2 Kronika 3:1-17
3 Kɛkɛ ni Solomon bɔi Yehowa shĩa lɛ maa+ yɛ Yerusalem yɛ Moria+ Gɔŋ lɛ nɔ, ni ji he ni Yehowa jie ehe kpo etsɔɔ etsɛ David yɛ lɛ,+ yɛ he ni David esaa eto yɛ Ornan,+ Yebusnyo lɛ ŋmaagbeemɔhe lɛ.
2 Ebɔi shĩa lɛ maa yɛ nyɔɔŋ ni ji enyɔ lɛ nɔ gbi ni ji enyɔ lɛ nɔ yɛ enɔyeli afi ni ji ejwɛ lɛ nɔ.
3 Ni faneshi ni Solomon tswa kɛhã anɔkwa Nyɔŋmɔ lɛ shĩa lɛ maa lɛ kɛlɛ ji ninetalɔi 60, ni elɛɛmɔ ji ninetalɔi 20,+ yɛ blema susumɔkpaa lɛ naa.*
4 Ablanaa lɛ ni yɔɔ tsũ lɛ hiɛ lɛ lɛɛmɔ ji ninetalɔi 20, tamɔ shĩa lɛ lɛɛmɔ lɛ nɔŋŋ,* ni ekwɔlɛ ji 20;* ni ekɛ shika tsuru krɔŋŋ ha mli.+
5 Ekɛ junipa tsei ha tsũ* wulu lɛ mli, ni ekɛ shika tsuru krɔŋŋ ha he,+ kɛkɛ ni ekɛ tɛŋ tsei mfonirii*+ kɛ tsein*+ saa mli.
6 Agbɛnɛ, ekɛ ojarawatɛi+ fɛfɛji tarataraa tsũ* lɛ mli; ni shika tsuru+ ni ekɛha mli lɛ Parvaim akɛjɛ.
7 Ekɛ shika tsuru ha tsũ* lɛ, mplaŋi lɛ, kɛ shinai lɛ, kɛ egbogboi lɛ, kɛ ehe shinai lɛ fɛɛ ahe;+ ni ekpɛ́ kerubim ewo gbogboi lɛ fɛɛ ahe.+
8 Agbɛnɛ, efee shĩa lɛ He Krɔŋkrɔŋ Fe Fɛɛ+ lɛ; ekɛlɛ kɛ shĩa lɛ lɛɛmɔ fɛɛ ekome, ninetalɔi 20, ni elɛɛmɔ hu ji ninetalɔi 20. Ni ekɛ shika tsuru krɔŋŋ talɛntai* 600 ha mli.+
9 Shika tsuru ni akɛfee plɛkoobii lɛ tsiimɔ ji shekeli* 50; ni ekɛ shika tsuru ha ŋwɛi asai lɛ amli.
10 Kɛkɛ ni egbɔ kerubim enyɔ ewo shĩa lɛ He Krɔŋkrɔŋ Fe Fɛɛ lɛ mli, ni ekɛ shika tsuru ha amɛhe.+
11 Kerubim+ lɛ afiji lɛ fɛɛ kɛlɛmɔ feɔ ninetalɔi 20; klɛŋklɛŋ kerub lɛ fine kome kɛlɛ ji ninetalɔi enumɔ, ni efine lɛ saa shĩa lɛ gbogbo lɛ he, ni efine kroko lɛ hu kɛlɛ ji ninetalɔi enumɔ, ni esaa kerub kroko lɛ fiji enyɔ lɛ ateŋ ekome he.
12 Ni kerub kroko lɛ fine kome kɛlɛ ji ninetalɔi enumɔ, ni efine lɛ saa shĩa lɛ gbogbo lɛ afã kroko lɛ he, ni efine kroko lɛ hu kɛlɛ ji ninetalɔi enumɔ, ni esaa klɛŋklɛŋ kerub lɛ fiji enyɔ lɛ ateŋ ekome he.
13 Kerubim nɛɛ afiji ni amɛgbɛgbɛɛ mli lɛ fɛɛ kɛlɛ feɔ ninetalɔi 20; ni amɛdamɔ amɛnaji anɔ, ni amɛhiɛ miikwɛ shĩa lɛ mli gbɛ.*
14 Agbɛnɛ hu, ekɛ kpãa bluu kɛ kooloo hetsɔi ni hiɛ pɛpol kɔla kɛ kpãa tsuru kɛ mama kpakpa fee pateeshɛŋ,*+ ni eye kerubim samai ewo mli.+
15 Kɛkɛ ni efee akulashiŋi enyɔ+ yɛ shĩa lɛ hiɛ, eko fɛɛ eko kwɔlɛ ji ninetalɔi 35, ni akekerei ni ma eko fɛɛ eko nɔ lɛ hu feɔ ninetalɔi enumɔ.+
16 Ni efee tsein,* tamɔ kuɛnii, ni ekɛwo akulashiŋi lɛ ayiteŋ, ni efee pomegranet aduawai 100 ni ekɛwo tsein* lɛ ahe.
17 Ekɛ akulashiŋi lɛ mamɔ sɔlemɔ shĩa lɛ hiɛ, ekɛ akulashiŋ kome ma ninejurɔgbɛ,* ni ekɛ akulashiŋ kome hu ma abɛkugbɛ,* ni ewo nɔ ni yɔɔ ninejurɔgbɛ lɛ gbɛ́i akɛ Yakin,* ni ewo nɔ ni yɔɔ abɛkugbɛ lɛ gbɛ́i akɛ Boaz.*
Shishigbɛ Niŋmaa
^ Ninetalɔ kome feɔ sɛntimitai 44.5 (iŋtsii 17.5), ni no ji nɔ ni mɛi kɛfɔɔ nitsumɔ, shi mɛi komɛi susuɔ akɛ, “blema susumɔkpaa” ji ninetalɔ kakadaŋŋ lɛ ni ekome feɔ sɛntimitai 51.8 (iŋtsii 20.4) lɛ. Kwɛmɔ Saji Krokomɛi B14 lɛ.
^ Loo “ninetalɔi 20 yɛ shĩa lɛ lɛɛmɔ lɛ naa.”
^ Blema wolokpoi komɛi kɛɔ akɛ “ekwɔlɛ ji 120,” shi wolokpoi krokomɛi kɛ shishitsɔɔmɔi komɛi kɛɔ akɛ “ekwɔlɛ ji ninetalɔi 20.”
^ Loo “kɔsɔŋkɔsɔi.”
^ Ni ji, mfonirii ni akpɛ́ loo atɛŋ.
^ Hebri sht. ŋm., “shĩa.”
^ Hebri sht. ŋm., “shĩa.”
^ Hebri sht. ŋm., “shĩa.”
^ Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
^ Shekel kome feɔ gram 11.4 (oz t 0.367). Kwɛmɔ Saji Krokomɛi B14 lɛ.
^ Ni tsɔɔ akɛ, amɛhiɛ miikwɛ He Krɔŋkrɔŋ lɛ.
^ Loo “muhɔɔ.”
^ Loo “kɔsɔŋkɔsɔi.”
^ Loo “kɔsɔŋkɔsɔi.”
^ Loo “wuoyigbɛ.”
^ Loo “kooyigbɛ.”
^ Eshishi ji, “Ehã [ni ji, Yehowa ahã] Ema Shi Shiŋŋ.”
^ Eeenyɛ efee akɛ eshishi ji, “Yɛ Hewalɛ Mli.”
