1 Mose 7:1-24
7 No sɛɛ lɛ, Yehowa kɛɛ Noa akɛ: “Botemɔ adeka lɛ mli, bo kɛ oshĩabii lɛ fɛɛ, ejaakɛ bo ji mɔ ni mina akɛ oji jalɔ yɛ mihiɛ yɛ yinɔbii nɛɛ ateŋ.+
2 Okɛ kooloo fɛɛ kooloo ni he tse kpawo-kpawo,*+ nuu kɛ yoo; kɛ kooloo fɛɛ kooloo ni he tseee enyɔnyɔɔnyɔ pɛ, nuu kɛ yoo, aya adeka lɛ mli;
3 kɛ bɔɔ nii ni filikiɔ yɛ ŋwɛi lɛ hu kpawo-kpawo,* nuu kɛ yoo, koni akɛbaa shwiei ni amɛbaawo lɛ ayi yɛ shikpɔŋ lɛ nɔ fɛɛ.+
4 Ejaakɛ biɛ gbii kpawo pɛ mli lɛ, mahã nugbɔ anɛ+ yɛ shikpɔŋ lɛ nɔ jetsɛremɔ kɛ jenamɔ gbii 40,+ ni makpãtã nɔ fɛɛ nɔ ni hiɛ kã ni mifee lɛ hiɛ kɛje shikpɔŋ lɛ nɔ.”+
5 Kɛkɛ ni Noa fee nɔ fɛɛ nɔ ni Yehowa fã lɛ lɛ.
6 Be ni nu afua lɛ ba shikpɔŋ lɛ nɔ lɛ, no mli lɛ, Noa eye afii 600.+
7 No hewɔ lɛ, Noa kɛ ebihii lɛ kɛ eŋa kɛ ebihii lɛ aŋamɛi lɛ bote adeka lɛ mli dani nu afua lɛ ba.+
8 Kooloo fɛɛ kooloo ni he tse kɛ kooloo fɛɛ kooloo ni he tseee kɛ bɔɔ nii ni filikiɔ kɛ nɔ fɛɛ nɔ ni tsiɔ ehe yɛ shikpɔŋ lɛ nɔ lɛ,+
9 amɛtee Noa ŋɔɔ yɛ adeka lɛ mli enyɔnyɔɔnyɔ, nuu kɛ yoo, tamɔ bɔ ni Nyɔŋmɔ fã Noa lɛ.
10 Ni gbii kpawo sɛɛ lɛ, nu afua lɛ ba shikpɔŋ lɛ nɔ.
11 Noa wala be mli afi ni ji afi 600 lɛ mli, yɛ nyɔɔŋ ni ji enyɔ lɛ nɔ, yɛ nyɔɔŋ lɛ nɔ gbi ni ji 17 lɛ nɔ, nakai gbi lɛ nɔ lɛ, nui babaoo ni mli kwɔlɔ lɛ anuhiŋmɛii lɛ fɛɛ fɛlɛ, ni agbele ŋwɛi nui lɛ shinai* lɛ.+
12 Ni nugbɔ nɛ yɛ shikpɔŋ lɛ nɔ jetsɛremɔ kɛ jenamɔ gbii 40.
13 Nakai gbi lɛ nɔ nɔŋŋ lɛ, Noa kɛ ebihii lɛ, Shem kɛ Ham kɛ Yafet+ kɛ Noa ŋa kɛ ebihii lɛ aŋamɛi etɛ lɛ bote adeka lɛ mli.+
14 Amɛ kɛ ŋa mli kooloi fɛɛ, eko fɛɛ eko kɛ ehenɔi, kɛ shĩa kooloi fɛɛ, eko fɛɛ eko kɛ ehenɔi, kɛ shikpɔŋ lɛ nɔ kooloi ni wamɔɔ fɛɛ, eko fɛɛ eko kɛ ehenɔi, kɛ bɔɔ nii ni filikiɔ fɛɛ, eko fɛɛ eko kɛ ehenɔi, loofɔlɔ fɛɛ loofɔlɔ, bɔɔ nɔ fɛɛ bɔɔ nɔ ni yɔɔ fiji lɛ, tee adeka lɛ mli.
15 Heloo fɛɛ heloo ní wala mumɔ yɔɔ emli lɛ tee Noa ŋɔɔ, enyɔnyɔɔnyɔ yɛ adeka lɛ mli.
16 No hewɔ lɛ, heloo fɛɛ heloo, nuu kɛ yoo, tee adeka lɛ mli, tamɔ bɔ ni Nyɔŋmɔ fã lɛ lɛ. No sɛɛ lɛ, Yehowa ŋa shinaa lɛ ewo eyi.
17 Nugbɔ lɛ tee nɔ enɛ gbii 40 yɛ shikpɔŋ lɛ nɔ, ni nui ni ta shikpɔŋ lɛ nɔ lɛ tee nɔ efa, ni ewó adeka lɛ nɔ kɛjɛ shikpɔŋ, ni etɔɔ nui lɛ ahiɛ.
18 Nui lɛ ha shikpɔŋ lɛ nɔ, ni etee nɔ efa babaoo, shi adeka lɛ tɔɔ nui lɛ ahiɛ.
19 Nui lɛ fa babaoo yɛ shikpɔŋ lɛ nɔ aahu akɛ, eha gɔji ni kwɔlɔ fɛɛ ni yɔɔ ŋwɛi shishi lɛ anɔ.+
20 Nui lɛ kwɔ kɛtee ŋwɛi kɛteke gɔji lɛ ninetalɔi* 15.
21 No hewɔ lɛ, bɔɔ nii fɛɛ ni hiɛ kamɔ* ni tsiɔ amɛhe yɛ shikpɔŋ lɛ nɔ lɛ hiɛ kpãtã+—bɔɔ nii ni filikiɔ kɛ shĩa kooloi kɛ ŋa mli kooloi kɛ kooloi bibiibibii ni yi fa babaoo* kɛ gbɔmɛi fɛɛ.+
22 Nɔ fɛɛ nɔ ni yɔɔ shikpɔŋ gbiŋ nɔ ní wala mumɔ yɔɔ* egugɔ mli lɛ gbo.+
23 No hewɔ lɛ, ekpãtã* nɔ fɛɛ nɔ ni hiɛ kã lɛ hiɛ kɛje shikpɔŋ lɛ nɔ, ni gbɔmɔ kɛ kooloi kɛ kooloi ni wamɔɔ kɛ bɔɔ nii ni filikiɔ yɛ ŋwɛi lɛ fata he. Akpãtã amɛ fɛɛ amɛhiɛ kɛje shikpɔŋ lɛ nɔ;+ Noa kɛ mɛi ni kɛ lɛ yɔɔ adeka lɛ mli lɛ pɛ ayi ná wala.+
24 Ni nui lɛ tee nɔ eha shikpɔŋ lɛ nɔ gbii 150.+
Shishigbɛ Niŋmaa
^ Shishitsɔɔmɔi komɛi kɛɔ akɛ, “kooloo fɛɛ kooloo ni he tse lɛ enyɔ-enyɔ toi kpawo.”
^ Shishitsɔɔmɔi komɛi kɛɔ akɛ, “bɔɔ nii ni filikiɔ yɛ ŋwɛi lɛ enyɔ-enyɔ toi kpawo.”
^ Loo “agbói.”
^ Ninetalɔ kome feɔ sɛntimitai 44.5 (iŋtsii 17.5). Kwɛmɔ Saji Krokomɛi B14 lɛ.
^ Hebri sht. ŋm., “heloo fɛɛ.”
^ Hebri wiemɔ ni akɛtsu nii yɛ biɛ lɛ kɔɔ kooloi bibiibibii ni keɔ yuu kɛnyiɛɔ, ni ekomɛi nyiɛɔ kɔɔyɔɔ lɛ mli, ekomɛi yɛ nu mli, ni ekomɛi hu yɛ shikpɔŋ lɛ nɔ lɛ ahe.
^ Loo “muɔ wala mumɔ yɛ.”
^ Ni ji, Nyɔŋmɔ.
