2 Kronika 12:1-16
12 Be ni Rehoboam maŋtsɛyeli lɛ damɔ shi shiŋŋ+ ni ená hewalɛ nɔŋŋ lɛ, eje Yehowa Mla lɛ sɛɛ,+ ni Israelbii lɛ fɛɛ hu fata ehe kɛfee nakai.
2 Yɛ Maŋtsɛ Rehoboam nɔyeli afi ni ji enumɔ lɛ nɔ lɛ, Ejipt maŋtsɛ Shishak+ kwɔ kɛba koni ekɛ Yerusalem abawu, ejaakɛ amɛgbo Yehowa nɔ toi.
3 Ekɛ shwiilii 1,200, kɛ okpɔŋɔnɔtaralɔi 60,000 ba, ni asraafoi babaoo ni anyɛɛɛ akane fata ehe kɛjɛ Ejipt kɛba—asraafoi nɛɛ ekomɛi ji Libiabii, kɛ Sukbii, kɛ Etiopiabii.+
4 Eye Yuda maji ni atswa gbogboi awo amɛhe lɛ anɔ kunim, ni ebashɛ Yerusalem.
5 Gbalɔ Shemaia+ ba Rehoboam kɛ Yuda lumɛi ni ebabua amɛhe naa yɛ Yerusalem yɛ Shishak hewɔ lɛ aŋɔɔ, ni ebakɛɛ amɛ akɛ: “Nɔ ni Yehowa kɛɛ nɛ, ‘Nyɛje misɛɛ, no hewɔ lɛ, mi hu mikɛ nyɛ baawo Shishak dɛŋ.’”+
6 Kɛkɛ ni Israel lumɛi lɛ kɛ maŋtsɛ lɛ ba amɛhe shi yɛ Nyɔŋmɔ hiɛ+ ni amɛkɛɛ: “Yehowa sane ja.”
7 Be ni Yehowa na akɛ amɛba amɛhe shi lɛ, Yehowa kɛɛ Shemaia* akɛ: “Amɛba amɛhe shi. Mikpãtãŋ amɛhiɛ,+ ni etsɛŋ majie amɛ. Mitsɔŋ Shishak nɔ mifɔseŋ mimlifu lɛ mishwieŋ Yerusalem nɔ.
8 Shi amɛbaatsɔmɔ etsuji, koni amɛkwɛ akɛ, mi ni amɛbaasɔmɔ kɛ shikpɔji krokomɛi anɔ maŋtsɛmɛi* lɛ ni amɛbaasɔmɔ lɛ, te nɔ ni hi lɛ?”
9 No hewɔ lɛ, Ejipt maŋtsɛ Shishak kwɔ kɛba koni ekɛ Yerusalem abawu. Eloo Yehowa shĩa lɛ jwetrii+ lɛ kɛ maŋtsɛ shĩa lɛ jwetrii lɛ kɛtee. Eloo nɔ fɛɛ nɔ kɛtee, eloo shika tsuru tsɛŋi ni Solomon fee lɛ fɛɛ hu kɛtee.+
10 No hewɔ lɛ, Maŋtsɛ Rehoboam fee akɔɔble tsɛŋi eto najiaŋ, ni ekɛ fɛɛ wo mɛi ni kwɛɔ bulɔi* ni buɔ maŋtsɛ shĩa lɛ agbó lɛ naa lɛ anɔ lɛ adɛŋ.
11 Be fɛɛ be ni maŋtsɛ lɛ baaba Yehowa shĩa lɛ, bulɔi lɛ hiɛɔ tsɛŋi lɛ kɛbaa, ni no sɛɛ lɛ, amɛkɛkuɔ sɛɛ kɛyaa bulɔi atsũ lɛ mli ekoŋŋ.
12 Akɛni maŋtsɛ lɛ ba ehe shi hewɔ lɛ, Yehowa mlifu lɛ je enɔ,+ ni Nyɔŋmɔ kpãtãaa amɛhiɛ butuu.+ Agbɛnɛ hu, ana nibii kpakpai komɛi yɛ Yuda.+
13 Maŋtsɛ Rehoboam waje ehe yɛ Yerusalem, ni etee nɔ eye nɔ; be ni Rehoboam batsɔ maŋtsɛ lɛ, no mli lɛ, eye afii 41, ni eye maŋtsɛ afii 17 yɛ Yerusalem, ni ji maŋ ni Yehowa hala yɛ Israel wekui lɛ fɛɛ amli koni egbɛ́i akã nɔ lɛ. Atsɛɔ maŋtsɛ lɛ mami akɛ Naama, eji Amon yoo.+
14 Shi Rehoboam fee efɔŋ, ejaakɛ ekpɛɛɛ mli yɛ etsui mli akɛ ebaatao Yehowa sɛɛ gbɛ.+
15 Shi Rehoboam shihilɛ mli saji fɛɛ, kɛjɛ shishijee kɛyashi naagbee lɛ, aŋmala yɛ gbalɔ Shemaia,+ kɛ Ido,+ ninalɔ lɛ wekutɔkpaa woji lɛ amli. Nakai beiaŋ fɛɛ lɛ, Rehoboam kɛ Yeroboam kɛ amɛhe wu ta.+
16 Ni Rehoboam gbo* ni afu lɛ yɛ David Maŋ+ lɛ mli; ni ebinuu Abiya+ baye maŋtsɛ yɛ esɛɛ.
Shishigbɛ Niŋmaa
^ Loo “Yehowa wiemɔ lɛ ba Shemaia ŋɔɔ.”
^ Hebri sht. ŋm., “maŋtsɛyelii.”
^ Hebri sht. ŋm., “foijelɔi.”
^ Loo “kɛ etsɛmɛi lɛ yawɔ.”
