Yohane 17:1-26
17 Yesu wie nibii nɛɛ, ni ehole ehiŋmɛii anɔ kɛtee ŋwɛi ni ekɛɛ: “Ataa, ŋmɛlɛtswaa lɛ eshɛ. Wo obi lɛ hiɛ nyam, koni obi lɛ hu awo ohiɛ nyam,
2 tamɔ bɔ ni ohã lɛ hegbɛ yɛ heloo* fɛɛ nɔ lɛ, koni lɛ hu ehã mɛi ni oŋɔhã lɛ lɛ fɛɛ naanɔ wala.
3 Enɛ ji naanɔ wala lɛ, akɛ amɛbaale bo,* anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ.
4 Miwo ohiɛ nyam yɛ shikpɔŋ lɛ nɔ ejaakɛ migbe nitsumɔ ni okɛhã mi akɛ mitsu lɛ naa.
5 No hewɔ lɛ, agbɛnɛ, Ataa, okɛ anunyam ni miyɔɔ yɛ omasɛi dani je lɛ yɔɔ lɛ awo mihiɛ nyam yɛ omasɛi.
6 “Mijie ogbɛ́i lɛ shi mitsɔɔ mɛi ni oŋɔ amɛ kɛjɛ je lɛ mli ohã mi lɛ.* Onii ji amɛ, ni oŋɔ amɛ ohã mi, ni amɛyeɔ owiemɔ lɛ nɔ.
7 Agbɛnɛ amɛná amɛle akɛ nibii ni oŋɔhã mi lɛ fɛɛ lɛ, oŋɔɔ ejɛ;
8 ejaakɛ wiemɔi ni oŋɔhã mi lɛ, miŋɔ mihã amɛ, ni amɛmɔ mli ni amɛná amɛle lɛɛlɛŋ akɛ miba akɛ onajiaŋdamɔlɔ, ni amɛheɔ amɛyeɔ akɛ bo otsu mi.
9 Miibi miihã amɛ; mibiii mihãaa je lɛ, shi moŋ kɛhã mɛi ni oŋɔhã mi lɛ, ejaakɛ onii ji amɛ;
10 ni minii fɛɛ lɛ, onɔ ni, ni bo hu onii lɛ, minɔ ni, ni awo mihiɛ nyam yɛ amɛteŋ.
11 “Mibɛ je lɛ mli dɔŋŋ, shi amɛ lɛ, amɛyɛ je lɛ mli, ni miiba oŋɔɔ. Ataa Krɔŋkrɔŋ, kwɛmɔ amɛnɔ yɛ bo diɛŋtsɛ ogbɛ́i ni oŋɔhã mi lɛ hewɔ, koni amɛfee ekome tamɔ bɔ ni wɔfee ekome lɛ.
12 Be ni mikɛ amɛ yɔɔ lɛ, mikwɛɔ amɛnɔ yɛ bo diɛŋtsɛ ogbɛ́i ni oŋɔhã mi lɛ hewɔ; ni mibu amɛhe, ni amɛteŋ mɔ kome folo po hiɛ kpãtãko akɛ ja hiɛkpatamɔ bi lɛ, koni ŋmalɛ lɛ aba mli.
13 Shi agbɛnɛ, miiba oŋɔɔ, ni miiwie nibii nɛɛ yɛ je lɛ mli, koni amɛná mimiishɛɛ lɛ yɛ amɛmli ni eyi amɛ obɔ.
14 Miŋɔ owiemɔ lɛ mihã amɛ, shi je lɛ nyɛɔ amɛ, ejaakɛ amɛfataaa je lɛ he, tamɔ bɔ ni mi hu mifataaa je lɛ he lɛ.
15 “Mibiii akɛ ojie amɛ kɛjɛ je lɛ mli, shi moŋ akɛ okwɛ amɛnɔ yɛ mɔ fɔŋ lɛ hewɔ.
16 Amɛfataaa je lɛ he, tamɔ bɔ ni mi hu mifataaa je lɛ he lɛ.
17 Okɛ anɔkwale lɛ atsuu amɛhe;* owiemɔ lɛ anɔkwale ni.
18 Tamɔ bɔ ni otsu mi je lɛ mli lɛ, nakai nɔŋŋ mi hu mitsu amɛ je lɛ mli.
19 Ni mi diɛŋtsɛ miitsuu mihe miihã amɛ, koni amɛ hu akɛ anɔkwale lɛ atsuu amɛhe.
20 “Mibiii mihãaa mɛnɛɛmɛi pɛ, shi moŋ kɛhã mɛi ni tsɔɔ amɛwiemɔ nɔ amɛnáa hemɔkɛyeli yɛ mimli lɛ hu,
21 koni amɛ fɛɛ amɛfee ekome, tamɔ bɔ ni bo, Ataa, okɛ mi efee ekome, ni mi hu mi kɛ bo efee ekome lɛ, koni amɛ hu amɛ kɛ wɔ afee ekome, koni je lɛ ahe aye akɛ bo otsu mi.
22 Miŋɔ anunyam ni oŋɔhã mi lɛ mihã amɛ, bɔ ni afee ni amɛfee ekome, tamɔ bɔ ni wɔ hu wɔfee ekome lɛ.
23 Mi kɛ amɛ efee ekome, ni okɛ mi efee ekome, bɔ ni afee ni amɛfee ekome kɛwula shi, koni je lɛ aná ale akɛ bo otsu mi, ni akɛ, osumɔɔ amɛ tamɔ bɔ ni osumɔɔ mi lɛ.
24 Ataa, miitao ni mɛi ni oŋɔhã mi lɛ hu kɛ mi ahi he ni miyɔɔ lɛ, koni amɛna minunyam ni oŋɔhã mi lɛ, ejaakɛ osumɔɔ mi dani ato je lɛ shishi.*
25 Ataa jalɔ, anɔkwa, je lɛ náko ale bo, shi mi lɛ, mile bo, ni mɛnɛɛmɛi hu ebaná amɛle akɛ bo otsu mi.
26 Mihã amɛle ogbɛ́i lɛ, ni masaa mafee nakai, koni suɔmɔ ni okɛsumɔ mi lɛ ahi amɛmli, ni mi hu mi kɛ amɛ afee ekome.”
Shishigbɛ Niŋmaa
^ Aloo “gbɔmɛi; mɛi.”
^ Aloo “amɛbaaya nɔ amɛná ohe nilee.”
^ Aloo “Mihã mɛi ni oŋɔ amɛ kɛjɛ je lɛ mli ohã mi lɛ ele ogbɛ́i lɛ.”
^ Aloo “asaa amɛ oto; afee amɛ krɔŋkrɔŋ.”
^ Sht. ŋm., “dani ashɛ (dumɔwu) afɔ̃ shi,” ni tsɔɔ akɛ, dani Adam kɛ Hawa bɔi amɛbii lɛ ahɔŋɔɔ.
