1 Kronika 10:1-14
-
Saul kɛ ebihii lɛ agbele (1-14)
10 No mli lɛ, Filistibii lɛ kɛ Israel miiwu. Ni Israel hii lɛ jo foi yɛ Filistibii lɛ ahiɛ, ni mɛi babaoo gboi yɛ Gilboa Gɔŋ+ lɛ nɔ.
2 Filistibii lɛ tiu Saul kɛ ebihii lɛ waa, ni Filistibii lɛ gbe Saul bihii Yonatan kɛ Abinadab kɛ Malki-shua.+
3 Ta lɛ mli wa wo Saul, gãitsɛ̃lɔi lɛ anine shɛ enɔ, ni gãitsɛ̃lɔi lɛ pila lɛ.+
4 Kɛkɛ ni Saul kɛɛ mɔ ni hiɛɔ etawuu nii lɛ akɛ: “Gbalamɔ oklante lɛ ni okɛtsu mi, koni hii ni afolɔko amɛ ketia* nɛɛ akaba ni amɛbafee mi niseniianii.”+ Shi mɔ ni hiɛɔ etawuu nii lɛ sumɔɔɔ ni efeɔ, ejaakɛ no mli lɛ, eeshe gbeyei waa. No hewɔ lɛ, Saul kɔ klante lɛ ni eho egbee nɔ.+
5 Be ni mɔ ni hiɛɔ Saul tawuu nii lɛ na akɛ Saul egbo lɛ, lɛ hu eho egbee lɛ diɛŋtsɛ eklante lɛ nɔ, ni egbo.
6 No hewɔ lɛ, Saul kɛ ebihii etɛ lɛ kɛ eshĩabii lɛ fɛɛ gboi shi kome.+
7 Be ni Israelbii fɛɛ ni yɔɔ jɔɔ lɛ mli lɛ na akɛ mɔ fɛɛ mɔ ejo foi, ni Saul kɛ ebihii lɛ egboi lɛ, amɛ hu amɛshi maji ni amɛyɔɔ mli lɛ amli ni amɛjo foi; ni Filistibii lɛ ba ni amɛbahi jɛmɛ.
8 Enɔ jetsɛremɔ be ni Filistibii lɛ ba koni amɛbakpɔlɔ mɛi ni egboi lɛ ahe nibii lɛ, amɛna Saul kɛ ebihii lɛ agbohii yɛ Gilboa Gɔŋ+ lɛ nɔ.
9 No hewɔ lɛ, amɛkpɔlɔ ehe nibii, ni amɛfo eyitso, ni amɛkpɔlɔ etawuu nii lɛ hu yɛ ehe, ni amɛhã ashiɛ sane nɛɛ yɛ Filistibii lɛ ashikpɔŋ lɛ nɔ fɛɛ ahã amɛmagai+ lɛ kɛ maŋbii lɛ.
10 Kɛkɛ ni amɛkɛ etawuu nii lɛ yashwie amɛnyɔŋmɔ lɛ jamɔhe* lɛ, ni amɛkɛ eyitsoŋoŋo lɛ yakpɛtɛ Dagon jamɔhe+ lɛ.
11 Be ni mɛi fɛɛ ni yɔɔ Yabesh+ ni yɔɔ Gilead lɛ nu nibii fɛɛ ni Filistibii lɛ efee Saul lɛ he lɛ,+
12 tawulɔi lɛ fɛɛ te shi ni amɛyawó Saul gbonyo lɛ kɛ ebihii lɛ agbohii lɛ. Amɛkɛ amɛ ba Yabesh ni amɛfu amɛwui lɛ yɛ tso agbo lɛ ni yɔɔ Yabesh+ lɛ shishi, ni amɛhi ŋmaa gbii kpawo.
13 No hewɔ lɛ, Saul gbo yɛ anɔkwa ni eyayeee Yehowa lɛ hewɔ, ejaakɛ eyabooo Yehowa wiemɔ lɛ toi,+ ni agbɛnɛ hu eyabi mumɔi atsɛlɔ ko nii moŋ,+
14 fe nɔ ni ebaabi Yehowa nii. No hewɔ lɛ, Nyɔŋmɔ gbe lɛ ni ekɛ maŋtsɛyeli lɛ hã David, Yishai binuu lɛ.+
