2 Samuel 6:1-23
6 Kɛkɛ ni David bua Israel asraafoi ni he esa fe fɛɛ lɛ anaa ekoŋŋ, hii 30,000.
2 Kɛkɛ ni David kɛ hii lɛ fɛɛ ni fata ehe lɛ yiŋ akɛ amɛmiiya Baale-yuda koni amɛyawó anɔkwa Nyɔŋmɔ lɛ Adeka+ lɛ kɛjɛ jɛmɛ kɛba; Adeka nɛɛ hiɛ mɛi yaboɔ amɛtsɛɔ Yehowa, taiatsɛ+ lɛ ni taa maŋtsɛ sɛi nɔ yɛ kerubim lɛ anɔ*+ lɛ gbɛ́i yɛ.
3 Shi amɛkɛ anɔkwa Nyɔŋmɔ lɛ Adeka lɛ ma shwiili hee ko nɔ,+ ni amɛwó kɛje Abinadab shĩa+ lɛ yɛ gɔŋkpɔ lɛ nɔ; ni Uza kɛ Ahio, Abinadab bihii lɛ ji mɛi ni nyiɛ shwiili hee lɛ hiɛ.
4 No hewɔ lɛ, amɛwó anɔkwa Nyɔŋmɔ lɛ Adeka lɛ kɛje Abinadab shĩa lɛ yɛ gɔŋkpɔ lɛ nɔ, ni Ahio nyiɛ Adeka lɛ hiɛ.
5 David kɛ Israel shĩa lɛ fɛɛ miinya yɛ Yehowa hiɛ ni amɛmiitswa junipa tso saŋkui kɛ saŋkui kɛ kpãi saŋkui krokomɛi+ kɛ akashai+ kɛ ŋmɛji kɛ tsɛŋtsɛŋi.+
6 Shi be ni amɛshɛ Nakon ŋmaagbeemɔhe lɛ, Uza kpã enine mli kɛtee anɔkwa Nyɔŋmɔ lɛ Adeka lɛ he ni emɔ mli,+ ejaakɛ shwɛ fioo ni tsinai lɛ atsi Adeka lɛ agbee shi.
7 Kɛkɛ ni Yehowa mli wo la ewo Uza, ni anɔkwa Nyɔŋmɔ lɛ tswa lɛ nɔ+ yɛ jɛmɛ yɛ bulɛ kpo ni eyajieee lɛ hewɔ,+ ni egbo yɛ jɛmɛ yɛ anɔkwa Nyɔŋmɔ lɛ Adeka lɛ masɛi.
8 Shi David mli wo la* ejaakɛ Yehowa mlifu egbá ewo Uza; ni atsɛ jɛmɛ akɛ Perez-uza,* ni nakai atsɛɔ jɛmɛ lolo kɛbashi ŋmɛnɛ.
9 No hewɔ lɛ, David she Yehowa gbeyei+ yɛ nakai gbi lɛ nɔ, ni ekɛɛ akɛ: “Te aaafee tɛŋŋ ni Yehowa Adeka lɛ aaaba miŋɔɔ lɛ?”+
10 David sumɔɔɔ ni ekɛ Yehowa Adeka lɛ baa he ni eyɔɔ yɛ David Maŋ+ lɛ mli. Shi David hã awó kɛtee Obed-edom,+ Gatnyo* lɛ shĩa lɛ.
11 Yehowa Adeka lɛ hi Obed-edom, Gatnyo* lɛ shĩa lɛ nyɔji etɛ, ni Yehowa tee nɔ ejɔɔ Obed-edom kɛ eshĩabii lɛ fɛɛ.+
12 Ayabɔ Maŋtsɛ David amaniɛ akɛ: “Yehowa ejɔɔ Obed-edom shĩa lɛ kɛ nii fɛɛ ni eyɔɔ yɛ anɔkwa Nyɔŋmɔ lɛ Adeka lɛ hewɔ.” No hewɔ lɛ, David tee ni eyawó anɔkwa Nyɔŋmɔ lɛ Adeka lɛ kɛjɛ Obed-edom shĩa lɛ ni ekɛkwɔ kɛba David Maŋ lɛ mli kɛ miishɛɛ.+
13 Be ni mɛi ni tere+ Yehowa Adeka lɛ famɔ amɛnaji shii ekpaa lɛ, ekɛ tsinanuu kɛ kooloo ni eshwi shã afɔle.
14 David kɛ ehewalɛ fɛɛ miijo yɛ Yehowa hiɛ; no mli fɛɛ lɛ, David wo* klala efɔd.+
15 David kɛ Israel shĩa lɛ fɛɛ kɛ Yehowa Adeka+ lɛ miikwɔ kɛmiiba ni amɛmiibɔ oshe+ ni amɛmiikpã tɛtɛrɛmantɛrɛ.*+
16 Shi be ni Yehowa Adeka lɛ bashɛ David Maŋ lɛ mli lɛ, Saul biyoo Mikal+ kwɛ shikpɔŋ kɛtsɔ samfɛlɛ lɛ mli ni ena Maŋtsɛ David ni eehuru ni eejo yɛ Yehowa hiɛ; ni enyaŋe David yɛ etsui mli.+
17 No hewɔ lɛ, amɛkɛ Yehowa Adeka lɛ ba, ni amɛkɛbama he ni asaa kɛhã lɛ yɛ mama tsũ ni David efee ehã lɛ lɛ mli.+ Kɛkɛ ni David shã shãa afɔlei+ kɛ naanyobɔɔ afɔlei+ yɛ Yehowa hiɛ.+
18 Be ni David shã shãa afɔlei kɛ naanyobɔɔ afɔlei lɛ egbe naa lɛ, ejɔɔ maŋ lɛ yɛ Yehowa, taiatsɛ lɛ, gbɛ́i mli.
19 Agbɛnɛ hu, eja blodo ni afee lɛ kokloo tamɔ ga kɛ deeti keeki* kɛ wain yibii keeki* ehã maŋ lɛ fɛɛ, Israel asafo lɛ fɛɛ, nuu fɛɛ nuu kɛ yoo fɛɛ yoo, kɛkɛ ni maŋbii lɛ fɛɛ shi, ni mɔ fɛɛ mɔ tee eshĩa.
20 Be ni David ku esɛɛ kɛtee koni eyajɔɔ lɛ diɛŋtsɛ eshĩabii lɛ, Saul biyoo Mikal+ kɛ lɛ bakpe. Ekɛɛ akɛ: “Nyam pi Israel maŋtsɛ lɛ wo ehiɛ ŋmɛnɛ nɛkɛ, be ni ekpa ehe mama yɛ etsuji lɛ anyɔji yei lɛ ahiɛ, tamɔ bɔ ni hii ni bɛ yitseiaŋ lɛ kpaa amɛhe mama yɛ mɛi ahiɛ lɛ pɛpɛɛpɛ!”+
21 Kɛkɛ ni David kɛɛ Mikal akɛ: “Yehowa, mɔ ni shi otsɛ kɛ eshĩa lɛ fɛɛ sɛɛ ni ehala mi ni ewó mi Israel, Yehowa maŋ lɛ hiɛnyiɛlɔ lɛ hiɛ minya yɛ lɛ.+ No hewɔ lɛ, manya yɛ Yehowa hiɛ,
22 ni maba mihe shi fe nɛkɛ po ni mana mihe bibioo yɛ mi diɛŋtsɛ mihiŋmɛiiaŋ. Shi mawo mihiɛ nyam yɛ nyɔji yei lɛ ni owieɔ amɛsane lɛ ahiɛ.”
23 No hewɔ lɛ, Saul biyoo Mikal+ náaa bi kɛyashi egbo.
Shishigbɛ Niŋmaa
^ Shishitsɔɔmɔi komɛi kɛɔ akɛ, “ateŋ.”
^ Loo “egba David naa.”
^ Eshishi ji, “Gba Ewo Uza.”
^ Loo “Gitinyo.”
^ Loo “Gitinyo.”
^ Hebri sht. ŋm., “fĩ.”
^ Hebri sht. ŋm., “akolonto.”
^ Keeki nɛɛ ji deeti yibii ni egbi ni anyɛmɔ nɔ afee lɛ ekome tamɔ pan keeki.
^ Keeki nɛɛ ji wain yibii ni egbi ni anyɛmɔ nɔ afee lɛ ekome tamɔ pan keeki.
