1 Mose 6:1-22
6 Agbɛnɛ, be ni gbɔmɛi ayi bɔi famɔ yɛ shikpɔŋ lɛ nɔ, ní afɔfɔɔ biyei ahã amɛ lɛ,
2 anɔkwa Nyɔŋmɔ lɛ bihii*+ lɛ na akɛ, gbɔmɛi abiyei lɛ ahe yɛ fɛo. No hewɔ lɛ, amɛŋɔŋɔɔ amɛteŋ mɛi fɛɛ ni amɛsumɔɔ lɛ akɛ amɛŋamɛi.
3 Ni Yehowa kɛɛ: “Mimumɔ lɛ náŋ gbɔmɔ he tsui kɛyaŋ naanɔ,+ ejaakɛ heloo kɛkɛ ji lɛ.* No hewɔ lɛ, egbii baafee afii 120.”+
4 Nakai gbii lɛ amli kɛ no sɛɛ fɛɛ lɛ, Nefilim* lɛ yɛ shikpɔŋ lɛ nɔ. Yɛ nakai be lɛ mli lɛ, anɔkwa Nyɔŋmɔ lɛ bihii lɛ tee nɔ amɛkɛ gbɔmɛi abiyei lɛ ná bɔlɛ, ni yei nɛɛ fɔfɔɔ bihii amɛhã amɛ. Bii nɛɛ ji kãkãlɔi ni hi shi yɛ blema lɛ, hii ni he gbɛ́i lɛ.
5 Enɛ hewɔ lɛ, Yehowa na akɛ gbɔmɔ nɔfɔŋfeemɔ lɛ efa babaoo yɛ shikpɔŋ lɛ nɔ, ni etsuiŋ susumɔ fɛɛ susumɔ lɛ, be fɛɛ be lɛ efɔŋ sɔŋŋ ni.+
6 Edɔ Yehowa waa* akɛ efee gbɔmɛi yɛ shikpɔŋ lɛ nɔ, ni ewerɛ ho ehe yɛ etsui mli.*+
7 No hewɔ lɛ, Yehowa kɛɛ: “Mibakpãtã gbɔmɛi ni mibɔ lɛ ahiɛ kɛje shikpɔŋ lɛ nɔ, gbɔmɔ kɛ shĩa kooloi, kooloi ni wamɔɔ, kɛ bɔɔ nii ni filikiɔ yɛ ŋwɛi, ejaakɛ edɔ mi waa akɛ mifee amɛ.”
8 Shi Noa hiɛ ba nyam yɛ Yehowa hiɛ.
9 Noa he sane nɛ.
Jalɔ ji Noa.+ Ehi shi akɛ mɔ ni sane ko bɛ ehe* yɛ eyinɔbii* lɛ ateŋ. Noa kɛ anɔkwa Nyɔŋmɔ lɛ nyiɛ.+
10 Sɛɛ mli lɛ, Noa fɔ bihii etɛ, Shem kɛ Ham kɛ Yafet.+
11 Shi shikpɔŋ lɛ nɔ efite yɛ anɔkwa Nyɔŋmɔ lɛ hiɛ, ni shikpɔŋ lɛ nɔ eyi obɔ kɛ yiwalɛ.
12 Hɛɛ, Nyɔŋmɔ kwɛ shikpɔŋ lɛ, ni enɔ efite;+ heloo* fɛɛ miifee nibii gbohii yɛ shikpɔŋ lɛ nɔ.+
13 No sɛɛ lɛ, Nyɔŋmɔ kɛɛ Noa akɛ: “Mikpɛ miyiŋ akɛ makpãtã heloo fɛɛ hiɛ, ejaakɛ amɛhã shikpɔŋ lɛ nɔ eyi obɔ kɛ yiwalɛ, no hewɔ lɛ, mibakpãtã amɛ kɛ shikpɔŋ lɛ fɛɛ hiɛ.+
14 Okɛ gofer tso* akpɛ adeka* ohã ohe.+ Feemɔ tsũi bibii yɛ adeka lɛ mli, ni okɛ kootaa*+ akpa emli kɛ ehe fɛɛ.
15 Bɔ ni ofee lɛ nɛ: Adeka lɛ kɛlɛ afee ninetalɔi* 300, elɛɛmɔ afee ninetalɔi 50, ni ekwɔlɛ afee ninetalɔi 30.
16 Feemɔ samfɛlɛ,* ninetalɔ kome kɛjɛ adeka lɛ ŋwɛigbɛ, koni ehã kane aba mli. Okɛ adeka lɛ shinaa lɛ awo adeka lɛ koŋ nɔ,+ ní ofee adeka lɛ nsɔɔdoi etɛ, shishi nɔ kɛ nɔ ni ji enyɔ kɛ nɔ ni ji etɛ.
17 “Shi mi lɛ, mikɛ nu afua+ baaba shikpɔŋ lɛ nɔ, koni mikɛkpãtã heloo fɛɛ ni yɔɔ ŋwɛi shishi ni wala mumɔ yɔɔ amɛmli lɛ hiɛ. Nɔ fɛɛ nɔ ni yɔɔ shikpɔŋ lɛ nɔ lɛ hiɛ baakpãtã.+
18 Ni mikɛ bo miikpaŋ kpaŋmɔ, ni obaabote adeka lɛ mli, bo kɛ obihii lɛ kɛ oŋa kɛ obihii lɛ aŋamɛi ní fata ohe lɛ.+
19 Ni okɛ bɔɔ nii ni hiɛ kamɔ+ lɛ srɔtoi fɛɛ enyɔnyɔɔnyɔ aya adeka lɛ mli, nuu kɛ yoo,+ koni abaa amɛyi afata ohe;
20 bɔɔ nii ni filikiɔ kɛ amɛhenɔi, shĩa kooloi kɛ amɛhenɔi, kɛ kooloi fɛɛ ni wamɔɔ yɛ shikpɔŋ lɛ nɔ lɛ kɛ amɛhenɔi, eko fɛɛ eko enyɔnyɔɔnyɔ baaba oŋɔɔ yɛ adeka lɛ mli koni abaa amɛyi.+
21 Shi bo lɛ, buamɔ niyenii srɔtoi fɛɛ anaa+ ní okɛya adeka lɛ mli, koni bo kɛ kooloi lɛ fɛɛ aye.”
22 Ni Noa fee nɔ fɛɛ nɔ tamɔ bɔ ni Nyɔŋmɔ fã lɛ lɛ. Nakai pɛpɛɛpɛ efee.+
Shishigbɛ Niŋmaa
^ Eji Hebri fɔŋwiemɔ ni damɔ shi kɛhã ŋwɛibɔfoi lɛ.
^ Shishitsɔɔmɔi komɛi kɛɔ akɛ, “ejaakɛ efeɔ enii yɛ heloo lɛ naa.”
^ Eeenyɛ efee akɛ, eshishi ji “Mɛiashitswialɔi,” ni tsɔɔ akɛ, mɛi ni tsirɛɔ mɛi amɛtswiaa shi. Kwɛmɔ Wiemɔi Titrii Amligbalamɔ lɛ.
^ Loo “Yehowa werɛ ho ehe.”
^ Loo “etsui werɛ ho ehe; edɔ lɛ yɛ etsui mli.”
^ Loo “shwamɔ ko bɛ ehe.”
^ Loo “ebeiaŋ bii.”
^ Loo “gbɔmɛi.”
^ Eji tso ko ni ama yɔɔ mli.
^ Loo “meele agbo ko.”
^ Loo “ama.”
^ Ninetalɔ kome feɔ sɛntimitai 44.5 (iŋtsii 17.5). Kwɛmɔ Saji Krokomɛi B14 lɛ.
^ Loo “nɔ ni akɛwo adeka lɛ yiteŋ lɛ.”
