1 Mose 22:1-24
22 Agbɛnɛ, enɛ sɛɛ lɛ anɔkwa Nyɔŋmɔ lɛ ka+ Abraham ekwɛ, ni ekɛɛ lɛ akɛ: “Abraham!” ni ehere nɔ akɛ: “Naa mi!”
2 Ni Nyɔŋmɔ kɛɛ: “Ofainɛ, ŋɔɔ obinuu lɛ, obinuu koome ni ji Isak+ ní osumɔɔ lɛ waa lɛ,+ ni ofã gbɛ kɛya Moria+ shikpɔŋ lɛ nɔ ni okɛ lɛ ayashã shãa afɔle yɛ jɛmɛ, yɛ gɔji ni matsɔɔ bo lɛ ateŋ ekome nɔ.”
3 No hewɔ lɛ, Abraham te shi leebi maŋkpa ni ewo eteji nɔ nii, ni eŋɔ etsuji lɛ ateŋ mɛi enyɔ kɛ ebinuu Isak efata ehe. Egba lai ní ekɛbaayashã shãa afɔle lɛ, no sɛɛ lɛ, eyi mli etee he ni anɔkwa Nyɔŋmɔ lɛ etsɔɔ lɛ lɛ.
4 Gbi ni ji etɛ lɛ nɔ lɛ, Abraham wó ehiɛ nɔ, ni ena jɛmɛ yɛ shɔŋŋ.
5 Agbɛnɛ, Abraham kɛɛ etsuji lɛ akɛ: “Nyɛkɛ teji lɛ ahia biɛ, shi mi kɛ mibinuu lɛ baaya jɛmɛ koni wɔyajá Nyɔŋmɔ ní wɔku wɔsɛɛ wɔba nyɛŋɔɔ.”
6 No hewɔ lɛ, Abraham ŋɔ lai ní akɛbaashã shãa afɔle lɛ ni ekɛŋmɛ ebinuu Isak kɔɔŋ nɔ. Ni eŋɔ la lɛ kɛ kakla lɛ ehiɛ edɛ̃, ni amɛyi enyɔ lɛ fɛɛ amɛnyiɛ kɛtee.
7 Ni Isak kɛɛ etsɛ Abraham akɛ: “Mipapa!” Ehere nɔ akɛ: “Naa mi, mibinuu!” No hewɔ lɛ, ekɛɛ akɛ: “Naa, la kɛ lai nɛ, shi nɛgbɛ gwantɛŋ ni akɛbaashã shãa afɔle lɛ yɔɔ?”
8 Kɛkɛ ni Abraham kɛɛ: “Mibinuu, Nyɔŋmɔ diɛŋtsɛ kɛ gwantɛŋ ni akɛbaashã shãa afɔle lɛ baahã.”+ Ni amɛyi enyɔ lɛ fɛɛ amɛtsa amɛnyiɛmɔ lɛ nɔ.
9 Naagbee lɛ, amɛyashɛ he ni anɔkwa Nyɔŋmɔ lɛ etsɔɔ lɛ lɛ, ni Abraham ma afɔleshaa latɛ yɛ jɛmɛ ni eto lai lɛ eshwie nɔ. Efimɔ ebinuu Isak niji kɛ enaji ni ekɛ lɛ ŋmɛ lai lɛ nɔ yɛ afɔleshaa latɛ lɛ nɔ.+
10 Kɛkɛ ni Abraham kpã enine mli ekɔ kakla lɛ koni egbe ebinuu lɛ.+
11 Shi Yehowa bɔfo tsɛ lɛ kɛjɛ ŋwɛi ekɛɛ: “Abraham, Abraham!” ni ehere nɔ akɛ: “Naa mi!”
12 Ni ekɛɛ: “Kaaye gbekɛ nuu lɛ awui, ni kaafee lɛ nɔ ko nɔ ko, ejaakɛ miná mile agbɛnɛ akɛ osheɔ Nyɔŋmɔ gbeyei, akɛni okamaaa mi obinuu lɛ, obi koome lɛ hewɔ.”+
13 Kɛkɛ ni Abraham wó ehiɛ nɔ ekwɛ, ni ena gwantɛŋnuu ko ní ekolonto elalaa koo ko yɛ ehiɛ nɔŋŋ. No hewɔ lɛ, Abraham tee ni eyamɔ gwantɛŋnuu lɛ ni ekɛ lɛ bashã shãa afɔle yɛ ebinuu lɛ najiaŋ.
14 Ni Abraham wo jɛmɛ gbɛ́i akɛ Yehowa-yire.* Enɛ hewɔ ni kɛbashi ŋmɛnɛ lɛ awieɔ akɛ: “Akɛbaahã yɛ Yehowa gɔŋ lɛ nɔ” lɛ.+
15 Ni Yehowa bɔfo lɛ jɛ ŋwɛi etsɛ Abraham nɔ ni ji shii enyɔ nɔ
16 ekɛɛ: “Yehowa kɛɛ, ‘Mikɛ mi diɛŋtsɛ mihe miikã kitã akɛ,+ akɛni ofee enɛ ni okamaaa mi obinuu lɛ, obi koome+ lɛ hewɔ lɛ,
17 bɔ fɛɛ bɔ ni fee lɛ majɔɔ bo, ni mahã oseshi* lɛ afa tamɔ ŋwɛi ŋulamii kɛ ŋshɔnaa shia,+ ni oseshi* lɛ baaŋɔ ehenyɛlɔi lɛ agbó* lɛ.+
18 Ni oseshi+ lɛ nɔ shikpɔŋ lɛ nɔ jeŋmaji fɛɛ baatsɔ aná jɔɔmɔ amɛhã amɛhe, ejaakɛ obo migbee toi.’”+
19 No sɛɛ lɛ, Abraham ku esɛɛ kɛtee etsuji lɛ aŋɔɔ, ni amɛte shi ni amɛ fɛɛ amɛku amɛsɛɛ kɛtee Beer-sheba;+ ni Abraham tee nɔ ehi Beer-sheba.
20 Enɛ sɛɛ lɛ, ababɔ Abraham amaniɛ akɛ: “Naa, Milka hu efɔ bihii ehã onyɛmi nuu Nahor:+
21 Ekromɔbi ji Uz, enyɛmi nuu ji Buz, kɛ Kemuel, ni ji Aram papa lɛ,
22 kɛ Kesed kɛ Hazo kɛ Pildash kɛ Yidlaf kɛ Betuel.”+
23 Betuel fɔ Rebeka.+ Milka fɔ mɛi kpaanyɔ nɛɛ ehã Nahor, Abraham nyɛmi nuu lɛ.
24 Ehemɔ* ní atsɛɔ lɛ Reuma lɛ hu fɔ bihii: Teba kɛ Gaham kɛ Tahash kɛ Maaka.
Shishigbɛ Niŋmaa
^ Eshishi ji, “Yehowa Kɛbaahã; Yehowa Baatsu He Nii.”
^ Hebri sht. ŋm., “odumɔwu.”
^ Hebri sht. ŋm., “odumɔwu.”
^ Loo “amaji.”
^ Kwɛmɔ Wiemɔi Titrii Amligbalamɔ lɛ.
