2 Kronika 31:1-21
31 Be ni amɛgbe fɛɛ naa lɛ, Israelbii lɛ fɛɛ ni yɔɔ jɛmɛ lɛ je kpo kɛtee Yuda maji lɛ amli, ni amɛyakumɔ wɔŋ tɛi*+ lɛ, ni amɛyafolɔ wɔŋ tsei*+ lɛ, ni amɛyakumɔ hei grɔŋŋi+ lɛ kɛ afɔleshaa latɛi+ ni yɔɔ Yuda kɛ Benyamin fɛɛ lɛ, kɛ nɔ ni yɔɔ Efraim kɛ Manase+ lɛ kɛyashi amɛkpãtã fɛɛ hiɛ kwraa, ni no sɛɛ lɛ, Israelbii lɛ fɛɛ ku amɛsɛɛ amɛtee amɛmaji lɛ amli, amɛteŋ mɔ fɛɛ mɔ tee lɛ diɛŋtsɛ eshikpɔŋ nɔ.
2 Kɛkɛ ni Hezekia to osɔfoi lɛ yɛ amɛkui lɛ anaa+ kɛ Levibii lɛ hu yɛ amɛkui lɛ anaa,+ kuu fɛɛ kuu kɛ enitsumɔ yɛ osɔfoi lɛ kɛ Levibii lɛ ateŋ,+ amɛshãa shãa afɔlei kɛ naanyobɔɔ afɔlei, amɛsɔmɔɔ, amɛdaa shi ni amɛjieɔ Nyɔŋmɔ yi yɛ Yehowa kpoi* lɛ agbói lɛ amli.+
3 Ajieɔ maŋtsɛ lɛ diɛŋtsɛ nibii ni eyɔɔ lɛ eko koni akɛshã shãa afɔlei,+ leebi kɛ gbɛkɛnaashi,+ agbɛnɛ hu koni akɛshã shãa afɔlei yɛ Hejɔɔmɔ Gbii+ lɛ anɔ, kɛ nyɔɔŋtsere hei+ lɛ anɔ, kɛ gbii juji+ lɛ anɔ, tamɔ bɔ ni aŋma yɛ Yehowa Mla* lɛ mli akɛ afee lɛ.
4 Agbɛnɛ hu, efã mɛi ni yɔɔ Yerusalem lɛ koni amɛkɛ osɔfoi lɛ kɛ Levibii lɛ agbɛnaa nii lɛ ahã amɛ,+ bɔ ni afee ni amɛye Yehowa mla lɛ nɔ pɛpɛɛpɛ.*
5 Be ni akɛ famɔ nɛɛ hã nɔŋŋ lɛ, Israelbii lɛ kɛ ŋmaa,* kɛ wain hee, kɛ mu,+ kɛ wo, kɛ ŋmɔshi nibii fɛɛ amli klɛŋklɛŋ yibii babaoo ba;+ amɛkɛ nibii fɛɛ mlijai nyɔŋma mli ekomekome ba, nibii babaoo diɛŋtsɛ.+
6 Ni Israelbii kɛ Yudabii ni yɔɔ Yuda maji lɛ amli lɛ hu kɛ tsinai kɛ gwantɛŋi mlijai nyɔŋma mli ekomekome kɛ krɔŋkrɔŋ nibii+ ni ajɔɔ nɔ ahã Yehowa, amɛ-Nyɔŋmɔ lɛ mlijai nyɔŋma mli ekomekome ba. Amɛkɛba ni amɛbabua naa kuikui babaoo.
7 Yɛ nyɔɔŋ ni ji etɛ lɛ nɔ+ lɛ, amɛkɛ nibii lɛ bɔi baa ni amɛbua naa kuikui; ni amɛgbe naa yɛ nyɔɔŋ ni ji kpawo lɛ nɔ.+
8 Be ni Hezekia kɛ lumɛi lɛ ba ni amɛbana nibii lɛ ni abua naa kuikui lɛ, amɛjie Yehowa yi ni amɛjɔɔ ewebii Israel hu.
9 Hezekia bi osɔfoi lɛ kɛ Levibii lɛ sane yɛ nibii ni abua naa kuikui lɛ he,
10 ni osɔfonukpa Azaria ni jɛ Zadok shĩa lɛ kɛɛ lɛ akɛ: “Kɛjɛ be ni amɛbɔi nibii lɛ kɛ Yehowa shĩa lɛ baa nɛɛ,+ maŋbii lɛ yeɔ nii amɛtɔrɔɔ ni babaoo shwɛɔ, ejaakɛ Yehowa ejɔɔ ewebii lɛ, ni nɔ ni eshwɛ lɛ ji nibii babaoo nɛɛ.”+
11 Kɛkɛ ni Hezekia kɛɛ amɛ ni amɛfee nitoohei*+ yɛ Yehowa shĩa lɛ, ni amɛfee.
12 Ni amɛkɛ nibii lɛ baa, mlijai nyɔŋma mli ekomekome+ lɛ, kɛ krɔŋkrɔŋ nibii lɛ, amɛkɛbaa pɛpɛɛpɛ; Konania, Levinyo lɛ, ji mɔ ni ahã ekwɛ enɛ fɛɛ nɔ akɛ nɔkwɛlɔ, ni enyɛmi nuu Shimei ji esɛɛmɔ.
13 Yɛ Maŋtsɛ Hezekia famɔ naa lɛ, ahala Yehiel, kɛ Azazia, kɛ Nahat, kɛ Asahel, kɛ Yerimot, kɛ Yozabad, kɛ Eliel, kɛ Ismakia, kɛ Mahat, kɛ Benaia akɛ nɔkwɛlɔi koni amɛye amɛbua Konania kɛ enyɛmi nuu Shimei. Azaria ji anɔkwa Nyɔŋmɔ lɛ shĩa lɛ nɔkwɛlɔ.
14 Ni Kore, Imna binuu lɛ, ni ji Levinyo agbonaakwɛlɔ ni kwɛɔ bokãgbɛ agbó lɛ naa+ lɛ ji mɔ ni kwɛɔ nibii ni mɛi jɛɔ amɛsuɔmɔ mli amɛbakeɔ+ anɔkwa Nyɔŋmɔ lɛ nɔ, ni ejaa nibii ni akɛbake Yehowa+ kɛ nibii ni yɔɔ krɔŋkrɔŋ fe fɛɛ ni akɛba lɛ.+
15 Ni mɛi ni amuɔ afɔ̃ɔ amɛnɔ ni tsu nii yɛ eshishi yɛ osɔfoi amaji lɛ amli+ koni amɛja nibii lɛ pɛpɛɛpɛ amɛhã amɛnyɛmimɛi lɛ,+ mɔ wulu jio, mɔ bibioo jio, yɛ amɛkui lɛ anaa lɛ ji Eden, kɛ Miniamin, kɛ Yeshua, kɛ Shemaia, kɛ Amaria, kɛ Shekania.
16 Esoro nɔ ni ajaa ahãa hii ni gbɛ́ii yɔɔ wekutɔkpaa wolo lɛ mli ni basɔmɔɔ yɛ Yehowa shĩa lɛ daa gbi ni amɛbatsuɔ nii yɛ amɛkui lɛ anaa lɛ. Mɛi ni aŋmaa amɛgbɛ́ii yɛ wekutɔkpaa wolo lɛ mli lɛ ji hii ni eye afii etɛ kɛyaa.
17 Aŋmala osɔfoi lɛ agbɛ́ii yɛ wekutɔkpaa wolo lɛ mli yɛ amɛtsɛmɛi ashĩai lɛ anaa,+ tamɔ bɔ ni aŋmala Levibii ni eye afii 20 kɛyaa lɛ agbɛ́ii lɛ nɔŋŋ,+ yɛ nitsumɔi ni amɛkui lɛ tsuɔ lɛ naa.+
18 Amɛbii bibii, kɛ amɛŋamɛi, kɛ amɛbihii, kɛ amɛbiyei, amɛsafo muu lɛ fɛɛ hu gbɛ́ii yɛ wekutɔkpaa wolo lɛ mli—ejaakɛ amɛhiɛɔ amɛhe krɔŋkrɔŋ kɛhã krɔŋkrɔŋ nii, yɛ amɛnitsumɔ ni amuɔ afɔ̃ɔ amɛnɔ ni amɛtsuɔ lɛ hewɔ—
19 Aaron seshibii, ni ji osɔfoi ni yɔɔ hei ni kooloi yeɔ nii yɛ ni bɔle osɔfoi amaji lɛ ahe+ lɛ agbɛ́ii hu yɛ wekutɔkpaa wolo lɛ mli. Ahala hii yɛ maŋ fɛɛ maŋ mli koni amɛja nii amɛhã nuu fɛɛ nuu ni yɔɔ osɔfoi lɛ ateŋ kɛ mɔ fɛɛ mɔ ni gbɛ́i yɔɔ Levibii lɛ awekutɔkpaa wolo lɛ mli lɛ.
20 Hezekia fee enɛ yɛ Yuda shikpɔŋ lɛ nɔ fɛɛ, ni etee nɔ efee nɔ ni hi, kɛ nɔ ni ja yɛ Yehowa, e-Nyɔŋmɔ lɛ hiɛ, ni eye Nyɔŋmɔ anɔkwa hu.
21 Ni nɔ fɛɛ nɔ ni efee kɛtao e-Nyɔŋmɔ lɛ sɛɛ gbɛ, nɔ ni kɔɔ anɔkwa Nyɔŋmɔ lɛ shĩa lɛ sɔɔmɔ lɛ he jio,+ Mla lɛ kɛ kitã lɛ he jio lɛ, ekɛ etsui fɛɛ fee, ni eye omanye.
Shishigbɛ Niŋmaa
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “nsarai.”
^ Kwɛmɔ Wiemɔi Titrii Amligbalamɔ lɛ.
^ Loo “bɔ ni afee ni amɛkɛ amɛhe ahã Yehowa mla lɛ kwraa.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Loo “niyelihei.”
