Klɛŋklɛŋ Wolo Ni Akɛmaje Korintobii Lɛ 12:1-31
12 Agbɛnɛ nyɛmimɛi, misumɔɔɔ akɛ nyɛfee mɛi ni leee nikeenii ni jɛ Nyɔŋmɔ ŋɔɔ+ lɛ ahe nɔ ko.
2 Nyɛle akɛ be ni nyɛji jeŋmajiaŋbii* lɛ, alaka nyɛ ni ahã nyɛdu gbɛ kɛtee nakai amagai ni ewieee lɛ aŋɔɔ,+ ni nyɛnyiɛɔ nomɛi asɛɛ kɛyaa he fɛɛ he ni amɛkɛ nyɛ yaa lɛ.
3 Agbɛnɛ, miisumɔ ni nyɛle akɛ mɔ ko mɔ ko bɛ ni wieɔ yɛ Nyɔŋmɔ mumɔ lɛ naa ni kɛɔ akɛ: “Yesu ji mɔ ni alomɔ lɛ!” ni mɔ ko mɔ ko nyɛŋ ekɛɛ akɛ: “Yesu ji Nuŋtsɔ!” ja yɛ mumɔ krɔŋkrɔŋ lɛ naa.+
4 Agbɛnɛ nikeenii srɔtoi yɔɔ, shi mumɔ kome lɛ nɔŋŋ yɔɔ;+
5 ni sɔɔmɔi srɔtoi yɔɔ,+ shi Nuŋtsɔ kome lɛ nɔŋŋ yɔɔ;
6 ni nitsumɔi* srɔtoi yɔɔ, shi Nyɔŋmɔ kome lɛ nɔŋŋ ji mɔ ni tsuɔ fɛɛ yɛ mɔ fɛɛ mɔ mli.+
7 Shi atsɔɔ mɔ fɛɛ mɔ nɔ ajieɔ mumɔ lɛ kpo yɛ yiŋtoo kpakpa hewɔ.+
8 Ejaakɛ mɔ ko lɛ, atsɔɔ mumɔ lɛ nɔ ahãa lɛ hiɛshikamɔ wiemɔ,* mɔ kroko hu ahãa lɛ nilee yɛ nakai mumɔ lɛ nɔŋŋ naa,
9 mɔ kroko hu atsɔɔ nakai mumɔ lɛ nɔŋŋ nɔ ahãa lɛ hemɔkɛyeli,+ ni mɔ kroko hu atsɔɔ mumɔ kome too lɛ nɔŋŋ nɔ ahãa lɛ helatsamɔ+ nikeenii,
10 mɔ ko lɛ hewalɛ nitsumɔi atsumɔ,+ mɔ kroko lɛ gbalɛ, mɔ kroko hu wiemɔi ni jɛ mumɔŋ lɛ asɛɛkɔmɔ,+ mɔ kroko hu wiemɔi srɔtoi,+ ni mɔ kroko hu wiemɔi ashishitsɔɔmɔ.+
11 Shi mumɔ kome too lɛ nɔŋŋ ni tsuɔ nitsumɔi nɛɛ fɛɛ, ni ejaa nibii nɛɛ ehãa bɔ ni esumɔɔ, mɔ fɛɛ mɔ kɛ enɔ.
12 Ejaakɛ tamɔ bɔ ni gbɔmɔtso lɛ ekome ni, shi eyɛ henii pii, ni nakai gbɔmɔtso lɛ henii lɛ fɛɛ lɛ, eyɛ mli akɛ pii ni moŋ, shi gbɔmɔtso kome ni lɛ,+ nakai nɔŋŋ hu Kristo lɛ ji.
13 Ejaakɛ Yudafoi loo Greekbii ji wɔ jio, nyɔji loo mɛi ni jeee nyɔji ji wɔ jio, atsɔ mumɔ kome too lɛ nɔ abaptisi wɔ fɛɛ awo gbɔmɔtso kome mli, ni mumɔ kome akɛhã wɔ fɛɛ koni wɔnu.
14 Ejaakɛ, anɔkwa, jeee gbɔmɔtso henii kome feɔ gbɔmɔtso lɛ, shi moŋ henii pii.+
15 Kɛ́ nanetokota kɛɛ akɛ, “Akɛni jeee nine ji mi hewɔ lɛ, mifataaa gbɔmɔtso lɛ he” lɛ, no etsɔɔɔ akɛ efataaa gbɔmɔtso lɛ he.
16 Ni kɛ́ toi kɛɛ akɛ, “Akɛni jeee hiŋmɛi ji mi hewɔ lɛ, mifataaa gbɔmɔtso lɛ he” lɛ, no etsɔɔɔ akɛ efataaa gbɔmɔtso lɛ he.
17 Kɛ́ gbɔmɔtso muu lɛ fɛɛ lɛ hiŋmɛi ni lɛ, nɛgbɛ akɛbaanu wiemɔ? Kɛ́ gbɔmɔtso muu lɛ fɛɛ lɛ toi ni lɛ, nɛgbɛ akɛbaafu nii?
18 Shi agbɛnɛ, Nyɔŋmɔ kɛ gbɔmɔtso lɛ henii lɛ ateŋ eko fɛɛ eko eto egbɛhe bɔ ni esumɔɔ.
19 Kɛ́ amɛ fɛɛ lɛ gbɔmɔtso henii kome pɛ ni lɛ, nɛgbɛ gbɔmɔtso lɛ yɔɔ?
20 Eyɛ mli akɛ henii pii ji amɛ moŋ, shi gbɔmɔtso kome ni.
21 Hiŋmɛi nyɛŋ ekɛɛ nine akɛ, “Ohe ehiaaa mi,” ni yitso hu nyɛŋ ekɛɛ nanetokotai akɛ, “Nyɛhe ehiaaa mi.”
22 Shi gbɔmɔtso lɛ henii ni etamɔ nɔ ni amɛhe waaa lɛ, ahe miihia,
23 ni gbɔmɔtso lɛ henii ni wɔsusuɔ akɛ amɛhiɛ bɛ nyam tsɔ lɛ, nomɛi wɔkɛ woo kpele hãa,+ no hewɔ lɛ, wɔgbɔmɔtso lɛ henii ni bɛ fɛo lɛ wɔhiɛɔ amɛ kɛ bulɛ kpele,
24 shi wɔhenii ni yɔɔ fɛo lɛ, nɔ ko ehiaaa amɛ. Kɛ̃lɛ Nyɔŋmɔ eto gbɔmɔtso lɛ he gbɛjianɔ, ni ekɛ woo kpele ehã gbɔmɔtso lɛ henii ni hiɛ bɛ nyam lɛ,
25 koni mligbálamɔ akaba gbɔmɔtso lɛ mli, shi moŋ koni gbɔmɔtso lɛ henii lɛ asusu amɛhe.+
26 Kɛ́ henii lɛ eko miina nɔ lɛ, henii krokomɛi lɛ fɛɛ kɛ lɛ naa nɔ;+ ni kɛ́ henii lɛ eko hiɛ ba nyam hu lɛ, henii krokomɛi lɛ fɛɛ kɛ lɛ náa miishɛɛ babaoo.+
27 Agbɛnɛ Kristo gbɔmɔtso ji nyɛ,+ ni akɛ aŋkroaŋkroi lɛ, nyɛteŋ mɔ fɛɛ mɔ ji ehenii lɛ eko.+
28 Ni Nyɔŋmɔ kɛ nitsumɔ ewo aŋkroaŋkroi ni yɔɔ asafo lɛ mli lɛ adɛŋ: klɛŋklɛŋ lɛ, bɔfoi;+ nɔ ni ji enyɔ lɛ, gbalɔi;+ nɔ ni ji etɛ lɛ, tsɔɔlɔi;+ no sɛɛ lɛ, hewalɛ nitsumɔi;+ kɛkɛ lɛ helatsamɔ nikeenii;+ yelikɛbuamɔ nitsumɔi; nyɛmɔi ni akɛtsɔɔ gbɛ;+ kɛ wiemɔi srɔtoi.+
29 Ani mɛi fɛɛ ji bɔfoi? Ani mɛi fɛɛ ji gbalɔi? Ani mɛi fɛɛ ji tsɔɔlɔi? Ani mɛi fɛɛ tsuɔ hewalɛ nitsumɔi?
30 Ani mɛi fɛɛ yɔɔ helatsamɔ nikeenii? Ani mɛi fɛɛ wieɔ wiemɔi srɔtoi?+ Ani mɛi fɛɛ ji wiemɔi ashishitsɔɔlɔi?+
31 Shi nyɛyaa nɔ nyɛbɔa mɔdɛŋ waa ni nyɛná* nikeenii kpelei lɛ.+ Shi mibatsɔɔ nyɛ gbɛ ko ni nɔ bɛ.+
Shishigbɛ Niŋmaa
^ Ni tsɔɔ akɛ, be ni amɛjeee héyelilɔi.
^ Loo “nifeemɔi.”
^ Loo “sane.”
^ Loo “nyɛyaa nɔ nyɛkɛ hiɛdɔɔ ataoa.”
