Yohane 2:1-25
2 Ni gbi ni ji gbi etɛ lɛ nɔ lɛ, aŋmɛ yookpeemɔ he okpɔlɔ ko yɛ Kana ni yɔɔ Galilea lɛ, ni Yesu nyɛ yɛ jɛmɛ.
2 Afɔ̃ Yesu kɛ ekaselɔi lɛ hu nine kɛtee yookpeemɔ he okpɔlɔŋmɛɛ lɛ shishi.
3 Be ni wein lɛ miihe atã lɛ, Yesu nyɛ kɛɛ lɛ akɛ: “Amɛbɛ wein.”
4 Shi Yesu kɛɛ lɛ akɛ: “Yoo, mɛni no kɔɔ yɛ mihe kɛ bo hu ohe?* Miŋmɛlɛtswaa lɛ shɛko.”
5 Enyɛ kɛɛ mɛi ni sɔmɔɔ lɛ akɛ: “Nɔ fɛɛ nɔ ni ebaakɛɛ nyɛ lɛ, nyɛfea.”
6 No mli lɛ, nugbɛ́i ekpaa ni akɛ tɛ fee mamɔ jɛmɛ taakɛ Yudafoi lɛ ahetsuumɔ mlai lɛ biɔ lɛ, ni eko fɛɛ eko yeɔ nu susumɔnii enyɔ loo etɛ.*
7 Yesu kɛɛ amɛ akɛ: “Nyɛwoa gbɛ́i lɛ amli nu obɔbɔ.” No hewɔ lɛ, amɛwo amɛ obɔbɔɔbɔ.
8 Ni ekɛɛ amɛ akɛ: “Agbɛnɛ, nyɛyɛa eko ni nyɛkɛyahãa okpɔlɔŋmɛɛ lɛ nɔkwɛlɔ lɛ.” Ni amɛkɛtee.
9 Be ni okpɔlɔŋmɛɛ lɛ nɔkwɛlɔ lɛ sa nu ni amrɔ nɛɛ ahã etsɔ wein lɛ naa ní eleee he ni ejɛ (shi tsuji ní yɛ nu lɛ le) lɛ, okpɔlɔŋmɛɛ lɛ nɔkwɛlɔ lɛ tsɛ ayemforo wu lɛ
10 ni ekɛɛ lɛ akɛ: “Mɔ fɛɛ mɔ kɛ wein kpakpa lɛ maa shi klɛŋklɛŋ, ni be ni mɛi lɛ etɔrɔ lɛ, ekɛ nɔ ni eŋɔɔɔ lɛ baa. Bo lɛ, okɛ wein kpakpa lɛ eto kɛbashi amrɔ nɛɛ.”
11 Yesu fee enɛ yɛ Kana ni yɔɔ Galilea lɛ kɛje ekadii lɛ ashishi, ni ehã enunyam lɛ fee faŋŋ, ni ekaselɔi lɛ ná hemɔkɛyeli yɛ emli.
12 Enɛ sɛɛ lɛ, ekɛ enyɛ kɛ enyɛmimɛi hii lɛ kɛ ekaselɔi lɛ kpeleke shi kɛtee Kapernaum, shi amɛyeee gbii pii yɛ jɛmɛ.
13 Agbɛnɛ, Yudafoi lɛ a-Hehoo lɛ miihe ashɛ, ni Yesu kwɔ kɛtee Yerusalem.
14 Eyana mɛi ni hɔ̃ɔ tsinai kɛ gwantɛŋi kɛ okpoi, kɛ shika tsakelɔi lɛ tara shi yɛ sɔlemɔwe lɛ.
15 No hewɔ lɛ, be ni ekɛ kpãi efee kpelebii lɛ, eshwie amɛ fɛɛ kɛ amɛgwantɛŋi kɛ amɛtsinai lɛ kɛje sɔlemɔwe lɛ, ni etsɔ shika tsakelɔi lɛ ashika lɛ eshwie shi ni etsirɛ amɛkpɔlɔi lɛ etswiatswiaa shi.
16 Ni ekɛɛ mɛi ni hɔ̃ɔ okpoi lɛ akɛ: “Nyɛjiea nibii nɛɛ kɛjea biɛ! Nyɛkɛ mi-Tsɛ we lɛ akpaa jarayeli we* feemɔ!”
17 Ekaselɔi lɛ kai akɛ aŋma akɛ: “Owe lɛ he hiɛdɔɔ lɛ baaye mi.”
18 No hewɔ lɛ, Yudafoi lɛ here lɛ nɔ akɛ: “Akɛni oofee nibii nɛɛ hewɔ lɛ, mɛɛ okadi okɛbaatsɔɔ wɔ?”
19 Yesu hã amɛ hetoo ekɛɛ: “Nyɛkumɔa sɔlemɔwe nɛɛ, ni gbii etɛ mli lɛ mawó nɔ mama shi.”
20 Kɛkɛ ni Yudafoi lɛ kɛɛ: “Afii nyɔŋmai ejwɛ kɛ ekpaa akɛma sɔlemɔwe nɛɛ, ni bo lɛ, okɛ gbii etɛ baawó nɔ oma shi?”
21 Shi no mli lɛ eewie egbɔmɔtso sɔlemɔwe lɛ he.
22 Shi be ni atee lɛ shi kɛjɛ gbohii ateŋ lɛ, ekaselɔi lɛ kai akɛ no mli lɛ efɔɔ enɛ kɛɛmɔ, ni amɛhe ŋmalɛ lɛ kɛ nɔ ni Yesu wie lɛ amɛye.
23 Shi be ni eyɔɔ Yerusalem, yɛ Hehoo Gbijurɔyeli lɛ mli lɛ, mɛi babaoo na okadii ni efeɔ lɛ, ni amɛná hemɔkɛyeli yɛ egbɛ́i lɛ mli.
24 Shi Yesu lɛ, emuuu efɔ̃ɔɔ amɛnɔ ejaakɛ ele amɛ fɛɛ
25 ni ehiaaa lɛ akɛ mɔ ko aye gbɔmɔ ko he odase ahã lɛ, ejaakɛ ele nɔ ni yɔɔ gbɔmɔ mli.
Shishigbɛ Niŋmaa
^ Sht. ŋm., “Mɛni kɛhã mi kɛ kɛhã bo, yoo?” Eji fɔŋwiemɔ ní akɛkuɔ mɔ naa kɛtsɔɔ akɛ akpɛlɛɛɛ nɔ ko nɔ. Wiemɔ ni ji “yoo” ni ekɛtsu nii lɛ etsɔɔɔ akɛ ebuuu enyɛ lɛ.
^ Eeenyɛ efee akɛ nu susumɔnɔ lɛ ji bati, ni bati kome feɔ L 22 (gal 5.81).
^ Aloo “jara nɔ; guɔyeli we.”
