Klɛŋklɛŋ Wolo Ni Akɛmaje Korintobii Lɛ 10:1-33
10 Agbɛnɛ, nyɛmimɛi, miitao nyɛle akɛ wɔtsɛmɛi lɛ fɛɛ hi atatu+ lɛ shishi ni amɛ fɛɛ amɛtsɔ ŋshɔ lɛ mli+
2 ni atsɔ atatu lɛ kɛ ŋshɔ lɛ nɔ abaptisi amɛ fɛɛ awo Mose mli,
3 ni amɛ fɛɛ amɛye niyenii kome too lɛ ni jɛ Nyɔŋmɔ ŋɔɔ lɛ nɔŋŋ+
4 ni amɛ fɛɛ amɛnu nu kome too lɛ ni jɛ Nyɔŋmɔ ŋɔɔ lɛ nɔŋŋ.+ Ejaakɛ no mli lɛ amɛnuɔ tɛsaa ni jɛ Nyɔŋmɔ ŋɔɔ ni nyiɛ amɛsɛɛ lɛ mli nu, ni nakai tɛsaa lɛ damɔ shi kɛhã* Kristo lɛ.+
5 Shi Nyɔŋmɔ náaa amɛteŋ mɛi pii ahe miishɛɛ, ejaakɛ agbe amɛ yɛ ŋa lɛ nɔ.+
6 Agbɛnɛ, nibii nɛɛ bafee nɔkwɛmɔnii kɛhã wɔ, bɔ ni afee ni wɔkashwe nibii fɔji, tamɔ bɔ ni amɛshwe lɛ.+
7 Ni nyɛkatsɔmɔa amagajalɔi hu tamɔ bɔ ni amɛteŋ mɛi komɛi fee lɛ; tamɔ bɔ ni aŋma lɛ, akɛ: “Maŋbii lɛ ho tara shi ni amɛye nii ni amɛnu nii. Kɛkɛ ni amɛte shi ni amɛshwɛ amɛhiɛ jogbaŋŋ.”+
8 Ni nyɛkahãa wɔyaa nɔ wɔbɔa ajwamaŋ,* tamɔ bɔ ni amɛteŋ mɛi komɛi bɔ ajwamaŋ,* ni amɛteŋ mɛi 23,000 nyɔnyɔi yɛ gbi kome mli lɛ.+
9 Ni nyɛkahãa wɔkaa Yehowa* wɔkwɛa,+ tamɔ bɔ ni amɛteŋ mɛi komɛi ka lɛ amɛkwɛ ni onufui kpãtã amɛhiɛ lɛ.+
10 Ni agbɛnɛ hu, nyɛkawiea huhuuhu, tamɔ bɔ ni amɛteŋ mɛi komɛi wie huhuuhu+ ni hiɛkpatalɔ lɛ kpãtã amɛhiɛ lɛ.+
11 Agbɛnɛ, nibii nɛɛ ba amɛnɔ akɛ nɔkwɛmɔnii kɛhã wɔ, ni aŋma enɛɛmɛi koni akɛbɔ wɔ+ mɛi ni yinɔ nɛɛ naagbee* lɛ enina wɔ lɛ kɔkɔ.
12 No hewɔ lɛ, mɔ ni susuɔ akɛ edamɔ shi lɛ akwɛ jogbaŋŋ koni ekagbee shi.+
13 Kaa* ko bako nyɛnɔ ni jeee gbɔmɛi ahe nɔ.+ Shi anɔkwafo ji Nyɔŋmɔ, ni ehãŋ aka nyɛ fe bɔ ni nyɛbaanyɛ naa nyɛdamɔ,+ shi moŋ yɛ kaa lɛ mli lɛ, ebaaje gbɛ ni nyɛkɛaaje mli hu ehã nyɛ koni nyɛnyɛ naa nyɛdamɔ.+
14 No hewɔ lɛ, mɛi ni misumɔɔ, nyɛjoa amagajamɔ naa foi.+
15 Mikɛ nyɛ miiwie tamɔ akɛ mɛi ni kɔɔ sane sɛɛ wieɔ lɛ; nyɛ diɛŋtsɛ nyɛkojoa nɔ ni miwieɔ lɛ nyɛhãa nyɛhe.
16 Shidaa kɔɔpoo lɛ ni wɔdaa Nyɔŋmɔ shi yɛ he lɛ,* ani jeee Kristo lɛ lá lɛ mli gbɛfaŋnɔ wɔnáa lɛ?+ Blodo lɛ ni wɔkumɔɔ lɛ, ani jeee Kristo lɛ gbɔmɔtso lɛ mli gbɛfaŋnɔ wɔnáa lɛ?+
17 Akɛni blodo kome yɔɔ hewɔ lɛ, wɔ lɛ, eyɛ mli akɛ wɔyi pii moŋ, shi gbɔmɔtso kome ji wɔ,+ ejaakɛ wɔ fɛɛ wɔyeɔ nakai blodo kome lɛ eko.
18 Nyɛkwɛa Israelbii lɛ:* Mɛi ni yeɔ afɔlei lɛ, ani jeee naanyo amɛkɛ afɔleshaa latɛ lɛ bɔɔ lɛ?+
19 No hewɔ lɛ, mɛni miwieɔ lɛ mɔ? Akɛ, ani afɔle ni akɛhã amaga ji nɔ ko, aloo akɛ, amaga ji nɔ ko?
20 Dabi; shi miikɛɛ akɛ nɔ ni jeŋmaji lɛ kɛhãa akɛ afɔle lɛ, daimonioi amɛkɛhãa shi jeee Nyɔŋmɔ;+ ni misumɔɔɔ akɛ nyɛkɛ daimonioi lɛ bɔɔ naanyo.+
21 Nyɛnyɛŋ Yehowa* kɔɔpoo lɛ kɛ daimonioi akɔɔpoo lɛ fɛɛ naa nyɛnu; nyɛnyɛŋ “Yehowa* okpɔlɔ lɛ”+ kɛ daimonioi akpɔlɔ lɛ fɛɛ nɔ nii nyɛye.
22 Aloo ‘wɔmiifee nɔ ko ni baahã Yehowa* aye awuŋa’?+ Bɛ wɔhe waaa fe lɛ, aloo?
23 Mla ŋmɛɔ nibii fɛɛ gbɛ,* shi jeee nibii fɛɛ he yɔɔ sɛɛnamɔ. Mla ŋmɛɔ nibii fɛɛ gbɛ, shi jeee nibii fɛɛ tswaa mɔ emaa shi.+
24 Mɔ ko mɔ ko akaya nɔ etao nɔ ni lɛ diɛŋtsɛ ebaaná he sɛɛ, shi moŋ nɔ ni mɔ kroko baaná he sɛɛ.+
25 Nyɛyea nɔ fɛɛ nɔ ni ahɔ̃ɔ yɛ loo jara nɔ, shi nyɛhenilee hewɔ lɛ, nyɛkabia mli,
26 ejaakɛ “shikpɔŋ lɛ kɛ nɔ fɛɛ nɔ ni yɔɔ nɔ lɛ, Yehowa* nɔ ni.”+
27 Kɛ́ mɔ ko ni heee yeee fɔ̃ nyɛ nine ni nyɛmiisumɔ ni nyɛya lɛ, nyɛyea nɔ fɛɛ nɔ ni akɛbaama nyɛhiɛ lɛ, shi nyɛhenilee hewɔ lɛ, nyɛkabia mli.
28 Shi kɛ́ mɔ ko kɛɛ nyɛ akɛ, “Enɛ ji nɔ ko ni akɛhã akɛ afɔleshaa nii” lɛ, nyɛkayea yɛ mɔ ni hã nyɛle enɛ lɛ hewɔ, kɛ agbɛnɛ hu, yɛ henilee hewɔ.+
29 Jeee nyɛ diɛŋtsɛ nyɛhenilee he miwieɔ lɛ, shi moŋ mɔ kroko lɛ nɔ lɛ. Ejaakɛ mɛni hewɔ esa akɛ mɔ kroko henilee akojo hegbɛ ni miyɔɔ lɛ?+
30 Kɛ́ midaa shi dani miyeɔ lɛ, mɛni hewɔ esa akɛ awie ashi mi yɛ nii ni midaa shi yɛ he lɛ hewɔ?+
31 No hewɔ lɛ, kɛ́ nii nyɛyeɔ jio, nii nyɛnuɔ jio, aloo nɔ kroko nyɛfeɔ jio, nyɛfea nibii fɛɛ kɛwoa Nyɔŋmɔ hiɛ nyam.+
32 Nyɛkwɛa ni nyɛkatsɔmɔa nanetɔ̃tɔmɔnii nyɛhãa Yudafoi lɛ kɛ Greekbii lɛ kɛ Nyɔŋmɔ asafo lɛ,+
33 tamɔ bɔ nɔŋŋ ni miibɔ mɔdɛŋ akɛ masa mɛi fɛɛ ahiɛ yɛ nii fɛɛ mli, ni mitaooo nɔ ni mi diɛŋtsɛ maná he sɛɛ,+ shi moŋ nɔ ni mɛi babaoo baaná he sɛɛ, koni ahere amɛyiwala lɛ.+
Shishigbɛ Niŋmaa
^ Loo “ji.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Saji Krokomɛi A5 lɛ.
^ Loo “shihilɛi agbɛjianɔtoi nɛɛ anaagbei.”
^ Ni ji, efɔŋ he kaa.
^ Greek sht. ŋm., “Jɔɔmɔ kɔɔpoo lɛ ni wɔjɔɔ lɛ.”
^ Loo “heloonaa Israel.”
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Loo “Wɔyɛ nibii fɛɛ hegbɛ.”
^ Kwɛmɔ Saji Krokomɛi A5 lɛ.
