Klɛŋklɛŋ Wolo Ni Akɛmaje Tesalonikabii Lɛ 2:1-20
2 Nyɛmimɛi, nyɛ diɛŋtsɛ nyɛle lɛɛlɛŋ akɛ saramɔ ni wɔbasara nyɛ lɛ efeko efolo.+
2 Ejaakɛ eyɛ mli akɛ klɛŋklɛŋ lɛ wɔna nɔ, ni afee wɔ niseniianii yɛ Filipi,+ tamɔ bɔ ni nyɛle lɛ moŋ, shi wɔ-Nyɔŋmɔ lɛ hã wɔná ekãa koni wɔkɛjaje Nyɔŋmɔ sane kpakpa lɛ wɔtsɔɔ nyɛ+ yɛ shiteekɛwoo babaoo mli.*
3 Ejaakɛ wɔwiemɔkɛtsɔɔmɔ lɛ, jeee tɔmɔ loo muji nii mli ejɛ, ni lakamɔ hu bɛ mli,
4 shi tamɔ bɔ ni Nyɔŋmɔ ebu wɔ akɛ wɔsa akɛ atu sane kpakpa lɛ awo wɔdɛŋ lɛ, nakai wɔwieɔ, jeee koni wɔkɛsa gbɔmɛi ahiɛ, shi moŋ koni wɔkɛsa Nyɔŋmɔ, mɔ ni pɛiɔ wɔtsuii amli lɛ hiɛ.+
5 Anɔkwa, nyɛle akɛ wɔwieko yiteŋmuluwoo wiemɔ ko pɛŋ, ni wɔkwako akɛ wɔbaafee nɔ ko ni wɔkɛye nyɛ amim dã;+ Nyɔŋmɔ ji odasefonyo!
6 Ni wɔtaooo gbɔmɛi ahiɛnyam yɛ nyɛŋɔɔ loo mɛi krokomɛi aŋɔɔ, shi akɛ Kristo bɔfoi lɛ, kulɛ wɔbaanyɛ wɔtsɔ jatsu ni jara wa wɔhã nyɛ.+
7 Shi moŋ wɔmli jɔ yɛ nyɛteŋ, tamɔ bɔ ni yoo ni miihã fufɔ kɛ suɔmɔ kwɛɔ lɛ diɛŋtsɛ ebii lɛ.*
8 No hewɔ lɛ, akɛni wɔsumɔɔ nyɛ hewɔ lɛ, wɔtswa wɔfai shi* akɛ jeee Nyɔŋmɔ sane kpakpa lɛ pɛ wɔkɛbaahã nyɛ, shi moŋ wɔ diɛŋtsɛ wɔhe* hu,+ ejaakɛ wɔbasumɔ nyɛ waa diɛŋtsɛ.+
9 Nyɛmimɛi, ekã shi faŋŋ akɛ nyɛkaiɔ nitsumɔ ni wɔtsu waa kɛ deŋme ni wɔgbo lɛ. Be mli ni wɔshiɛɔ Nyɔŋmɔ sane kpakpa lɛ wɔtsɔɔ nyɛ lɛ, wɔtsu nii jenamɔ kɛ jetsɛremɔ koni wɔkɛ jatsu ni jara wa ko akafɔ̃ nyɛteŋ mɔ ko nɔ.+
10 Nyɛji odasefoi, ni nakai nɔŋŋ ji Nyɔŋmɔ hu, akɛ wɔba wɔjeŋ yɛ nyɛ ni nyɛheɔ Nuŋtsɔ lɛ nɔ nyɛyeɔ lɛ ateŋ akɛ anɔkwafoi, kɛ jalɔi, kɛ mɛi ni shwamɔ ko bɛ amɛhe.
11 Nyɛle jogbaŋŋ akɛ wɔtee nɔ wɔwie wɔtsɔɔ nyɛteŋ mɔ fɛɛ mɔ, ni wɔshɛje nyɛteŋ mɔ fɛɛ mɔ mii, ni wɔye nyɛteŋ mɔ fɛɛ mɔ odase,+ tamɔ bɔ ni tsɛ+ feɔ ebii lɛ,
12 koni nyɛya nɔ nyɛnyiɛ bɔ ni sa Nyɔŋmɔ,+ mɔ ni tsɛɔ nyɛ kɛbaa e-Maŋtsɛyeli+ kɛ enunyam lɛ mli lɛ.+
13 Anɔkwa, no hewɔ ni wɔ hu wɔdaa Nyɔŋmɔ shi ni wɔkpaaa lɛ,+ ejaakɛ be ni nyɛnine shɛ Nyɔŋmɔ wiemɔ ni nyɛnu yɛ wɔnaa lɛ nɔ lɛ, nyɛmɔ mli, jeee akɛ gbɔmɛi awiemɔ, shi moŋ akɛ Nyɔŋmɔ wiemɔ, tamɔ bɔ ni eji hu lɛɛlɛŋ lɛ, nɔ ni miitsu nii hu yɛ nyɛ ni nyɛji mɛi ni heɔ Nuŋtsɔ lɛ nɔ nyɛyeɔ lɛ amli lɛ.
14 Ejaakɛ, nyɛmimɛi, nyɛtsɔmɔ mɛi ni kaseɔ Nyɔŋmɔ asafoi ni kɛ Kristo Yesu efee ekome ni yɔɔ Yudea lɛ, ejaakɛ amanehului ni nyɛna yɛ nyɛ diɛŋtsɛ nyɛmaŋbii lɛ adɛŋ lɛ,+ no nɔŋŋ amɛ hu amɛnaa yɛ Yudafoi lɛ adɛŋ,
15 mɛi ni gbe Nuŋtsɔ Yesu+ po kɛ gbalɔi lɛ, ni amɛwa wɔ yi lɛ.+ Agbɛnɛ hu, amɛsaaa Nyɔŋmɔ hiɛ, shi moŋ, amɛwuɔ amɛshiɔ nibii ni he yɔɔ sɛɛnamɔ kɛhã gbɔmɛi fɛɛ lɛ,
16 ejaakɛ amɛbɔɔ mɔdɛŋ akɛ amɛbaatsĩ wɔ gbɛ koni wɔkawie wɔtsɔɔ jeŋmajiaŋbii lɛ ni ahere amɛyiwala.+ Yɛ nɛkɛ gbɛ nɔ lɛ, amɛwoɔ amɛhe eshai lɛ obɔ daa. Shi emlifu lɛ eba amɛnɔ agbɛnɛ.+
17 Shi nyɛmimɛi, be ni atse wɔ kɛje nyɛhe* (yɛ heloo mli, shi jeee yɛ wɔtsuii amli) be fioo ko kɛkɛ lɛ, wɔbɔ mɔdɛŋ fɛɛ ni wɔɔnyɛ koni wɔna nyɛhiɛ* ejaakɛ wɔmiishwe waa ni wɔna nyɛ.
18 Enɛ hewɔ lɛ, wɔtao akɛ wɔba nyɛŋɔɔ, hɛɛ, mi Paulo lɛ, jeee shi kome kɛkɛ mibɔ mɔdɛŋ akɛ mafee nakai, shi shii enyɔ; shi Satan folɔ wɔnaji ateŋ.
19 Ejaakɛ mɛni ji wɔhiɛnɔkamɔ, loo wɔmiishɛɛ, loo wɔmlifilimɔ akekere yɛ wɔ-Nuŋtsɔ Yesu hiɛ, yɛ be ni eba lɛ mli? Ani yɛ anɔkwale mli lɛ, jeee nyɛ ni?+
20 Ekã shi faŋŋ akɛ, nyɛji wɔnunyam kɛ wɔmiishɛɛ.
Shishigbɛ Niŋmaa
^ Shishitsɔɔmɔi komɛi kɛɔ akɛ, “yɛ pelemɔ babaoo mli.”
^ Loo “sumɔɔ lɛ diɛŋtsɛ ebii lɛ.”
^ Greek sht. ŋm., “esa wɔhiɛ jogbaŋŋ.”
^ Loo “wɔsusumai.”
^ Loo “be ni ahã nyɛgboi nyɛshi wɔ.”
^ Loo “koni wɔna nyɛ yɛ heloo mli.”
