Wolo Ni Ji Enyɔ Ni Akɛmaje Korintobii Lɛ 12:1-21
12 Esa akɛ mashwã. Sɛɛnamɔ ko bɛ he, shi mibawie Nuŋtsɔ lɛ ninai+ kɛ kpojiemɔi ahe.+
2 Mile mɔ ko ni kɛ Kristo efee ekome, ni afii 14 nɛ lɛ—kɛ́ yɛ gbɔmɔtso mli jio, jeee gbɔmɔtso mli jio, mileee; Nyɔŋmɔ le—ashá lɛ kɛtee ŋwɛi ni ji etɛ lɛ.
3 Hɛɛ, mile mɔ nɛɛ—kɛ́ yɛ gbɔmɔtso mli jio, jeee gbɔmɔtso mli jio, mileee; Nyɔŋmɔ le—
4 ashá lɛ kɛtee paradeiso ni eyanu wiemɔi ni ehiii wiemɔ ni mla hu eŋmɛɛɛ gbɛ akɛ mɔ ko tsĩɔ tã.
5 Mashwã yɛ mɔ ko ni tamɔ nɛkɛ he, shi mishwãŋ yɛ mi diɛŋtsɛ mihe, akɛ ja yɛ migbɔjɔmɔi lɛ ahe.
6 Ejaakɛ kɛ́ miisumɔ ni mashwã po lɛ, no efeŋ mi mɔ ni bɛ jwɛŋmɔ, ejaakɛ mawie anɔkwale. Shi mikpoo akɛ mafee nakai, bɔ ni afee ni mɔ ko mɔ ko akabu mi fe nɔ ni enaa yɛ mihe aloo nɔ ni enuɔ yɛ minaa,
7 yɛ nɛkɛ kpojiemɔi ni nɔ bɛ ni minine shɛ nɔ nɛɛ kɛkɛ ahewɔ.
Bɔ ni afee ni mikawó mihe nɔ fe nine lɛ, ahã mi ŋmei ko yɛ heloo lɛ mli,+ Satan bɔfo ko, koni eya nɔ egbála mi mai,* koni mikawó mihe nɔ fe nine.
8 Mikpa Nuŋtsɔ lɛ fai shii etɛ yɛ enɛ he, koni ŋmei lɛ aje minɔ.
9 Shi ekɛɛ mi akɛ: “Midromɔ lɛ fa hã bo, ejaakɛ mihewalɛ lɛ yeɔ emuu yɛ gbɔjɔmɔ mli.”+ No hewɔ lɛ, mikɛ miishɛɛ baashwã yɛ migbɔjɔmɔi lɛ ahe, bɔ ni afee ni Kristo lɛ hewalɛ lɛ aya nɔ aha minɔ tamɔ mama tsũ ko.
10 No hewɔ lɛ, mináa miishɛɛ yɛ gbɔjɔmɔi amli, yɛ jɛmɔi amli, yɛ hiamɔ bei amli, yɛ yiwai kɛ shihilɛi ni mli wawai amli, yɛ Kristo hewɔ. Ejaakɛ kɛ́ migbɔjɔ lɛ, no moŋ mináa hewalɛ.+
11 Mitsɔ mɔ ni bɛ jwɛŋmɔ. Nyɛ nyɛnyɛ minɔ ni mifee nakai, ejaakɛ kulɛ esa akɛ nyɛjie miyi. Ejaakɛ kɛ́ mijeee nɔ ko po lɛ, nɔ kome folo po bɛ ni nyɛbɔfoi ni he tse fe fɛɛ lɛ kɛfe mi.+
12 Anɔkwa, mijie bɔfo ni mi ji lɛ he okadii lɛ akpo yɛ nyɛteŋ kɛ shifimɔ babaoo,+ kɛ agbɛnɛ hu, kɛtsɔ okadii kɛ naakpɛɛ nii kɛ hewalɛ nitsumɔi anɔ.+
13 Ejaakɛ mɛni mli asafoi krokomɛi lɛ ahiɛ ba nyam yɛ fe nyɛ, akɛ ja nɔ ni mi diɛŋtsɛ lɛ mitsɔɔɔ jatsu ko mihãaa nyɛ lɛ mli?+ Nyɛjɛa mlihilɛ mli nyɛkɛ nɛkɛ efɔŋ nɛɛ akea mi.
14 Naa! Enɛ ji shii etɛ nɔ ni misaa mihe akɛ miiba nyɛŋɔɔ, ni mibatsɔŋ jatsu mihãŋ nyɛ. Ejaakɛ jeee nyɛnii mitaoɔ,+ shi moŋ nyɛ diɛŋtsɛ; ejaakɛ akpaaa gbɛ akɛ bii+ baabua nii anaa amɛto amɛfɔlɔi, shi moŋ fɔlɔi ji mɛi ni akpaa gbɛ akɛ amɛbaabua nii anaa amɛto amɛbii.
15 Ejaakɛ migbɛfaŋ lɛ, miyɛ he miishɛɛ babaoo akɛ mikɛ nii ni miyɔɔ lɛ fɛɛ baahã, ni akɛ mi atsu nii kɛwula shi yɛ nyɛhewɔ.*+ Kɛ́ misumɔɔ nyɛ babaoo nɛkɛ lɛ, ani esa akɛ nyɛjie suɔmɔ bibioo kpo nyɛtsɔɔ mi?
16 Shi bɔ fɛɛ bɔ ni sane lɛ ji lɛ, mitsɔɔɔ jatsu mihãaa nyɛ.+ Fɛɛ sɛɛ lɛ, nyɛkɛɔ akɛ “mihiɛ tɛ̃” ni mitsɔ “ŋaa gbɛ nɔ” midũ nyɛ.
17 Mitsɔɔɔ mɛi ni mitsu amɛ nyɛŋɔɔ lɛ ateŋ mɔ ko nɔ miyeee nyɛhe nii, aloo mifee nakai?
18 Mikpa Tito fai ni mitsu lɛ kɛ nyɛmi nuu lɛ. Tito yeee nyɛhe nii ko kwraa, aloo efee nakai?+ Ani jeee mumɔ kome too lɛ nɔŋŋ mli wɔnyiɛ yɛ? Ani jeee nanemaahei kome too lɛ nɔŋŋ amli wɔnyiɛ yɛ?
19 Ani nyɛmiisusu akɛ wɔnaa sɔŋŋ wɔjieɔ wɔtsɔɔ nyɛ nɛɛ? Wɔmiiwie yɛ Nyɔŋmɔ hiɛ yɛ Kristo mli. Shi mɛi ni asumɔɔ, nɔ ni wɔfeɔ lɛ fɛɛ lɛ wɔmiifee ni wɔkɛtswa nyɛ wɔma shi.
20 Ejaakɛ miishe gbeyei akɛ yɛ gbɛ ko nɔ lɛ kɛ́ miba lɛ, ekolɛ mibanaŋ nyɛ bɔ ni mitaoɔ, ni mibafeŋ bɔ ni nyɛ hu nyɛtaoɔ, moŋ lɛ ekolɛ mabana béi, kɛ awuŋayeli, kɛ mlifu, kɛ naataamɔ, kɛ mɔfitemɔ, kɛ ablɛbiwiemɔ,* kɛ henɔwomɔ, kɛ basabasafeemɔ.
21 Kɛ́ miba ekoŋŋ lɛ, ekolɛ mi-Nyɔŋmɔ lɛ baahã mihiɛ agbo yɛ nyɛhiɛ, ni miwerɛ baaho mihe yɛ mɛi babaoo ni fee esha be ko ni eho, shi amɛtsakeko amɛtsui yɛ amɛhe ni amɛkɛwo muji nii kɛ ajwamaŋbɔɔ* kɛ jeŋba gbonyo ni efeee mɔ hiɛgbele* mli lɛ hewɔ.
Shishigbɛ Niŋmaa
^ Loo “eyi mi.”
^ Loo “nyɛsusumai ahewɔ.”
^ Loo “mɛi-ahe-wiemɔ.”
^ Greek mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
^ Loo “nyɛnyɛŋtswibɔɔ.” Greek, a·selʹgei·a. Kwɛmɔ Wiemɔi Titrii Amligbalamɔ lɛ.
