1 Samuel 11:1-15
11 Kɛkɛ ni Nahash, Amonnyo+ lɛ kwɔ kɛba ni ebabɔ nsara ewo Yabesh+ he yɛ Gilead koni ekɛ lɛ awu. Yabesh hii lɛ fɛɛ kɛɛ Nahash akɛ: “Okɛ wɔ akpaŋ, ni wɔbaasɔmɔ bo.”
2 Nahash, Amonnyo lɛ kɛɛ amɛ akɛ: “Kɛ́ nyɛbaahã mafamɔ nyɛ fɛɛ nyɛninejurɔ hiŋmɛii lɛ, no lɛ mikɛ nyɛ baakpaŋ. Mafee nakai koni mikɛshwie Israel fɛɛ hiɛ shi.”
3 Yabesh onukpai lɛ kɛɛ lɛ akɛ: “Hã wɔ gbii kpawo koni wɔtsu kɛya Israel shikpɔji lɛ fɛɛ anɔ. Ni kɛ́ wɔnáaa mɔ ko ni baakpɔ̃ wɔ lɛ, wɔbaaŋmɛɛ wɔhe wɔhã bo.”
4 Be ko sɛɛ lɛ, mɛi ni atsu lɛ ba Saul maŋ, Gibea,+ ni amɛbabɔ maŋbii lɛ sane nɛɛ, ni maŋbii lɛ fɛɛ hole amɛgbei anɔ ni amɛfó waa.
5 Shi no mli lɛ, Saul nyiɛ kooloi lɛ asɛɛ kɛjɛ ŋa lɛ nɔ kɛmiiba, ni Saul bi akɛ: “Mɛni feɔ maŋbii lɛ? Mɛni hewɔ amɛfóɔ?” No hewɔ lɛ, amɛgba lɛ sane ni Yabesh hii lɛ babɔ lɛ.
6 Be ni Saul nu wiemɔi nɛɛ, Nyɔŋmɔ mumɔ lɛ bayi enɔ,+ ni emli wo la waa.
7 No hewɔ lɛ, emɔmɔ tsinahii enyɔ, ni efolɔ amɛmli kukuji ni ekɛtsu mɛi kɛtee Israel shikpɔji lɛ fɛɛ anɔ, ni amɛyakɛɛ akɛ: “Mɔ fɛɛ mɔ ni ebanyiɛɛɛ Saul kɛ Samuel sɛɛ lɛ, nɛkɛ abaafee etsinai!” Ni Yehowa he ŋmiŋmi mɔmɔ mɛi lɛ, ni no hã amɛje kpo kɛba kɛ jwɛŋmɔ kome.*
8 Kɛkɛ ni ekane amɛ yɛ Bezek, ni ená Israelbii 300,000 kɛ Yuda hii 30,000.
9 Agbɛnɛ amɛkɛɛ mɛi ni atsu kɛba lɛ akɛ: “Enɛ ji nɔ ni esa akɛ nyɛyakɛɛ Yabesh hii lɛ yɛ Gilead, ‘Wɔ́, be ni hulu lɛ baakɛɛ enaa waa lɛ, abaahere nyɛ.’” No hewɔ lɛ, mɛi ni atsu lɛ ba, ni amɛbakɛɛ Yabesh hii lɛ, ni amɛná miishɛɛ waa diɛŋtsɛ.
10 No hewɔ lɛ, Yabesh hii lɛ kɛɛ akɛ: “Wɔ́ ni ji wɔ́ lɛ, wɔbaaŋmɛɛ wɔhe wɔhã nyɛ koni nyɛfee wɔ nɔ fɛɛ nɔ ni sa nyɛhiɛ.”+
11 Enɔ jetsɛremɔ lɛ, Saul ja mɛi lɛ amli kui etɛ, ni leebi buu be* mli lɛ, amɛtee nsara lɛ teŋ ni amɛyagbe Amonbii+ lɛ aahu kɛyashi be ni hulu lɛ naa wa. Mɛi ni je mli lɛ gbɛ shwã bɔ ni eshwɛɛɛ amɛteŋ mɛi enyɔ yɛ he kome.
12 Kɛkɛ ni mɛi lɛ bi Samuel akɛ: “No mli lɛ, namɛi kɛɔ akɛ, ‘Ani Saul baaye wɔnɔ maŋtsɛ lo?’+ lɛ, jiemɔ hii lɛ ohã wɔ ni wɔgbe amɛ.”
13 Shi Saul kɛɛ akɛ: “Akagbe mɔ ko ŋmɛnɛ gbi nɛɛ,+ ejaakɛ ŋmɛnɛ lɛ, Yehowa ekpɔ̃ Israel.”
14 Sɛɛ mli lɛ, Samuel kɛɛ mɛi lɛ akɛ: “Nyɛbaa koni wɔyaa Gilgal+ koni wɔyawó Saul maŋtsɛ ekoŋŋ.”+
15 No hewɔ lɛ, mɛi lɛ fɛɛ tee Gilgal ni amɛyawó Saul maŋtsɛ yɛ Yehowa hiɛ yɛ Gilgal. Kɛkɛ ni amɛshã naanyobɔɔ afɔlei yɛ jɛmɛ yɛ Yehowa hiɛ.+ Ni Saul kɛ Israel hii lɛ fɛɛ ye gbi jurɔ kɛ miishɛɛ kpele.+
Shishigbɛ Niŋmaa
^ Hebri sht. ŋm., “akɛ nuu kome.”
^ Ni ji, aaafee maŋkɛ ŋmɛji enyɔ kɛyashi leebi ŋmɛji ekpaa.
