Yohane 21:1-25
21 Enɛ sɛɛ lɛ, Yesu jie ehe kpo ekoŋŋ etsɔɔ kaselɔi lɛ yɛ Tiberia Ŋshɔ* lɛ naa. Bɔ ni ejie ehe kpo etsɔɔ amɛ nɛ.
2 No mli lɛ, Simon Petro, Toma (mɔ ni atsɛɔ lɛ Hãaji lɛ), Natanael ni jɛ Kana yɛ Galilea lɛ, Zebedeo bihii lɛ, kɛ ekaselɔi lɛ ateŋ mɛi enyɔ krokomɛi yɛ he kome kutuu.
3 Simon Petro kɛɛ amɛ akɛ: “Miiya wuo.” Amɛkɛɛ lɛ akɛ: “Wɔ hu wɔkɛ bo miiya.” Ni amɛje kpo amɛyakwɔ lɛlɛ lɛ, shi nakai nyɔɔŋ lɛ mli lɛ, amɛgbeee nɔ ko.
4 Shi be ni je miihe atsɛre lɛ, Yesu badamɔ ŋshɔ lɛ naa, shi kaselɔi lɛ yɔseee akɛ Yesu ni.
5 Kɛkɛ ni Yesu kɛɛ amɛ akɛ: “Bii, ani nyɛyɛ nɔ ko* ni nyɛbaaye?” Amɛhã hetoo akɛ: “Dabi!”
6 Ekɛɛ amɛ akɛ: “Nyɛfɔ̃a yaa lɛ yɛ lɛlɛ lɛ ninejurɔgbɛ ni nyɛbaaná nɔ ko.” No hewɔ lɛ, amɛfɔ̃ yaa lɛ, shi loi lɛ afalɛ hewɔ lɛ, amɛnyɛɛɛ yaa lɛ amɛgbala.
7 Kɛkɛ ni kaselɔ ni Yesu sumɔɔ lɛ lɛ kɛɛ Petro akɛ: “Nuŋtsɔ lɛ ni!” Agbɛnɛ, be ni Simon Petro nu akɛ Nuŋtsɔ lɛ ni lɛ, ekɔ etade nɔhaanɔ lɛ ewo,* ejaakɛ ehiɛ ehe yayai,* ni etu egbee ŋshɔ lɛ mli.
8 Shi kaselɔi krokomɛi lɛ kɛ lɛlɛ bibioo lɛ ba, ni amɛmiigbala yaa ni loi eyi lɛ obɔ lɛ, ejaakɛ amɛkɛ shikpɔŋ jekɛɛɛ, aaafee mitai nyɔŋmai nɛɛhu* pɛ.
9 Be ni amɛkpeleke lɛ, amɛna ŋai ni akɛshɛre la ni loi jwere nɔ, kɛ aboloo.
10 Yesu kɛɛ amɛ akɛ: “Nyɛkɛ loi ni nyɛgbe bianɛ lɛ eko abaa.”
11 No hewɔ lɛ, Simon Petro tee lɛlɛ lɛ mli ni eyagbala yaa lɛ ni loi agboi oha kɛ nyɔŋmai enumɔ kɛ etɛ eyi mli obɔ lɛ kɛba ŋshɔ lɛ naa. Ni eyɛ mli akɛ loi lɛ fa moŋ shi yaa lɛ gbalaaa.
12 Yesu kɛɛ amɛ akɛ: “Nyɛbaa, nyɛbayea nii.” Kaselɔi lɛ ateŋ mɔ kome po náaa ekãa kɛbi lɛ akɛ: “Namɔ ji bo?” ejaakɛ amɛle akɛ Nuŋtsɔ lɛ ni.
13 Yesu ba ni ebakɔ aboloo lɛ ni ekɛhã amɛ, ni ekɛ loi lɛ hu hã amɛ.
14 Enɛ ji shii etɛ nɔ ni Yesu jie ehe kpo etsɔɔ kaselɔi lɛ kɛjɛ be ni atee lɛ shi kɛjɛ gbohii ateŋ lɛ.
15 Be ni amɛye nii lɛ amɛtã lɛ, Yesu kɛɛ Simon Petro akɛ: “Simon, Yohane bi, ani osumɔɔ mi fe enɛɛmɛi?” Ehere lɛ nɔ akɛ: “Hɛɛ, Nuŋtsɔ, ole akɛ midɔɔ ohe.” Ekɛɛ lɛ akɛ: “Lɛɛ migwantɛŋbii lɛ.”
16 Esaa ekɛɛ lɛ nɔ ni ji shii enyɔ nɔ akɛ: “Simon, Yohane bi, ani osumɔɔ mi?” Ehere lɛ nɔ akɛ: “Hɛɛ, Nuŋtsɔ, ole akɛ midɔɔ ohe.” Ekɛɛ lɛ akɛ: “Kwɛmɔ migwantɛŋi bibii lɛ tamɔ tookwɛlɔ feɔ lɛ.”
17 Ekɛɛ lɛ nɔ ni ji shii etɛ nɔ akɛ: “Simon, Yohane bi, ani odɔɔ mihe?” Petro werɛ ho ehe akɛ ebi lɛ shii etɛ sɔŋŋ akɛ: “Ani odɔɔ mihe?” No hewɔ lɛ ekɛɛ lɛ akɛ: “Nuŋtsɔ, ole nibii fɛɛ; ole akɛ midɔɔ ohe.” Yesu kɛɛ lɛ akɛ: “Lɛɛ migwantɛŋi bibii lɛ.
18 Lɛɛlɛŋ, lɛɛlɛŋ, miikɛɛ bo akɛ, be ni oji oblanyo lɛ, bo diɛŋtsɛ owoɔ otade ni onyiɛɔ kɛyaa he ni osumɔɔ. Shi kɛ́ ogbɔ lɛ obaakpã oniji amli ni mɔ kroko baawo bo atade ni ebaahiɛ omli kɛya he ni osumɔɔɔ.”
19 Ewie enɛ kɛtsɔɔ nɔ gbele ni ekɛbaawo Nyɔŋmɔ hiɛ nyam lɛ. Be ni ewie enɛ sɛɛ lɛ, ekɛɛ lɛ akɛ: “Yaa nɔ onyiɛ misɛɛ.”
20 Petro tsɔ ehe ni ena kaselɔ ni Yesu sumɔɔ lɛ lɛ nyiɛ amɛsɛɛ, mɔ ni be ni ayeɔ gbɛkɛ niyenii lɛ eho ekpasa Yesu tsitsi ni ekɛɛ lɛ akɛ: “Nuŋtsɔ, namɔ ji mɔ ni jieɔ bo ehãa lɛ?”
21 No hewɔ lɛ, be ni Petro hiŋmɛi gba enɔ lɛ, ekɛɛ Yesu akɛ: “Nuŋtsɔ, shi mɔ nɛ hu?”
22 Yesu kɛɛ lɛ akɛ: “Kɛ́ miisumɔ akɛ ehi shi kɛyashi maba lɛ, mɛni no kɔɔ yɛ ohe? Bo lɛ yaa nɔ onyiɛ misɛɛ.”
23 No hewɔ lɛ, nyɛmimɛi lɛ wiewiee yɛ amɛteŋ akɛ kaselɔ nɛɛ gboŋ. Shi Yesu ekɛɛɛ lɛ akɛ egboŋ, shi moŋ akɛ: “Kɛ́ miisumɔ akɛ ehi shi kɛyashi maba lɛ, mɛni no kɔɔ yɛ ohe?”
24 Mɔ nɛ ji kaselɔ ni yeɔ nibii nɛɛ ahe odase lɛ kɛ mɔ ni ŋma nibii nɛɛ, ni wɔle akɛ odase ni eyeɔ lɛ anɔkwale ni.
25 Yɛ anɔkwale mli lɛ, nibii krokomɛi babaoo hu yɛ ni Yesu fee ni eji aŋmala fɛɛ fitsofitso kulɛ, misusuɔ akɛ, je lɛ diɛŋtsɛ nyɛŋ wolokpoi* ni abaaŋmala lɛ ato.
Shishigbɛ Niŋmaa
^ Aloo “loo ko.”
^ Aloo “ekɛŋmɔ ehɛ.”
^ Aloo “ewo nɔ ko hatahata ko.”
^ Sht. ŋm., “aaafee ninetalɔi 200.”
^ Woji kakadaji ni akotaa awoɔ tso he.
