2 Mose 12:1-51
12 Ni Yehowa kɛɛ Mose kɛ Aaron yɛ Ejipt shikpɔŋ lɛ nɔ akɛ:
2 “Nyɔɔŋ nɛɛ baatsɔ nyɔɔŋ ni baaje nyɔji lɛ ashishi ahã nyɛ. Ebaatsɔ klɛŋklɛŋ nyɔɔŋ yɛ afi lɛ mli ehã nyɛ.+
3 Nyɛkɛ Israel asafo muu lɛ fɛɛ awiea akɛ, ‘Nyɔɔŋ nɛɛ nɔ gbi ni ji nyɔŋma lɛ, amɛteŋ mɔ fɛɛ mɔ aŋɔ too kome+ kɛhã etsɛ shĩa lɛ, shĩa fɛɛ shĩa aŋɔ too kome ahã ehe.
4 Shi kɛ́ shĩabii lɛ faaa kɛhã too lɛ yeli lɛ, no lɛ, amɛkɛ amɛkutsoŋnyo ni bɛŋkɛ amɛ* lɛ aja yɛ amɛshĩa lɛ, yɛ mɛi* lɛ ayifalɛ naa. Kɛ́ nyɛmiikwɛ bɔ ni nyɛbaaja lɛ nyɛhã lɛ, nyɛdamɔa loo falɛ ni mɔ fɛɛ mɔ baanyɛ aye lɛ nɔ nyɛfea nakai.
5 Nyɛmɔa toonuu ni kpa ko bɛ ehe+ ni eye afi. Nyɛbaanyɛ nyɛmɔ gwantɛŋnuu* loo abotianuu.*
6 Nyɛkwɛa lɛ kɛyashi nyɔɔŋ nɛɛ nɔ gbi ni ji 14 lɛ nɔ,+ ni weku fɛɛ weku ni yɔɔ Israel maŋ muu lɛ fɛɛ mli lɛ agbe etoo lɛ be ni hulu enyɔ shi.*+
7 Amɛŋɔ too lɛ lá lɛ eko, ní amɛkɛkpa shĩai ni amɛbaaye too lɛ yɛ mli lɛ shinaatsei enyɔ lɛ kɛ yiteŋ nɔ lɛ ahe.+
8 “‘Esa akɛ amɛye loo lɛ nakai gbɛkɛ lɛ nɔŋŋ.+ Amɛshã yɛ la nɔ, ní amɛkɛ blodo ni ashikishaŋ-sha* bɛ mli+ kɛ bai ni joɔ aye.+
9 Nyɛkayea loo lɛ eko eŋmɔŋ, ni nyɛkɛ nu akahoa eko hu nyɛyea, shi moŋ nyɛshãa yɛ la nɔ, eyitso lɛ kɛ enaji lɛ kɛ emusuŋnii* lɛ fɛɛ.
10 Nyɛkɛ loo lɛ eko akatoa ní je tsɛre nɔ, shi kɛ́ eko shwɛ kɛyashi leebi lɛ, nyɛkɛ la ashãa.+
11 Ni bɔ ni sa akɛ nyɛye lɛ nɛ, nyɛfĩa nyɛbɛlti,* nyɛwoa nyɛtokotai, ni nyɛhiɛa nyɛdɛhiɛmɔtsei lɛ; ni nyɛyea lɛ oyayaayai. Yehowa Hehoo ni.
12 Ejaakɛ nakai nyɔɔŋ lɛ mli lɛ, makpa Ejipt shikpɔŋ lɛ nɔ, ni matswa Ejipt shikpɔŋ lɛ nɔ kromɔbi fɛɛ kromɔbi nɔ, kɛjɛ gbɔmɔ nɔ kɛyashi kooloo nɔ;+ ni makojo Ejipt nyɔŋmɔi lɛ fɛɛ.+ Miji Yehowa lɛ.
13 Lá lɛ baatsɔ nyɛkadi yɛ shĩai ni nyɛyɔɔ mli lɛ ahe; ni mana lá lɛ ni maho nyɛhe maya, ni haomɔ lɛ baŋ nyɛnɔ ni ekpãtã nyɛhiɛ be ni matswia Ejipt shikpɔŋ lɛ nii lɛ.+
14 “‘Nɛkɛ gbi nɛɛ baatsɔ kaimɔ gbi ahã nyɛ, ni nyɛyea lɛ akɛ gbi jurɔ nyɛhãa Yehowa yɛ nyɛyinɔi fɛɛ amli. Nyɛyea gbi jurɔ nɛɛ, ni etsɔ mla ni kã shi daa hã nyɛ.
15 Nyɛyea blodo ni ashikishaŋ-sha* bɛ mli gbii kpawo.+ Klɛŋklɛŋ gbi lɛ nɔ lɛ, nyɛjiea ashikishaŋ-sha kɛjea nyɛshĩai lɛ amli, ejaakɛ kɛjɛ klɛŋklɛŋ gbi lɛ nɔ kɛyashi gbi ni ji kpawo lɛ nɔ lɛ, mɔ fɛɛ mɔ ni baaye nɔ ko ni ashikishaŋ-sha yɛ mli lɛ, nakai mɔ* lɛ, afo lɛ ashɛ afɔ̃* kɛje Israel.
16 Klɛŋklɛŋ gbi lɛ nɔ lɛ, nyɛfea kpee krɔŋkrɔŋ, ni gbi ni ji kpawo lɛ hu nɔ lɛ, nyɛfea kpee krɔŋkrɔŋ kroko. Akatsu nitsumɔ ko kwraa yɛ gbii nɛɛ anɔ.+ Niyenii ni mɔ fɛɛ mɔ* baaye lɛ pɛ he nii nyɛbaanyɛ nyɛtsu.
17 “‘Nyɛyea Blodo Ni Ashikishaŋ-sha* Bɛ Mli Gbi Jurɔ lɛ,+ ejaakɛ nɛkɛ gbi nɛɛ nɔ nɔŋŋ majie nyɛwebii babaoo* lɛ kɛje Ejipt shikpɔŋ lɛ nɔ. Ni nyɛyea nɛkɛ gbi nɛɛ akɛ gbi jurɔ yɛ nyɛyinɔi lɛ fɛɛ amli, ni etsɔ mla ni kã shi daa hã nyɛ.
18 Klɛŋklɛŋ nyɔɔŋ lɛ nɔ gbi ni ji 14 lɛ gbɛkɛ mli aahu kɛyashi nyɔɔŋ lɛ nɔ gbi ni ji 21 lɛ gbɛkɛ mli lɛ, nyɛyea blodo ni ashikishaŋ-sha* bɛ mli.+
19 Akana ashikishaŋ-sha* ko ashikishaŋ-sha ko yɛ nyɛshĩai lɛ gbii kpawo, ejaakɛ mɔ fɛɛ mɔ ni baaye nɔ ko ni ashikishaŋ-sha yɛ mli lɛ, kɛ́ eji mɔkpɔŋ jio, Israelnyo jio,+ nakai mɔ* lɛ, afo lɛ ashɛ afɔ̃* kɛje Israelbii lɛ ateŋ.+
20 Nyɛkayea ashikishaŋ-sha* nii ko kwraa. Yɛ nyɛshĩai lɛ fɛɛ amli lɛ, nyɛyea blodo ni ashikishaŋ-sha bɛ mli.’”
21 Amrɔ nɔŋŋ lɛ, Mose tsɛ Israel onukpai lɛ fɛɛ+ ni ekɛɛ amɛ akɛ: “Nyɛyaa ni nyɛyamɔmɔa toi ni darako nyɛhãa nyɛwekui lɛ fɛɛ, ni nyɛgbea amɛ kɛhã Hehoo lɛ yeli.
22 No sɛɛ lɛ, nyɛkɛ hisopo* ni afĩ lɛ kusha atsɔa lá ni yɔɔ tsɛnsi mli lɛ mli, ní nyɛkɛkpa shinaatsei enyɔ lɛ kɛ yiteŋ nɔ lɛ ahe; ni nyɛteŋ mɔ ko mɔ ko akaje kpo kɛje eshĩa lɛ mli kɛyashi leebi.
23 Kɛkɛ lɛ, kɛ́ Yehowa bakpa Ejipt shikpɔŋ lɛ nɔ koni ehao Ejiptbii lɛ, ni ena lá lɛ yɛ shinaatsei enyɔ lɛ kɛ yiteŋ nɔ lɛ ahe lɛ, no lɛ bɔ fɛɛ bɔ ni fee lɛ, Yehowa baaho shinai lɛ ahe eya, ni eŋmɛŋ haomɔ ni kɛ gbele baa* lɛ gbɛ ni ebote nyɛshĩai lɛ amli.+
24 “Nyɛyea gbi jurɔ nɛɛ, ni etsɔ mla* ni kã shi daa hã bo kɛ obii lɛ.+
25 Ni kɛ́ nyɛyashɛ shikpɔŋ ni Yehowa kɛbaahã nyɛ lɛ nɔ, tamɔ bɔ ni ekɛɛ lɛ, nyɛyea gbi jurɔ nɛɛ.+
26 Ni kɛ́ nyɛbii lɛ bi nyɛ akɛ, ‘Mɛni hewɔ nyɛyeɔ gbi jurɔ nɛɛ?’+ lɛ,
27 nyɛkɛa amɛ akɛ, ‘Eji Hehoo ni ayeɔ ahãa Yehowa lɛ afɔle, ejaakɛ eho Israelbii lɛ ashĩai lɛ ahe yɛ Ejipt be ni ekpãtã Ejiptbii lɛ ahiɛ* lɛ, shi etaaa wɔshĩai lɛ ahe.’”
Kɛkɛ ni gbɔmɛi lɛ kula shi ni amɛkɛ amɛhiɛ bumɔ shi.
28 No hewɔ lɛ, Israelbii lɛ tee ni amɛyafee bɔ ni Yehowa fã Mose kɛ Aaron lɛ.+ Nakai pɛpɛɛpɛ amɛfee.
29 Kɛkɛ ni nyɔɔŋteŋ lɛ, Yehowa tswia kromɔbii fɛɛ ni yɔɔ Ejipt shikpɔŋ lɛ nɔ lɛ nii,+ kɛjɛ Farao ni ta emaŋtsɛ sɛi lɛ nɔ lɛ kromɔbi nɔ kɛyashi mɔ ni aŋɔ lɛ nom ni awo lɛ tsuŋ* lɛ kromɔbi nɔ, kɛ kooloi hu akromɔbii fɛɛ.+
30 Farao te shi nakai nyɔɔŋ lɛ mli, lɛ kɛ etsuji lɛ fɛɛ kɛ Ejiptbii krokomɛi lɛ fɛɛ, ni Ejiptbii lɛ fó waa diɛŋtsɛ, ejaakɛ shĩa ko shĩa ko bɛ ni mɔ ko gboko yɛ mli.+
31 Amrɔ nɔŋŋ lɛ, etsɛ Mose kɛ Aaron+ nyɔɔŋ lɛ mli, ni ekɛɛ: “Nyɛtea shi, nyɛjea mimaŋbii lɛ ateŋ nyɛyaa, nyɛ kɛ Israelbii krokomɛi lɛ. Nyɛyaa ni nyɛyasɔmɔa Yehowa, tamɔ bɔ ni nyɛkɛɛ lɛ.+
32 Nyɛkɛ nyɛtoi kɛ nyɛtsinai lɛ hu ayaa, tamɔ bɔ ni nyɛkɛɛ lɛ.+ Shi nyɛjɔa mi hu.”
33 Ni Ejiptbii lɛ tsirɛ Israelbii lɛ ayisɛɛ koni amɛshi shikpɔŋ lɛ nɔ oya,+ “ejaakɛ,” amɛkɛɛ, “kɛ́ nyɛshiii lɛ, wɔ fɛɛ wɔbaagboi!”*+
34 No hewɔ lɛ, Israelbii lɛ hole amɛshikishaŋ ni akpɔtɔ ni náko asha lɛ, ni amɛkɛ amɛmamai lɛ fimɔ amɛtsɛnsii ni amɛkpɔtɔɔ ashikishaŋ yɛ mli lɛ, ni amɛkɛtswa amɛkɔɔŋ.
35 Israelbii lɛ fee nɔ ni Mose kɛɛ amɛ lɛ, ni amɛbibii Ejiptbii lɛ jwiɛtɛi kɛ shika tsuru nibii kɛ mamai* hu.+
36 Yehowa hã gbɔmɛi lɛ ahiɛ ba nyam yɛ Ejiptbii lɛ ahiɛ, ni no hewɔ lɛ, amɛhã amɛ nibii ni amɛbi amɛ lɛ, ni amɛkpakpaa Ejiptbii lɛ ahe nii.+
37 Kɛkɛ ni Israelbii lɛ yi mli kɛjɛ Rameses+ kɛmiiya Sukot;+ amɛyi aaafee hii 600,000 ni nyiɛ amɛnane nɔ, soro gbekɛbii hu.+
38 Ni futufutu gbɔmɛi*+ babaoo hu fata amɛhe kɛmiiya, kɛ agbɛnɛ hu, toi kɛ tsinai, hɛɛ, lɛɛ kooloi babaoo diɛŋtsɛ.
39 Amɛkɛ ashikishaŋ ni akpɔtɔ ni amɛkɛjɛ Ejipt lɛ shã blodoi koklobii ni ashikishaŋ-sha* bɛ mli. Ashikishaŋ ni akpɔtɔ lɛ eshako, ejaakɛ ashwie amɛ kɛje Ejipt trukaa be ni amɛsako niyenii ko kwraa amɛtoko gbɛnyiɛmɔ lɛ.+
40 Bei abɔ ni Israelbii lɛ, mɛi ni yahi Ejipt lɛ,+ kɛhi shi akɛ gbɔi ji afii 430.+
41 Be ni afii 430 lɛ ba naagbee lɛ, nakai gbi lɛ nɔ nɔŋŋ lɛ, Yehowa webii babaoo* lɛ fɛɛ je Ejipt shikpɔŋ lɛ nɔ amɛtee.
42 Nakai gbi lɛ nyɔɔŋ lɛ ji nyɔɔŋ ni amɛbaaye jiemɔ ni Yehowa jie amɛ kɛje Ejipt shikpɔŋ lɛ nɔ lɛ he gbi jurɔ. Israelbii lɛ fɛɛ aye nyɔɔŋ nɛɛ akɛ gbi jurɔ amɛhã Yehowa yɛ amɛyinɔi lɛ fɛɛ amli.+
43 Ni Yehowa kɛɛ Mose kɛ Aaron akɛ, “Hehoo lɛ he mla nɛ: Mɔkpɔŋ* ko mɔkpɔŋ ko akaye eko.+
44 Shi kɛ́ mɔ ko yɛ nyɔŋ nuu ni ehé lɛ kɛ shika lɛ, efo lɛ ketia.+ No dani nyɔŋ lɛ baanyɛ aye eko.
45 Mɔ ni ebahi nyɛshikpɔŋ lɛ nɔ, kɛ apaafonyo hu akaye eko.
46 Aye toobi lɛ yɛ shĩa kome mli. Nyɛkɛ loo lɛ eko kwraa akajea kpo kɛjea shĩa lɛ mli, ni nyɛkakua ewui lɛ eko kwraa.+
47 Israel asafo muu lɛ fɛɛ aye gbi jurɔ lɛ.
48 Kɛ́ mɔ ko ebato bo gbɔ ni eetao eye Hehoo lɛ eko ehã Yehowa lɛ, no lɛ, afolɔ ehii lɛ fɛɛ ketia. No dani ebaanyɛ eye gbi jurɔ lɛ eko, ni ebaatsɔ tamɔ Israelnyo nɔŋŋ. Shi nuu fɛɛ nuu ni afoko lɛ ketia lɛ akaye eko.+
49 Mla kome too lɛ nɔŋŋ kã shi hã Israelnyo kɛ gbɔ ni yɔɔ nyɛteŋ lɛ.”+
50 No hewɔ lɛ, Israelbii lɛ fɛɛ fee bɔ ni Yehowa fã Mose kɛ Aaron lɛ. Nakai pɛpɛɛpɛ amɛfee.
51 Nakai gbi lɛ nɔ nɔŋŋ lɛ, Yehowa jie Israelbii lɛ fɛɛ* kɛje Ejipt shikpɔŋ lɛ nɔ.
Shishigbɛ Niŋmaa
^ Hebri sht. ŋm., “no lɛ, ekɛ ekutsoŋnyo ni bɛŋkɛ lɛ.”
^ Loo “susumai.”
^ Loo “gwantɛŋ oblanyo.”
^ Loo “abotia oblanyo.”
^ Hebri sht. ŋm., “yɛ gbɛkɛi enyɔ lɛ ateŋ,” eeenyɛ efee akɛ nɔ ni enɛ tsɔɔ ji, “yɛ gbɛkɛnaashi kɛ gbɛkɛ teŋ”; “be ni hulu enyɔ shi, shi duŋ woko.”
^ Kwɛmɔ Wiemɔi Titrii Amligbalamɔ lɛ.
^ “Musuŋnii” ni akɛtsu nii yɛ biɛ lɛ kɔɔ too lɛ musuŋ kotokui kɛ etsui kɛ emlɛbo kɛ esabai kɛ nibii krokomɛi ni yɔɔ emli lɛ ahe.
^ Hebri sht. ŋm., “nyɛfĩa nyɛhɛ.”
^ Kwɛmɔ Wiemɔi Titrii Amligbalamɔ lɛ.
^ Loo “susuma.”
^ Loo “agbe lɛ.”
^ Loo “susuma fɛɛ susuma.”
^ Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “nyɛsraafoi.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Loo “susuma.”
^ Loo “agbe lɛ.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “eŋmɛŋ hiɛkpatamɔ.”
^ Loo “taomɔ nii.”
^ Loo “be ni ehao Ejiptbii.”
^ Hebri sht. ŋm., “mɔ ni aŋɔ lɛ nom ni yɔɔ bu ni akɛtoɔ nu lɛ shĩa lɛ mli.”
^ Loo “wɔ fɛɛ wɔtamɔ mɛi ni egboi nɔŋŋ.”
^ Loo “atadei.”
^ Ni ji, mɛi srɔtoisrɔtoi ni jeee Israelbii ni futu amɛ lɛ, ni Ejiptbii hu fata he.
^ Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “Yehowa asraafoi.”
^ Ni ji, mɔ ko ni jeee Israelnyo.
^ Hebri sht. ŋm., “Israelbii lɛ kɛ amɛsraafoi lɛ.”
