1 Mose 15:1-21
15 Enɛ sɛɛ lɛ, Yehowa kɛ Abram wie yɛ ninaa mli akɛ: “Kaashe gbeyei+ Abram. Mabu ohe.*+ Ojweremɔnɔ lɛ baafa babaoo.”+
2 Abram hã hetoo akɛ: “Nuŋtsɔ Ofe Yehowa, mɛni obaahã mi, akɛni mikã he mibɛ bi ko nɛɛ, ní mɔ ni baaye migboshinii lɛ ji Eliezer, Damaskonyo lɛ?”+
3 Abram kɛɛ kɛfata he akɛ: “Ohãko mi seshi ko,+ ni mishĩabii lɛ ateŋ mɔ* kome ji mɔ ni baaye minii.”
4 Shi naa! Yehowa hã lɛ hetoo akɛ, “Nuu nɛɛ yeŋ onii, shi bo diɛŋtsɛ obinuu* ji mɔ ni baaye onii.”+
5 Ni Nyɔŋmɔ kɛ Abram je kpo, ni ekɛɛ: “Ofainɛ, kwɛmɔ ŋwɛi ní okane ŋulamii lɛ, akɛ obaanyɛ okane lo.” Kɛkɛ ni ekɛɛ lɛ akɛ: “Nakai oseshi lɛ baatamɔ.”+
6 Ni ehe Yehowa nɔ eye,*+ ni ebu no jalɛ ehã lɛ.+
7 Ni ekɛɛ kɛfata he akɛ: “Miji Yehowa, mɔ ni jie bo kɛjɛ Ur yɛ Kaldea, koni mikɛ shikpɔŋ nɛɛ ahã bo akɛ onɔ lɛ.”+
8 Kɛkɛ ni Abram kɛɛ: “Nuŋtsɔ Ofe Yehowa, te mafee tɛŋŋ male akɛ ebaatsɔ minɔ lɛ?”
9 Nyɔŋmɔ hã lɛ hetoo akɛ: “Ŋɔɔ tsinayoo ni eye afii etɛ, kɛ abotiayoo ni eye afii etɛ, kɛ gwantɛŋnuu ni eye afii etɛ, kɛ ŋa mli okpo kɛ shĩa okpo bi ohã mi.”
10 No hewɔ lɛ, eŋɔ enɛɛmɛi fɛɛ, ni efolɔ amɛmli enyɔnyɔɔnyɔ, ni ekɛ fã fɛɛ fã ŋmɛ efã kroko lɛ ŋɛlɛ nɔ,* shi loofɔji lɛ, efolɔɔɔ amɛmli.
11 Kɛkɛ ni loofɔji ni gbɔbiɔ bɔi kooloi lɛ agbohii lɛ anɔ sɔmɔmɔ, shi Abram tee nɔ eshwie amɛ.
12 Be ni eshwɛ fioo ni hulu baanyɔ shi lɛ, wɔ nyɔ Abram nɔ vii, ni duŋ kpii ni yɔɔ gbeyei ba enɔ.
13 Kɛkɛ ni Nyɔŋmɔ kɛɛ Abram akɛ: “Ná ole akɛ, oseshibii lɛ baayatsɔmɔ gbɔi yɛ shikpɔŋ ko ni jeee amɛnɔ nɔ, ni jɛmɛ bii lɛ baaye amɛ nyɔŋ, ni amɛbaawa amɛ yi afii 400.+
14 Shi makojo jeŋmaŋ ní amɛbaasɔmɔ lɛ,+ ni no sɛɛ lɛ, amɛbaashi jɛmɛ kɛ nibii babaoo.+
15 Shi bo lɛ, obaagbo yɛ toiŋjɔlɛ mli;* abaafu bo be ni ogbɔ jogbaŋŋ.+
16 Shi amɛbaaku amɛsɛɛ kɛba biɛ+ yɛ yinɔ ni ji ejwɛ lɛ nɔ, ejaakɛ be ni akɛbaagbala Amorbii* lɛ atoi yɛ amɛnɔfɔŋfeemɔ lɛ hewɔ lɛ shɛko.”+
17 Be ni hulu lɛ enyɔ shi ní duŋ kpii ewo lɛ, flɔnɔɔ ko ní miifã lasu pue, ni latso* ni miitso batsɔ loi ni afolɔ amɛmli fãfãi lɛ ateŋ kɛho.
18 Nakai gbi lɛ nɔ lɛ, Yehowa kɛ Abram kpaŋ kpaŋmɔ+ ko ekɛɛ: “Mikɛ shikpɔŋ+ nɛɛ baahã oseshi lɛ, kɛjɛ Ejipt faa lɛ naa kɛyashi faa wulu lɛ, ni ji Yufrate faa lɛ naa:+
19 Kenbii+ kɛ Kenizbii kɛ Kadmonbii
20 kɛ Hitbii+ kɛ Perizbii+ kɛ Refabii+
21 kɛ Amorbii kɛ Kanaanbii kɛ Girgashbii kɛ Yebusbii+ lɛ ashikpɔŋ lɛ.”
Shishigbɛ Niŋmaa
^ Hebri sht. ŋm., “Miji tsɛŋ kɛhã bo.”
^ Hebri sht. ŋm., “binuu.”
^ Hebri sht. ŋm., “shi mɔ ni jɛ omli.”
^ Loo “ená hemɔkɛyeli yɛ Yehowa mli.”
^ Loo “ekɛ fã fɛɛ fã ŋmɛ efã kroko lɛ masɛi pɛpɛɛpɛ.”
^ Hebri sht. ŋm., “Shi bo lɛ, obaaya otsɛmɛi lɛ aŋɔɔ yɛ toiŋjɔlɛ mli.”
^ “Amorbii” ni akɛtsu nii lɛ damɔ shi kɛhã Kanaanbii lɛ fɛɛ.
^ Loo “jatɛŋ; kɔti.”
