Klɛŋklɛŋ Wolo Ni Akɛmaje Korintobii Lɛ 9:1-27
9 Ani miyeko mihe? Ani jeee bɔfo ji mi? Ani minako Yesu, wɔ-Nuŋtsɔ lɛ?+ Ani jeee mininenaa nitsumɔ ji nyɛ yɛ Nuŋtsɔ lɛ mli?
2 Kɛ́ mijeee bɔfo mihãaa mɛi krokomɛi po lɛ, ekã shi faŋŋ akɛ, bɔfo ji mi hã nyɛ! Ejaakɛ nyɛji niianaasɔomɔnɔ ni maa bɔfo ni miji yɛ Nuŋtsɔ lɛ mli lɛ nɔ mi.
3 Naajiemɔ ni miyɔɔ kɛhã mɛi ni kojoɔ mi lɛ nɛ:
4 Wɔyɛ hegbɛ* akɛ wɔyeɔ nii ni wɔnuɔ nii, aloo jeee nakai?
5 Wɔyɛ hegbɛ akɛ wɔŋɔɔ nyɛmi yoo ko akɛ wɔŋa ni wɔhãa efataa wɔhe,+ tamɔ bɔ ni bɔfoi krokomɛi lɛ kɛ Nuŋtsɔ lɛ nyɛmimɛi+ lɛ kɛ Kefa*+ hu efee lɛ, aloo jeee nakai?
6 Aloo mi kɛ Barnaba+ pɛ bɛ hegbɛ akɛ wɔkpaa heloonaa nitsumɔ?
7 Namɔ sɔmɔɔ akɛ asraafonyo ni lɛ diɛŋtsɛ ewoɔ ehe nyɔmɔ? Namɔ feɔ wain ŋmɔ ni eyeee emli yibii lɛ eko?+ Aloo mɛɛ kooloi akwɛlɔ kwɛɔ kooloi akuu nɔ ni enuuu amɛmliki lɛ eko?
8 Nibii ni miwieɔ nɛɛ, ani gbɔmɛi asusumɔ naa miwieɔ yɛ? Ani Mla lɛ hu ewieee nibii nɛɛ nɔŋŋ?
9 Ejaakɛ aŋma yɛ Mose Mla lɛ mli akɛ: “Kaawo tsina naabu kotoku be ni eegbee ŋmaa.”+ Ani tsinai ahewɔ Nyɔŋmɔ wieɔ enɛ lɛ?
10 Aloo wɔhewɔ moŋ ewieɔ nakai lɛ? Anɔkwa, wɔ hewɔ aŋma, ejaakɛ esa akɛ mɔ ni kɛ tsina kɔi huɔ kɛ mɔ ni gbeɔ ŋmaa lɛ fɛɛ afee nakai kɛ hiɛnɔkamɔ akɛ amɛbaaná eko.
11 Kɛ́ wɔdu nibii ni jɛ Nyɔŋmɔ ŋɔɔ yɛ nyɛteŋ lɛ, ani eji tɔmɔ akɛ wɔbaaná heloonaa nii kɛjɛ nyɛŋɔɔ akɛ yibii ni wɔkpa?+
12 Kɛ́ mɛi krokomɛi yɛ hegbɛ akɛ amɛmɔɔ nibii ni nyɛkɛyeɔ nyɛbuaa amɛ lɛ mli lɛ, ani wɔbɛ nakai hegbɛ lɛ kwraa fe amɛ? Shi wɔkɛ hegbɛ* nɛɛ tsuuu nii,+ shi moŋ wɔmiifi shi yɛ nibii fɛɛ amli, koni wɔkatsĩ Kristo lɛ he sane kpakpa lɛ gbɛ yɛ gbɛ ko kwraa nɔ.+
13 Ani nyɛleee akɛ mɛi ni tsuɔ nitsumɔi krɔŋkrɔŋi lɛ yeɔ sɔlemɔ shĩa lɛ nii lɛ eko, ni mɛi ni sɔmɔɔ daa yɛ afɔleshaa latɛ lɛ he lɛ náa afɔleshaa latɛ lɛ nɔ nii lɛ eko?+
14 Nakai nɔŋŋ Nuŋtsɔ lɛ fã koni mɛi ni jajeɔ sane kpakpa lɛ aye sane kpakpa lɛ mli nii.+
15 Shi mikɛ gbɛjianɔtoi nɛɛ ateŋ ekome folo po tsuko nii.+ Anɔkwa, miŋmaaa nibii nɛɛ koni afee enɛ ahã mi, ejaakɛ ehi akɛ magbo moŋ—mɔ ko mɔ ko nyɛŋ ajie nɔ ni midamɔɔ nɔ mishwãa lɛ kɛya!+
16 Agbɛnɛ, kɛ́ miijaje sane kpakpa lɛ, jeee no hewɔ esa akɛ mashwã, ejaakɛ eji sɔ̃ ni kã minɔ. Anɔkwa, kpoo hã mi kɛ́ mijajeee sane kpakpa lɛ!+
17 Kɛ́ mijɛ misuɔmɔ mli mifee enɛ lɛ, miyɛ jweremɔnɔ; shi kɛ́ mikɛ mligbigbilimɔ fee lɛ, no hu po lɛ, eji nitsumɔ ni atu awo midɛŋ akɛ shĩa nɔkwɛlɔ.+
18 No hewɔ lɛ, mɛni ji mijweremɔnɔ lɛ mɔ? No ji akɛ, kɛ́ miijaje sane kpakpa lɛ, majaje sane kpakpa lɛ ni miheee nɔ ko yɛ mɔ ko dɛŋ, koni mikɛ hegbɛ* ni miyɔɔ yɛ sane kpakpa lɛ hewɔ lɛ akatsu nii yɛ gbɛ gbonyo nɔ.
19 Ejaakɛ, eyɛ mli akɛ miye mihe kɛje mɛi fɛɛ ahe moŋ, shi mitsɔ mihe nyɔŋ mihã mɛi fɛɛ, koni kɛ́ ebaahi lɛ minine ashɛ mɛi babaoo anɔ.
20 Mitsɔ mihe tamɔ Yudanyo mihã Yudafoi bɔ ni afee ni minine ashɛ Yudafoi lɛ anɔ;+ mitsɔ mihe tamɔ mɔ ni yɔɔ mla shishi mihã mɛi ni yɔɔ mla shishi, eyɛ mli akɛ mi diɛŋtsɛ lɛ, mibɛ mla shishi, bɔ ni afee ni minine ashɛ mɛi ni yɔɔ mla shishi lɛ anɔ.+
21 Mitsɔ mihe tamɔ mɔ ni bɛ mla mihã mɛi ni bɛ mla, eyɛ mli akɛ mijeee mɔ ni bɛ mla yɛ Nyɔŋmɔ hiɛ moŋ, shi miyɛ mla shishi yɛ Kristo hiɛ,+ bɔ ni afee ni minine ashɛ mɛi ni bɛ mla lɛ anɔ.
22 Mitsɔ mihe mɔ ni he waaa mihã mɛi ni he waaa, bɔ ni afee ni minine ashɛ mɛi ni he waaa lɛ anɔ.+ Mitsɔ mihe nɔ fɛɛ nɔ mihã mɛi srɔtoi fɛɛ, koni matsɔ gbɛ fɛɛ gbɛ ni baahi nɔ mahere mɛi komɛi ayiwala.
23 Shi mifeɔ nibii fɛɛ yɛ sane kpakpa lɛ hewɔ, bɔ ni afee ni majaje matsɔɔ mɛi krokomɛi.+
24 Ani nyɛleee akɛ yɛ foidamɔ mli lɛ, foidalɔi lɛ fɛɛ daa foi lɛ moŋ, shi mɔ kome pɛ nine shɛɔ jweremɔnɔ lɛ nɔ? Nyɛdaa foi lɛ yɛ nakai gbɛ nɔ koni nyɛnine ashɛ jweremɔnɔ lɛ nɔ.+
25 Agbɛnɛ, mɔ fɛɛ mɔ ni kɛ ehe woɔ akaŋshii mli lɛ* yeɔ ehe nɔ yɛ nibii fɛɛ amli. Anɔkwa, amɛfeɔ nakai koni amɛná akekere ni baanyɛ afite,+ shi wɔ lɛ, koni wɔná nɔ ni fiteee.+
26 No hewɔ lɛ, bɔ ni midaa foi lɛ, midaaa lɛ tamɔ nɔ ni oti ko emaaa mihiɛ;+ bɔ ni mifɔ̃ɔ mitswɛrɛi lɛ, mifɔ̃ɔɔ lɛ bɔ ni baahã mamamɔ kɔɔyɔɔ atswɛrɛ;
27 shi moŋ migbálaa migbɔmɔtso lɛ mai*+ ni miyeɔ lɛ nyɔŋ, koni be ni mishiɛ mitsɔɔ mɛi krokomɛi migbe naa lɛ, mi diɛŋtsɛ lɛ, akabu mi mɔ ni esaaa* yɛ gbɛ ko nɔ.
Shishigbɛ Niŋmaa
^ Greek sht. ŋm., “hewalɛ.”
^ Atsɛɔ lɛ Petro hu.
^ Loo “hewalɛ.”
^ Loo “hewalɛ.”
^ Loo “akaŋshilɔ fɛɛ akaŋshilɔ.”
^ Loo “miwaa migbɔmɔtso lɛ yi; mitsɔseɔ migbɔmɔtso lɛ jogbaŋŋ.”
^ Loo “akashɛ mi afɔ̃.”
