Klɛŋklɛŋ Wolo Ni Akɛmaje Korintobii Lɛ 1:1-31
1 Paulo, mɔ ni atsɛ lɛ yɛ Nyɔŋmɔ suɔmɔ naa koni ebatsɔ Kristo Yesu bɔfo+ lɛ, kɛ wɔnyɛmi nuu Sostene,
2 kɛ wolo nɛɛ miimaje Nyɔŋmɔ asafo ni yɔɔ Korinto+ lɛ, nyɛ mɛi ni afee nyɛ krɔŋkrɔŋ* yɛ Kristo Yesu mli,+ ni atsɛ nyɛ koni nyɛbafee mɛi krɔŋkrɔŋi lɛ, kɛ mɛi fɛɛ ni yɔɔ he fɛɛ he, ni boɔ tsɛɔ wɔ-Nuŋtsɔ Yesu Kristo gbɛ́i lɛ,+ mɔ ni ji wɔ kɛ amɛ fɛɛ Nuŋtsɔ lɛ:
3 Dromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.
4 Midaa mi-Nyɔŋmɔ lɛ shi daa nɛɛ yɛ nyɛhewɔ yɛ Nyɔŋmɔ dromɔ ni akɛdro nyɛ yɛ Kristo Yesu mli lɛ hewɔ;
5 ejaakɛ ahã nyɛtsɔmɔ niiatsɛmɛi yɛ nɔ fɛɛ nɔ mli, yɛ wiemɔ fɛɛ mli kɛ nilee fɛɛ mli,+
6 tamɔ bɔ ni Kristo he odase+ lɛ emɔ shi jogbaŋŋ yɛ nyɛteŋ lɛ,
7 ni no hewɔ lɛ, nikeenii ko kwraa eshwɛɛɛ nyɛ, ni yɛ nakai beiaŋ nɔŋŋ lɛ, nyɛkɛ miishɛɛ miimɛ wɔ-Nuŋtsɔ Yesu Kristo kpojiemɔ lɛ.+
8 Agbɛnɛ hu, ebaahã nyɛhe awa kɛyashi naagbee, koni nyɛhe akaba shwamɔ ko yɛ wɔ-Nuŋtsɔ Yesu Kristo gbi lɛ nɔ.+
9 Anɔkwafo ji Nyɔŋmɔ,+ mɔ ni tsɛ nyɛ kɛba e-Bi Yesu Kristo, wɔ-Nuŋtsɔ lɛ naanyobɔɔ lɛ mli lɛ.*
10 Agbɛnɛ, nyɛmimɛi, miitsɔ wɔ-Nuŋtsɔ Yesu Kristo gbɛ́i lɛ nɔ miiwo nyɛ hewalɛ akɛ nyɛ fɛɛ nyɛnaabu afee ekome, ni mligbálamɔi akahi nyɛteŋ,+ shi moŋ nyɛjwɛŋmɔ kɛ nyɛsusumɔ afee ekome kɛwula shi.+
11 Ejaakɛ, minyɛmimɛi, mɛi komɛi ni jɛ Kloe we lɛ ebabɔ mi nyɛhe sane, akɛ naataamɔi yɛ nyɛteŋ.
12 Nɔ ni mitsɔɔ lɛ ji akɛ, nyɛteŋ mɔ fɛɛ mɔ kɛɔ akɛ: “Paulo nɔ ji mi,” “Mi lɛ Apolo nɔ ji mi,”+ “Mi lɛ Kefa* nɔ ji mi,” “Shi mi lɛ Kristo nɔ ji mi.”
13 Ani Kristo lɛ mli egbála? Ani Paulo agbe yɛ tso jaŋŋ lɛ nɔ ahã nyɛ lɛ? Aloo Paulo gbɛ́i mli abaptisi nyɛ yɛ?
14 Miida Nyɔŋmɔ shi akɛ mibaptisiii nyɛteŋ mɔ ko akɛ ja Krispo+ kɛ Gaio,+
15 koni mɔ ko akakɛɛ akɛ abaptisi nyɛ yɛ migbɛ́i mli.
16 Hɛɛ, mibaptisi Stefana+ shĩabii lɛ hu. Shi mɛi ni eshwɛ lɛ, mileee kɛji mibaptisi amɛteŋ mɔ ko.
17 Ejaakɛ Kristo tsuuu mi akɛ miyabaptisi, shi moŋ koni miyajaje sane kpakpa lɛ;+ ni jeee kɛ hiɛshikamɔ wiemɔi, koni Kristo piŋmɔ tso* lɛ akafee efolo.
18 Ejaakɛ piŋmɔ tso* lɛ he wiemɔi lɛ ji kwashiai asane kɛhã mɛi ni hiɛ miikpãtã lɛ,+ shi kɛhã wɔ mɛi ni aahere wɔyiwala lɛ, eji Nyɔŋmɔ hewalɛ.+
19 Ejaakɛ aŋma akɛ: “Mahã hiɛshikalɔi lɛ ahiɛshikamɔ lɛ afite, ni makpoo nilelɔi lɛ anilee lɛ.”*+
20 Nɛgbɛ hiɛshikalɔ lɛ yɔɔ? Nɛgbɛ woloŋmalɔ* lɛ yɔɔ? Nɛgbɛ je nɛɛ* naataalɔ lɛ yɔɔ? Ani Nyɔŋmɔ hãko je lɛ hiɛshikamɔ lɛ atsɔ kwashiai asane?
21 Shi akɛni je lɛ nyɛɛɛ atsɔ lɛ diɛŋtsɛ ehiɛshikamɔ+ lɛ nɔ ele Nyɔŋmɔ hewɔ lɛ,+ yɛ Nyɔŋmɔ hiɛshikamɔ lɛ naa lɛ, esa Nyɔŋmɔ hiɛ akɛ etsɔ kwashiai asane+ ni ashiɛɔ lɛ nɔ ehere mɛi ni heɔ amɛyeɔ lɛ ayiwala.
22 Ejaakɛ Yudafoi lɛ, okadii+ ashi amɛbiɔ, ni Greekbii hu sumɔɔ akɛ amɛná jwɛŋmɔ;*
23 shi wɔ lɛ, Kristo ni agbe lɛ yɛ tso jaŋŋ lɛ nɔ lɛ wɔshiɛɔ, mɔ ni ji nanetɔ̃tɔmɔnɔ kɛhã Yudafoi lɛ kɛ kwashiai asane kɛhã jeŋmaji lɛ.+
24 Shi mɛi ni atsɛ amɛ lɛ agbɛfaŋ lɛ, Yudafoi jio, Greekbii jio, Kristo ji Nyɔŋmɔ hewalɛ kɛ Nyɔŋmɔ hiɛshikamɔ lɛ.+
25 Ejaakɛ Nyɔŋmɔ nii ni abuɔ lɛ kwashiai asane lɛ, hiɛ kã shi fe nɔ ni gbɔmɛi buɔ lɛ akɛ ehiɛ kã shi, ni Nyɔŋmɔ nii ni abuɔ lɛ akɛ ehe waaa lɛ, he wa fe nɔ ni gbɔmɛi buɔ lɛ akɛ ehe wa lɛ.+
26 Shi nyɛmimɛi, nyɛmiina yɛ tsɛmɔ ni etsɛ nyɛ lɛ mli akɛ, jeee mɛi babaoo ji hiɛshikalɔi yɛ heloo gbɛfaŋ,*+ jeee mɛi babaoo ji mɛi ni he wa, ni jeee mɛi babaoo ji abladei,*+
27 shi Nyɔŋmɔ hala je lɛ mli kwashiai anii lɛ koni ekɛwo hiɛshikalɔi lɛ ahiɛgbele; ni Nyɔŋmɔ hala je lɛ mli nibii ni he waaa lɛ, koni ekɛwo nibii ni he wa lɛ ahiɛgbele;+
28 ni Nyɔŋmɔ hala je lɛ mli nibii ni abuuu lɛ kɛ nibii ni anyaŋeɔ lɛ, nibii ni bɛ lɛ, koni ekɛhã nibii ni yɔɔ lɛ afee efolo,+
29 koni mɔ ko mɔ ko* akashwã yɛ Nyɔŋmɔ hiɛ.
30 Shi lɛ ehewɔ nyɛ kɛ Kristo Yesu efee ekome lɛ, mɔ ni ebatsɔ hiɛshikamɔ ni jɛ Nyɔŋmɔ ŋɔɔ, kɛ agbɛnɛ hu, jalɛ+ kɛ krɔŋkrɔŋfeemɔ+ kɛ jiemɔ kɛtsɔ kpɔmɔnɔ lɛ nɔ ehã wɔ lɛ,+
31 koni eba mli tamɔ bɔ ni aŋma lɛ, akɛ: “Mɔ ni shwãa lɛ, eshwã efɔ̃ Yehowa* nɔ.”+
Shishigbɛ Niŋmaa
^ Loo “mɛi ni asaa nyɛ ato ahã Nyɔŋmɔ.”
^ Loo “tsɛ nyɛ koni nyɛbatsɔmɔ . . . hefatalɔi lɛ.”
^ Atsɛɔ lɛ Petro hu.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Loo “matswa nilelɔi lɛ anilee lɛ mafɔ̃.”
^ Ni ji, mɔ ni le Mla lɛ mli jogbaŋŋ.
^ Loo “yinɔ nɛɛ; shihilɛ gbɛjianɔtoo nɛɛ.” Kwɛmɔ Wiemɔi Titrii Amligbalamɔ lɛ.
^ Greek sht. ŋm., “Greekbii lɛ hu taoɔ hiɛshikamɔ.”
^ Loo “jɛ wekui ni abuɔ amɛ waa amli.”
^ Loo “yɛ gbɔmɛi ataomɔ nii anaa.”
^ Greek sht. ŋm., “heloo ko.”
^ Kwɛmɔ Saji Krokomɛi A5 lɛ.
