1 Mose 13:1-18
13 Abram shi Ejipt ni ekwɔ kɛtee Negeb+ lɛ, lɛ kɛ eŋa kɛ nɔ fɛɛ nɔ ni eyɔɔ, ni Lot hu fata he.
2 Abram yɛ lɛɛ kooloi kɛ jwiɛtɛi kɛ shika tsuru babaoo.+
3 Be ni efãa gbɛ kɛjɛ Negeb kɛyaa Betel lɛ, efeɔ emama tsũ yɛ he ko, kɛkɛ lɛ efã kɛtee he kroko eyafee yɛ jɛmɛ, ni ehiɛ nakai aahu kɛyashi eyashɛ he ni tsutsu lɛ emama tsũ lɛ yɔɔ, yɛ Betel kɛ Ai teŋ,+
4 he ni tsutsu lɛ ema afɔleshaa latɛ yɛ lɛ. Jɛmɛ Abram tsɛ Yehowa gbɛ́i lɛ yɛ.
5 Agbɛnɛ, Lot, mɔ ni fata Abram he kɛfãa gbɛ lɛ hu yɛ toi kɛ tsinai kɛ mama tsũi.
6 No hewɔ lɛ, amɛ fɛɛ amɛnyɛɛɛ amɛhi he kome yɛ nakai shikpɔŋ lɛ nɔ, ejaakɛ nibii ni amɛyɔɔ lɛ fa babaoo.
7 Enɛ hewɔ lɛ, béi ba Abram koolookwɛlɔi lɛ kɛ Lot koolookwɛlɔi lɛ ateŋ. (Nakai beiaŋ lɛ, Kanaanbii lɛ kɛ Perizbii lɛ yɛ shikpɔŋ lɛ nɔ.)+
8 No hewɔ lɛ, Abram kɛɛ Lot+ akɛ: “Ofainɛ, esaaa akɛ béi ko kwraa baa mi kɛ bo teŋ, kɛ mikoolookwɛlɔi lɛ kɛ okoolookwɛlɔi lɛ ateŋ, ejaakɛ nyɛmimɛi ji wɔ.
9 Ani jeee shikpɔŋ muu lɛ fɛɛ kã ohiɛ nɛɛ? Ofainɛ, tse ohe kɛje mihe. Kɛ́ otee abɛkugbɛ lɛ, no lɛ, maya ninejurɔgbɛ; shi kɛ́ otee ninejurɔgbɛ lɛ, no lɛ, maya abɛkugbɛ.”
10 No hewɔ lɛ, Lot hole ehiŋmɛii anɔ, ni ena Yordan kpokpaa muu lɛ fɛɛ+ aahu kɛyashi Zoar+ tɔ̃ɔ. Ena akɛ jɛmɛ fɛɛ (dani Yehowa kpãtã Sodom kɛ Gomora hiɛ lɛ) yɛ frɔ̃frɔ̃ naakpa, tamɔ Yehowa abɔɔ lɛ,+ tamɔ Ejipt shikpɔŋ lɛ.
11 Kɛkɛ ni Lot hala Yordan kpokpaa muu lɛ fɛɛ ehã ehe, ni Lot fã ni eyafee emama tsũi* lɛ yɛ bokã. No hewɔ lɛ, mɔ nɛ tse ehe kɛje mɔ nɛ he.
12 Abram hi Kanaan shikpɔŋ lɛ nɔ, shi Lot hi Yordan kpokpaa lɛ nɔ maji lɛ ateŋ.+ Naagbee lɛ, efee emama tsũ lɛ yɛ he ko ni bɛŋkɛ Sodom.
13 Agbɛnɛ, Sodombii lɛ ji mɛi fɔji, eshafeelɔi kpanakui yɛ Yehowa hiɛ.+
14 Be ni Lot tse ehe kɛje Abram he lɛ sɛɛ lɛ, Yehowa kɛɛ Abram akɛ: “Ofainɛ, holemɔ ohiŋmɛii anɔ, ní ojɛ he ni oyɔɔ lɛ okwɛ kooyigbɛ kɛ wuoyigbɛ, bokãgbɛ kɛ anaigbɛ,
15 ejaakɛ shikpɔŋ lɛ fɛɛ ni onaa lɛ, mikɛbaahã bo kɛ oseshi lɛ, ni ebaatsɔ nyɛnɔ kɛya naanɔ.+
16 Ni mahã oseshi lɛ afa tamɔ shikpɔŋ mulu, ni kɛ́ mɔ ko baanyɛ akane shikpɔŋ mulu lɛ, belɛ, abaanyɛ akane oseshi lɛ hu.+
17 Tee shi, kpaa shikpɔŋ lɛ nɔ yɛ ekɛlɛ kɛ elɛɛmɔ naa, ejaakɛ bo mikɛbaahã.”
18 No hewɔ lɛ, Abram tee nɔ ehi mama tsũi amli. Sɛɛ mli lɛ, eba ebahi Mamre tsei wuji+ ní yɔɔ Hebron+ lɛ amasɛi, ni ema afɔleshaa latɛ yɛ jɛmɛ ehã Yehowa.+
Shishigbɛ Niŋmaa
^ Loo “eyabɔ nsara.”
