2 Mose 36:1-38
36 “Bezalel kɛ Oholiab, kɛ mɛi fɛɛ ni le ŋaa nitsumɔ* jogbaŋŋ ni Yehowa ehã amɛ hiɛshikamɔ kɛ niiashishinumɔ koni amɛle bɔ ni amɛbaafee amɛtsu sɔɔmɔ krɔŋkrɔŋ lɛ he nitsumɔi lɛ fɛɛ lɛ baafee ekome kɛtsu nitsumɔ lɛ, tamɔ bɔ ni Yehowa efã lɛ.”+
2 Ni Mose tsɛ Bezalel kɛ Oholiab kɛ mɛi fɛɛ ni le ŋaa nitsumɔ jogbaŋŋ ní Yehowa kɛ hiɛshikamɔ ewo amɛtsui mli lɛ,+ mɛi fɛɛ ni tsui tsirɛ amɛ koni amɛkɛ amɛhe ahã kɛtsu nitsumɔ lɛ.+
3 Kɛkɛ ni amɛhe oniai+ fɛɛ ni Israelbii lɛ kɛba koni akɛtsu sɔɔmɔ krɔŋkrɔŋ lɛ he nitsumɔ lɛ yɛ Mose dɛŋ. Kɛ̃lɛ, Israelbii lɛ tee nɔ amɛjɛ amɛsuɔmɔ mli amɛkɛ nibii bahã lɛ daa leebi.
4 Kɛkɛ ni be ni amɛbɔi nitsumɔ krɔŋkrɔŋ lɛ tsumɔ lɛ, mɛi fɛɛ ni le ŋaa nitsumɔ jogbaŋŋ lɛ bɔi baa, amɛba kɛtsara nɔ,
5 ni amɛkɛɛ Mose akɛ: “Maŋbii lɛ kɛ nibii babaoo miiba fe bɔ ni ataoɔ kɛhã nitsumɔ ni Yehowa efã akɛ atsu lɛ.”
6 No hewɔ lɛ, Mose fã ni atswa adafi yɛ nsara lɛ mli fɛɛ akɛ: “Nuu jio, yoo jio, mɔ ko mɔ ko kɛ nɔ ko akaba dɔŋŋ akɛ onia krɔŋkrɔŋ.” Kɛkɛ ni atsĩ maŋbii lɛ anaa koni amɛkɛ nɔ ko akaba dɔŋŋ.
7 Nibii lɛ fa kɛhã nitsumɔi fɛɛ ni abaatsu lɛ, ni efa po fe nine.
8 No hewɔ lɛ, mɛi fɛɛ ni le ŋaa nitsumɔ jogbaŋŋ+ lɛ kɛ klala ni alo lɛ jogbaŋŋ kɛ kpãa bluu kɛ kooloo hetsɔi afaseo* kɛ kpãa ni tsuɔ waa fee mamai nyɔŋma, ni amɛkɛfee sɔlemɔ buu+ lɛ; elo* kerubim ewo mamai lɛ amli.+
9 Mamai lɛ eko fɛɛ eko kɛlɛ ji ninetalɔi* 28, ni elɛɛmɔ ji ninetalɔi 4. Mamai lɛ fɛɛ daramɔ kome.
10 Kɛkɛ ni etsara mamai lɛ enumɔ efee mama muu kome, ni etsara mamai enumɔ kroko lɛ hu efee mama muu kome.
11 No sɛɛ lɛ, ekɛ kpãa bluu ŋmɔlɔ aflãi yɛ mama muu kome naa yɛ he ni akɛbaatsa yɛ lɛ. Ni efee nakai nɔŋŋ yɛ mama muu kroko lɛ naagbee mama lɛ naa yɛ he ni akɛbaatsa yɛ lɛ.
12 Eŋmɔlɔ aflãi 50 yɛ mama muu kome naa, ni eŋmɔlɔ aflãi 50 yɛ mama muu kroko lɛ hu naa yɛ he ni akɛ mamai muji enyɔ lɛ baatsa yɛ lɛ, koni aflãi lɛ eko akwɛ eko hiɛ.
13 Naagbee lɛ, ekɛ shika tsuru fee kpoji* 50, ni ekɛ kpoji lɛ mɔmɔ mamai muji enyɔ lɛ kɛtsa, ni etsɔ mama muu kome kɛhã sɔlemɔ buu lɛ.
14 Ni ekɛ abotia hetsɔi fee mamai ni akɛbaaha sɔlemɔ buu lɛ nɔ lɛ. Efee mamai 11.+
15 Mamai lɛ eko fɛɛ eko kɛlɛ ji ninetalɔi 30, ni elɛɛmɔ ji ninetalɔi 4. Mamai 11 lɛ fɛɛ daramɔ kome.
16 Kɛkɛ ni etsara mamai lɛ enumɔ efee lɛ mama muu kome, ni etsara mamai ekpaa kroko lɛ hu efee lɛ mama muu kome.
17 No sɛɛ lɛ, eŋmɔlɔ aflãi 50 yɛ mama muu lɛ ekome naagbee mama lɛ naa yɛ he ni akɛbaatsa yɛ lɛ, ni eŋmɔlɔ aflãi 50 yɛ mama muu kroko lɛ naagbeehe lɛ, yɛ he ni akɛ mamai muji enyɔ lɛ baatsa yɛ lɛ.
18 Ni ekɛ akɔɔble fee kpoji 50 koni akɛmɔmɔ mamai muji enyɔ lɛ kɛtsa, ní etsɔ mama muu kome.
19 Ekɛ gwantɛŋhii ahewoji ni awo lɛ tsofa tsuru fee nɔhaanɔ kɛhã sɔlemɔ buu lɛ, ni ekɛ nu mli gbei ahewoji hu fee nɔhaanɔ ní akɛbaaha no hu nɔ.+
20 Ni ekɛ akasia tso+ fee sɔlemɔ buu lɛ mplaŋi ni mamɔ shi jaŋŋ lɛ.+
21 Mplaŋi lɛ eko fɛɛ eko kwɔlɛ ji ninetalɔi nyɔŋma, ni elɛɛmɔ ji ninetalɔ kome kɛ fã.
22 Mplaŋ fɛɛ mplaŋ yɛ naji* enyɔ ní eko ye eko ŋɛlɛ nɔ. Nakai ji bɔ ni efee sɔlemɔ buu lɛ mplaŋi lɛ fɛɛ.
23 No hewɔ lɛ, efee mplaŋi kɛhã sɔlemɔ buu lɛ afã ni ye wuoyigbɛ lɛ, mplaŋi 20 ni amɛhiɛ miikwɛ wuoyigbɛ.
24 Ni ekɛ jwiɛtɛi fee nɔdaamɔnii 40 ni fɔji yɔɔ mli ewo mplaŋi 20 lɛ ashishi, nɔdaamɔnii enyɔ ni fɔji yɔɔ mli yɛ mplaŋ kome shishi kɛhã enaji enyɔ lɛ, ni nɔdaamɔnii enyɔ ni fɔji yɔɔ mli yɛ mplaŋi ni nyiɛ sɛɛ lɛ eko fɛɛ eko shishi kɛhã enaji enyɔ lɛ.+
25 Ni efee mplaŋi 20 kɛhã sɔlemɔ buu lɛ afã kroko lɛ, he ni ye kooyigbɛ lɛ
26 kɛ amɛjwiɛtɛi nɔdaamɔnii 40 ni fɔji yɔɔ mli, nɔdaamɔnii enyɔ ni fɔji yɔɔ mli yɛ mplaŋ kome shishi, ni nɔdaamɔnii enyɔ ni fɔji yɔɔ mli yɛ mplaŋi krokomɛi lɛ eko fɛɛ eko shishi.
27 Efee mplaŋi ekpaa kɛhã sɔlemɔ buu lɛ sɛɛgbɛ, he ni ye anaigbɛ lɛ.+
28 Efee mplaŋi enyɔ kɛfee sɔlemɔ buu lɛ koŋtsei, yɛ sɛɛgbɛ koji enyɔ lɛ.
29 Akɛ mplaŋi enyɔ bɔ he kɛfee koŋtsei lɛ kɛjɛ shishi kɛtee ŋwɛi, aahu kɛyashi klɛŋklɛŋ ga lɛ he. Nakai ji bɔ ni efee koŋtsei enyɔ lɛ fɛɛ.
30 No hewɔ lɛ, fɛɛ fee mplaŋi kpaanyɔ kɛ amɛjwiɛtɛi nɔdaamɔnii 16 ni fɔji yɔɔ mli, nɔdaamɔnii enyɔ ni fɔji yɔɔ mli yɛ mplaŋ fɛɛ mplaŋ shishi.
31 Ni ekɛ akasia tso fee mlibelemɔnii, efee mlibelemɔnii enumɔ kɛhã mplaŋi ni yɔɔ sɔlemɔ buu lɛ afã kome lɛ,+
32 ni efee mlibelemɔnii enumɔ kɛhã mplaŋi ni yɔɔ sɔlemɔ buu lɛ afã kroko lɛ, ni efee enumɔ hu kɛhã mplaŋi ni yɔɔ sɔlemɔ buu lɛ sɛɛgbɛ, he ni ye anaigbɛ lɛ.
33 Ni efee teŋ mlibelemɔnii lɛ koni ebele mplaŋi lɛ teŋgbɛ, kɛjɛ shishijee kɛyashi naagbee.
34 Ekɛ shika tsuru ha mplaŋi lɛ ahe, ni ekɛ shika tsuru fee amɛhe gai ní akɛ mlibelemɔnii lɛ baahɔlɔ mli lɛ, ni ekɛ shika tsuru ha mlibelemɔnii lɛ ahe.+
35 Ni ekɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ fee pateeshɛŋ.+ Elo kerubim+ ewo mli.+
36 Ni ekɛ akasia tso fee akulashiŋi ejwɛ ehã pateeshɛŋ lɛ, ni ekɛ shika tsuru ha akulashiŋi lɛ ahe, ni ekɛ shika tsuru fee amɛhe kpoji lɛ, ni ekɛ jwiɛtɛi fee nɔdaamɔnii ejwɛ ni fɔji yɔɔ mli ehã amɛ.
37 No sɛɛ lɛ, ekɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ lo pateeshɛŋ ewo sɔlemɔ buu lɛ shinaa lɛ naa,+
38 ni efee ekulashiŋi enumɔ lɛ kɛ amɛhe kpoji lɛ hu. Ekɛ shika tsuru ha amɛyiteŋ kɛ amɛmlibɛlɛmɔnii* lɛ ahe, shi amɛnɔdaamɔnii enumɔ ni fɔji yɔɔ mli lɛ, akɔɔble ni.
Shishigbɛ Niŋmaa
^ Hebri sht. ŋm., “mɛi fɛɛ ni tsui hiɛ kã shi.”
^ Blɔfo mli lɛ, “pɛpol.”
^ Eeenyɛ efee akɛ, aatsɔɔ Bezalel.
^ Ninetalɔ kome feɔ sɛntimitai 44.5 (iŋtsii 17.5). Kwɛmɔ Saji Krokomɛi B14 lɛ.
^ Kpoji ni akɛtsu nii yɛ biɛ lɛ ji dadei bibii komɛi ni adɔrɔ amɛnaabu tamɔ kpoŋ.
^ Loo “tsei ni mamɔ shi jaŋŋ.”
^ Blɔfo mli lɛ, “pɛpol.”
^ Blɔfo mli lɛ, “pɛpol.”
^ Loo “gai srɔtoi” ni akɛbɛlɛɔ nii amli.
