Yohane 5:1-47
5 Enɛ sɛɛ lɛ, Yudafoi lɛ agbi jurɔ ko bashɛ, ni Yesu kwɔ kɛtee Yerusalem.
2 Agbɛnɛ kpaakpo ko yɛ Yerusalem Gwantɛŋi Agbó lɛ masɛi ni atsɛɔ lɛ yɛ Hebri mli akɛ Betesda, ni eyɛ koii enumɔ.
3 Mɛi pii ni ji helatsɛmɛi, shwilafoi, akpakei, kɛ mɛi ni niji kɛ naji egbogboi kamɔ koii nɛɛ ashishi.
4 ——
5 Shi nuu ko yɛ jɛmɛ ní hela ehao lɛ afii nyɔŋmai etɛ kɛ kpaanyɔ.
6 Be ni Yesu na nuu nɛɛ kã jɛmɛ, ní ele akɛ hela ehao lɛ be kplaŋŋ lɛ, ekɛɛ nuu lɛ akɛ: “Oosumɔ ni ohe awa bo?”
7 Helatsɛ lɛ hã lɛ hetoo akɛ: “Onukpa, mibɛ mɔ ko ni kɛ́ ata nu lɛ mli lɛ, ebaawó mi ewo mli, shi kɛ́ miiba lɛ, mɔ kroko tsɔɔ mihiɛ ebagbeɔ mli.”
8 Yesu kɛɛ lɛ akɛ: “Tee shi! Wó osaa lɛ ni onyiɛ.”
9 Ni amrɔ lɛ, nuu lɛ he wa lɛ, ni ewó esaa lɛ ni ebɔi nyiɛmɔ.
Nakai gbi lɛ Hejɔɔmɔ Gbi ni.
10 No hewɔ lɛ, Yudafoi lɛ bɔi nuu ni atsa lɛ lɛ kɛɛmɔ akɛ: “Hejɔɔmɔ Gbi nɛ, ni mla eŋmɛɛɛ gbɛ akɛ owóɔ saa lɛ.”
11 Shi ehã amɛ hetoo akɛ: “Mɔ tuuntu ni hã mihe wa mi lɛ kɛɛ mi akɛ, ‘Wó osaa lɛ ni onyiɛ.’”
12 Amɛbi lɛ akɛ: “Namɔ ji mɔ ni kɛɛ bo akɛ, ‘Wó osaa lɛ ni onyiɛ’ lɛ?”
13 Shi nuu ni atsa lɛ lɛ leee mɔ ni ji, ejaakɛ Yesu ebote asafoku ni yɔɔ jɛmɛ lɛ ateŋ.
14 Enɛ sɛɛ lɛ, Yesu na lɛ yɛ sɔlemɔwe lɛ ni ekɛɛ lɛ akɛ: “Naa, ohe ewa bo. Kaafee esha dɔŋŋ, koni nɔ ko ni fe tsutsu nɔ lɛ akaba onɔ.”
15 Nuu lɛ yiŋ etee ni eyakɛɛ Yudafoi lɛ akɛ Yesu ji mɔ ni hã ehe wa lɛ lɛ.
16 Enɛ hewɔ lɛ, Yudafoi lɛ bɔi Yesu haomɔ ejaakɛ eefee nibii nɛɛ yɛ Hejɔɔmɔ Gbi lɛ nɔ.
17 Shi ehã amɛ hetoo akɛ: “Mi-Tsɛ kã he eetsu nii kɛbashi amrɔ nɛɛ, ni mi hu mikã he miitsu nii.”
18 Enɛ hewɔ ni Yudafoi lɛ je shishi amɛtao lɛ amɛgbe fe tsutsu lɛ, ejaakɛ jeee Hejɔɔmɔ Gbi lɛ kɛkɛ ebuleɔ, shi moŋ eetsɛ Nyɔŋmɔ akɛ lɛ diɛŋtsɛ e-Tsɛ, eetsɔɔ akɛ ekɛ Nyɔŋmɔ yeɔ egbɔ.
19 No hewɔ lɛ, Yesu here nɔ ekɛɛ amɛ akɛ: “Lɛɛlɛŋ, lɛɛlɛŋ, miikɛɛ nyɛ akɛ, Bi lɛ diɛŋtsɛ nyɛŋ eto eyiŋ efee nɔ ko, ja nɔ ni enaa akɛ Tsɛ lɛ feɔ lɛ. Ejaakɛ nibii fɛɛ ni nakai mɔ lɛ feɔ lɛ, nomɛi nɔŋŋ Bi lɛ hu feɔ.
20 Ejaakɛ Tsɛ lɛ dɔɔ Bi lɛ he ni etsɔɔ lɛ nibii fɛɛ ni lɛ diɛŋtsɛ efeɔ lɛ, ni ebaatsɔɔ lɛ nitsumɔi wuji fe enɛɛmɛi tete, koni nyɛnaa akpɛ nyɛhe.
21 Ejaakɛ bɔ ni Tsɛ lɛ teɔ gbohii ashi ni ehãa amɛ wala lɛ, nakai nɔŋŋ Bi lɛ hu ŋɔɔ wala ehãa mɔ fɛɛ mɔ ni esumɔɔ akɛ ehã lɛ lɛ.
22 Ejaakɛ Tsɛ lɛ ekojooo mɔ ko mɔ ko, shi moŋ etu kojomɔ lɛ fɛɛ ewo Bi lɛ dɛŋ,
23 koni mɛi fɛɛ kɛ woo ahã Bi lɛ tamɔ bɔ ni amɛkɛ woo hãa Tsɛ lɛ. Mɔ fɛɛ mɔ ni kɛ woo hãaa Bi lɛ, ekɛ woo hãaa Tsɛ lɛ ni tsu lɛ lɛ hu.
24 Lɛɛlɛŋ, lɛɛlɛŋ, miikɛɛ nyɛ akɛ, mɔ fɛɛ mɔ ni nuɔ miwiemɔ ni eheɔ mɔ ni tsu mi lɛ eyeɔ lɛ yɛ naanɔ wala, ni ebaŋ kojomɔ mli, shi moŋ efo mli kɛjɛ gbele mli kɛtee wala mli.
25 “Lɛɛlɛŋ, lɛɛlɛŋ, miikɛɛ nyɛ akɛ, ŋmɛlɛtswaa lɛ miiba, ni eshɛ agbɛnɛ, be mli ni gbohii lɛ baanu Nyɔŋmɔ Bi lɛ gbee, ni mɛi ni bo toi* lɛ baaná wala.
26 Ejaakɛ bɔ ni Tsɛ lɛ yɔɔ wala yɛ lɛ diɛŋtsɛ emli* lɛ, nakai nɔŋŋ eŋɔhã Bi lɛ hu akɛ ená wala yɛ lɛ diɛŋtsɛ emli.
27 Ni ehã lɛ hegbɛ akɛ ekojo, ejaakɛ lɛ ji gbɔmɔ Bi lɛ.
28 Enɛ akafee nyɛ naakpɛɛ, ejaakɛ ŋmɛlɛtswaa lɛ miiba, be mli ni mɛi fɛɛ ni yɔɔ gbohii akaimɔ bui lɛ amli lɛ baanu egbee
29 ni amɛbaaje kpo, mɛi ni fee nibii kpakpai lɛ baaná wala gbohiiashitee, ni mɛi ni tsu nihiinii lɛ baaná fɔbuu kojomɔ gbohiiashitee.
30 Mi diɛŋtsɛ minyɛŋ miyiŋ mato mafee nɔ ko. Bɔ ni minuɔ lɛ, nakai mikojoɔ, ni mikojomɔ lɛ ja, ejaakɛ mitaooo nɔ ni mi diɛŋtsɛ misumɔɔ, shi moŋ nɔ ni mɔ ni tsu mi lɛ sumɔɔ.
31 “Kɛ́ mi kome miyeɔ mihe odase lɛ, midase lɛ, jeee anɔkwale ni.
32 Mɔ kroko yɛ ni yeɔ mihe odase, ni mile akɛ odase ni eyeɔ yɛ mihe lɛ, anɔkwale ni.
33 Nyɛtsu mɛi kɛtee Yohane ŋɔɔ, ni eye anɔkwale lɛ he odase.
34 Shi mi lɛ, mikɛ mihe efɔ̃ɔɔ gbɔmɔ ko odase nɔ, shi moŋ miiwie nibii nɛɛ koni ahere nyɛyiwala.
35 Nakai nuu lɛ ji kane ni tsoɔ ni kpɛɔ, ni nyɛsumɔɔ akɛ nyɛmii ashɛ nyɛhe babaoo yɛ ela lɛ mli be kukuoo ko.
36 Shi miyɛ odase ni fe Yohane nɔ lɛ, ejaakɛ nitsumɔi tuuntu ni mi-Tsɛ kɛwo midɛŋ akɛ mitsu migbe naa lɛ, nakai nitsumɔi lɛ ni mitsuɔ lɛ yeɔ mihe odase akɛ Tsɛ lɛ tsu mi.
37 Ni Tsɛ lɛ ni tsu mi lɛ diɛŋtsɛ eye mihe odase. Nyɛnuko egbee dã, ni asaŋ nyɛnako esu dã,
38 ni ewiemɔ lɛ ehiii nyɛmli, ejaakɛ mɔ tuuntu ni etsu lɛ lɛ, nyɛheee lɛ nyɛyeee.
39 “Nyɛmiitao Ŋmalɛi lɛ amli, ejaakɛ nyɛsusuɔ akɛ kɛtsɔ nomɛi anɔ lɛ nyɛbaaná naanɔ wala; ni nomɛi nɔŋŋ* ji nii ni yeɔ mihe odase lɛ.
40 Ni kɛ̃lɛ nyɛsumɔɔɔ akɛ nyɛbaa miŋɔɔ koni nyɛná wala.
41 Mitaooo gbɔmɛi ahiɛnyam,
42 shi mile jogbaŋŋ akɛ nyɛbɛ Nyɔŋmɔ suɔmɔ lɛ yɛ nyɛmli.
43 Miba yɛ mi-Tsɛ gbɛ́i mli, shi nyɛhereee mi. Kɛ́ mɔ kroko ba yɛ lɛ diɛŋtsɛ egbɛ́i mli lɛ, nyɛbaahere nakai mɔ lɛ.
44 Kɛ́ nyɛwoɔ gbɔmɛi ahiɛ nyam ni nyɛtaoɔ hiɛnyam kɛjɛɔ amɛdɛŋ, shi hiɛnyam ni jɛ Nyɔŋmɔ kome pɛ lɛ ŋɔɔ lɛ, nyɛtaooo lɛ, te nyɛbaafee tɛŋŋ nyɛhe nyɛye lɛ?
45 Nyɛkasusua akɛ mikɛ sane baafɔ̃ nyɛnɔ yɛ Tsɛ lɛ hiɛ; mɔ ko yɛ ni kɛ sane fɔ̃ɔ nyɛnɔ, lɛ ji Mose, mɔ ni nyɛkɛ nyɛhiɛ efɔ̃ enɔ lɛ.
46 Anɔkwa, eji nyɛhe Mose nyɛye kulɛ, nyɛbaahe mi nyɛye, ejaakɛ nakai mɔ lɛ ŋma mihe sane.
47 Shi kɛ́ nyɛheee nakai mɔ lɛ niŋmai lɛ nyɛyeee lɛ, te nyɛaafee tɛŋŋ nyɛhe miwiemɔi lɛ nyɛye lɛ?”
Shishigbɛ Niŋmaa
^ Aloo “mɛi ni boɔ toi.”
^ Aloo “yɔɔ wala nɔkeenɔ lɛ yɛ lɛ diɛŋtsɛ emli.”
^ Ni tsɔɔ akɛ, Ŋmalɛi lɛ.
