Mɛi komɛi baasusu akɛ, bɔ ni afee ni shishitsɔɔmɔ lɛ kɛ saji ni aŋmala yɛ Biblia lɛ mli klɛŋklɛŋ kwraa lɛ anyiɛ pɛpɛɛpɛ lɛ, esa akɛ atsɔɔ wiemɔi lɛ ashishi ekomekomei, ni ato wiemɔi lɛ anaa tamɔ bɔ ni ato naa yɛ blema nɔ lɛ mli lɛ nɔŋŋ. Shi jeee be fɛɛ be abaanyɛ afee lɛ nakai. Hã wɔsusu yiŋtoi fioo komɛi ahewɔ ni anyɛŋ afee lɛ nakai he wɔkwɛ:

• Wiemɔ ko wiemɔ ko bɛ ni kɛ́ akɛto wiemɔ kroko ko he lɛ, enyɔ lɛ fɛɛ hiɛ wiemɔ he mla kome, ni nɔ fɛɛ nɔ ni wiemɔ nɛɛ yɔɔ gbɛ́i kɛhã lɛ lɛ, wiemɔ kroko lɛ hu yɛ gbɛ́i kɛhã nakai nii lɛ, ni agbɛnɛ hu atoɔ wiemɔi enyɔ lɛ fɛɛ amli wiemɔi lɛ yɛ gbɛ kome too lɛ nɔŋŋ nɔ. Hebri wiemɔ lɛ he nilelɔ kpanaa ko ni atsɛɔ lɛ S. R. Driver lɛ ŋma akɛ, “jeee wiemɔ he mla kɛ wiemɔ lɛ shishifã pɛ hãa esoroɔ wiemɔ ko yɛ wiemɔ kroko he, shi . . . bɔ ni atoɔ emli wiemɔi ahãa koni shishinumɔ aba he hu hãa esoroɔ wiemɔ lɛ.” Esoro bɔ ni mɛi susuɔ nii ahe amɛhãa yɛ wiemɔ fɛɛ wiemɔ mli. S. R. Driver tsa esane lɛ nɔ akɛ, ‘Enɛ hewɔ lɛ, bɔ ni atoɔ wiemɔi ahãa yɛ wiemɔ kome mli lɛ yɛ srɔto yɛ wiemɔ kroko he.’

• Wiemɔi ni awieɔ ŋmɛnɛ lɛ eko eko bɛ ni yɛ gbɛ́i kɛhã nɔ fɛɛ nɔ ni Hebri, kɛ Aramaik, kɛ Greek wiemɔi ni akɛŋma Biblia lɛ yɔɔ gbɛ́i kɛhã lɛ lɛ, ni eko eko hu bɛ ni kɛ wiemɔi etɛ nɛɛ ateŋ eko hiɛ wiemɔ he mla kome, no hewɔ lɛ, kɛ́ atsɔɔ wiemɔi lɛ ashishi ekomekomei lɛ, bei pii lɛ, anuŋ nɔ ni atsɔɔ shishi lɛ shishi jogbaŋŋ, ni bei komɛi po lɛ abaanu shishi yɛ gbɛ kroko nɔ kwraa.

•   Kɛ́ akɛ wiemɔ pɔtɛɛ ko tsu nii yɛ sane ko mli lɛ, nɔ ni awieɔ he lɛ ji nɔ ni baahã ana shishinumɔ ni yɔɔ nakai wiemɔ lɛ sɛɛ.

Wiemɔ shishitsɔɔlɔ ko baanyɛ atsɔɔ wiemɔ ni aŋma Biblia lɛ yɛ mli klɛŋklɛŋ kwraa lɛ shishi pɛpɛɛpɛ yɛ saji komɛi amli, shi esa akɛ ekwɛ jogbaŋŋ yɛ enɛ feemɔ mli.

Naa nɔkwɛmɔnii komɛi ni tsɔɔ bɔ ni kɛ́ atsɔɔ wiemɔi lɛ ashishi ekomekomei lɛ ebaanyɛ ehã anu sane lɛ shishi yɛ gbɛ kroko nɔ:

• Akɛ wiemɔi tamɔ “wɔ” kɛ “yawɔ” tsuɔ nii yɛ Ŋmalɛ lɛ mli kɛ́ aawie wɔ diɛŋtsɛ ni awɔɔ, kɛ gbele he. (Mateo 28:13; Bɔfoi 7:60) Kɛ́ akɛ wiemɔi nɛɛ tsu nii be ni aawie gbele he lɛ, Biblia shishitsɔɔlɔi lɛ baanyɛ atsɔɔ shishi akɛ “yawɔ yɛ gbele mli,” koni mɔ ni baakane lɛ yiŋ akafutu lɛ.—Kwɛmɔ shishigbɛ niŋmai ni yɔɔ 1 Korintobii 7:39 kɛ 1 Tesalonikabii 4:13 kɛ 2 Petro 3:4 lɛ.

• Abaanyɛ atsɔɔ wiemɔ ko ni bɔfo Paulo kɛtsu nii yɛ Efesobii 4:14 lɛ shishi akɛ “yɛ ludu tɛ ni hii tswaa lɛ mli.” Eji blema mfonirifeemɔŋ wiemɔ ko ni aná kɛjɛ bɔ ni mɛi kɛ ludu tɛ shishiuɔ mɛi lɛ mli. Yɛ wiemɔi babaoo amli lɛ, kɛ́ atsɔɔ mfonirifeemɔŋ wiemɔ nɛɛ shishi nakai lɛ, anaŋ nɔ ni ataoɔ awie he lɛ jogbaŋŋ. Kɛ́ atsɔɔ shishi akɛ “ŋaa fɔŋ ni gbɔmɛi toɔ” lɛ, no lɛ nɔ ni ataoɔ awie he lɛ feɔ faŋŋ.

• Yɛ Romabii 12:11 lɛ, akɛ Greek wiemɔ ko ni kɛ́ akɛɛ abaatsɔɔ wiemɔi lɛ ashishi ekomekomei lɛ, abaatsɔɔ shishi akɛ, “nyɛmumɔ lɛ atswaa kɔtɔkɔtɔ.” Kɛ́ atsɔɔ shishi nakai lɛ, anaŋ nɔ ni ataoɔ atsɔɔ lɛ faŋŋ yɛ Ga mli, no hewɔ lɛ, atsɔɔ shishi akɛ “nyɛfea ekãa yɛ mumɔ lɛ naa” yɛ Ga Biblia nɛɛ mli.

• Yɛ Yesu Gɔŋ Nɔ Shiɛmɔ ni ale waa lɛ mli lɛ, ekɛ wiemɔ ko ni afɔɔ shishitsɔɔmɔ akɛ “Ajɔɔ mumɔ lɛ mli ohiafoi lɛ” tsu nii. (Mateo 5:3, Ga Biblia hee) Shi yɛ wiemɔi babaoo mli lɛ, kɛ́ atsɔɔ Greek wiemɔ ni akɛtsu nii lɛ shishi nakai lɛ, eshishinumɔ efeŋ faŋŋ. Yɛ wiemɔi komɛi amli lɛ, kɛ́ atsɔɔ shishi nakai lɛ, etsɔɔ akɛ “mumɔ lɛ mli ohiafoi lɛ” kɛ amɛjwɛŋmɔ tsuuu nii jogbaŋŋ loo amɛyɛ shɔ̃ɔ ni amɛmiaaa amɛhiɛ. Shi no mli lɛ, Yesu miitsɔɔ mɛi lɛ akɛ, jeee nibii ni he hiaa amɛ yɛ heloo gbɛfaŋ lɛ sɛɛ ni amɛbaadi lɛ ni baahã amɛná miishɛɛ, shi moŋ, yɔsemɔ ni amɛbaayɔse akɛ Nyɔŋmɔ gbɛtsɔɔmɔ he miihia amɛ lɛ ji nɔ ni baahã amɛná miishɛɛ. (Luka 6:20) No hewɔ lɛ, kɛ́ atsɔɔ shishi akɛ “mɛi ni hiɛ yɔɔ amɛ-Nyɔŋmɔjamɔŋ hiamɔ nii anɔ” loo “mɛi ni le akɛ Nyɔŋmɔ he miihia amɛ lɛ,” no baahã anu Greek wiemɔ ni akɛtsu nii lɛ shishi jogbaŋŋ.—Mateo 5:3.

•   Kɛ́ akɛ Hebri wiemɔ ni atsɔɔ shishi akɛ “awuŋayeli” lɛ tsu nii yɛ saji komɛi amli lɛ, ehiɛ shishinumɔ ni Ga wiemɔ “awuŋayeli” lɛ hiɛ lɛ nɔŋŋ, ni ji bɔ ni mɔ ko mli fuɔ kɛji mɔ ko ni bɛŋkɛ lɛ kpaakpa lɛ yeee lɛ anɔkwa loo bɔ ni mɔ ko hiɛ kɔ̃ɔ mɛi krokomɛi anibii anɔ lɛ. (Abɛi 6:34; Yesaia 11:13) Shi akɛ nakai Hebri wiemɔ lɛ nɔŋŋ tsuɔ nii kɛ́ aawie nibii ni yeee awui ahe. Akɛ nɔkwɛmɔnɔ lɛ, abaanyɛ akɛtsu nii kɛ́ aawie bɔ ni Yehowa kɛ “hiɛdɔɔ” buɔ etsuji ahe loo bɔ ni Yehowa biɔ ni “ajá ekome too pɛ” lɛ he. (2 Mose 34:14; 2 Maŋtsɛmɛi 19:31; Ezekiel 5:13; Zakaria 8:2) Abaanyɛ akɛtsu nii hu kɛ́ aawie bɔ ni Nyɔŋmɔ anɔkwa tsuji lɛ “hiɛ dɔɔ” yɛ Nyɔŋmɔ kɛ ejamɔ lɛ he, loo bɔ ni ‘amɛkpɛlɛɛɛ ni ajáa nyɔŋmɔ kroko yɛ esɛɛ’ lɛ he.—Lala 69:9; 119:139; 4 Mose 25:11.

• Hebri wiemɔ ni bei pii lɛ akɛtsuɔ nii kɛkɔɔ gbɔmɔ nine he lɛ hiɛ shishinumɔi srɔtoi babaoo. Abaanyɛ adamɔ sane ni awieɔ lɛ nɔ atsɔɔ wiemɔ nɛɛ shishi akɛ “hewalɛ” loo ‘ke nii.’ (2 Samuel 8:3; 1 Maŋtsɛmɛi 10:13; Abɛi 18:21) Yɛ Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ Ga nɔ nɛɛ mli lɛ, atsɔɔ Hebri wiemɔ nɛɛ shishi yɛ gbɛi srɔtoi babaoo anɔ.

Enɛɛmɛi ahewɔ lɛ, kɛ́ aatsɔɔ Biblia lɛ shishi lɛ, ehe ehiaaa ni be fɛɛ be ni akɛ blema Hebri loo Aramaik loo Greek wiemɔ ko baatsu nii lɛ, akɛ wiemɔ kome pɔtɛɛ ko atsɔɔ shishi. Esa akɛ Biblia shishitsɔɔlɔ lɛ ajwɛŋ wiemɔ lɛ nɔ jogbaŋŋ ni ehala wiemɔi ni kɛ́ ekɛtsu nii lɛ, ebaahã shishinumɔ ni yɔɔ blema wiemɔ lɛ sɛɛ lɛ afee faŋŋ. Agbɛnɛ hu, esa akɛ eto wiemɔi lɛ anaa bɔ ni kɛ wiemɔ ni etsɔɔ Biblia lɛ shishi kɛyaa mli lɛ he wiemɔ he mlai lɛ kpãa gbee, koni ekanemɔ afee nɔ ni waaa.

Shi esa akɛ ekwɛ jogbaŋŋ yɛ wiemɔi ni ehalaa lɛ kɛ bɔ ni etoɔ amɛ ehãa lɛ he. Kɛ́ Biblia shishitsɔɔlɔ ko tsakeɔ Biblia lɛ mli wiemɔi lɛ yɛ bɔ ni enuɔ shishi lɛ naa lɛ kɛkɛ ni ejwɛŋŋ he jogbaŋŋ lɛ, ebaanyɛ ehã shishinumɔ ni yɔɔ sɛɛ lɛ atsake. Mɛni hewɔ? Biblia shishitsɔɔlɔ lɛ baanyɛ ekɛ lɛ diɛŋtsɛ esusumɔ awo Biblia lɛ mli loo ejie otii komɛi ni he hiaa waa lɛ yɛ mli. No hewɔ lɛ, eyɛ mli akɛ kɛ́ akɛ wiemɔi krokomɛi tsu nii ni ato naa yɛ gbɛ kroko nɔ lɛ ebaanyɛ ehã Biblia lɛ kanemɔ afee nɔ ni waaa moŋ, shi ebaanyɛ ehã shishinumɔ diɛŋtsɛ ni yɔɔ ŋmalɛ lɛ sɛɛ lɛ alaaje.

Nibii ni Biblia shishitsɔɔlɔ ko heɔ eyeɔ lɛ baanyɛ ahã ekɛ lɛ diɛŋtsɛ esusumɔ awo Biblia lɛ mli. Akɛ nɔkwɛmɔnɔ lɛ, Mateo 7:13 lɛ kɛɔ akɛ: “Gbɛ ni lɛɛ lɛ ji nɔ ni kɛ mɔ yaa hiɛkpatamɔ mli.” Shi yɛ nibii komɛi ni Biblia shishitsɔɔlɔi komɛi heɔ amɛyeɔ lɛ hewɔ lɛ, amɛkɛ wiemɔ ni ji “hɛl” tsuɔ nii fe nɔ ni amɛkɛ wiemɔ ni ji “hiɛkpatamɔ” ni ji shishinumɔ diɛŋtsɛ ni yɔɔ Greek wiemɔ lɛ sɛɛ lɛ baatsu nii.

 Esa akɛ Biblia shishitsɔɔlɔ lɛ ahã ehi ejwɛŋmɔ mli hu akɛ, wiemɔi ni mɛi foji tamɔ okwaafoi kɛ tookwɛlɔi kɛ wolɛi kɛtsuɔ nii kɛ́ amɛmiigba sane lɛ ji nɔ ni akɛtsu nii kɛŋma Biblia lɛ. (Nehemia 8:8, 12; Bɔfoi 4:13) No hewɔ lɛ, kɛ́ atsɔɔ Biblia ko shishi jogbaŋŋ lɛ, esa akɛ mɔ fɛɛ mɔ ni baakane ni ejeee ŋwanejelɔ lɛ, anu shishi jogbaŋŋ, ekɔɔɔ he eko mɔ ni eji. No hewɔ lɛ, ehi akɛ, akɛ wiemɔi ni mli kã shi faŋŋ ni akɛfɔɔ nitsumɔ ni anuɔ shishi oya nɔŋŋ atsu nii kɛtsɔɔ Biblia lɛ shishi moŋ fe wiemɔi ni mɛi babaoo kɛfɔɔɔ nitsumɔ.

Biblia shishitsɔɔlɔi babaoo efee nɔ ko ni ejaaa kwraa, no ji akɛ amɛjie Nyɔŋmɔ gbɛ́i ni ji Yehowa lɛ yɛ Bibliai babaoo ni amɛtsɔɔ shishi lɛ amli, eyɛ mli moŋ akɛ gbɛ́i lɛ yɛ blema Biblia wolokpoi lɛ amli. (Kwɛmɔ Saji Krokomɛi A4 lɛ.) Biblia shishitsɔɔlɔi babaoo kɛ gbɛnaa gbɛ́i tamɔ “Nuŋtsɔ” eye gbɛ́i lɛ najiaŋ, ni mɛi komɛi po ehã mɛi esusu akɛ Nyɔŋmɔ bɛ gbɛ́i. Akɛ nɔkwɛmɔnɔ lɛ, yɛ Bibliai komɛi amli lɛ, atsɔɔ Yesu sɔlemɔ ni yɔɔ Yohane 17:26 lɛ shishi akɛ: “Mihã amɛle bo,” ni atsɔɔ Yohane 17:6 lɛ hu shishi akɛ, “Mihã mɛi ni okɛhã mi lɛ ele bo.” Shi bɔ ni esa akɛ atsɔɔ nakai Yesu sɔlemɔ lɛ shishi diɛŋtsɛ ji: “Mihã amɛle ogbɛ́i lɛ,” kɛ “Mijie ogbɛ́i lɛ shi mitsɔɔ mɛi ni okɛ amɛ hã mi kɛjɛ je lɛ mli lɛ.”

Tamɔ bɔ ni atsɔɔ mli yɛ hiɛkpamɔ wiemɔ ni yɔɔ klɛŋklɛŋ Jeŋ Hee Shishitsɔɔmɔ Biblia ni afee yɛ Blɔfo mli lɛ mli lɛ: “Wɔtsakeee wiemɔi ni akɛtsu nii yɛ Ŋmalɛ lɛ mli lɛ loo bɔ ni ato wiemɔi lɛ ahã lɛ. Wɔbɔ mɔdɛŋ waa koni wɔtsɔɔ wiemɔi lɛ ashishi pɛpɛɛpɛ bɔ ni kɛ Blɔfo wiemɔ he mla lɛ nyiɛ, kɛ agbɛnɛ hu, yɛ hei ni kɛ́ wɔtsɔɔ wiemɔi lɛ ashishi ŋmiiŋmi lɛ ehãaa shishinumɔ ni yɔɔ sɛɛ lɛ alaaje.” No hewɔ lɛ, Jeŋ Hee Biblia Shishitsɔɔmɔ Ajinafoi Akuu lɛ bɔ mɔdɛŋ waa koni amɛkɛ wiemɔi ni kɛ blema wiemɔi lɛ nyiɛ pɛpɛɛpɛ lɛ atsu nii, shi yɛ nakai beiaŋ nɔŋŋ lɛ, amɛkwɛ jogbaŋŋ hu koni amɛkɛ wiemɔi ni baahã Biblia lɛ kanemɔ afee nɔ ni wa loo nɔ ni hãŋ eshishinumɔ lɛ afee faŋŋ lɛ akatsu nii. Enɛ hewɔ lɛ, Biblia lɛ kanemɔ waaa, ni mɔ ni kaneɔ lɛ baanyɛ aná nɔmimaa kwraa akɛ atsɔɔ sane ni ajɛ mumɔŋ aŋma ni yɔɔ mli lɛ shishi jogbaŋŋ.—1 Tesalonikabii 2:13.