2 Maŋtsɛmɛi 5:1-27
5 Siria maŋtsɛ lɛ yɛ tatsɛ ko ni atsɛɔ lɛ Naaman; eji gbɔmɔ wulu ni enuŋtsɔ buɔ lɛ waa, ejaakɛ Yehowa etsɔ enɔ ehã Siria eye kunim.* Eyɛ mli akɛ kpiti eshwie lɛ* moŋ, shi eji tawulɔ kãkãlɔ.
2 Be ko be ni Siriabii lɛ tee amɛyatutua Israel lɛ, amɛŋɔ Israel gbekɛ yoo fioo ko kɛba Siria, ni ebatsɔ Naaman ŋa lɛ tsulɔ.
3 Gbekɛ yoo lɛ kɛɛ enuŋtsɔ ŋa lɛ akɛ: “Miná ni minuŋtsɔ tee eyana gbalɔ+ ni yɔɔ Samaria lɛ! Kulɛ ebaatsa ekpiti lɛ ehã lɛ.”+
4 No hewɔ lɛ, etee ni eyabɔ enuŋtsɔ lɛ amaniɛ,* ni ekɛɛ lɛ nɔ ni gbekɛ yoo lɛ ni jɛ Israel shikpɔŋ lɛ nɔ lɛ wie lɛ.
5 Kɛkɛ ni Siria maŋtsɛ lɛ kɛɛ akɛ: “Yaa nɔŋŋ! Mikɛ wolo baamaje Israel maŋtsɛ lɛ.” No hewɔ lɛ etee, ni ekɛ jwiɛtɛi talɛntai* nyɔŋma, kɛ shika tsuru kapɛji 6,000, kɛ hewulamɔ atadei nyɔŋma tee.
6 Ekɛ wolo lɛ bahã Israel maŋtsɛ lɛ, ni aŋma yɛ wolo lɛ mli akɛ: “Yɛ wolo nɛɛ naa lɛ, miitsu mitsulɔ Naaman kɛmiiba oŋɔɔ koni otsa ekpiti lɛ ohã lɛ.”
7 Be ni Israel maŋtsɛ lɛ kane wolo lɛ egbe naa nɔŋŋ lɛ, egbala etadei lɛ ni ekɛɛ: “Ani Nyɔŋmɔ ji mi ni migbeɔ mɔ ni mihãa mɔ hiɔ wala mli?+ Etsu nuu nɛɛ miŋɔɔ akɛ mitsa nuu lɛ kpiti lɛ mihã lɛ! Nyɛ fɛɛ nyɛmiina akɛ bé etaoɔ ekɛ mi abé nɛɛ.”
8 Shi be ni Elisha, anɔkwa Nyɔŋmɔ lɛ gbɔmɔ lɛ nu akɛ Israel maŋtsɛ lɛ egbala etadei lɛ, etsu ni ayakɛɛ maŋtsɛ lɛ akɛ: “Mɛni hewɔ ogbala otadei lɛ? Ofainɛ, hã eba miŋɔɔ koni ená ele akɛ gbalɔ ko yɛ Israel.”+
9 No hewɔ lɛ, Naaman kɛ ekpɔŋɔi kɛ eta shwiilii lɛ ba ni ebadamɔ Elisha shĩa lɛ shinaa lɛ naa.
10 Shi Elisha tsu ayakɛɛ lɛ akɛ: “Yaa ni oyagbee Yordan+ Faa lɛ mli shii kpawo,+ ni okpiti lɛ baaya, ni ohe baatse.”
11 Kɛkɛ ni Naaman mli wo la ni eyi gbɛ koni eya, ni ekɛɛ akɛ: “Misusu akɛ ebaaje kpo ni ebadamɔ mihiɛ ni etsɛ Yehowa, e-Nyɔŋmɔ lɛ gbɛ́i ni ekɛ enine atsɔ kpiti lɛ nɔ kɛya kɛba koni etsa mi.
12 Ani Abana kɛ Farpar, ni ji Damasko+ fai lɛ ehiii fe nui fɛɛ ni yɔɔ Israel lɛ? Ani minyɛŋ mayagbee amɛteŋ eko mli koni mihe atse?” Kɛkɛ ni etsɔ ehe ni etee kɛ mlifu.
13 Ni etsuji lɛ tsi amɛbɛŋkɛ lɛ ni amɛbi lɛ akɛ: “Mitsɛ, eji gbalɔ lɛ bi ni ofee nɔ ko ni wa kulɛ, ani ofeŋ? Shi ni ekɛɛ bo kɛkɛ akɛ, ‘Yaagbee faa lɛ mli ni ohe atse’ lɛ, no moŋ lɛ, osumɔɔɔ ni ofeɔ?”
14 No hewɔ lɛ, etee ni eyagbee Yordan Faa lɛ mli shii kpawo yɛ anɔkwa Nyɔŋmɔ lɛ gbɔmɔ lɛ wiemɔ lɛ naa.+ Kɛkɛ ni kpiti lɛ tee, ni ehewolo tsɔ tamɔ gbekɛ fioo hewolo,+ ni ehe tse.+
15 No sɛɛ lɛ, eku esɛɛ etee anɔkwa Nyɔŋmɔ lɛ gbɔmɔ lɛ ŋɔɔ,+ lɛ kɛ mɛi fɛɛ ni nyiɛ esɛɛ kɛba lɛ,* ni eyadamɔ Elisha hiɛ ni ekɛɛ akɛ: “Kpaako miná mile akɛ Nyɔŋmɔ ko bɛ shikpɔŋ lɛ nɔ he ko he ko akɛ ja Israel.+ No hewɔ lɛ, ofainɛ, hemɔ nikeenii* ni mi, otsulɔ kɛba nɛɛ.”
16 Shi Elisha kɛɛ lɛ akɛ: “Gbii abɔ ni Yehowa, mɔ ni misɔmɔɔ lɛ* lɛ hiɛ kã nɛɛ, miheŋ.”+ Ni enyɛ enɔ doo koni ehe, shi eheee.
17 No hewɔ lɛ, Naaman kɛɛ akɛ: “Ofainɛ, kɛ́ oheee lɛ, belɛ hã ni ahã mi, otsulɔ, shikpɔŋ nɛɛ nɔ sũ ni tejii* enyɔ baanyɛ atere, ejaakɛ kɛjɛ ŋmɛnɛ kɛyaa lɛ, mi, otsulɔ, mishãŋ shãa afɔle loo afɔle kroko mihãŋ nyɔŋmɔ ko nyɔŋmɔ ko dɔŋŋ akɛ ja Yehowa.
18 Shi Yehowa kɛ nɔ kome nɛɛ pɛ ake mi, otsulɔ: Kɛ́ minuŋtsɔ tee Rimon jamɔhe* lɛ koni eyakoto lɛ lɛ, akɛni ekpasaa minine hewɔ lɛ, esa akɛ makoto shi yɛ Rimon jamɔhe lɛ. Kɛ́ mikoto shi yɛ Rimon jamɔhe lɛ, no lɛ, miikpa fai ni Yehowa, kɛke mi, otsulɔ.”
19 Kɛkɛ ni ekɛɛ lɛ akɛ: “Yaa yɛ toiŋjɔlɛ mli.” Be ni eshi Elisha hiɛ ni etee saŋŋ lɛ,
20 Gehazi,+ anɔkwa Nyɔŋmɔ lɛ gbɔmɔ Elisha+ sɔɔlɔ lɛ kɛɛ ehe akɛ: ‘Naa, minuŋtsɔ ehã Naaman, Sirianyo+ lɛ etee ni eheee nikeenii ni ekɛba lɛ yɛ edɛŋ. Gbii abɔ ni Yehowa hiɛ kã nɛɛ, masha foi kɛyi esɛɛ ni miyahe nɔ ko yɛ edɛŋ.’
21 No hewɔ lɛ, Gehazi wó foi kɛyi Naaman sɛɛ. Be ni Naaman na akɛ mɔ ko miiba kɛ foi yɛ esɛɛ lɛ, eyi shi yɛ eshwiili lɛ mli ni ekɛ lɛ yakpe ni ebi lɛ akɛ: “Nɔ fɛɛ nɔ yɛ jogbaŋŋ lo?”
22 Kɛkɛ ni ekɛɛ lɛ akɛ: “Nɔ fɛɛ nɔ yɛ jogbaŋŋ. Minuŋtsɔ tsu mi oŋɔɔ akɛ, ‘Naa! Bianɛ nɔŋŋ oblahii enyɔ komɛi jɛ gbalɔi abii* lɛ ateŋ yɛ Efraim gɔji lɛ anɔ kɛba miŋɔɔ. Ofainɛ, hã amɛ jwiɛtɛi talɛnta kome kɛ hewulamɔ atadei enyɔ.’”+
23 Naaman kɛɛ lɛ akɛ: “Hemɔ talɛntai enyɔ.” Enyɛ enɔ doo,+ ni efimɔ jwiɛtɛi talɛntai enyɔ ewo kotoku mli ehã lɛ ni ekɛ hewulamɔ atadei enyɔ fata he, ni ehã esɔɔlɔi enyɔ tere kɛnyiɛ Gehazi hiɛ kɛtee.
24 Be ni eshɛ Ofel* lɛ, ehe yɛ hii lɛ adɛŋ ni ekɛyato shĩa ni ewo hii lɛ gbɛ. Be ni sɔɔlɔi lɛ tee lɛ,
25 etee ni eyadamɔ enuŋtsɔ Elisha masɛi. Elisha bi lɛ akɛ: “Gehazi, nɛgbɛ ojɛ?” Shi ekɛɛ akɛ: “Otsulɔ eyako he ko.”+
26 Elisha kɛɛ lɛ akɛ: “Ani osusuɔ akɛ mileee akɛ oyi nuu lɛ sɛɛ, ni eyi shi yɛ eshwiili lɛ mli ni ekɛ bo bakpe?* Ani be nɛɛ ji be ni akɛheɔ jwiɛtɛi loo atadei loo oliv ŋmɔji loo wain ŋmɔji loo gwantɛŋi loo tsinai loo tsuji hii loo tsuji yei?+
27 Enɛ hewɔ lɛ, Naaman kpiti+ lɛ baashwie bo kɛ oseshibii kɛya naanɔ.” Amrɔ nɔŋŋ ni kpiti shwie Gehazi, ni eyɛ futaa tamɔ snoo,+ ni eshi Elisha hiɛ etee.
Shishigbɛ Niŋmaa
^ Loo “Yehowa etsɔ enɔ ehere Siria.”
^ Loo “nɔ ko eshwie lɛ.”
^ Eeenyɛ efee akɛ Naaman ni yabɔ amaniɛ lɛ.
^ Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
^ Hebri sht. ŋm., “jɔɔmɔ.”
^ Hebri sht. ŋm., “lɛ kɛ nsara lɛ fɛɛ.”
^ Hebri sht. ŋm., “mɔ ni midamɔɔ ehiɛ.”
^ Loo “teji okpɔŋɔ.” Teji nɛɛ ji tejinuu kɛ okpɔŋɔyoo bi.
^ Loo “sɔlemɔ shĩa.”
^ Eeenyɛ efee akɛ, akɛ wiemɔ ni ji “gbalɔi abii” lɛ tsuɔ nii kɛhãa mɛi ni yaa skul ni akɛtsɔɔ gbalɔi anii, loo akɛtsuɔ nii kɛhãa gbalɔi akuu ko.
^ Eji he ko yɛ Samaria, eeenyɛ efee akɛ, eji gɔŋkpɔ ko.
^ Loo “Ani mitsui fataaa ohe yɛ jɛmɛ be ni nuu lɛ yi shi yɛ eshwiili lɛ mli ni ekɛ bo bakpe lɛ?”
