Yohane 20:1-31
20 Otsi lɛ klɛŋklɛŋ gbi lɛ nɔ lɛ, Maria Magdalena ba gbonyo bu* lɛ naa mra mli, be ni duŋ ewo lolo, ni ena akɛ ajie tɛ lɛ yɛ gbonyo bu* lɛ naa momo.
2 No hewɔ lɛ, ejo foi ni eba Simon Petro kɛ kaselɔ kroko lɛ, mɔ ni Yesu dɔɔ ehe lɛ ŋɔɔ, ni ekɛɛ amɛ akɛ: “Amɛjie Nuŋtsɔ lɛ kɛje gbonyo bu lɛ mli, ni wɔleee he ni amɛkɛ lɛ eyaŋmɛ.”
3 Kɛkɛ ni Petro kɛ kaselɔ kroko lɛ yi mli akɛ amɛmiiya gbonyo bu lɛ he.
4 Amɛyi enyɔ lɛ fɛɛ bɔi foijee, shi kaselɔ kroko lɛ he fee oya fe Petro ni eyashɛ gbonyo bu lɛ he klɛŋklɛŋ.
5 Be ni edɔ emli ekwɛ mli lɛ, ena klalai lɛ jwere jɛmɛ, shi eboteee mli.
6 Kɛkɛ ni Simon Petro hu nyiɛ esɛɛ kɛba, ni ebabote gbonyo bu lɛ mli. Ni ena klalai lɛ jwere jɛmɛ.
7 Mama ni akɛfi eyitso lɛ kãaa mamai krokomɛi ni akɛbala lɛ lɛ amasɛi, shi moŋ akota ni ekã he kroko banee.
8 Kɛkɛ ni kaselɔ kroko ni shɛ gbonyo bu lɛ he klɛŋklɛŋ lɛ hu bote mli, ni ena ni ehe eye.
9 Shi amɛnáko amɛnu ŋmalɛ lɛ shishi akɛ esa akɛ ete shi kɛjɛ gbohii ateŋ.
10 No hewɔ lɛ, kaselɔi lɛ ku amɛsɛɛ kɛtee amɛshĩai.
11 Shi Maria tee nɔ edamɔ gbonyo bu lɛ masɛi, ni eefo. Be ni efoɔ lɛ, edɔ emli ekwɛ gbonyo bu lɛ mli,
12 ni ena ŋwɛibɔfoi enyɔ ni wo nii yɛji tara shi yɛ he ni akɛ Yesu gbonyo lɛ ŋmɛ lɛ, mɔ kome yɛ yitsogbɛ, ni mɔ kome hu yɛ najiashigbɛ.
13 Ni amɛkɛɛ lɛ akɛ: “Yoo, mɛni hewɔ ofoɔ?” Ekɛɛ amɛ akɛ: “Amɛjie mi-Nuŋtsɔ lɛ kɛtee, ni mileee he ni amɛkɛ lɛ eyaŋmɛ.”
14 Be ni ewie enɛ lɛ, etsɔ ehe ni ena Yesu damɔ shi, shi eyɔseee akɛ Yesu ni.
15 Yesu kɛɛ lɛ akɛ: “Yoo, mɛni hewɔ ofoɔ? Namɔ otaoɔ?” Shi lɛ lɛ, esusu akɛ abɔɔ nɔkwɛlɔ lɛ ni, ni ekɛɛ lɛ akɛ: “Onukpa, kɛ́ bo owó lɛ kɛtee lɛ, kɛɛmɔ mi he ni okɛ lɛ eyaŋmɛ, ni mayawó lɛ kɛya.”
16 Yesu kɛɛ lɛ akɛ: “Maria!” Be ni etsɔ ehe lɛ, ekɛɛ lɛ yɛ Hebri mli akɛ: “Rabuni!” (eshishi ji “Tsɔɔlɔ!”)
17 Yesu kɛɛ lɛ akɛ: “Kpa mimli mɔmɔ, ejaakɛ mináko makwɔ kɛya Tsɛ lɛ ŋɔɔ. Shi yaa minyɛmimɛi lɛ aŋɔɔ ni oyakɛɛ amɛ akɛ, ‘Miikwɔ kɛmiiya mi-Tsɛ kɛ nyɛ hu nyɛ-Tsɛ, kɛ mi-Nyɔŋmɔ kɛ nyɛ hu nyɛ-Nyɔŋmɔ lɛ ŋɔɔ.’”
18 Maria Magdalena ba ni ebabɔ kaselɔi lɛ amaniɛ akɛ: “Mina Nuŋtsɔ lɛ!” Ni ekɛɛ amɛ nɔ ni Yesu kɛɛ lɛ lɛ.
19 Agbɛnɛ nakai gbi lɛ, ni ji otsi lɛ klɛŋklɛŋ gbi lɛ, gbɛkɛ, be ni Yudafoi lɛ agbeyeishemɔ hewɔ lɛ aŋamɔ he ni kaselɔi lɛ yɔɔ lɛ shinai lɛ, Yesu ba ni ebadamɔ amɛteŋ ni ekɛɛ amɛ akɛ: “Toiŋjɔlɛ ahã nyɛ.”
20 Be ni ewie enɛ lɛ, ekɛ eniji kɛ eŋmawuiaŋ tsɔɔ amɛ. Kɛkɛ ni kaselɔi lɛ ná miishɛɛ naakpa akɛ amɛna Nuŋtsɔ lɛ.
21 Yesu saa ekɛɛ amɛ akɛ: “Toiŋjɔlɛ ahã nyɛ. Tamɔ bɔ ni Tsɛ lɛ tsu mi lɛ, nakai nɔŋŋ mi hu mitsuɔ nyɛ nɛɛ.”
22 Be ni ewie enɛ lɛ ehuu kɔɔyɔɔ eshwie amɛnɔ ni ekɛɛ amɛ akɛ: “Nyɛhea mumɔ krɔŋkrɔŋ.
23 Kɛ́ nyɛkɛ mɛi ahe eshai fa amɛ lɛ, akɛfa amɛ; kɛ́ nyɛkɛ mɛi anɔ efaaa amɛ lɛ, akɛfako amɛ.”
24 Shi no mli lɛ, Toma, Mɛi Nyɔŋma kɛ Enyɔ lɛ ateŋ mɔ kome ni atsɛɔ lɛ Hãaji lɛ, fataaa amɛhe be ni Yesu ba lɛ.
25 No hewɔ lɛ, kaselɔi krokomɛi lɛ kɛɛ lɛ akɛ: “Wɔna Nuŋtsɔ lɛ!” Shi ekɛɛ amɛ akɛ: “Kɛ́ minaaa plɛkoobii lɛ anajiaŋ* yɛ edɛŋ ni mikɛ miwao wooo plɛkoobii lɛ anajiaŋ, ni mikɛ minine wooo eŋmawuiaŋ lɛ, miheŋ miyeŋ kɔkɔɔkɔ.”
26 Enɔ gbii kpaanyɔ sɛɛ lɛ, ekaselɔi lɛ yɛ tsũ mli ekoŋŋ, ni Toma fata amɛhe. Eyɛ mli akɛ aŋamɔ shinai lɛ moŋ, shi Yesu ba, ni ebadamɔ amɛteŋ ni ekɛɛ: “Toiŋjɔlɛ ahã nyɛ.”
27 No sɛɛ lɛ, ekɛɛ Toma akɛ: “Okɛ owao awo biɛ, ni okwɛ midɛ̃, ni oŋɔ onine owo miŋmawuiaŋ, ni okpa ŋwanejee lɛ,* shi moŋ ohe oye.”
28 Toma hã lɛ hetoo akɛ: “Mi-Nuŋtsɔ kɛ mi-Nyɔŋmɔ!”
29 Yesu kɛɛ lɛ akɛ: “Ni ona mi hewɔ lɛ, ohe oye? Mɛi ni enaaa ni kɛ̃lɛ amɛheɔ amɛyeɔ lɛ yɛ miishɛɛ.”
30 Anɔkwa, Yesu fee okadii krokomɛi babaoo hu yɛ kaselɔi lɛ ahiɛ, ni aŋmalako ashwieko shi yɛ wolokpo* nɛɛ mli.
31 Shi aŋmala enɛɛmɛi ashwie shi koni nyɛhe nyɛye akɛ Yesu ji Kristo lɛ, Nyɔŋmɔ Bi lɛ, ni akɛni nyɛheɔ nyɛyeɔ hewɔ lɛ, nyɛbaatsɔ egbɛ́i lɛ nɔ nyɛná wala.
Shishigbɛ Niŋmaa
^ Aloo “gbonyo kaimɔ bu.”
^ Aloo “gbonyo kaimɔ bu.”
^ Aloo “plɛkoobii lɛ anaa.”
^ Sht. ŋm., “ni okpa he ni oheee oyeee lɛ.”
^ Wolo kakadaŋŋ ni akotaa awoɔ tso he.
