2 Mose 4:1-31
4 Ni Mose hã hetoo akɛ: “Shi kɛ́ amɛheee mi amɛyeee, ni amɛbooo migbee toi hu?+ ejaakɛ amɛbaakɛɛ akɛ, ‘Yehowa ejieko ehe kpo etsɔko bo.’”
2 Kɛkɛ ni Yehowa kɛɛ lɛ akɛ: “Mɛni ohiɛ yɛ odɛŋ lɛ?” Ehã hetoo akɛ: “Tso.”
3 Ekɛɛ: “Shɛ ofɔ̃ shikpɔŋ.” No hewɔ lɛ, eshɛ efɔ̃ shikpɔŋ, ni etsɔ onufu;+ ni Mose jo onufu lɛ naa foi.
4 Agbɛnɛ, Yehowa kɛɛ Mose akɛ: “Kpã onine mli ní omɔ elei.” No hewɔ lɛ, ekpã enine mli ni emɔ elei lɛ, ni etsɔ tso yɛ edɛŋ.
5 Kɛkɛ ni Nyɔŋmɔ kɛɛ: “Enɛ baahã amɛhe amɛye akɛ, Yehowa, amɛtsɛmɛi a-Nyɔŋmɔ lɛ, ni ji Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ lɛ,+ ejie ehe kpo etsɔɔ bo.”+
6 Yehowa kɛɛ lɛ ekoŋŋ akɛ: “Ofainɛ, okɛ onine awo otade lɛ ŋwɛigbɛ he ni edɔrɔ lɛ.” No hewɔ lɛ, ekɛ enine wo etade lɛ mli he ni edɔrɔ lɛ. Be ni ejie enine lɛ, naa, kpiti eshwie enine he ni eyɛ tamɔ snoo!+
7 Ni ekɛɛ: “Okɛ onine awo otade lɛ ŋwɛigbɛ he ni edɔrɔ lɛ ekoŋŋ.” No hewɔ lɛ, ekɛ enine wo etade lɛ mli ekoŋŋ. Be ni ejie enine yɛ atade lɛ mli lɛ, etsɔ tamɔ bɔ ni eyɔɔ tsutsu lɛ!
8 Ekɛɛ akɛ: “Kɛ́ amɛheee bo amɛyeee loo amɛkpɛlɛɛɛ klɛŋklɛŋ okadi lɛ nɔ lɛ, no lɛ, bɔ fɛɛ bɔ ni fee lɛ, amɛbaakpɛlɛ okadi ni ji enyɔ lɛ nɔ.+
9 Kɛji enɛ fɛɛ sɛɛ lɛ amɛheee okadii enyɔ nɛɛ amɛyeee, ni amɛbooo ogbee toi lɛ, no lɛ, yɛɛ Nilo Faa lɛ mli nu lɛ eko ní otsi oshwie shikpɔŋ gbiŋ lɛ nɔ, ni nu ni oyɛ yɛ Nilo lɛ mli lɛ baatsɔ lá yɛ shikpɔŋ gbiŋ lɛ nɔ.”+
10 Ni Mose kɛɛ Yehowa akɛ: “Yehowa, ofainɛ, minaa tseee kɛjɛ jeeŋmɔ beebe, ni kɛjɛ be ni okɛ otsulɔ bɔi wiemɔ nɛɛ po lɛ, minaa tseko, ejaakɛ miwiemɔ yɛ shɔ̃ɔ* ni mililɛi hu tsii.”+
11 Yehowa kɛɛ lɛ akɛ: “Namɔ fee naabu ehã gbɔmɔ, aloo namɔ hãa* mɔ ko tsɔɔ mumui, toimulɔ, mɔ ni naa nii faŋŋ, loo shwilafo? Ani jeee mi, Yehowa?
12 No hewɔ lɛ, agbɛnɛ yaa, ni mafata ohe be ni owieɔ lɛ,* ni matsɔɔ bo nɔ ni sa akɛ owie.”+
13 Shi ekɛɛ: “Miikpa bo fai Yehowa, ofainɛ, tsu mɔ fɛɛ mɔ ni osumɔɔ.”
14 Kɛkɛ ni Yehowa mli wo la ewo Mose, ni ekɛɛ: “Ni onyɛmi nuu Aaron,+ Levinyo lɛ hu? Mile akɛ ele wiemɔ jogbaŋŋ. Ni amrɔ nɛɛ, enyiɛ gbɛ kɛmiiba ní ekɛ bo abakpe. Kɛ́ ena bo lɛ, etsui baanya.+
15 No hewɔ lɛ, okɛ lɛ awie ní okɛ wiemɔi lɛ awo enaa,+ ni mafata bo kɛ lɛ fɛɛ he be ni owieɔ lɛ,+ ni matsɔɔ nyɛ nɔ ni nyɛfee.
16 Ekɛ maŋ lɛ baawie ehã bo, ni ebaatsɔ onaawielɔ, ni obaasɔmɔ akɛ Nyɔŋmɔ ohã lɛ.*+
17 Ni obaakɔ tso nɛɛ ohiɛ odɛŋ, ní okɛfee okadii lɛ.”+
18 No hewɔ lɛ, Mose ku esɛɛ kɛtee eshaanuu Yetro+ ŋɔɔ ni eyakɛɛ lɛ akɛ: “Ofainɛ, miitao maku misɛɛ ni maya minyɛmimɛi ní yɔɔ Ejipt lɛ aŋɔɔ ní mayakwɛ akɛ amɛyɛ wala mli lolo lo.” Yetro kɛɛ Mose akɛ: “Yaa yɛ toiŋjɔlɛ mli.”
19 No sɛɛ lɛ, Yehowa kɛɛ Mose yɛ Midian akɛ: “Kuu osɛɛ ní oya Ejipt, ejaakɛ mɛi fɛɛ ní taoɔ bo agbe* lɛ egboi.”+
20 Kɛkɛ ni Mose ŋɔ eŋa kɛ ebihii lɛ, ni ehole amɛ etara teji ko nɔ, ni eyi mli kɛmiiya Ejipt shikpɔŋ lɛ nɔ. Agbɛnɛ hu, Mose kɔ anɔkwa Nyɔŋmɔ lɛ tso lɛ ehiɛ edɛŋ.
21 Kɛkɛ ni Yehowa kɛɛ Mose akɛ: “Kɛ́ oku osɛɛ otee Ejipt lɛ, kwɛmɔ ni ofee naakpɛɛ nii ní mihã bo hewalɛ akɛ ofee lɛ fɛɛ yɛ Farao hiɛ.+ Shi maŋmɛ gbɛ ní ekpiliŋ etsui,+ ni eŋmɛŋ maŋ lɛ gbɛ ni amɛya.+
22 Kɛɛmɔ Farao akɛ, ‘Nɔ ni Yehowa kɛɛ nɛ: “Mibinuu ji Israel, mikromɔbi ni.+
23 Miikɛɛ bo akɛ, Hã mibinuu lɛ aya koni eyasɔmɔ mi. Shi kɛ́ ohãaa eya lɛ, no lɛ, magbe obinuu lɛ, okromɔbi lɛ.”’”+
24 Agbɛnɛ, be ni amɛnyiɛ gbɛ kɛyaa ní amɛyashɛ gbɔiatoohe lɛ, Yehowa+ kɛ lɛ bakpe ni eetao egbe lɛ.*+
25 Naagbee lɛ, Zipora+ kɔ tɛ ko ní naa ba* ni ekɛfo ebinuu lɛ ketia, ni ehã enuutso lɛ naa loo ní efo lɛ sa enane he, ni ekɛɛ: “Ejaakɛ oji lá ayemforo wu kɛhã mi.”
26 No hewɔ lɛ, Nyɔŋmɔ ŋmɛɛ ehe. Kɛkɛ ni yoo lɛ kɛɛ, “oji lá ayemforo wu,” yɛ ketiafoo lɛ hewɔ.
27 Ni Yehowa kɛɛ Aaron akɛ: “Yaa ni okɛ Mose ayakpe yɛ ŋa lɛ nɔ.”+ No hewɔ lɛ, etee ni ekɛ lɛ yakpe yɛ anɔkwa Nyɔŋmɔ lɛ gɔŋ lɛ he,+ ni eŋa lɛ kɛ naashɔmɔ.
28 Ni Mose gba Aaron wiemɔi fɛɛ ní Yehowa, mɔ ni tsu lɛ lɛ ewie lɛ,+ kɛ okadii fɛɛ ní efã* lɛ akɛ efee lɛ.+
29 No sɛɛ lɛ, Mose kɛ Aaron tee ni amɛyabua Israelbii lɛ anukpai lɛ fɛɛ anaa.+
30 Aaron kɛɛ amɛ wiemɔi fɛɛ ní Yehowa kɛ Mose ewie lɛ, ni efee okadii+ lɛ yɛ maŋ lɛ hiɛ.
31 Kɛkɛ ni gbɔmɛi lɛ he amɛye.+ Be ni amɛnu akɛ Yehowa egbala ejwɛŋmɔ kɛba Israelbii lɛ anɔ,+ ni akɛ, ena amanehulu ní amɛnaa lɛ,+ amɛkula shi ni amɛkɛ amɛhiɛ bumɔ shi.
Shishigbɛ Niŋmaa
^ Hebri sht. ŋm., “minaabu tsii.”
^ Loo “ŋmɛɔ gbɛ ni.”
^ Hebri sht. ŋm., “mafata onaabu he.”
^ Loo “obaadamɔ Nyɔŋmɔ najiaŋ ohã lɛ.”
^ Loo “taoɔ osusuma.”
^ Eeenyɛ efee akɛ, Mose binuu lɛ he awieɔ lɛ.
^ Loo “tɛ kakla.”
^ Ni ji, Nyɔŋmɔ.
