2 Kronika 13:1-22
13 Yɛ Maŋtsɛ Yeroboam nɔyeli afi ni ji 18 lɛ nɔ lɛ, Abiya batsɔ Yuda maŋtsɛ.+
2 Eye maŋtsɛ afii etɛ yɛ Yerusalem. Atsɛɔ emami akɛ Mikaia,*+ ni ji Uriel ni jɛ Gibea+ lɛ biyoo lɛ. Ni ta te shi yɛ Abiya kɛ Yeroboam teŋ.+
3 Abiya kɛ asraafoi 400,000 ni ji tawulɔi kãkãlɔi ni atsɔse amɛ*+ tee ta lɛ. Ni Yeroboam bua tawulɔi kãkãlɔi 800,000 ni atsɔse amɛ* anaa koni amɛkɛ Abiya ayawu.
4 Ni Abiya damɔ Zemaraim Gɔŋ ni yɔɔ Efraim gɔji lɛ anɔ lɛ nɔ ni ekɛɛ: “Yeroboam kɛ Israel fɛɛ, nyɛboa mi toi.
5 Ani nyɛleee akɛ Yehowa, Israel Nyɔŋmɔ lɛ tsɔ ŋoo kpaŋmɔ*+ nɔ ekɛ Israel maŋtsɛyeli lɛ hã David kɛ ebihii+ lɛ koni amɛye nɔ kɛya naanɔ?+
6 Shi Nebat binuu Yeroboam,+ ni ji David binuu Solomon tsulɔ lɛ, te shi ni etse enuŋtsɔ lɛ hiɛ atua.+
7 Ni hii yaka gbɔmɛi ni tsuuu nɔ ko yafata* ehe. Ni amɛtse Solomon binuu Rehoboam hiɛ atua be ni Rehoboam edako ni etsui esako ni enyɛɛɛ ete shi ewo amɛ lɛ.
8 “Ni agbɛnɛ, akɛni nyɛyi fa ni nyɛyɛ shika tsuru tsinabi amagai ni Yeroboam fee ehã nyɛ akɛ nyɔŋmɔi+ lɛ hewɔ lɛ, efeɔ nyɛ akɛ nyɛbaanyɛ nyɛte shi nyɛwo Yehowa maŋtsɛyeli ni ekɛwo David bihii lɛ adɛŋ lɛ.
9 Ani nyɛshwieko Yehowa osɔfoi,+ ni ji Aaron seshibii lɛ, kɛ Levibii lɛ? Ni ani nyɛhalako nyɛ diɛŋtsɛ nyɛsɔfoi tamɔ bɔ ni mɛi ni jɛ shikpɔji krokomɛi anɔ lɛ feɔ lɛ?+ Mɔ fɛɛ mɔ ni kɛ tsinanuu kɛ gwantɛŋhii kpawo baaba lɛ* baanyɛ atsɔ osɔfo ehã nii ni jeee nyɔŋmɔi lɛ.
10 Shi wɔ lɛ, Yehowa ji wɔ-Nyɔŋmɔ,+ ni wɔjeko esɛɛ; Aaron seshibii lɛ ji wɔsɔfoi ni sɔmɔɔ yɛ Yehowa hiɛ, ni Levibii lɛ yeɔ amɛbuaa amɛ yɛ nitsumɔ lɛ mli.
11 Amɛshãa shãa afɔle kɛ tsofa-kɛ-ŋma+ amɛhãa Yehowa daa leebi kɛ gbɛkɛnaashi,+ ni blodo ni eko kã eko nɔ+* lɛ ma okpɔlɔ ni akɛ shika tsuru krɔŋŋ fee lɛ nɔ, ni amɛsuɔ kanei lɛ ni yɔɔ kanetso ni akɛ shika tsuru fee+ lɛ he lɛ daa gbɛkɛnaashi,+ no hewɔ lɛ, wɔ lɛ, wɔmiitsu nitsumɔ ni Yehowa, wɔ-Nyɔŋmɔ lɛ kɛwo wɔdɛŋ lɛ; shi nyɛ lɛ, nyɛje esɛɛ.
12 No hewɔ lɛ, naa! anɔkwa Nyɔŋmɔ lɛ miiye kɛmiibua wɔ, enyiɛ wɔhiɛ koni wɔkɛ nyɛ abawu, lɛ kɛ esɔfoi lɛ kɛ tɛtɛrɛmantɛrɛi ni akpãa kɛbɔɔ oshe lɛ. No hewɔ lɛ, Israel hii, nyɛkɛ Yehowa nyɛtsɛmɛi a-Nyɔŋmɔ lɛ akabawua, ejaakɛ nyɛyeŋ omanye.”+
13 Shi Yeroboam hã mɛi yawo ka yɛ Yuda sɛɛgbɛ, no hewɔ lɛ, Yeroboam kɛ esraafoi lɛ yɛ Yuda hiɛ ni mɛi ni eyawo ka lɛ hu yɛ Yuda sɛɛgbɛ.
14 Be ni Yuda hii lɛ tsɔ amɛhe lɛ, amɛna akɛ ta lɛ yɛ amɛhiɛ kɛ amɛsɛɛ fɛɛ. No hewɔ lɛ, amɛbo amɛtsɛ Yehowa,+ ni nakai beiaŋ nɔŋŋ lɛ osɔfoi lɛ hu miikpã tɛtɛrɛmantɛrɛi lɛ waa.
15 Yuda hii lɛ bɔ oshe, ni be ni Yuda hii lɛ bɔ oshe lɛ, anɔkwa Nyɔŋmɔ lɛ ye Yeroboam kɛ Israel fɛɛ nɔ kunim yɛ Abiya kɛ Yuda hiɛ.
16 Israelbii lɛ jo foi yɛ Yuda hii lɛ ahiɛ, ni Nyɔŋmɔ kɛ Israelbii lɛ wo amɛdɛŋ.
17 Abiya kɛ ewebii lɛ gbe Israelbii lɛ ateŋ mɛi babaoo diɛŋtsɛ, ni Israelbii lɛ ateŋ hii ni atsɔse* kɛhã ta ni gboi lɛ ji hii 500,000.
18 No hewɔ lɛ, aba Israel hii lɛ ashi yɛ nakai beiaŋ, shi Yuda hii lɛ ye kunim ejaakɛ amɛkɛ amɛhiɛ fɔ̃* Yehowa, amɛtsɛmɛi a-Nyɔŋmɔ lɛ nɔ.+
19 Abiya tiu Yeroboam ni eyashɔ̃ maji komɛi yɛ edɛŋ, amɛji Betel+ kɛ emaji ni baa lɛ abo* lɛ, kɛ Yeshana kɛ emaji ni baa lɛ abo lɛ, kɛ Efrain+ kɛ emaji ni baa lɛ abo lɛ.
20 Ni Yeroboam náaa hewalɛ dɔŋŋ yɛ Abiya gbii lɛ amli; kɛkɛ ni Yehowa tswa Yeroboam nɔ, ni egbo.+
21 Shi Abiya tsɔ gbɔmɔ wulu. Ni be ko sɛɛ lɛ, ená ŋamɛi 14,+ ni efɔ bihii 22 kɛ biyei 16.
22 Ni Abiya shihilɛ mli saji krokomɛi fɛɛ, nibii ni efee kɛ wiemɔi ni ewie lɛ, aŋmala yɛ gbalɔ Ido+ niŋmai* lɛ amli.
Shishigbɛ Niŋmaa
^ Atsɛ lɛ Maaka yɛ 2Kr 11:20-22 kɛ 1Ma 15:2.
^ Hebri sht. ŋm., “ni ahala.”
^ Hebri sht. ŋm., “ni ahala.”
^ Ni tsɔɔ akɛ, kpaŋmɔ ni tsakeee ni hiɔ shi daa.
^ Loo “yafataa.”
^ Hebri sht. ŋm., “baawo edɛŋ kɛba lɛ.”
^ Ni ji, hiɛmaa blodo.
^ Hebri sht. ŋm., “ni ahala.”
^ Hebri sht. ŋm., “ejaakɛ amɛkpasa.”
^ Loo “kɛ ehewɔ maji.”
^ Loo “niiamlitsɔɔmɔi.”
