2 Kronika 21:1-20
21 Kɛkɛ ni Yehoshafat gbo* ni afu lɛ yɛ etsɛmɛi lɛ amasɛi yɛ David Maŋ lɛ mli; ni ebinuu Yehoram baye maŋtsɛ yɛ esɛɛ.+
2 Ni enyɛmimɛi hii ni ji Yehoshafat bihii lɛ ji Azaria, kɛ Yehiel, kɛ Zakaria, kɛ Azaria, kɛ Mikael, kɛ Shefatia; Israel maŋtsɛ Yehoshafat bihii ji mɛnɛɛmɛi fɛɛ.
3 Ni amɛtsɛ ke amɛ jwiɛtɛi kɛ shika tsuru nibii babaoo, kɛ jwetrii krokomɛi, ni ehã amɛ maji ni atswa gbogboi awo amɛhe yɛ Yuda;+ shi ekɛ maŋtsɛyeli lɛ hã Yehoram,+ ejaakɛ lɛ ji ekromɔbi.
4 Be ni Yehoram nine shɛ etsɛ maŋtsɛyeli lɛ nɔ lɛ, ekɛ klante gbe enyɛmimɛi hii lɛ fɛɛ,+ ni egbe Israel lumɛi lɛ ekomɛi hu, koni mɔ ko kɛ lɛ akapele maŋtsɛyeli lɛ he.*
5 Be ni Yehoram batsɔ maŋtsɛ lɛ, no mli lɛ, eye afii 32, ni eye maŋtsɛ afii kpaanyɔ yɛ Yerusalem.+
6 Enyiɛ Israel maŋtsɛmɛi lɛ agbɛ lɛ nɔ,+ tamɔ bɔ ni Ahab shĩabii lɛ fee lɛ nɔŋŋ, ejaakɛ no mli lɛ, ekɛ Ahab biyoo ebote gbalashihilɛ mli;+ ni etee nɔ efee efɔŋ yɛ Yehowa hiɛ.
7 Shi Yehowa sumɔɔɔ akɛ ekpãtãa David shĩa lɛ hiɛ yɛ kpaŋmɔ ni ekɛ David efee lɛ hewɔ,+ ejaakɛ ewo shi akɛ, be fɛɛ be lɛ, ebaahã lɛ kɛ ebihii lɛ seshi ko ni baaye nɔ.*+
8 Yɛ egbii lɛ amli lɛ, Edom tse Yuda hiɛ atua+ ni amɛ diɛŋtsɛ amɛwó maŋtsɛ amɛhã amɛhe.+
9 No hewɔ lɛ, Yehoram kɛ etatsɛmɛi lɛ kɛ eshwiilii lɛ fɛɛ fo mli kɛtee, ni ete shi nyɔɔŋ ni eye Edombii lɛ ni ebabɔle lɛ kɛ shwiili tatsɛmɛi lɛ anɔ kunim.
10 Shi Edom etee nɔ etse Yuda hiɛ atua kɛbashi ŋmɛnɛ. Libna+ hu tse ehiɛ atua yɛ nakai beiaŋ, ejaakɛ Yehoram je Yehowa, etsɛmɛi a-Nyɔŋmɔ lɛ sɛɛ.+
11 Agbɛnɛ hu, efee hei grɔŋŋi+ yɛ Yuda gɔji lɛ anɔ koni no ahã Yerusalembii lɛ aje Nyɔŋmɔ sɛɛ,* ni ehã Yuda du gbɛ.
12 Sɛɛ mli lɛ, gbalɔ Elia ŋma lɛ wolo+ ekɛɛ: “Nɔ ni Yehowa, otsɛ David Nyɔŋmɔ lɛ kɛɛ nɛ, ‘Onyiɛko otsɛ Yehoshafat+ gbɛi lɛ loo Yuda maŋtsɛ Asa gbɛi lɛ anɔ.+
13 Shi moŋ, onyiɛ Israel maŋtsɛmɛi lɛ agbɛ lɛ nɔ,+ ni ohã Yuda kɛ Yerusalembii lɛ je Nyɔŋmɔ sɛɛ*+ tamɔ bɔ ni Ahab shĩabii lɛ je Nyɔŋmɔ sɛɛ* lɛ nɔŋŋ,+ ni ogbe bo diɛŋtsɛ onyɛmimɛi hii,+ ni hi fe bo, ni ji otsɛ shĩabii lɛ po.
14 No hewɔ lɛ, Yehowa hu baahã sane fɔŋ kpele ko aba omaŋbii lɛ, kɛ obihii lɛ, kɛ oŋamɛi lɛ, kɛ onii fɛɛ nɔ.
15 Ni obaaye helai babaoo gbi fɛɛ gbi, ni hela lɛ eko po baamɔ omusuŋ nii, kɛyashi hela lɛ baahã omusuŋ nii aje kpo.’”
16 Kɛkɛ ni Yehowa tsirɛ+ Filistibii+ lɛ kɛ Arabbii+ ni yɔɔ Etiopiabii lɛ amasɛi lɛ* koni amɛkɛ Yehoram abawu.
17 No hewɔ lɛ, amɛbatutua Yuda, ni amɛbote Yuda shikpɔŋ lɛ mli akrana naa, ni amɛloo nibii fɛɛ ni amɛna yɛ maŋtsɛ lɛ shĩa lɛ kɛtee,+ amɛmɔmɔ ebihii kɛ eŋamɛi lɛ hu kɛtee; mɔ pɛ ni shwɛ ji ebihii lɛ ateŋ gbekɛ ni atsɛɔ lɛ Yehoahaz*+ lɛ.
18 Enɛɛmɛi fɛɛ sɛɛ lɛ, Yehowa hã hela ko ni anyɛɛɛ atsa mɔ emusuŋ nii.+
19 Be ko sɛɛ, be ni afii enyɔ eho lɛ, hela lɛ hã emusuŋ nii je kpo, ni egbo be ni hela lɛ ehã epiŋ waa lɛ; ni emaŋbii lɛ eshãaa nibii kɛfeee yara amɛhãaa lɛ tamɔ bɔ ni amɛshã nibii kɛfee yara amɛhã etsɛmɛi lɛ.+
20 Be ni ebatsɔ maŋtsɛ lɛ, no mli lɛ eye afii 32, ni eye nɔ afii kpaanyɔ yɛ Yerusalem. Be ni egbo lɛ, egbele lɛ edɔɔɔ mɔ ko mɔ ko. No hewɔ lɛ, amɛfu lɛ yɛ David Maŋ+ lɛ mli, shi amɛfuuu lɛ yɛ maŋtsɛmɛi lɛ afuuhei lɛ.+
Shishigbɛ Niŋmaa
^ Loo “kɛ etsɛmɛi lɛ yawɔ.”
^ Loo “koni emaŋtsɛyeli lɛ ama shi shiŋŋ.”
^ Hebri sht. ŋm., “ebaahã kane ko ahi shi ahã lɛ kɛ ebihii lɛ daa.”
^ Loo “Yerusalembii lɛ abɔ ajwamaŋ.”
^ Loo “bɔ ajwamaŋ.”
^ Loo “bɔ ajwamaŋ.”
^ Hebri sht. ŋm., “Yehowa tee Filistibii lɛ kɛ Arabbii ni yɔɔ Etiopiabii lɛ amasɛi lɛ mumɔ shi.”
^ Atsɛɔ lɛ Ahazia hu.
