2 Kronika 24:1-27
24 Be ni Yehoash batsɔ maŋtsɛ lɛ, no mli lɛ eye afii kpawo,+ ni eye maŋtsɛ afii 40 yɛ Yerusalem. Atsɛɔ emami Zibia, ni ejɛ Beer-sheba.+
2 Yehoash tee nɔ efee nɔ ni ja yɛ Yehowa hiɛ yɛ osɔfo Yehoiada gbii lɛ amli fɛɛ.+
3 Yehoiada hã lɛ ŋamɛi enyɔ, ni efɔ bihii kɛ biyei.
4 Enɛ sɛɛ lɛ, Yehoash kpɛ mli yɛ etsui mli akɛ ebaasaa Yehowa shĩa lɛ.+
5 No hewɔ lɛ, ebua osɔfoi lɛ kɛ Levibii lɛ anaa ni ekɛɛ amɛ akɛ: “Nyɛyakpaa Yuda maji lɛ amli ni nyɛhea shika yɛ Israelbii lɛ fɛɛ adɛŋ koni akɛsaa nyɛ-Nyɔŋmɔ lɛ shĩa+ lɛ daa afi; ni nyɛfea enɛ amrɔ nɔŋŋ.” Shi Levibii lɛ tsuuu he nii amrɔ nɔŋŋ.+
6 No hewɔ lɛ, maŋtsɛ lɛ tsɛ osɔfonukpa Yehoiada ni ebi lɛ akɛ:+ “Mɛni hewɔ ohãko Levibii lɛ ayahe too krɔŋkrɔŋ ni Mose, Yehowa tsulɔ lɛ fã ni awo,+ ni ji Israel asafo lɛ too krɔŋkrɔŋ kɛhã Odase buu+ lɛ, kɛjɛ Yuda kɛ Yerusalem kɛba lɛ?
7 Ejaakɛ, Atalia,+ yoo fɔŋ lɛ, bihii lɛ bote anɔkwa Nyɔŋmɔ lɛ shĩa lɛ akrana naa,+ ni amɛkɛ Yehowa shĩa lɛ nibii krɔŋkrɔŋi lɛ fɛɛ etee eyasɔmɔ Baal srɔtoi lɛ.”
8 Kɛkɛ ni yɛ maŋtsɛ lɛ famɔ naa lɛ, akpɛ adeka+ ko, ni akɛma Yehowa shĩa lɛ agbó lɛ naa.+
9 No sɛɛ lɛ, ashiɛ yɛ Yuda kɛ Yerusalem fɛɛ koni akɛ too krɔŋkrɔŋ+ ni Mose, anɔkwa Nyɔŋmɔ lɛ tsulɔ lɛ fo ehã Israelbii lɛ yɛ ŋa lɛ nɔ lɛ abahã Yehowa.
10 Kɛkɛ ni lumɛi lɛ kɛ maŋbii lɛ fɛɛ nya,+ ni amɛbatsu onia lɛ amɛwo adeka lɛ mli aahu kɛyashi adeka lɛ yi.*
11 Be fɛɛ be ni Levibii lɛ baaba ni amɛbaana akɛ shika pii eba adeka lɛ mli lɛ, amɛkɛ adeka lɛ bahãa maŋtsɛ lɛ, ni maŋtsɛ lɛ woloŋmalɔ lɛ kɛ osɔfɔnukpa lɛ sɔɔlɔ lɛ jieɔ shika lɛ yɛ adeka lɛ mli,+ ni Levibii lɛ kɛ adeka lɛ kuɔ sɛɛ kɛyamaa he ni emaa lɛ. Nakai ji bɔ ni amɛfeɔ daa gbi, ni amɛbua shika babaoo naa.
12 Kɛkɛ lɛ, maŋtsɛ lɛ kɛ Yehoiada kɛ shika lɛ hãa mɛi ni kwɛɔ nitsumɔ ni atsuɔ yɛ Yehowa shĩa lɛ nɔ lɛ, ni amɛ hu amɛkɛbɔɔ tɛgbalɔi lɛ, kɛ ŋaalɔi lɛ apaa koni amɛsaa Yehowa shĩa lɛ,+ ni agbɛnɛ hu, amɛkɛbɔɔ mɛi ni tsuɔ dade kɛ akɔɔble he nii lɛ apaa koni amɛsaa Yehowa shĩa lɛ.
13 Ni mɛi ni kwɛɔ nitsumɔ lɛ nɔ lɛ je nitsumɔ lɛ shishi, ni atee nɔ atsu nitsumɔ lɛ yɛ amɛfamɔ naa, ni amɛsaa anɔkwa Nyɔŋmɔ lɛ shĩa lɛ ni etsɔ ehee tamɔ tsutsu lɛ, ni amɛhã ená hewalɛ.
14 Ni be ni amɛgbe nitsumɔ lɛ naa nɔŋŋ lɛ, amɛkɛ shika ni shwɛ lɛ bahã maŋtsɛ lɛ kɛ Yehoiada, ni amɛkɛfee nibii kɛhã Yehowa shĩa lɛ, nibii ni akɛsɔmɔɔ kɛ nibii ni akɛshãa afɔle, kɛ kɔɔpoi kɛ shika tsuru kɛ jwiɛtɛi nibii.+ Ni yɛ Yehoiada gbii lɛ fɛɛ amli lɛ, amɛshãa shãa afɔlei+ yɛ Yehowa shĩa lɛ daa.
15 Yehoiada gbo be ni egbɔ ni eye gbii pii; be ni egbo lɛ, no mli lɛ, eye afii 130.
16 No hewɔ lɛ, amɛfu lɛ yɛ David Maŋ lɛ mli yɛ he ni amɛfuɔ maŋtsɛmɛi lɛ yɛ lɛ,+ ejaakɛ efee nibii kpakpai yɛ Israel+ ehã anɔkwa Nyɔŋmɔ lɛ kɛ anɔkwa Nyɔŋmɔ lɛ shĩa lɛ.
17 Yɛ Yehoiada gbele sɛɛ lɛ, Yuda lumɛi lɛ ba ni amɛbakoto maŋtsɛ lɛ, ni maŋtsɛ lɛ bo amɛ toi.
18 Amɛshi Yehowa, amɛtsɛmɛi a-Nyɔŋmɔ lɛ shĩa lɛ amɛfɔ̃ shi ni amɛyabɔi wɔŋ tsei* lɛ, kɛ amagai lɛ sɔɔmɔ, no hewɔ lɛ, Nyɔŋmɔ mli fu Yuda kɛ Yerusalem,* ejaakɛ amɛtɔ̃.
19 Yehowa tee nɔ etsu gbalɔi kɛtee amɛŋɔɔ koni amɛhã amɛku amɛsɛɛ kɛba eŋɔɔ, ni amɛtee nɔ amɛbɔ amɛ kɔkɔ,* shi amɛbooo toi.+
20 Nyɔŋmɔ mumɔ lɛ ba* Zakaria, osɔfo Yehoiada binuu+ lɛ nɔ, ni ete shi edamɔ he ko ni kwɔ yɛ maŋbii lɛ ahiɛ, ni ekɛɛ amɛ akɛ: “Nɔ ni anɔkwa Nyɔŋmɔ lɛ kɛɛ nɛ, ‘Mɛni hewɔ nyɛkuɔ Yehowa kitãi lɛ amli? Ehiŋ ehãŋ nyɛ! Ejaakɛ nyɛje Yehowa sɛɛ, ni lɛ hu ebaakwa nyɛ.’”+
21 Shi amɛkpaŋ eyi nɔ,+ ni yɛ maŋtsɛ lɛ famɔ naa lɛ, amɛtswia lɛ tɛi yɛ Yehowa shĩa lɛ kpo lɛ nɔ.+
22 No hewɔ lɛ, Maŋtsɛ Yehoash kaiii suɔmɔ ni tsakeee ni etsɛ* Yehoiada jie lɛ kpo etsɔɔ lɛ lɛ, ni egbe ebinuu lɛ, ni be ni Zakaria gboɔ lɛ, ekɛɛ akɛ: “Yehowa akwɛ, ni ewo he nyɔmɔ.”+
23 Yɛ afi lɛ shishijee mli lɛ, Siria asraafoi lɛ kwɔ kɛba koni amɛkɛ Yehoash abawu, ni amɛtutua Yuda kɛ Yerusalem.+ Ni amɛgbe maŋbii lɛ anɔ lumɛi lɛ fɛɛ,+ ni amɛkɛ ta mli nii lɛ ni amɛná lɛ fɛɛ yahã Damasko maŋtsɛ lɛ.
24 Eyɛ mli akɛ Siria asraafoi lɛ ni ba lɛ ayi faaa moŋ, shi Yehowa kɛ Yuda asraafoi babaoo wo amɛdɛŋ,+ ejaakɛ amɛje Yehowa, amɛtsɛmɛi a-Nyɔŋmɔ lɛ sɛɛ; no hewɔ lɛ, amɛgbala* Yehoash toi.
25 Ni be ni amɛshi lɛ amɛtee lɛ (ejaakɛ no mli lɛ, amɛpila lɛ waa*), lɛ diɛŋtsɛ etsuji lɛ kpaŋ eyi nɔ, ejaakɛ eshwie osɔfo Yehoiada bihii* lɛ alá shi.+ Amɛgbe Yehoash yɛ lɛ diɛŋtsɛ esaa nɔ.+ No hewɔ lɛ, egbo ni amɛfu lɛ yɛ David Maŋ+ lɛ mli, shi amɛfuuu lɛ yɛ maŋtsɛmɛi afuuhei lɛ.+
26 Mɛi ni kpaŋ eyi nɔ lɛ nɛ:+ Zabad, ni ji Shimeat, Amon yoo lɛ binuu lɛ, kɛ Yehozabad, ni ji Shimrit, Moab yoo lɛ binuu lɛ.
27 Ebihii lɛ, kɛ saji babaoo ni awie ashi lɛ,+ kɛ anɔkwa Nyɔŋmɔ lɛ shĩa lɛ ni esaa*+ lɛ he saji fɛɛ lɛ, aŋmala yɛ Maŋtsɛmɛi Awolo lɛ mli niŋmai* lɛ amli. Ni ebinuu Amazia baye maŋtsɛ yɛ esɛɛ.
Shishigbɛ Niŋmaa
^ Shishitsɔɔmɔi komɛi kɛɔ akɛ, “kɛyashi amɛ fɛɛ amɛhã nɔ ko.”
^ Hebri sht. ŋm., “mlifu ba Yuda kɛ Yerusalem nɔ.”
^ Kwɛmɔ Wiemɔi Titrii Amligbalamɔ lɛ.
^ Loo “amɛtee nɔ amɛye odase amɛshi amɛ.”
^ Hebri sht. ŋm., “baha.”
^ Ni ji, Zakaria tsɛ.
^ Ni ji, Siriabii lɛ.
^ Loo “amɛhã helai babaoo emɔ lɛ.”
^ Loo “binuu.” Eeenyɛ efee akɛ, akɛ wiemɔ “bihii” tsu nii koni akɛtsɔɔ bɔ ni abuɔ ebinuu lɛ waa hã.
^ Hebri sht. ŋm., “shishitoo.”
^ Loo “niiamlitsɔɔmɔi.”
