Petro Klɛŋklɛŋ Wolo Lɛ 3:1-22
3 Nakai nɔŋŋ nyɛ ŋamɛi lɛ hu, nyɛbaa nyɛhe shi nyɛwoa nyɛwumɛi ashishi,+ koni kɛ́ amɛteŋ mɛi komɛi booo wiemɔ lɛ toi lɛ, atsɔ nyɛjeŋba nɔ ni nine ashɛ amɛnɔ ni wiemɔ fataaa he,+
2 ejaakɛ amɛ diɛŋtsɛ amɛnaa nyɛjeŋba ni he tse+ lɛ, kɛ agbɛnɛ hu, bulɛ ni mli kwɔ ni nyɛjieɔ lɛ kpo lɛ.
3 Nyɛkahãa nyɛhewulamɔ lɛ feɔ kponɔgbɛ nɔ—yigbɔɔ kɛ shika tsuru nibii ni akɛwulaa he+ loo atadei fɛfɛji ni awoɔ—
4 shi moŋ, nyɛhãa efea tsuiŋ gbɔmɔ ni akɛtee, yɛ mumɔ ni yɔɔ kpoo ni he jɔ+ lɛ hewulamɔ ni fiteee lɛ mli, nɔ ni jara wa yɛ Nyɔŋmɔ hiɛ lɛ.
5 Ejaakɛ tsutsu lɛ, nɛkɛ ji bɔ ni yei krɔŋkrɔŋi ni ná hiɛnɔkamɔ yɛ Nyɔŋmɔ mli lɛ wula amɛhe, ni amɛba amɛhe shi amɛwo amɛwumɛi ashishi,
6 tamɔ bɔ ni Sara bo Abraham toi, ni etsɛ lɛ nuŋtsɔ lɛ.+ Ni nyɛtsɔmɔ Sara bii, gbii abɔ ni nyɛyaa nɔ nyɛfeɔ ekpakpa, ni nyɛhãaa nɔ ko awo nyɛhe gbeyei lɛ.+
7 Nakai nɔŋŋ nyɛ wumɛi lɛ hu, nyɛyaa nɔ nyɛkɛ nyɛŋamɛi lɛ ahia shi yɛ nilee naa.* Nyɛkɛ woo+ awoa yoo akɛ gbɛ́ ni waaa tamɔ nyɛ, ejaakɛ amɛ hu amɛkɛ nyɛ fɛɛ ji wala ni akɛdro nyɛ lɛ niyelɔi,+ koni akatsĩmɔ nyɛsɔlemɔi lɛ gbɛ.
8 Naagbee lɛ, nyɛ fɛɛ nyɛnáa jwɛŋmɔ kome,*+ nyɛnua he nyɛhãa nyɛhe, nyɛjiea nyɛmimɛi ateŋ suɔmɔ, kɛ musuŋtsɔlɛ,+ kɛ heshibaa kpo.+
9 Nyɛkɛ efɔŋ akatoa efɔŋ najiaŋ,+ loo jɛmɔ yɛ jɛmɔ najiaŋ.+ Shi moŋ, nyɛjɔa kɛtoa najiaŋ,+ ejaakɛ enɛ hewɔ atsɛ nyɛ, koni nyɛná jɔɔmɔ.*
10 Ejaakɛ “mɔ fɛɛ mɔ ni sumɔɔ wala, ni eesumɔ ni eye gbii kpakpai pii lɛ, ebu elilɛi he kɛje efɔŋ he,+ kɛ enaabu hu, ni ekalaka mɛi.
11 Etsi ehe kɛje efɔŋ he,+ ni efee ekpakpa;+ etao toiŋjɔlɛ ni etiu sɛɛ.+
12 Ejaakɛ Yehowa* hiŋmɛii kã jalɔi ahe, ni kɛ́ amɛsɔle kɛ hiɛdɔɔ kɛkpa lɛ fai lɛ,+ ekɛ etoi boɔ amɛ toi, shi Yehowa* jieɔ ehiɛ ekaa mɛi ni feɔ efɔŋ lɛ.”+
13 Anɔkwa, kɛji nyɛhiɛ dɔɔ ekpakpafeemɔ he lɛ, namɔ baaye nyɛ awui?+
14 Shi kɛ́ jalɛ hewɔ nyɛna nɔ po lɛ, nyɛyɛ miishɛɛ.+ Shi nyɛkashea nɔ ni woɔ amɛhe gbeyei lɛ gbeyei,* ni nyɛkahaoa hu.+
15 Shi moŋ, nyɛbua Kristo lɛ yɛ nyɛtsuiiaŋ akɛ Nuŋtsɔ ni yɔɔ krɔŋkrɔŋ, ni be fɛɛ be lɛ nyɛsaa nyɛhe nyɛtoa koni nyɛná hetoo nyɛhã mɔ fɛɛ mɔ ni biɔ nyɛ hiɛnɔkamɔ ni nyɛyɔɔ lɛ he sane lɛ, shi nyɛkɛ mlijɔlɛ+ kɛ bulɛ ni mli kwɔ afea nakai.+
16 Nyɛyaa nɔ nyɛhiɛa henilee kpakpa mli,+ koni nɔ fɛɛ nɔ mli ni amɛwieɔ amɛshiɔ nyɛ yɛ lɛ, nyɛnifeemɔi kpakpai akɛ Kristo sɛɛnyiɛlɔi+ lɛ ahã mɛi ni wieɔ shiɔ nyɛ lɛ ahiɛ agboi.+
17 Ejaakɛ ehi akɛ nyɛaana nɔ akɛni nyɛmiifee ekpakpa lɛ hewɔ,+ kɛ́ Nyɔŋmɔ miisumɔ akɛ eŋmɛ no gbɛ, moŋ fe nɔ ni nyɛbaana nɔ akɛni nyɛmiifee efɔŋ lɛ hewɔ.+
18 Ejaakɛ Kristo gbo shi kome nyɔŋlo yɛ eshai ahewɔ,+ lɛ jalɔ lɛ yɛ mɛi ni ejaaa lɛ anajiaŋ,+ bɔ ni afee ni enyiɛ nyɛhiɛ kɛya Nyɔŋmɔ ŋɔɔ.+ Agbe lɛ yɛ heloo mli,+ shi ahã ehiɛ kã yɛ mumɔ mli.+
19 Ni nɛkɛ shihilɛ nɛɛ mli ejɛ etee eyashiɛ etsɔɔ mumɔi ni awo amɛ tsuŋ lɛ,+
20 mɛi ni tsutsu lɛ amɛgbo toi be ni Nyɔŋmɔ toɔ etsui shi kɛmɛɔ* yɛ Noa gbii lɛ amli,+ be mli ni akpɛɔ adeka lɛ,+ nɔ mli ni abaa mɛi fioo ko, ni ji susumai* kpaanyɔ ayi yɛ kɛtsɔ nu lɛ mli lɛ.+
21 Amrɔ nɛɛ, nɔ ni nakai nifeemɔ lɛ feɔ he mfoniri, ni ji baptisimɔ lɛ hu miihere nyɛyiwala (jeee kɛtsɔ heloo lɛ nɔ muji jiemɔ nɔ, shi moŋ kɛtsɔ sɔlemɔ ni asɔleɔ kɛkpaa Nyɔŋmɔ fai kɛhã henilee kpakpa lɛ nɔ),+ kɛtsɔ Yesu Kristo shitee lɛ nɔ.
22 Etee ŋwɛi, ni eyɛ Nyɔŋmɔ ninejurɔ nɔ,+ ni akɛ ŋwɛibɔfoi kɛ hegbɛi kɛ hewalɛi ewo eshishi.+
Shishigbɛ Niŋmaa
^ Loo “nyɛjiea mɔhesusumɔ kpo nyɛtsɔa nyɛŋamɛi; nyɛnua nyɛŋamɛi ashishi.”
^ Loo “nyɛjwɛŋa jwɛŋmɔ kome.”
^ Greek sht. ŋm., “nyɛná jɔɔmɔ akɛ gboshinii.”
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Shishitsɔɔmɔi komɛi kɛɔ akɛ, “nyɛkahãa ŋmiŋmi mɔa nyɛ yɛ nyɛhe gbeyei ni amɛwoɔ lɛ hewɔ.”
^ Greek sht. ŋm., “Nyɔŋmɔ tsuishitoo lɛ mɛɔ.”
^ Loo “gbɔmɛi.”
