2 Mose 24:1-18
24 Ni ekɛɛ Mose akɛ: “Kwɔɔ kɛba Yehowa ŋɔɔ, bo kɛ Aaron, Nadab kɛ Abihu,+ kɛ Israel onukpai lɛ ateŋ mɛi 70, ni nyɛkoto shi* yɛ sɛɛ fɛlɛŋŋ.
2 Mose kome too atsi abɛŋkɛ Yehowa; shi mɛi krokomɛi lɛ akatsi kɛmiibɛŋkɛ, ni maŋbii lɛ hu kɛ lɛ akakwɔ kɛmiiba.”+
3 Ni Mose ba ebagba maŋbii lɛ nibii fɛɛ ni Yehowa ewie, kɛ eyiŋkpɛi*+ lɛ fɛɛ, ni maŋbii lɛ fɛɛ kɛ gbee kome kɛɛ akɛ: “Nibii fɛɛ ni Yehowa ewie lɛ, wɔbaafee.”+
4 No hewɔ lɛ, Mose ŋmala Yehowa wiemɔi lɛ fɛɛ eshwie shi.+ Kɛkɛ ni ete shi leebi maŋkpa ni ema afɔleshaa latɛ yɛ gɔŋ lɛ shishi, ni ekɛ akulashiŋi* 12 mamɔ shi yɛ Israel wekui 12 lɛ anaa.
5 No sɛɛ lɛ, etsu Israel oblahii komɛi, ni amɛyashã shãa afɔlei, ni amɛkɛ tsinahii shã naanyobɔɔ afɔlei+ amɛhã Yehowa.
6 Kɛkɛ ni Mose kɛ lá lɛ fã wo tsɛnsii amli, ni ekɛ fã hu shwã afɔleshaa latɛ lɛ nɔ.
7 Ni ekɔ kpaŋmɔ lɛ wolo lɛ ni ekane lɛ waa etsɔɔ maŋbii lɛ.+ Ni amɛkɛɛ: “Nibii fɛɛ ni Yehowa ekɛɛ lɛ wɔbaafee, ni wɔbaabo toi.”+
8 No hewɔ lɛ, Mose wó lá lɛ ni ekɛshwã maŋbii lɛ anɔ,+ ni ekɛɛ: “Kpaŋmɔ ni Yehowa kɛ nyɛ ekpaŋ yɛ wiemɔi nɛɛ fɛɛ anaa lɛ nɔ lá nɛ.”+
9 Mose kɛ Aaron, Nadab kɛ Abihu, kɛ Israel onukpai lɛ ateŋ mɛi 70 kwɔ kɛtee,
10 ni amɛna Israel Nyɔŋmɔ lɛ.+ Nɔ ko yɛ enajiashi tamɔ safiro tɛ ni akɛka shi, ni emli tse keŋkeŋ tamɔ ŋwɛi diɛŋtsɛ.+
11 Eyeee Israel hiɛnaanɔbii lɛ awui ko,+ ni amɛna anɔkwa Nyɔŋmɔ lɛ yɛ ninaa mli, ni amɛye nii ni amɛnu nii.
12 Agbɛnɛ, Yehowa kɛɛ Mose akɛ: “Kwɔɔ kɛba miŋɔɔ yɛ gɔŋ lɛ nɔ, ni ohi jɛmɛ. Mikɛ tɛi tɛtrɛbii ni maŋma mla lɛ kɛ kitã lɛ yɛ nɔ lɛ baahã bo koni akɛtsɔɔ maŋbii lɛ nii.”+
13 No hewɔ lɛ, Mose kɛ esɔɔlɔ Yoshua+ yi mli, ni Mose kwɔ kɛtee anɔkwa Nyɔŋmɔ lɛ gɔŋ lɛ nɔ.+
14 Shi ekɛɛ onukpai lɛ akɛ: “Nyɛmɛa wɔ yɛ biɛ kɛyashi wɔbaaku wɔsɛɛ wɔba nyɛŋɔɔ.+ Aaron kɛ Hur+ kɛ nyɛ yɛ biɛ. Mɔ fɛɛ mɔ ni yɔɔ sane ko ni sa akɛ aye lɛ ayana amɛ.”+
15 Kɛkɛ ni Mose kwɔ kɛtee gɔŋ lɛ nɔ be ni atatu lɛ eha gɔŋ lɛ yiteŋ.+
16 Yehowa anunyam+ lɛ tee nɔ ehi Sinai Gɔŋ+ lɛ nɔ, ni atatu lɛ ha gɔŋ lɛ yiteŋ gbii ekpaa. Gbi ni ji kpawo lɛ nɔ lɛ, etsɛ Mose kɛjɛ atatu lɛ mli.
17 Israelbii ní miikwɛ enɛ lɛ na Yehowa anunyam lɛ tamɔ la ni miitso grigri yɛ gɔŋ lɛ yiteŋ.
18 Ni Mose bote atatu lɛ mli, ni ekwɔ kɛtee gɔŋ lɛ yiteŋ.+ Ni Mose hi gɔŋ lɛ nɔ jetsɛremɔ kɛ jenamɔ gbii 40.+
