Yohane 19:1-42
19 Kɛkɛ ni Pilato ŋɔ Yesu ni ekɛ kpelebii yi lɛ.
2 Ni asraafoi lɛ lo ŋmeii akekere ni amɛkɛbu eyitso ni amɛwo lɛ atade afaseo yuu ko,
3 ni amɛbaa eŋɔɔ amɛbakɛɔ akɛ: “Wɔmiiŋa bo,* Yudafoi lɛ a-Maŋtsɛ!” Agbɛnɛ hu, amɛgbalagbalaa ehiɛ mai.
4 Pilato je kpo ekoŋŋ ni ekɛɛ amɛ akɛ: “Nyɛkwɛa! Mikɛ lɛ eje kpo kɛba nyɛŋɔɔ bɔ ni afee ni nyɛná nyɛle akɛ minaaa tɔmɔ ko yɛ ehe.”
5 No hewɔ lɛ, Yesu je kpo, ni ŋmeii akekere lɛ bu eyitso ni ewo atade afaseo yuu lɛ. Ni Pilato kɛɛ amɛ akɛ: “Naa! Gbɔmɔ lɛ!”
6 Shi be ni osɔfoi tsiifoi lɛ kɛ bulɔi lɛ na lɛ lɛ, amɛbolɔ amɛkɛɛ: “Gbee lɛ! Gbee lɛ!”* Pilato kɛɛ amɛ akɛ: “Nyɛ diɛŋtsɛ nyɛŋɔa lɛ ni nyɛyagbea lɛ,* ejaakɛ mi lɛ, minaaa tɔmɔ ko yɛ ehe.”
7 Yudafoi lɛ hã lɛ hetoo akɛ: “Wɔyɛ mla, ni yɛ mla lɛ naa lɛ esa akɛ egbo, ejaakɛ efee ehe Nyɔŋmɔ bi.”
8 Be ni Pilato nu nɔ ni amɛwieɔ lɛ, eshe gbeyei fe tsutsu lɛ,
9 ni esaa ebote amralo lɛ we lɛ ni ekɛɛ Yesu akɛ: “Nɛgbɛ ojɛ?” Shi Yesu efooo edaaŋ.
10 No hewɔ lɛ, Pilato kɛɛ lɛ akɛ: “Okɛ mi ewieee? Ani oleee akɛ miyɛ hegbɛ akɛ miŋmɛɔ ohe, ni miyɛ hegbɛ hu akɛ migbeɔ bo?”*
11 Yesu hã lɛ hetoo akɛ: “Onáŋ hegbɛ ko kwraa yɛ minɔ kɛjeee ŋwɛi ajɛ aŋɔhã bo. Enɛ hewɔ ni mɔ ni ŋɔ mi ewo odɛŋ lɛ he esha lɛ da fe onɔ lɛ.”
12 Enɛ hewɔ lɛ, Pilato tee nɔ etao gbɛ nɔ ni ebaatsɔ eŋmɛɛ ehe, shi Yudafoi lɛ bolɔ akɛ: “Kɛ́ oŋmɛɛ nuu nɛɛ he lɛ, jeee Kaisare naanyo ji bo. Mɔ fɛɛ mɔ ni feɔ ehe maŋtsɛ lɛ, eewie eeshi* Kaisare.”
13 Kɛkɛ ni be ni Pilato nu wiemɔi nɛɛ, ekɛ Yesu je kpo, ni eho eta kojomɔ sɛi ko nɔ yɛ he ko ni atsɛɔ jɛmɛ Shikpɔŋ ni Atswa Tɛi Awo Nɔ, shi yɛ Hebri mli lɛ, atsɛɔ lɛ Gabata lɛ.
14 Agbɛnɛ, Hesaamɔkɛtoo Gbi kɛhã Hehoo lɛ ni; aaafee ŋmɛlɛtswaa ni ji ekpaa lɛ nɔ.* Ni ekɛɛ Yudafoi lɛ akɛ: “Naa! Nyɛmaŋtsɛ lɛ!”
15 Shi amɛbolɔ akɛ: “Okɛ lɛ aya! Okɛ lɛ aya! Gbee lɛ!”* Pilato kɛɛ amɛ akɛ: “Ani migbe nyɛmaŋtsɛ lɛ?” Osɔfoi tsiifoi lɛ hã hetoo akɛ: “Wɔbɛ maŋtsɛ ko akɛ ja Kaisare.”
16 Kɛkɛ ni eŋɔ lɛ ehã amɛ koni amɛyagbe lɛ yɛ tso jaŋŋ nɔ.
No hewɔ lɛ, amɛŋɔ Yesu kɛtee.
17 Lɛ diɛŋtsɛ etere piŋmɔ tso* lɛ kɛje kpo kɛtee he ni atsɛɔ jɛmɛ Yitsoŋoŋohe, ní atsɛɔ lɛ yɛ Hebri mli akɛ Golgota lɛ.
18 Amɛkala lɛ amɛkpɛtɛ tso jaŋŋ lɛ he yɛ jɛmɛ, yɛ hii enyɔ krokomɛi amasɛi, mɔ kome yɛ biɛ ni mɔ kome hu yɛ biɛ, ni Yesu yɛ teŋ.
19 Pilato ŋma gbɛnaa gbɛ́i ko hu ni ekɛkpɛtɛ piŋmɔ tso* lɛ nɔ. Nɔ ni aŋma nɛ: “Yesu, Nazarenyo lɛ, Yudafoi lɛ a-Maŋtsɛ lɛ.”
20 Yudafoi lɛ ateŋ mɛi babaoo kane gbɛnaa gbɛ́i nɛɛ, ejaakɛ he ni akala Yesu akpɛtɛ tso jaŋŋ lɛ he yɛ lɛ bɛŋkɛ maŋ lɛ, ni aŋma yɛ Hebri, Latin, kɛ Hela wiemɔ mli.
21 Shi Yudafoi lɛ asɔfoi tsiifoi lɛ kɛɛ Pilato akɛ: “Kaaŋma akɛ, ‘Yudafoi lɛ a-Maŋtsɛ lɛ,’ shi moŋ akɛ lɛ ekɛɛ akɛ, ‘Miji Yudafoi lɛ a-Maŋtsɛ lɛ.’”
22 Pilato hã hetoo akɛ: “Nɔ ni miŋma lɛ, miŋma.”
23 Agbɛnɛ, be ni asraafoi lɛ kala Yesu amɛkpɛtɛ tso jaŋŋ lɛ he lɛ, amɛkɔlɔ etadei anɔhaanɔi lɛ ni amɛjara mli ejwɛ, ni asraafoi lɛ ateŋ mɔ fɛɛ mɔ kɔ ekome, ni amɛkɔ etade ni ewoɔ yɛ etade shishi lɛ hu. Shi etade ni ewoɔ yɛ etade shishi lɛ bɛ tsamɔhe, ejaakɛ alo kɛjɛ ŋwɛi kɛyi shi.
24 No hewɔ lɛ, amɛkɛɛkɛɛ amɛhe akɛ: “Nyɛkahãa wɔgbalaa no mli, shi moŋ nyɛhãa wɔfɔ̃a nɔ oshiki kɛna mɔ nɔ ní ebaatsɔ.” Enɛ ba lɛ nakai koni ŋmalɛ lɛ aba mli akɛ: “Amɛjara mitadei lɛ amɛhã amɛhe, ni amɛfɔ̃ mitadei lɛ anɔ oshiki.” No hewɔ lɛ, asraafoi lɛ fee nibii nɛɛ lɛɛlɛŋ.
25 Shi no mli lɛ, Yesu nyɛ kɛ enyɛ nyɛmi yoo damɔ Yesu piŋmɔ tso* lɛ he; Maria ni ji Klopa ŋa lɛ kɛ Maria Magdalena.
26 No hewɔ lɛ, be ni Yesu na enyɛ kɛ kaselɔ ni esumɔɔ lɛ lɛ damɔ jɛmɛ lɛ, ekɛɛ enyɛ akɛ: “Yoo, naa! Obinuu!”
27 No sɛɛ lɛ, ekɛɛ kaselɔ lɛ akɛ: “Naa! Onyɛ!” Ni kɛjɛ nakai ŋmɛlɛtswaa lɛ nɔ kɛyaa lɛ, kaselɔ lɛ ŋɔ lɛ kɛtee lɛ diɛŋtsɛ eshĩa.
28 Enɛ sɛɛ lɛ, be ni Yesu ná le akɛ kɛbashi bianɛ lɛ agbe nibii fɛɛ naa lɛ, bɔ ni afee ni ŋmalɛ lɛ aba mli lɛ, ekɛɛ akɛ: “Kumai miiye mi.”
29 No mli lɛ, kpulu ko ma jɛmɛ ni wein ni joɔ eyi lɛ obɔ. No hewɔ lɛ, amɛkɛ kotsa ni wein ni joɔ eyi lɛ obɔ ma hisopo* tso naa ni amɛwó nɔ kɛto enaa.
30 Be ni Yesu he wein ni joɔ lɛ, ekɛɛ akɛ: “Agbe naa!” ni ema eyi shi, ni eŋɔ emumɔ ehã.*
31 Akɛni Hesaamɔkɛtoo Gbi ni hewɔ lɛ, Yudafoi lɛ bi Pilato koni ehã akumɔ amɛnaji ni ajie gbohii lɛ kɛya, koni gbohii lɛ akahi piŋmɔ tsei lɛ anɔ yɛ Hejɔɔmɔ Gbi lɛ nɔ, (ejaakɛ nakai Hejɔɔmɔ Gbi lɛ, Hejɔɔmɔ Gbi wulu ni).
32 No hewɔ lɛ, asraafoi lɛ ba, ni amɛbakumɔ mɛi ni yɔɔ tsei jaŋŋi anɔ yɛ emasɛi lɛ anaji, klɛŋklɛŋ mɔ lɛ kɛ mɔ kroko lɛ fɛɛ.
33 Shi be ni amɛshɛ Yesu nɔ lɛ, amɛna akɛ egbo momo, no hewɔ lɛ, amɛkumɔɔɔ enaji.
34 Shi asraafoi lɛ ateŋ mɔ kome kɛ akplɔ tsu eŋmawuiaŋ, ni amrɔ lɛ lá kɛ nu jɛ mli ho.
35 Ni mɔ ni na lɛ, lɛ eye he odase nɛɛ, ni edase lɛ, anɔkwale ni, ni ele akɛ nɔ ni ewieɔ lɛ anɔkwale ni, koni nyɛ hu nyɛhe nyɛye.
36 Anɔkwa, nibii nɛɛ ba koni ŋmalɛ lɛ aba mli akɛ: “Akuŋ* ewu ko.”
37 Ni asaŋ ŋmalɛ kroko hu kɛɛ akɛ: “Amɛbaakwɛ mɔ ni amɛtsu lɛ nɔ lɛ.”
38 Agbɛnɛ, nibii nɛɛ asɛɛ lɛ, Yosef ni jɛ Arimatia, ni ji Yesu kaselɔ, shi Yudafoi lɛ agbeyeishemɔ hewɔ lɛ, ejieee ehe shi lɛ yabi Pilato kɛji ebaanyɛ eŋɔ Yesu gbonyo lɛ kɛya, ni Pilato ŋmɛ lɛ gbɛ. No hewɔ lɛ, eba ebaŋɔ gbonyo lɛ kɛtee.
39 Nikodemo, mɔ ni tsutsu ko lɛ eba Yesu ŋɔɔ nyɔɔŋ lɛ hu ba, ni ekɛ mire kɛ aloe ni afutu* aaafee nsɛnii tɛi oha* ba.
40 No hewɔ lɛ, amɛŋɔ Yesu gbonyo lɛ, ni amɛkɛ klalai ni tsofai ni jeɔ ŋma lɛ yɔɔ mli lɛ bala lɛ, taakɛ Yudafoi lɛ feɔ fuɔ mɔ yɛ kusum naa lɛ.
41 Shi he ni agbe lɛ* yɛ lɛ, abɔɔ ko yɛ jɛmɛ, ni gbonyo bu* hee ko ni akɛ mɔ ko eŋmɛko mli dã yɛ abɔɔ lɛ mli.
42 Akɛni Yudafoi lɛ a-Hesaamɔkɛtoo gbi ni, ni gbonyo bu lɛ bɛŋkɛ hewɔ lɛ, amɛkɛ Yesu yaŋmɛ jɛmɛ.
Shishigbɛ Niŋmaa
^ Aloo “Yijiemɔ ahã bo.”
^ Aloo “Gbee lɛ yɛ tso jaŋŋ lɛ nɔ! Gbee lɛ yɛ tso jaŋŋ lɛ nɔ!”
^ Aloo “nyɛyagbea lɛ yɛ tso jaŋŋ lɛ nɔ.”
^ Aloo “migbeɔ bo yɛ tso jaŋŋ lɛ nɔ.”
^ Aloo “eete shi eewo.”
^ Ni tsɔɔ akɛ, aaafee shwane ŋmɛlɛ 12.
^ Aloo “Gbee lɛ yɛ tso jaŋŋ lɛ nɔ!”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Aloo “ni egbo.”
^ Aloo “Ajwaraŋ.”
^ Aloo eeenyɛ efee akɛ, “ni afi.”
^ Ni tsɔɔ akɛ, Roma nsɛnii tɛi. Aaafee kg 32.7.
^ Aloo “agbe lɛ yɛ tso jaŋŋ lɛ nɔ.”
^ Aloo “gbonyo kaimɔ bu.”
