1 Mose 12:1-20
12 Ni Yehowa kɛɛ Abram akɛ: “Jee oshikpɔŋ lɛ nɔ kɛ owekumɛi lɛ ateŋ kɛ otsɛ shĩa lɛ kɛya shikpɔŋ ni matsɔɔ bo lɛ nɔ.+
2 Mahã otsɔ jeŋmaŋ kpeteŋkpele, ni majɔɔ bo, ni mahã ogbɛ́i aje agbo, ni obaatsɔ jɔɔmɔ.+
3 Majɔɔ mɛi ni jɔɔ bo lɛ, ni malomɔ mɔ ni lomɔɔ bo lɛ,+ ni bo onɔ abaatsɔ ajɔɔ shikpɔŋ lɛ nɔ wekui fɛɛ.”*+
4 No hewɔ lɛ, Abram yi mli etee tamɔ bɔ ni Yehowa ekɛɛ lɛ lɛ, ni Lot kɛ lɛ tee. Be ni Abram shi Haran lɛ,+ no mli lɛ eye afii 75.
5 Abram ŋɔ eŋa Sarai+ kɛ Lot, enyɛmi nuu lɛ bi lɛ,+ kɛ nibii fɛɛ ni amɛná lɛ,+ kɛ mɛi* ni amɛná yɛ Haran lɛ, ni amɛyi mli akɛ amɛmiiya Kanaan shikpɔŋ+ lɛ nɔ. Be ni amɛyashɛ Kanaan shikpɔŋ lɛ nɔ lɛ,
6 Abram kpa shikpɔŋ lɛ nɔ fɛɛ kɛyashɛ he ni atsɛɔ jɛmɛ Shekem,+ ní bɛŋkɛ he ni More tsei wuji+ lɛ yɔɔ lɛ. Nakai beiaŋ lɛ, Kanaanbii lɛ yɛ shikpɔŋ lɛ nɔ.
7 Kɛkɛ ni Yehowa jie ehe kpo etsɔɔ Abram ni ekɛɛ: “Mikɛ shikpɔŋ+ nɛɛ baahã oseshi+ lɛ.” No hewɔ lɛ, ema afɔleshaa latɛ yɛ jɛmɛ ehã Yehowa, mɔ ni jie ehe kpo etsɔɔ lɛ lɛ.
8 Sɛɛ mli lɛ, efã kɛjɛ jɛmɛ kɛtee gɔji ni yɔɔ Betel+ bokãgbɛ lɛ anɔ, ni efee emama tsũ lɛ yɛ Betel kɛ Ai+ teŋ—Betel yɛ anai ni Ai hu yɛ bokã. Ema afɔleshaa latɛ yɛ jɛmɛ ehã Yehowa,+ ni ebɔi Yehowa gbɛ́i lɛ tsɛmɔ.+
9 No sɛɛ lɛ, Abram fã yɛ jɛmɛ ni ewó ehiɛ ewo Negeb*+ lɛ gbɛ; ebɔɔ nsara yɛ he ko, kɛkɛ lɛ efã kɛtee he kroko eyabɔ nsara yɛ jɛmɛ.
10 Agbɛnɛ, hɔmɔ ko ba nakai shikpɔŋ lɛ nɔ, ni Abram kpeleke shi akɛ eeya Ejipt koni eyahi jɛmɛ fioo,*+ ejaakɛ hɔmɔ ni yɔɔ shikpɔŋ lɛ nɔ lɛ naa wa.+
11 Be ni eshwɛ fioo ni ebaashɛ Ejipt lɛ, ekɛɛ eŋa Sarai akɛ: “Ofainɛ, bo mi toi! Mile akɛ yoo ni he yɔɔ fɛo waa ji bo.+
12 No hewɔ lɛ, kɛ́ Ejiptbii lɛ na bo lɛ, amɛbaakɛɛ akɛ, ‘Eŋa nɛ.’ Kɛkɛ lɛ, amɛbaagbe mi, shi bo lɛ, amɛbaahã ohi wala mli.
13 Ofainɛ, kɛɛmɔ akɛ minyɛmi yoo ji bo, koni ohewɔ lɛ, nɔ fɔŋ ko akaba minɔ, ni no baahã ohere miyiwala.”*+
14 Be ni Abram shɛ Ejipt nɔŋŋ lɛ, Ejiptbii lɛ na akɛ, yoo lɛ he yɛ fɛo waa.
15 Ni Farao abladei lɛ hu na lɛ, ni amɛyajie eyi amɛhã Farao, ni no hewɔ lɛ, akɛ yoo lɛ tee Farao shĩa lɛ.
16 Ekɛ Abram ye jogbaŋŋ yɛ yoo lɛ hewɔ, ni Abram ná toi kɛ tsinai, tejihii kɛ tejiyei, tsuji hii kɛ tsuji yei, kɛ afukpɔŋɔi.+
17 Kɛkɛ ni Yehowa kɛ haomɔi ni naa wawai ba Farao kɛ eshĩabii lɛ anɔ yɛ Sarai, Abram ŋa+ lɛ hewɔ.
18 No hewɔ lɛ, Farao tsɛ Abram ni ekɛɛ: “Mɛni ofee mi nɛɛ? Mɛni hewɔ okɛɛɛ mi akɛ oŋa ni lɛ?
19 Mɛni hewɔ okɛɛ, ‘Minyɛmi yoo+ ni’ lɛ, ni no hewɔ lɛ, kulɛ miiba maŋɔ lɛ mafee miŋa lɛ? Naa oŋa lɛ. Ŋɔɔ lɛ ni nyɛya!”
20 No hewɔ lɛ, Farao kɛ famɔi hã ehii lɛ yɛ Abram hewɔ, ni amɛyajie lɛ kɛ eŋa lɛ kɛ nɔ fɛɛ nɔ ni eyɔɔ lɛ gbɛ.+
Shishigbɛ Niŋmaa
^ Loo “onɔ shikpɔŋ lɛ nɔ wekui fɛɛ baatsɔ aná jɔɔmɔ amɛhã amɛhe.”
^ Loo “susumai.”
^ Loo “wuoyi,” ni tsɔɔ akɛ, Shiwoo Shikpɔŋ lɛ wuoyigbɛ.
^ Loo “koni eyahi jɛmɛ akɛ gbɔ.”
^ Loo “misusuma yi aná wala.”
