1 Mose 48:1-22
48 Nibii nɛɛ asɛɛ lɛ, ayakɛɛ Yosef akɛ: “Naa, opapa efee gbedee.” Kɛkɛ ni eŋɔ ebihii enyɔ lɛ, ni ji Manase kɛ Efraim efata ehe kɛtee.+
2 Ni ayakɛɛ Yakob akɛ: “Naa, obinuu Yosef eba oŋɔɔ.” No hewɔ lɛ, Israel mia ehiɛ ni ete shi eta esaatso lɛ nɔ.
3 Ni Yakob kɛɛ Yosef akɛ:
“Nyɔŋmɔ Ofe lɛ jie ehe kpo etsɔɔ mi yɛ Luz yɛ Kanaan shikpɔŋ lɛ nɔ, ni ejɔɔ mi.+
4 Ni ekɛɛ mi akɛ, ‘Mahã ofɔ, ni mahã oyi afa, ni mahã otsɔ majimaji asafo,+ ni mikɛ shikpɔŋ nɛɛ baahã oseshibii ní baaba yɛ osɛɛ lɛ akɛ amɛnɔ kɛmiiya naanɔ.’+
5 Agbɛnɛ, obihii enyɔ ní afɔ ahã bo yɛ Ejipt shikpɔŋ lɛ nɔ dani miba oŋɔɔ yɛ Ejipt lɛ, minii ji amɛ.+ Efraim kɛ Manase baatsɔ minii tamɔ bɔ ni Ruben kɛ Simeon ji minii lɛ.+
6 Shi bii ní abaafɔ ahã bo yɛ amɛsɛɛ lɛ baatsɔ onii. Akɛ amɛnyɛmimɛi lɛ agbɛ́ii baatsɛ amɛ yɛ amɛgboshiniyeli gbɛfaŋ.+
7 Shi mi lɛ, be ni mijɛ Padan mibaa lɛ, Rahel gbo+ yɛ mimasɛi yɛ Kanaan shikpɔŋ lɛ nɔ, no mli lɛ, eshwɛ gbɛ kakadaŋŋ lolo dani mashɛ Efrat.+ No hewɔ lɛ, mifu lɛ yɛ jɛmɛ, yɛ gbɛ ní yaa Efrat, ni ji Betlehem+ lɛ he.”
8 Ni Israel na Yosef bihii lɛ ni ebi akɛ: “Namɛi nɛ?”
9 No hewɔ lɛ, Yosef kɛɛ epapa akɛ: “Mibihii ní Nyɔŋmɔ kɛhã mi yɛ biɛ lɛ ni.”+ Kɛkɛ ni ekɛɛ: “Ofainɛ, okɛ amɛ aba miŋɔɔ koni majɔɔ amɛ.”+
10 Agbɛnɛ, gbɔlɛ ehã Israel hiŋmɛii anɔ eha, ni enaaa nii jogbaŋŋ. No hewɔ lɛ, Yosef kɛ amɛ bɛŋkɛ lɛ, ni eshɔshɔɔ amɛnaa ni efua amɛ.
11 Israel kɛɛ Yosef akɛ: “Misusuuu kɔkɔɔkɔ akɛ mana ohiɛ,+ shi naa, Nyɔŋmɔ ehã mina oseshi hu.”
12 Kɛkɛ ni Yosef jie amɛ yɛ Israel nakutsei ateŋ, ni ekula shi ni ekɛ ehiɛ bu shi.
13 Agbɛnɛ, Yosef ŋɔ amɛyi enyɔ lɛ fɛɛ—ekɛ eninejurɔ mɔ Efraim+ mli kɛtee Israel abɛku nɔ, ni ekɛ ebɛku mɔ Manase+ mli kɛtee Israel ninejurɔ nɔ—ni ekɛ amɛ bɛŋkɛ Israel.
14 Shi Israel kpã eninejurɔ mli ni ekɛŋmɛ Efraim yiteŋ, eyɛ mli moŋ akɛ lɛ ji gbekɛ, ni ekɛ ebɛku ŋmɛ Manase yiteŋ. Eje gbɛ ekɛ eniji ŋmɛlɛ amɛnɔ nakai, akɛni Manase ji kromɔ lɛ hewɔ.+
15 Kɛkɛ ni ejɔɔ Yosef ekɛɛ:+
“Anɔkwa Nyɔŋmɔ lɛ, mɔ hiɛ ní mitsɛmɛi Abraham kɛ Isak nyiɛ yɛ lɛ,+Anɔkwa Nyɔŋmɔ lɛ, mɔ ni ekwɛ mi yɛ miwala shihilɛ mli fɛɛ kɛbashi ŋmɛnɛ gbi nɛɛ,+
16 Ŋwɛibɔfo lɛ ní jieɔ mi kɛjeɔ amanehului fɛɛ amli+ lɛ ajɔɔ gbekɛbii hii lɛ.+
Akɛ migbɛ́i kɛ mitsɛmɛi Abraham kɛ Isak gbɛ́ii atsɛ amɛ,Amɛyi afa babaoo diɛŋtsɛ yɛ shikpɔŋ lɛ nɔ.”+
17 Be ni Yosef na akɛ epapa ninejurɔ kã Efraim yiteŋ lolo lɛ, enáaa he miishɛɛ, no hewɔ lɛ, eka akɛ ebaamɔ epapa nine mli ní ejie kɛje Efraim yiteŋ kɛyaŋmɛ Manase yiteŋ.
18 Yosef kɛɛ epapa akɛ: “Jeee nakai ni, mipapa, ejaakɛ mɔ nɛ ji kromɔbi.+ Okɛ oninejurɔ aŋmɛ eyiteŋ.”
19 Shi epapa ekpɛlɛɛɛ, ni ekɛɛ: “Mile nakai, mibinuu, mile nakai. Lɛ hu ebaatsɔ maŋ, ni lɛ hu ebaatsɔ mɔ kpeteŋkpele. Shi enyɛmi gbekɛ lɛ baatsɔ mɔ kpeteŋkpele fe lɛ,+ ni eseshi lɛ yi baafa aahu akɛ ebaatsɔ jeŋmaji.”+
20 No hewɔ lɛ, etee nɔ ejɔɔ amɛ nakai gbi lɛ+ ekɛɛ:
“Be fɛɛ be ni Israelbii lɛ baajɔɔ mɛi lɛ, hã amɛtsĩ ogbɛ́i lɛ tã amɛkɛɛ akɛ,‘Nyɔŋmɔ ahã otsɔ tamɔ Efraim kɛ Manase.’”
No hewɔ lɛ, etee nɔ ekɛ Efraim ye Manase hiɛ.
21 Ni Israel kɛɛ Yosef akɛ: “Naa, miigbo,+ shi bɔ fɛɛ bɔ ni fee lɛ, Nyɔŋmɔ baaya nɔ ekɛ nyɛ ahi shi, ni ekɛ nyɛ baaku sɛɛ kɛya nyɛtsɛmɛi ashikpɔŋ lɛ nɔ.+
22 Shi mi lɛ, mikɛ shikpɔŋkuku* kome miifata he miihã bo fe nɔ ni mihã onyɛmimɛi lɛ, shikpɔŋ ní mikɛ miklante kɛ migãi shɔ̃ yɛ Amorbii lɛ adɛŋ lɛ.”
Shishigbɛ Niŋmaa
^ Loo “gɔŋ he shikpɔŋ.”
