1 Mose 33:1-20
33 Agbɛnɛ, Yakob hole ehiŋmɛii anɔ ni ena Esau miiba, ni hii 400 fata ehe.+ No hewɔ lɛ, ejara gbekɛbii lɛ amli ehã Lea, Rahel, kɛ tsuji yei enyɔ lɛ.+
2 Ekɛ tsuji yei lɛ kɛ amɛbii lɛ ye hiɛgbɛ,+ Lea kɛ ebii lɛ nyiɛ amɛsɛɛ,+ ni Rahel+ kɛ Yosef hu nyiɛ sɛɛ.
3 Kɛkɛ ni lɛ diɛŋtsɛ eyi amɛhiɛ ni ekula shi ekɛ ehiɛ bu shi, ni efee nakai shii kpawo be ni ebɛŋkɛɔ enyɛmi nuu lɛ.
4 Shi Esau sha foi ekɛ lɛ bakpe, ni efua lɛ ni eshɔ enaa, ni amɛjwa yaafo.
5 Be ni ehole ehiŋmɛii anɔ ní ena yei lɛ kɛ gbekɛbii lɛ, ekɛɛ: “Namɛi ji mɛi ní fata ohe nɛɛ?” kɛkɛ ni ekɛɛ: “Bii ni Nyɔŋmɔ kɛdro otsulɔ lɛ ni.”+
6 Kɛkɛ ni tsuji yei lɛ kɛ amɛbii lɛ tsi kɛba hiɛ ni amɛbakoto shi,
7 ni Lea hu kɛ ebii lɛ tsi kɛba hiɛ ni amɛbakoto shi. No sɛɛ lɛ, Yosef kɛ Rahel tsi kɛba hiɛ ni amɛbakoto shi.+
8 Esau kɛɛ: “Mɛni ji kuikui nɛɛ fɛɛ ní mikɛkpe lɛ shishi?”+ Ehã hetoo akɛ: “Bɔ ni afee ní mihiɛ aba nyam yɛ minuŋtsɔ hiɛ.”+
9 Kɛkɛ ni Esau kɛɛ: “Minyɛmi nuu, miyɛ nii babaoo diɛŋtsɛ.+ Hã onɔ lɛ ahi shi ahã bo.”
10 Shi Yakob kɛɛ: “Ofainɛ, dabi. Kɛ́ mihiɛ eba nyam yɛ ohiɛ lɛ, no lɛ, hemɔ minikeenii lɛ yɛ midɛŋ, ejaakɛ mikɛba koni manyɛ mana ohiɛ. Ni ohiɛ ní mina lɛ tamɔ nɔ ni mina Nyɔŋmɔ hiɛ, ejaakɛ ohere mi kɛ miishɛɛ.+
11 Ofainɛ, hemɔ minikeenii* lɛ ní akɛbahã bo lɛ,+ ejaakɛ Nyɔŋmɔ edro mi, ni miyɛ nɔ fɛɛ nɔ ni he hiaa mi.”+ Ni ekpa lɛ fai aahu, ni ehe.
12 Sɛɛ mli lɛ, Esau kɛɛ: “Hã wɔshi wɔya, ni hã matsɔ ohiɛ.”
13 Shi ekɛɛ lɛ akɛ: “Minuŋtsɔ le akɛ gbekɛbii lɛ darako ni amɛhe waaa,+ ni mihiɛ toi kɛ tsinai ní miihã amɛbii fufɔ. Kɛ́ akpala amɛ oyayaayai gbi kome lɛ, no lɛ, koolooku muu lɛ fɛɛ baagboi.
14 Ofainɛ, hã minuŋtsɔ atsɔ etsulɔ hiɛ kɛya, shi mi lɛ, matsa nyiɛmɔ lɛ nɔ blɛooblɛoo bɔ ni mikooloi lɛ kɛ gbekɛbii lɛ baanyɛ, kɛyashi maba minuŋtsɔ ŋɔɔ yɛ Seir.”+
15 Ni Esau kɛɛ: “Ofainɛ, hã mashi miwebii lɛ eko mahã bo.” Kɛkɛ ni ekɛɛ: “Mɛni hewɔ obaafee enɛ? Hã mihiɛ aba nyam yɛ minuŋtsɔ hiɛ kɛkɛ.”
16 No hewɔ lɛ, nakai gbi lɛ Esau ku esɛɛ kɛtee Seir.
17 Ni Yakob yiŋ kɛtee Sukot,+ ni eyama shĩa ehã ehe ni efee tsũi hu ehã ekooloi lɛ. No hewɔ ni ewo jɛmɛ Sukot* lɛ.
18 Be ni Yakob fã kɛshi Padan-aram+ lɛ, ebashɛ Shekem+ maŋ ní yɔɔ Kanaan+ shikpɔŋ lɛ nɔ lɛ shweshweeshwe, ni ebɔ nsara yɛ he ko ni bɛŋkɛ maŋ lɛ.
19 Ni ekɛ kapɛji 100 hé shikpɔŋ ní efee emama tsũ lɛ yɛ nɔ lɛ fã ko yɛ Shekem tsɛ Hamor bihii lɛ adɛŋ.+
20 Ema afɔleshaa latɛ yɛ jɛmɛ ni ewo lɛ gbɛ́i akɛ Nyɔŋmɔ, Israel Nyɔŋmɔ lɛ.+
