Klɛŋklɛŋ Wolo Ni Akɛmaje Korintobii Lɛ 11:1-34
11 Nyɛkasea mi, tamɔ bɔ ni mi hu mikaseɔ Kristo lɛ.+
2 Miijie nyɛyi ejaakɛ nyɛkaiɔ mi yɛ nibii fɛɛ amli, ni nyɛhiɛ gbɛtsɔɔmɔi* ni mikɛhã nyɛ lɛ mli bɔ pɛ ni mikɛhã nyɛ lɛ.
3 Shi miisumɔ ni nyɛle akɛ nuu fɛɛ nuu yitso ji Kristo lɛ;+ ni yoo fɛɛ yoo hu yitso ji nuu;+ ni Kristo lɛ hu yitso ji Nyɔŋmɔ.+
4 Nuu fɛɛ nuu ni sɔleɔ aloo egbaa ni ekɛ nɔ ko haa eyitso nɔ lɛ, eewo eyitso lɛ hiɛgbele;
5 shi yoo fɛɛ yoo ni sɔleɔ aloo egbaa+ ni nɔ ko ehaaa eyitso nɔ lɛ, eewo eyitso lɛ hiɛgbele, ejaakɛ etamɔ yoo ni eshɛ eyi nɔŋŋ pɛ.
6 Ejaakɛ kɛ́ yoo ehaaa eyi nɔ lɛ, esa akɛ eku eyi; shi kɛ́ eji hiɛgbele hã yoo akɛ eeeku eyi aloo eeeshɛ eyi lɛ, esa akɛ eha eyi nɔ.
7 Ejaakɛ esaaa akɛ nuu haa eyitso nɔ, ejaakɛ Nyɔŋmɔ bɔ nuu tamɔ bɔ ni Nyɔŋmɔ yɔɔ lɛ,+ ni nuu lɛ ji Nyɔŋmɔ anunyam, shi yoo lɛ, nuu anunyam ji lɛ.
8 Ejaakɛ nuu jɛɛɛ yoo mli, shi yoo moŋ jɛ nuu mli.+
9 Ni agbɛnɛ hu, abɔɔɔ nuu yɛ yoo hewɔ, shi abɔ yoo moŋ yɛ nuu hewɔ.+
10 No hewɔ ni esa akɛ yoo aná okadi ko yɛ eyiteŋ ni tsɔɔ akɛ eyɛ mɔ ko shishi yɛ ŋwɛibɔfoi lɛ ahewɔ lɛ.+
11 Agbɛnɛ hu, yɛ Nuŋtsɔ lɛ mli lɛ, yoo nyɛŋ atse ehe yɛ nuu he, ni nuu hu nyɛŋ atse ehe yɛ yoo he.
12 Ejaakɛ tamɔ bɔ ni yoo jɛ nuu mli lɛ,+ nakai nɔŋŋ nuu hu tsɔ yoo nɔ kɛba; shi nibii fɛɛ jɛ Nyɔŋmɔ mli.+
13 Nyɛ diɛŋtsɛ nyɛkojoa: Ani eja gbɛ akɛ yoo aaasɔle ehã Nyɔŋmɔ ni ehaaa eyi nɔ?
14 Ani adebɔɔ diɛŋtsɛ etsɔɔɔ nyɛ akɛ, kɛji nuu hã eyitsɔi tsa kakadaŋŋ lɛ, eji hiɛshishwiemɔ kɛhã lɛ,
15 shi kɛ́ yoo yɛ yitsɔi kakadaŋŋ lɛ, eji anunyam hã lɛ? Ejaakɛ yɛ nɔ najiaŋ ni aaahã lɛ hehaanɔ lɛ, ahã lɛ yitsɔi moŋ.
16 Shi kɛ́ mɔ ko miisumɔ ni eje enɛ he ŋwane yɛ kusum kroko hewɔ po lɛ, wɔ lɛ wɔbɛ ekroko, ni Nyɔŋmɔ asafoi lɛ hu nakai nɔŋŋ.
17 Shi be ni mikɛ gbɛtsɔɔmɔi nɛɛ hãa nyɛ lɛ, mijieee nyɛyi, ejaakɛ kɛ́ nyɛkpe lɛ nɔ ko kpakpa jɛɛɛ mli kɛbaaa, shi moŋ efɔŋ.
18 Klɛŋklɛŋ kwraa lɛ, minu akɛ, kɛ́ nyɛbua nyɛhe naa akɛ asafo lɛ, mligbálamɔi yɛ nyɛteŋ; ni miheɔ miyeɔ yɛ gbɛ ko nɔ.
19 Ejaakɛ bɔ fɛɛ bɔ ni fee lɛ jamɔ kui hu baate shi yɛ nyɛteŋ,+ koni ana mɛi ni Nyɔŋmɔ yɔɔ amɛhe miishɛɛ yɛ nyɛteŋ lɛ faŋŋ.
20 Kɛ́ nyɛbua nyɛhe naa yɛ he kome kɛhã Nuŋtsɔ lɛ Gbɛkɛ Niyeli lɛ,+ nyɛyeee lɛ yɛ gbɛ kpakpa nɔ.
21 Ejaakɛ kɛ́ shɛ be ni abaaye lɛ, mɔ fɛɛ mɔ tsɔɔ hiɛ eyeɔ lɛ diɛŋtsɛ egbɛkɛ niyenii, ni no hewɔ lɛ be ni hɔmɔ miiye mɔ ko lɛ, mɔ kroko hu etɔ dãa.
22 Ani nyɛbɛ shĩai ni nyɛyeɔ nii ni nyɛnuɔ nii yɛ jɛmɛ? Aloo nyɛbuuu Nyɔŋmɔ asafo lɛ, ni nyɛkɛwoɔ mɛi ni bɛ nɔ ko lɛ hiɛgbele? Mɛni makɛɛ nyɛ? Ani mijie nyɛyi? Mijieee nyɛyi yɛ enɛ mli.
23 Ejaakɛ nɔ ni miná kɛjɛ Nuŋtsɔ lɛ dɛŋ ni mi hu mikɛhã nyɛ lɛ ji akɛ, nakai gbɛkɛ+ lɛ ni abaajie Nuŋtsɔ Yesu ahã lɛ mli nɔŋŋ lɛ, ekɔ blodo,
24 ni be ni eda shi lɛ, ekumɔ mli ni ekɛɛ: “Enɛ damɔ shi kɛhã* migbɔmɔtso+ ni akɛbaahã yɛ nyɛhewɔ lɛ. Nyɛyaa nɔ nyɛfea enɛ kɛkaia mi.”+
25 Nakai nɔŋŋ efee yɛ kɔɔpoo+ lɛ hu he be ni amɛye gbɛkɛ niyenii lɛ amɛtã lɛ, ni ekɛɛ: “Kɔɔpoo nɛɛ damɔ shi kɛhã kpaŋmɔ hee+ lɛ ni damɔ milá+ lɛ nɔ lɛ. Be fɛɛ be ni nyɛbaanu naa lɛ, nyɛfea enɛ kɛkaia mi.”+
26 Ejaakɛ be fɛɛ be ni nyɛbaaye blodo nɛɛ ni nyɛbaanu kɔɔpoo nɛɛ naa lɛ, belɛ nyɛmiijaje Nuŋtsɔ lɛ gbele lɛ nyɛmiitsɔɔ kɛyashi ebaaba.
27 No hewɔ lɛ, mɔ fɛɛ mɔ ni yeɔ blodo lɛ loo enuɔ Nuŋtsɔ lɛ kɔɔpoo lɛ naa bɔ ni esaaa lɛ, ebaaye fɔ yɛ Nuŋtsɔ lɛ gbɔmɔtso lɛ kɛ elá lɛ gbɛfaŋ.
28 Gbɔmɔ apɛi lɛ diɛŋtsɛ emli ekwɛ akɛ esa dã lo,+ dani eye blodo lɛ eko ni enu kɔɔpoo lɛ naa.
29 Ejaakɛ mɔ ni yeɔ ni enuɔ ni ekɔɔɔ nɔ ni gbɔmɔtso lɛ damɔ shi kɛhã lɛ sɛɛ lɛ, toigbalamɔ moŋ eyeɔ ni enuɔ ehãa lɛ diɛŋtsɛ ehe lɛ.
30 No hewɔ ni nyɛteŋ mɛi babaoo he waaa ni amɛbɛ hewalɛ lɛ, ni nyɛteŋ mɛi saŋŋ hu egboi lɛ.*+
31 Shi kɛ́ wɔyɔse bɔ ni wɔ diɛŋtsɛ wɔji lɛ, akojoŋ wɔ.
32 Shi kɛ́ akojo wɔ lɛ, Yehowa* miitsɔse wɔ,+ koni akabu wɔ kɛ je lɛ fɛɛ fɔ.+
33 No hewɔ lɛ, minyɛmimɛi, kɛ́ nyɛbua nyɛhe naa kɛhã niyeli nɛɛ, nyɛmɛa nyɛhe.
34 Kɛ́ hɔmɔ miiye mɔ ko lɛ, eye nii yɛ shĩa dã, koni kɛ́ nyɛbabua nyɛhe naa lɛ, no akafee kojomɔ.+ Shi saji ni eshwɛ lɛ, kɛ́ miba jɛmɛ lɛ mabato amɛhe gbɛjianɔ.
Shishigbɛ Niŋmaa
^ Loo “kusumii.”
^ Greek sht. ŋm., “Enɛ ji.” Greek mli lɛ, e·stin, ni eshishi ji “damɔ shi kɛhã; feɔ he okadi.”
^ Loo “ewɔ lɛ.” Ekã shi faŋŋ akɛ, jeee gbele diɛŋtsɛ he ewieɔ, shi moŋ eewie amɛ kɛ Nyɔŋmɔ teŋ wekukpaa ni efite lɛ he.
^ Kwɛmɔ Saji Krokomɛi A5 lɛ.
