Wolo Ni Ji Enyɔ Ni Akɛmaje Korintobii Lɛ 4:1-18
4 No hewɔ lɛ, akɛni akɛ sɔɔmɔ nɛɛ ewo wɔdɛŋ yɛ mɔbɔ ni ana wɔ lɛ hewɔ lɛ, wɔŋmɛɛɛ sɔɔmɔ nɛɛ he.
2 Shi moŋ wɔkwa hiɛgbejianii ni afeɔ yɛ teemɔŋ lɛ, wɔnyiɛɛɛ yɛ lakamɔ mli, ni wɔkɛ nɔ ko futuuu Nyɔŋmɔ wiemɔ lɛ;+ shi moŋ wɔtsɔɔ anɔkwale lɛ ni wɔjieɔ lɛ kpo faŋŋ lɛ nɔ wɔjieɔ wɔhe yi wɔhãa gbɔmɔ fɛɛ gbɔmɔ henilee yɛ Nyɔŋmɔ hiɛ.+
3 Kɛ́ yɛ anɔkwale mli lɛ, aha sane kpakpa ni wɔjajeɔ lɛ hiɛ lɛ, mɛi ni hiɛ miikpãtã lɛ ateŋ aha hiɛ yɛ,
4 mɛi ateŋ ni je nɛɛ* nyɔŋmɔ+ lɛ eshwila mɛi ni heee yeee lɛ ajwɛŋmɔi lɛ yɛ,+ koni Kristo lɛ, ni ji mɔ ni tamɔ Nyɔŋmɔ+ lɛ he sane kpakpa ni yɔɔ nyam lɛ la lɛ akakpɛ amɛnɔ.+
5 Ejaakɛ jeee wɔ diɛŋtsɛ wɔhe sane wɔshiɛɔ, shi moŋ wɔshiɛɔ Yesu Kristo he sane akɛ lɛ ji Nuŋtsɔ, ni wɔ lɛ, nyɛnyɔji ji wɔ yɛ Yesu hewɔ.
6 Ejaakɛ Nyɔŋmɔ ji mɔ ni kɛɛ akɛ: “La lɛ ajɛ duŋ lɛ mli akpɛ”+ lɛ, ni etsɔ Kristo hiɛ nɔ ehã la lɛ, ni ji Nyɔŋmɔ nilee ni yɔɔ nyam lɛ ekpɛ yɛ wɔtsuii anɔ.+
7 Shi wɔyɛ jwetri+ nɛɛ yɛ sũ nii*+ amli, koni hewalɛ ni fa kɛteke nɔ lɛ afee Nyɔŋmɔ nɔ, shi jeee nɔ ni jɛ wɔ diɛŋtsɛ wɔmli.+
8 Amiaa wɔ waa yɛ gbɛ fɛɛ gbɛ nɔ, shi jeee kpɛŋŋ bɔ ni wɔnyɛɛɛ wɔtsi wɔhe; wɔyiŋ feɔ wɔ kɔshikɔshi, shi jeee bɔ ni wɔnáaa he ko wɔtsɔ kwraa;*+
9 awaa wɔ yi, shi akpooko wɔ;+ atsirɛɔ wɔ atswiaa shi, shi wɔhiɛ kpãtãko.+
10 Be fɛɛ be lɛ, wɔgbɔmɔtso lɛ tsɔɔ shihilɛ ni baanyɛ agbe mɔ ni tamɔ nɔ ni Yesu kɛkpe lɛ mli,+ koni Yesu wala lɛ hu aje kpo faŋŋ yɛ wɔgbɔmɔtso lɛ mli.
11 Ejaakɛ wɔ mɛi ni wɔhiɛ kamɔ lɛ, daa gbi lɛ wɔkɛ gbele kpeɔ hiɛ kɛ hiɛ+ yɛ Yesu hewɔ, koni Yesu wala lɛ hu aje kpo faŋŋ yɛ wɔheloo ni baagbo lɛ mli.
12 No hewɔ lɛ, gbele miitsu nii yɛ wɔmli, shi nyɛ lɛ, wala miitsu nii yɛ nyɛmli.
13 Agbɛnɛ, akɛni wɔyɛ hemɔkɛyeli mumɔ kome lɛ nɔŋŋ, tamɔ nɔ ni aŋma yɛ he akɛ: “Mihe miye,* no hewɔ miwie lɛ”+ hewɔ lɛ; wɔ hu wɔheɔ wɔyeɔ,* no hewɔ ni, wɔwieɔ lɛ,
14 ejaakɛ wɔle akɛ mɔ ni tee Yesu shi lɛ baatee wɔ hu shi afata Yesu he, ni ekɛ wɔ kɛ nyɛ fɛɛ baayahã lɛ.+
15 Ejaakɛ nibii nɛɛ fɛɛ lɛ, nyɛhewɔ amɛyaa nɔ, koni dromɔ lɛ aya nɔ afa kɛteke nɔ babaoo fe tsutsu lɛ, ejaakɛ mɛi babaoo kɛ shidaa miihã kɛmiiwo Nyɔŋmɔ hiɛ nyam.+
16 No hewɔ lɛ, wɔŋmɛɛɛ sɔɔmɔ lɛ he, shi moŋ kɛ́ wɔkponɔgbɛ gbɔmɔ lɛ miifite po lɛ, ekã shi faŋŋ akɛ, wɔmligbɛ gbɔmɔ lɛ miitsɔ ehee gbi fɛɛ gbi.
17 Eyɛ mli akɛ amanehulu* lɛ ji be fioo ko nɔ, ni etsiii moŋ, shi nakai amanehulu lɛ hãa wɔnáa anunyam ni nɔ bɛ kwraa* ni hiɔ shi kɛyaa naanɔ;+
18 ni nakai be mli nɔŋŋ lɛ, wɔkɛ wɔhiŋmɛii emaaa nibii ni anaa lɛ anɔ, shi moŋ nibii ni anaaa lɛ anɔ.+ Ejaakɛ nibii ni anaa lɛ hiɔ shi be fioo ko, shi nibii ni anaaa lɛ hiɔ shi kɛyaa naanɔ.
Shishigbɛ Niŋmaa
^ Loo “yinɔ nɛɛ; shihilɛ gbɛjianɔtoo nɛɛ.” Kwɛmɔ Wiemɔi Titrii Amligbalamɔ lɛ.
^ Loo “yɛ kɔɔpoi ni akɛ sũ fee.”
^ Shishitsɔɔmɔi komɛi kɛɔ akɛ, “shi wɔnijiaŋ ejeee wui.”
^ Loo “Mijie hemɔkɛyeli kpo.”
^ Loo “wɔ hu wɔjieɔ hemɔkɛyeli kpo.”
^ Loo “shihilɛ ni mli wa.”
^ Greek sht. ŋm., “anunyam ni tsii waa.”
