2 Mose 16:1-36
16 Be ni Israelbii lɛ fɛɛ fã kɛjɛ Elim lɛ, amɛyashɛ Sin ŋa+ ni kã Elim kɛ Sinai teŋ lɛ nɔ. Amɛyashɛ jɛmɛ yɛ nyɔɔŋ ni ji enyɔ lɛ nɔ gbi ni ji 15 lɛ nɔ kɛjɛ be ni amɛshi Ejipt shikpɔŋ lɛ nɔ lɛ.
2 Ni Israelbii lɛ fɛɛ wie huhuuhu amɛshi Mose kɛ Aaron yɛ ŋa lɛ nɔ.+
3 Israelbii lɛ kɛɛkɛɛ amɛ akɛ: “Eji wɔgboi yɛ Yehowa nine naa yɛ Ejipt shikpɔŋ lɛ nɔ, be ni wɔtara kukwɛii kɛ amɛmli loi ahe,+ ní wɔyeɔ nii wɔtɔrɔɔ lɛ moŋ kulɛ, ehi. Amrɔ nɛɛ, nyɛjie wɔ kɛba ŋa nɛɛ nɔ, koni nyɛkɛ hɔmɔ abagbe asafo muu nɛɛ fɛɛ.”+
4 Ni Yehowa kɛɛ Mose akɛ: “Naa, mibahã niyenii* ajɛ ŋwɛi anɛ ashwie shi ahã nyɛ,+ ni daa gbi lɛ,+ maŋbii lɛ ateŋ mɔ fɛɛ mɔ aje kpo ni eyaloo bɔ ni baashɛ enaa nakai gbi lɛ, koni mikɛ no aka amɛ makwɛ akɛ amɛbaanyiɛ yɛ mimla lɛ naa loo amɛnyiɛŋ yɛ naa.+
5 Shi gbi ni ji ekpaa lɛ nɔ lɛ,+ amɛyaloo nɔ ni amɛloɔ yɛ gbii krokomɛi lɛ anɔ lɛ toi enyɔ ní amɛkɛfee niyenii amɛto.”+
6 No hewɔ lɛ, Mose kɛ Aaron kɛɛ Israelbii lɛ fɛɛ akɛ: “Gbɛkɛ mli lɛ, nyɛbaaná nyɛle lɛɛlɛŋ akɛ Yehowa ji mɔ ni jie nyɛ kɛje Ejipt shikpɔŋ lɛ nɔ lɛ.+
7 Leebi mli lɛ, nyɛbaana Yehowa anunyam lɛ, ejaakɛ Yehowa enu huhuuhu ni nyɛwieɔ nyɛshiɔ lɛ lɛ. Wɔ lɛ, namɛi ji wɔ ni nyɛwieɔ huhuuhu nyɛshiɔ wɔ?”
8 Mose kɛɛ kɛfata he akɛ: “Kɛ́ Yehowa hã nyɛ loo nyɛye gbɛkɛ mli, ni leebi lɛ ehã nyɛ niyenii nyɛye nyɛtɔrɔ lɛ, nyɛbaana akɛ Yehowa enu huhuuhu ni nyɛwieɔ nyɛshiɔ lɛ lɛ. Shi wɔ lɛ, namɛi ji wɔ? Jeee wɔ nyɛwieɔ huhuuhu nyɛshiɔ lɛ, shi moŋ, Yehowa nyɛwieɔ nyɛshiɔ lɛ.”+
9 Ni Mose kɛɛ Aaron akɛ: “Kɛɛmɔ Israelbii lɛ fɛɛ akɛ, ‘Nyɛtsia nyɛbaa Yehowa hiɛ, ejaakɛ enu nyɛhuhuuhuwiemɔi lɛ.’”+
10 Be ni Aaron kɛ Israelbii lɛ fɛɛ wie egbe naa nɔŋŋ lɛ, amɛtsɔ amɛhe ni amɛkɛ amɛhiɛ tsɔɔ ŋa lɛ nɔ gbɛ, ni naa! Yehowa anunyam lɛ pue yɛ atatu lɛ mli.+
11 Yehowa kɛ Mose wie ekoŋŋ akɛ:
12 “Minu huhuuhu ni Israelbii lɛ wieɔ lɛ.+ Kɛɛmɔ amɛ akɛ, ‘Hulushinyɔɔ mli* lɛ, nyɛbaaye loo, ni leebi lɛ, nyɛbaaye niyenii* nyɛtɔrɔ,+ ni nyɛbaaná nyɛle lɛɛlɛŋ akɛ, miji Yehowa, nyɛ-Nyɔŋmɔ lɛ.’”+
13 No hewɔ lɛ, nakai gbi lɛ gbɛkɛnaashi lɛ, trakɔkɔi* bayi nsara lɛ mli fɛɛ obɔ,+ ni leebi lɛ, bɔ́ nyɔ kɛbɔle nsara lɛ he fɛɛ kɛkpe.
14 Be ni bɔ́ lɛ kpala lɛ, ana nibii kpɔbiikpɔbii komɛi tamɔ snoo jwere shikpɔŋ yɛ ŋa lɛ nɔ.+
15 Be ni Israelbii lɛ na lɛ, amɛkɛɛkɛɛ amɛhe akɛ: “Mɛni nɛ?” ejaakɛ amɛleee nɔ ni ji. Mose kɛɛ amɛ akɛ: “Niyenii* ni Yehowa kɛhã nyɛ akɛ nyɛye lɛ nɛ.+
16 Nɔ ni Yehowa efã akɛ afee nɛ: ‘Mɔ fɛɛ mɔ aloo bɔ ni ebaanyɛ eye. Mɔ fɛɛ mɔ akwɛ mɛi* abɔ ni yɔɔ emama tsũ lɛ mli, ni eloo niyenii lɛ omer susumɔnɔ kome*+ ehã amɛteŋ mɔ fɛɛ mɔ.’”
17 Israelbii lɛ bɔi nakai feemɔ; amɛteŋ mɛi komɛi loo babaoo ni mɛi komɛi hu loo fioo.
18 Be ni amɛkɛ omer susumɔnɔ lɛ susu lɛ, mɔ ni loo babaoo lɛ náaa kɛtekeee nɔ, ni mɔ ni loo fioo lɛ hu lɛ, ebaaa lɛ akɛ enɔ lɛ shɛɛɛ lɛ.+ Amɛteŋ mɔ fɛɛ mɔ loo bɔ ni ebaanyɛ eye.
19 Ni Mose kɛɛ amɛ akɛ: “Mɔ ko mɔ ko kɛ eko akama shi kɛyashi enɔ jetsɛremɔ leebi.”+
20 Shi amɛyabooo Mose toi. Be ni amɛteŋ mɛi komɛi shi eko amɛma shi kɛyashi enɔ jetsɛremɔ leebi lɛ, ewo gɔgɔmii, ni esha, ni Mose mli wo la ewo amɛ.
21 Leebi fɛɛ leebi lɛ, amɛyaloɔ eko, mɔ fɛɛ mɔ loɔ bɔ ni ebaanyɛ eye. Shi kɛ́ hulu lɛ tso lɛ, esereɔ.
22 Gbi ni ji ekpaa lɛ nɔ lɛ, amɛloo niyenii lɛ toi enyɔ,+ omer susumɔnii enyɔ kɛhã mɔ kome. No hewɔ lɛ, maŋ lɛ mli wekunukpai lɛ babɔ Mose amaniɛ.
23 Ni ekɛɛ amɛ akɛ: “Nakai ji bɔ ni Yehowa wie. Wɔ́ lɛ, abaajɔɔ he kwraa,* eji hejɔɔmɔ gbi krɔŋkrɔŋ kɛhã Yehowa.+ Nyɛshãa nɔ ni nyɛbaashã, ni nyɛhoa nɔ ni nyɛbaahoo;+ koni nyɛkɛ nɔ ni baashwɛ lɛ ama shi ni nyɛkɛto kɛyashi enɔ jetsɛremɔ leebi.”
24 No hewɔ lɛ, amɛkɛto kɛyashi enɔ jetsɛremɔ leebi, tamɔ bɔ ni Mose efã amɛ lɛ, ni eshaaa lɛ, ewooo gɔgɔmii hu.
25 Kɛkɛ ni Mose kɛɛ akɛ: “Nyɛyea no ŋmɛnɛ, ejaakɛ ŋmɛnɛ ji hejɔɔmɔ gbi kɛhã Yehowa. Ŋmɛnɛ lɛ, nyɛnaŋ eko yɛ shikpɔŋ lɛ.
26 Nyɛbaaloo niyenii lɛ gbii ekpaa, shi gbi ni ji kpawo lɛ, ni ji Hejɔɔmɔ Gbi+ lɛ nɔ lɛ, eko baŋ.”
27 Shi gbi ni ji kpawo lɛ nɔ lɛ, maŋbii lɛ ateŋ mɛi komɛi tee koni amɛyaloo niyenii lɛ eko, shi amɛyanaaa eko.
28 No hewɔ lɛ, Yehowa kɛɛ Mose akɛ: “Mɛɛ be nɔŋŋ nyɛbaagbo mikitãi kɛ mimlai lɛ anɔ toi kɛyashi?+
29 Nyɛhãa ehia nyɛjwɛŋmɔ mli akɛ, Yehowa ehã nyɛ Hejɔɔmɔ Gbi lɛ.+ No hewɔ ni gbi ni ji ekpaa lɛ nɔ lɛ, ehãa nyɛ gbii enyɔ niyenii lɛ. Mɔ fɛɛ mɔ ahi shi yɛ he ni eyɔɔ lɛ; mɔ ko mɔ ko akashi he ni eyɔɔ lɛ yɛ gbi ni ji kpawo lɛ nɔ.”
30 No hewɔ lɛ, maŋbii lɛ ye Hejɔɔmɔ Gbi lɛ* yɛ gbi ni ji kpawo lɛ nɔ.+
31 Israelbii lɛ wo niyenii* lɛ gbɛ́i akɛ “mana.”* Niyenii lɛ yɛɔ tamɔ korianda* wui, ni eŋɔɔmɔ tamɔ keeki tɛtrɛbii ni akɛ wo eshwie nɔ.+
32 Ni Mose kɛɛ: “Nɔ ni Yehowa efã nɛ, ‘Nyɛloa niyenii lɛ omer susumɔnɔ kome ni nyɛkɛtoa nyɛhãa nyɛseshibii lɛ,*+ koni amɛna niyenii ni mihã nyɛ akɛ nyɛye yɛ ŋa lɛ nɔ be ni mijie nyɛ kɛje Ejipt shikpɔŋ lɛ nɔ lɛ.’”
33 No hewɔ lɛ, Mose kɛɛ Aaron akɛ: “Wó kɔɔpoo ko ní okɛ mana lɛ omer susumɔnɔ kome awo mli, ni okɛyama Yehowa hiɛ, ni nyɛkɛtoa nyɛhãa nyɛseshibii lɛ.”*+
34 Kɛkɛ ni Aaron kɛyama Odaseyelinɔ*+ lɛ hiɛ, tamɔ bɔ ni Yehowa fã Mose lɛ, koni akɛto.
35 Israelbii lɛ ye mana lɛ afii 40+ kɛyashi be ni amɛshɛ shikpɔŋ ko ni mɛi yɔɔ nɔ lɛ nɔ.+ Amɛye mana lɛ kɛyashi be ni amɛshɛ Kanaan shikpɔŋ lɛ husu lɛ naa.+
36 Efa susumɔnɔ* kome mlijai nyɔŋma mli ekome feɔ omer susumɔnɔ kome.
Shishigbɛ Niŋmaa
^ Hebri sht. ŋm., “blodo.”
^ Hebri sht. ŋm., “Yɛ gbɛkɛi enyɔ lɛ ateŋ,” eeenyɛ efee akɛ nɔ ni enɛ tsɔɔ ji, “Yɛ gbɛkɛnaashi kɛ gbɛkɛ teŋ”; “Be ni hulu enyɔ shi, shi duŋ woko.”
^ Hebri sht. ŋm., “blodo.”
^ Trakɔkɔi ji loofɔji komɛi ni ayeɔ, ni amɛkɛlɛmɔ aaafee sɛntimitai 18. Amɛtamɔ afi loo ŋa mli wuɔ.
^ Hebri sht. ŋm., “Blodo.”
^ Aaafee litai 2.2 (kwat 2). Kwɛmɔ Saji Krokomɛi B14 lɛ.
^ Loo “susumai.”
^ Loo “Wɔ́ lɛ, abaaye hejɔɔmɔ gbi.”
^ Loo “maŋbii lɛ jɔɔ amɛhe.”
^ Hebri sht. ŋm., “blodo.”
^ Korianda ji kwɛ̃ɛ nɔ ko ni wui lɛ kɔla tamɔ lamulu.
^ Eeenyɛ efee akɛ, aná kɛjɛ Hebri wiemɔ ko ni ji, “Mɛni nɛ?” lɛ mli.
^ Loo “nyɛkɛtoa yɛ nyɛyinɔi fɛɛ amli.”
^ Loo “nyɛkɛtoa yɛ nyɛyinɔi fɛɛ amli.”
^ Eeenyɛ efee akɛ, eji adeka ni akɛ nibii ni he hiaa toɔ mli.
^ Efa kome feɔ litai 22 (kwat 20). Kwɛmɔ Saji Krokomɛi B14 lɛ.
