2 Kronika 18:1-34
18 Yehoshafat ná nii babaoo kɛ anunyam kpele,+ shi ekɛ Ahab+ kpaŋ gbãla kpaŋmɔ.
2 No hewɔ lɛ, afii komɛi asɛɛ lɛ, ekpeleke shi kɛtee Ahab ŋɔɔ yɛ Samaria,+ ni Ahab gbe gwantɛŋi kɛ tsinai babaoo* ehã lɛ kɛ mɛi ni fata ehe lɛ. Ni ekɔne eyiŋ* koni ekɛ lɛ aya* koni amɛkɛ Ramot-gilead+ ayawu.
3 Kɛkɛ ni Israel maŋtsɛ Ahab bi Yuda maŋtsɛ Yehoshafat akɛ: “Ani okɛ mi baaya Ramot-gilead?” Ni Yehoshafat kɛɛ lɛ akɛ: “Mi kɛ bo fɛɛ lɛ, gbɔmɛi kome ji wɔ, ni mimaŋbii lɛ kɛ omaŋbii lɛ hu lɛ, gbɔmɛi kome ni, ni wɔbaaye wɔbua bo yɛ ta lɛ mli.”
4 Shi Yehoshafat kɛɛ Israel maŋtsɛ lɛ akɛ: “Shi ofainɛ, bi Yehowa nii dã.”+
5 No hewɔ lɛ, Israel maŋtsɛ lɛ bua gbalɔi lɛ anaa, hii 400, ni ebi amɛ akɛ: “Wɔya ni wɔkɛ Ramot-gilead ayawu, aloo mikaya?” Amɛkɛɛ lɛ akɛ: “Kwɔɔ kɛya, ejaakɛ anɔkwa Nyɔŋmɔ lɛ kɛ Ramot-gilead baawo maŋtsɛ dɛŋ.”
6 Kɛkɛ ni Yehoshafat bi akɛ: “Ani Yehowa gbalɔ ko bɛ biɛ dɔŋŋ?+ Hã wɔtsɔ lɛ hu enɔ wɔbi nii.”+
7 Kɛkɛ ni Israel maŋtsɛ lɛ kɛɛ Yehoshafat akɛ: “Eshwɛ mɔ kome+ ko ni wɔbaanyɛ wɔtsɔ enɔ wɔbi Yehowa nii; shi misumɔɔɔ esane, ejaakɛ egbako nɔ ko kpakpa yɛ mihe pɛŋ, efɔŋ pɛ egbaa yɛ mihe daa nɛɛ.+ Lɛ ji Mikaia, Imla binuu lɛ.” Shi Yehoshafat kɛɛ akɛ: “Maŋtsɛ akakɛɛ nakai.”
8 No hewɔ lɛ, Israel maŋtsɛ lɛ tsɛ maŋtsɛ shĩa onukpai lɛ eko ni ekɛɛ lɛ akɛ: “Yaatsɛ Mikaia, Imla binuu lɛ kɛba oya.”+
9 No mli lɛ, Israel maŋtsɛ lɛ kɛ Yuda maŋtsɛ Yehoshafat fɛɛ tara maŋtsɛ sɛii anɔ, ni amɛwo maŋtsɛ atadei; ni no mli lɛ amɛtara shi yɛ ŋmaagbeemɔhe lɛ yɛ Samaria agbó lɛ naa, ni gbalɔi lɛ fɛɛ miigba yɛ amɛhiɛ.
10 Kɛkɛ ni Zedekia, Kenaana binuu lɛ fee dade akolontoi ni ekɛɛ: “Nɔ ni Yehowa kɛɛ nɛ, ‘Enɛ okɛbaashimɔ Siriabii lɛ kɛyashi obaakpãtã amɛhiɛ kwraa.’”
11 Ni gbalɔi krokomɛi lɛ fɛɛ hu miigba nakai nɔŋŋ amɛmiikɛɛ: “Kwɔɔ kɛya Ramot-gilead, ni obaaye omanye;+ Yehowa kɛ maŋ lɛ baawo maŋtsɛ dɛŋ.”
12 Ni mɔ ni atsu ni eyatsɛ Mikaia lɛ kɛɛ lɛ akɛ: “Naa! Gbalɔi lɛ fɛɛ miigba nɔ ko kpakpa yɛ maŋtsɛ lɛ he. Ofainɛ, wiemɔ nɔ ko kpakpa+ tamɔ amɛnɔ lɛ nɔŋŋ.”+
13 Shi Mikaia kɛɛ lɛ akɛ: “Gbii abɔ ni Yehowa hiɛ kã nɛɛ, nɔ fɛɛ nɔ ni mi-Nyɔŋmɔ lɛ baakɛɛ lɛ, no mawie.”+
14 Kɛkɛ ni eba maŋtsɛ lɛ hiɛ ni maŋtsɛ lɛ bi lɛ akɛ: “Mikaia, wɔya ni wɔkɛ Ramot-gilead ayawu, aloo mikaya?” Oya nɔŋŋ ni Mikaia kɛɛ akɛ: “Kwɔɔ kɛya, ni obaaye omanye; akɛ amɛ baawo odɛŋ.”
15 Kɛkɛ ni maŋtsɛ lɛ kɛɛ lɛ akɛ: “Shii enyiɛ ni mahã okã mi kitã akɛ, okɛŋ mi nɔ ko nɔ ko akɛ ja anɔkwale lɛ pɛ yɛ Yehowa gbɛ́i mli?”
16 No hewɔ lɛ, Mikaia kɛɛ akɛ: “Miina Israelbii lɛ ni amɛgbɛ amɛshwã gɔji lɛ anɔ tamɔ gwantɛŋi ni bɛ kwɛlɔ.+ Yehowa kɛɛ akɛ: ‘Mɛnɛɛmɛi bɛ nuŋtsɔ ko dɔŋŋ. Amɛteŋ mɔ fɛɛ mɔ aku sɛɛ kɛya eshĩa yɛ toiŋjɔlɛ mli.’”
17 Kɛkɛ ni Israel maŋtsɛ lɛ kɛɛ Yehoshafat akɛ: “Ani mikɛɛɛ bo akɛ egbaŋ nɔ kpakpa ko yɛ mihe, akɛ ja efɔŋ pɛ?”+
18 Kɛkɛ ni Mikaia kɛɛ akɛ: “Agbɛnɛ, bo nɔ ni Yehowa kɛɛ lɛ toi: Mina Yehowa ta emaŋtsɛ sɛi lɛ nɔ,+ ni ŋwɛi asraafoi lɛ fɛɛ+ damɔ eninejurɔ kɛ ebɛku.+
19 Kɛkɛ ni Yehowa bi akɛ, ‘Namɔ baayalaka Israel maŋtsɛ Ahab koni ekwɔ kɛya Ramot-gilead ni eyagbo?’ Ni mɔ nɛ miikɛɛ nɛkɛ, ni mɔ nɛ hu miikɛɛ nɔ kroko.
20 Ni ŋwɛibɔfo*+ ko ba ebadamɔ Yehowa hiɛ ni ekɛɛ, ‘Mayalaka lɛ.’ Ni Yehowa bi lɛ akɛ, ‘Te obaalaka lɛ ohã tɛŋŋ?’
21 Ekɛɛ akɛ, ‘Maya, ni mikɛ amale wiemɔi baayawo egbalɔi* lɛ fɛɛ anaa.’ No hewɔ lɛ, Nyɔŋmɔ kɛɛ lɛ akɛ, ‘Obaalaka lɛ lɛɛlɛŋ, ni nɔ ni fe fɛɛ lɛ, obaaye omanye. Yaa ni oyafee nakai.’
22 No hewɔ lɛ, Yehowa kɛ amale wiemɔ* ewo ogbalɔi nɛɛ anaa,+ shi Yehowa ewie akɛ sane fɔŋ moŋ ni baaba onɔ.”
23 Ni Zedekia,+ Kenaana binuu lɛ ba ni ebagbá Mikaia+ toiŋ+ ni ekɛɛ: “Mɛɛ be Yehowa mumɔ lɛ je minɔ ni ekɛ bo wie?”*+
24 Mikaia kɛɛ lɛ akɛ: “Naa! Obaaná ole yɛ gbi nɔ ni obaajo foi oyatee ohe yɛ sɛɛtsu lɛ mli lɛ.”
25 Kɛkɛ ni Israel maŋtsɛ lɛ kɛɛ akɛ: “Nyɛmɔa Mikaia ni nyɛkɛ lɛ ayahãa Amon, maŋ lɛ nɔ onukpa lɛ, kɛ Yoash, maŋtsɛ lɛ binuu lɛ.
26 Ni nyɛkɛa amɛ akɛ, ‘Nɔ ni maŋtsɛ lɛ kɛɛ nɛ: “Nyɛwoa gbɔmɔ nɛɛ tsuŋ+ ni nyɛtsea niyenii* kɛ nu ni kulɛ nyɛbaahã lɛ lɛ nɔ kɛyashi maku misɛɛ maba yɛ toiŋjɔlɛ mli.”’”
27 Shi Mikaia kɛɛ akɛ: “Kɛ́ oku osɛɛ oba yɛ toiŋjɔlɛ mli lɛ, belɛ, jeee Yehowa ji mɔ ni tsɔ minɔ ewie lɛ.”+ Ni ekɛɛ hu akɛ: “Nyɛ fɛɛ nyɛkadia.”
28 No hewɔ lɛ, Israel maŋtsɛ lɛ kɛ Yehoshafat, Yuda maŋtsɛ lɛ kwɔ kɛtee Ramot-gilead.+
29 Kɛkɛ ni Israel maŋtsɛ lɛ kɛɛ Yehoshafat akɛ: “Matsake mihe koni akayoo mi ni maya ta lɛ naa, shi bo lɛ wo omaŋtsɛ atade lɛ.” No hewɔ lɛ, Israel maŋtsɛ lɛ tsake ehe koni akayoo lɛ ni amɛtee ta lɛ naa.
30 No mli lɛ, Siria maŋtsɛ lɛ efã eshwiili tatsɛmɛi lɛ akɛ: “Nyɛkɛ mɔ ko mɔ ko akawua, mɔ bibioo jio, mɔ wulu jio, akɛ ja Israel maŋtsɛ lɛ kɛkɛ.”
31 Be ni shwiili tatsɛmɛi lɛ na Yehoshafat nɔŋŋ lɛ, amɛwie yɛ amɛyitsoŋ akɛ: “Israel maŋtsɛ lɛ nɛ.” No hewɔ lɛ, amɛtsɔ amɛhe koni amɛkɛ lɛ awu; ni Yehoshafat bɔi bolɔmɔ koni abaye abua lɛ,+ ni Yehowa ye ebua lɛ, ni Nyɔŋmɔ hã amɛtsɔ amɛhe kɛje esɛɛ amrɔ nɔŋŋ.
32 Be ni shwiili tatsɛmɛi lɛ yɔse akɛ jeee Israel maŋtsɛ lɛ ni lɛ, oya nɔŋŋ ni amɛkpa esɛɛnyiɛmɔ.
33 Shi nuu ko tsɛ̃ egãi kɛkɛ,* ni eyatsu Israel maŋtsɛ lɛ yɛ he ni edama lɛ kɛ etawuu hewulamɔ nii krokomɛi lɛ kpeɔ yɛ lɛ. No hewɔ lɛ, maŋtsɛ lɛ kɛɛ mɔ ni kudɔɔ eshwiili lɛ akɛ: “Dɔɔ ohe ni okɛ mi aje ta* lɛ naa, ejaakɛ mipila waa.”+
34 Awu ta lɛ nakai gbi lɛ fɛɛ, ni ahiɛ Israel maŋtsɛ lɛ mli yɛ eshwiili lɛ mli, ni ehiɛ miikwɛ Siriabii lɛ aahu kɛyashi gbɛkɛnaashi; ni egbo hulushinyɔɔ mli.+
Shishigbɛ Niŋmaa
^ Loo “Ahab kɛ gwantɛŋi kɛ tsinai babaoo shã afɔle.”
^ Loo “egbe eyitsoŋ.”
^ Loo “akwɔ kɛya.”
^ Loo “mumɔ.”
^ Hebri sht. ŋm., “Maya, ni matsɔ amale mumɔ yɛ egbalɔi.”
^ Hebri sht. ŋm., “mumɔ.”
^ Hebri sht. ŋm., “Nɛgbɛ Yehowa mumɔ lɛ tsɔ eje minɔ ni ekɛ bo bawie?”
^ Hebri sht. ŋm., “blodo.”
^ Loo “ni ehiɛ bɛ ehe nɔ.”
^ Hebri sht. ŋm., “nsara.”
