1 Kronika 29:1-30
29 Kɛkɛ ni Maŋtsɛ David kɛɛ asafo muu lɛ fɛɛ akɛ: “Mibinuu Solomon, mɔ ni Nyɔŋmɔ ehala lɛ+ lɛ edako ni ehiɛ esako* hu,+ shi nitsumɔ lɛ da, ejaakɛ tsũ ni ebaama lɛ jeee gbɔmɔ ko sɔlemɔ shĩa,* shi moŋ, Yehowa Nyɔŋmɔ sɔlemɔ shĩa ni.+
2 Ni mikɛ mihewalɛ fɛɛ ebua nibii anaa koni akɛma mi-Nyɔŋmɔ lɛ shĩa lɛ, mibua shika tsuru naa koni akɛfee shika tsuru nibii, mibua jwiɛtɛi naa koni akɛfee jwiɛtɛi nibii, mibua akɔɔble naa koni akɛfee akɔɔble nibii, mibua dade naa koni akɛfee dade nibii,+ mibua tsei+ hu anaa koni akɛfee tso nibii, ni mibua onike tɛi, kɛ tɛi ni akɛ mɔɔta baamɔmɔ kɛtsara, kɛ fɔbitɛi ni akɛyeɔ samai, kɛ ojarawatɛi srɔtoi fɛɛ kɛ alabastro tɛi babaoo hu anaa.
3 Agbɛnɛ hu, nibii fɛɛ ni misaa mito kɛhã shĩa krɔŋkrɔŋ lɛ maa lɛ, miijɛ mi diɛŋtsɛ mijwetri+ lɛ mli mikɛ shika tsuru kɛ jwiɛtɛi miihã koni mikɛye mabua kɛma mi-Nyɔŋmɔ lɛ shĩa lɛ, ejaakɛ eŋɔɔ minaa akɛ abaama shĩa ahã mi-Nyɔŋmɔ lɛ,+
4 shika tsuru ni jɛ Ofir+ talɛntai* 3,000 kɛ jwiɛtɛi ni atsuu he talɛntai 7,000, koni akɛha shĩa lɛ gbogboi lɛ ahe,
5 shika tsuru ni akɛbaafee shika tsuru nibii, kɛ jwiɛtɛi ni akɛbaafee jwiɛtɛi nibii, kɛ nɔ ni ŋaalɔi lɛ kɛbaatsu nii lɛ fɛɛ. No hewɔ lɛ, agbɛnɛ, namɔ hu sumɔɔ akɛ eke Yehowa nii ŋmɛnɛ?”+
6 No hewɔ lɛ, tsɛmɛi ashĩai lɛ anɔ lumɛi lɛ, kɛ Israel wekui lɛ anɔ lumɛi lɛ, kɛ asraafoi akpei anɔkwɛlɔi kɛ asraafoi ohai anɔkwɛlɔi lɛ,+ kɛ onukpai ni kwɛɔ nibii ni kɔɔ maŋtsɛ lɛ he lɛ anɔ+ lɛ kɛ nikeenii ba yɛ amɛsuɔmɔ naa.
7 Nibii ni amɛkɛbahã kɛhã anɔkwa Nyɔŋmɔ lɛ shĩa lɛ he nitsumɔ lɛ nɛ: shika tsuru talɛntai 5,000, kɛ darik* 10,000, kɛ jwiɛtɛi talɛntai 10,000, kɛ akɔɔble talɛntai 18,000, kɛ dade talɛntai 100,000.
8 Mɔ fɛɛ mɔ ni yɔɔ ojarawatɛi lɛ kɛhã koni akɛwo Yehowa shĩa lɛ jwetritoohe ni Yehiel,+ Gershonnyo+ lɛ kwɛɔ nɔ lɛ mli.
9 Maŋbii lɛ ná miishɛɛ waa akɛ amɛjɛ amɛsuɔmɔ mli amɛhã, ejaakɛ amɛjɛ amɛtsui muu fɛɛ mli amɛke Yehowa nii,+ ni Maŋtsɛ David hu ná miishɛɛ waa diɛŋtsɛ.
10 Kɛkɛ ni David jie Yehowa yi yɛ asafo muu lɛ fɛɛ hiɛ. David kɛɛ akɛ: “Ajie Yehowa, wɔtsɛ Israel Nyɔŋmɔ lɛ yi kɛya naanɔi anaanɔ.*
11 Ao Yehowa, onɔ ji dalɛ lɛ,+ kɛ hewalɛ lɛ,+ kɛ hefɛo lɛ, kɛ anunyam lɛ, kɛ agbojee* lɛ,+ ejaakɛ nɔ fɛɛ nɔ ni yɔɔ ŋwɛi kɛ shikpɔŋ lɛ nɔ lɛ, onɔ ni.+ Ao Yehowa, onɔ ji maŋtsɛyeli lɛ.+ Bo ji mɔ ni ewó ehe nɔ gojoo yɛ nii fɛɛ nɔ akɛ yitso.
12 Bo odɛŋ ninámɔ kɛ hiɛnyam fɛɛ jɛɔ,+ ni bo oyeɔ nibii fɛɛ nɔ,+ ni bo odɛŋ nyɛmɔ+ kɛ hewalɛ yɔɔ,+ ni bo onine ji nɔ ni feɔ mɔ agbo+ ni ehãa lɛ hewalɛ.+
13 No hewɔ lɛ, wɔ-Nyɔŋmɔ, wɔmiida bo shi ni wɔmiijie ogbɛ́i fɛfɛo lɛ yi.
14 “Shi namɔ ji mi, ni namɛi ji mimaŋbii lɛ, ni wɔɔjɛ wɔsuɔmɔ mli wɔhã nii tamɔ nɛkɛ? Ejaakɛ nɔ fɛɛ nɔ jɛ oŋɔɔ, ni nɔ ni wɔná kɛjɛ odɛŋ lɛ, no ji nɔ ni wɔkɛhã bo nɛɛ.
15 Ejaakɛ wɔji gbɔi kɛ mɛikpɔji yɛ ohiɛ, tamɔ wɔtsɛmɛi lɛ fɛɛ ji lɛ.+ Ejaakɛ wɔgbii yɛ shikpɔŋ nɛɛ nɔ lɛ tamɔ hɔɔŋ+—wɔhiii shi kɛyaaa naanɔ.
16 Ao Yehowa, wɔ-Nyɔŋmɔ, nibii nɛɛ fɛɛ ni wɔbua naa koni wɔkɛma shĩa wɔhã ogbɛ́i krɔŋkrɔŋ lɛ jɛ bo diɛŋtsɛ odɛŋ, ni fɛɛ ji onɔ.
17 Ao mi-Nyɔŋmɔ, mile jogbaŋŋ akɛ otaoɔ tsuii amli,+ ni onáa mɔ ni yeɔ anɔkwa* he miishɛɛ.+ Mijɛ mitsui krɔŋŋ mli mikɛ nibii nɛɛ fɛɛ ehã bo yɛ misuɔmɔ naa, ni eŋɔɔ minaa waa akɛ omaŋbii ni damɔ biɛ lɛ ejɛ amɛsuɔmɔ mli amɛke bo nii.
18 Ao Yehowa, Abraham, kɛ Isak, kɛ Israel, ni ji wɔtsɛmɛi lɛ a-Nyɔŋmɔ, hã nɔ ni omaŋbii lɛ shweɔ nɛɛ kɛ susumɔ ni amɛná nɛɛ ahi amɛtsuiiaŋ kɛya naanɔ, ni odɔ amɛtsuii kɛba oŋɔɔ.+
19 Ni ohã mibinuu Solomon kɛ etsui muu fɛɛ asɔmɔ* bo,+ koni eye okitãi lɛ,+ kɛ okaimɔi lɛ, kɛ otaomɔ nii lɛ anɔ, ni efee nibii nɛɛ fɛɛ ni ema sɔlemɔ shĩa* ni mibua nibii anaa koni akɛma lɛ.”+
20 Kɛkɛ ni David kɛɛ asafo muu lɛ fɛɛ akɛ: “Agbɛnɛ, nyɛjiea Yehowa, nyɛ-Nyɔŋmɔ lɛ yi.” Ni asafo muu lɛ fɛɛ jie Yehowa, amɛtsɛmɛi a-Nyɔŋmɔ lɛ yi, ni amɛkula shi ni amɛkoto Yehowa kɛ maŋtsɛ lɛ.
21 Ni amɛtee nɔ amɛshã afɔlei amɛhã Yehowa, ni enɔ jetsɛremɔ lɛ, amɛkɛ tsinahii 1,000, kɛ gwantɛŋhii 1,000, kɛ gwantɛŋhii bibii 1,000 shã shaa afɔlei+ amɛhã Yehowa kɛ amɛhe dãa afɔlei;+ amɛshã afɔlei babaoo yɛ Israel fɛɛ hewɔ.+
22 Amɛtee nɔ amɛkɛ miishɛɛ kpele ye nii ni amɛnu nii yɛ Yehowa hiɛ yɛ nakai gbi lɛ nɔ,+ ni amɛwó David binuu Solomon maŋtsɛ nɔ ni ji shii enyɔ nɔ,+ ni amɛfɔ lɛ mu yɛ Yehowa hiɛ akɛ hiɛnyiɛlɔ, kɛ Zadok hu, akɛ osɔfo.+
23 Ni Solomon ta Yehowa maŋtsɛ sɛi lɛ nɔ+ akɛ maŋtsɛ yɛ etsɛ David najiaŋ, ni eye omanye, ni Israelbii lɛ fɛɛ bo lɛ toi.
24 Ni lumɛi lɛ,+ kɛ tawulɔi kãkãlɔi lɛ fɛɛ,+ kɛ agbɛnɛ hu, Maŋtsɛ David bihii+ lɛ fɛɛ ba amɛhe shi amɛhã Maŋtsɛ Solomon.
25 Ni Yehowa hã Solomon tsɔ gbɔmɔ wulu yɛ Israel fɛɛ hiɛ, ni ehã emaŋtsɛyeli lɛ hiɛ ba nyam fe Israel maŋtsɛmɛi ni tsɔ ehiɛ lɛ.+
26 Bɔ ni fee ni David, Yishai binuu lɛ ye Israel fɛɛ nɔ nɛ,
27 ni bei* abɔ ni ekɛye Israel nɔ ji afii 40. Eye nɔ afii 7 yɛ Hebron,+ ni eye nɔ afii 33 yɛ Yerusalem.+
28 Ni egbo be ni egbɔ,+ ni eye afii* pii, ni ená nii babaoo, kɛ anunyam babaoo; ni ebinuu Solomon baye maŋtsɛ yɛ esɛɛ.+
29 Shi Maŋtsɛ David shihilɛ mli saji fɛɛ, kɛjɛ shishijee kɛyashi naagbee lɛ, aŋmala yɛ Samuel, ninalɔ lɛ, kɛ gbalɔ Natan,+ kɛ Gad,+ ninalɔ lɛ woji lɛ amli,
30 ni aŋmala emaŋtsɛyeli lɛ mli saji fɛɛ, kɛ nibii wuji ni efee, kɛ nibii fɛɛ ni tee nɔ yɛ ebeiaŋ ni kɔɔ lɛ kɛ Israel kɛ maŋtsɛyelii ni bɔle lɛ lɛ fɛɛ ahe lɛ hu yɛ mli.
Shishigbɛ Niŋmaa
^ Loo “ebɛ niiashikpamɔ.”
^ Loo “mɔɔ; maŋtsɛ shĩa.”
^ Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
^ Darik ji Persia shika tsuru kapɛlɛ. Kwɛmɔ Saji Krokomɛi B14 lɛ.
^ Loo “kɛjɛ naanɔ kɛyashi naanɔ.”
^ Loo “woo.”
^ Loo “onáa krɔŋŋfeemɔ.”
^ Loo “kɛ etsui fɛɛ ahã.”
^ Loo “mɔɔ; maŋtsɛ shĩa.”
^ Hebri sht. ŋm., “gbii.”
^ Hebri sht. ŋm., “gbii.”
