3 Mose 20:1-27
20 Yehowa tee nɔ ekɛ Mose wie ekɛɛ:
2 “Kɛɛmɔ Israelbii lɛ akɛ, ‘Israelnyo fɛɛ Israelnyo kɛ gbɔ fɛɛ gbɔ ni ebahi Israel ni kɛ eshwiei lɛ eko baahã Molek lɛ, bɔ fɛɛ bɔ ni fee lɛ, agbe lɛ.+ Shikpɔŋ lɛ nɔ bii lɛ atswia lɛ tɛi ni egbo.
3 Mi diɛŋtsɛ majie mihiɛ maka nakai mɔ lɛ, ni mafo lɛ mashɛ mafɔ̃* kɛje emaŋbii lɛ ateŋ, ejaakɛ ekɛ eshwiei lɛ eko ehã Molek, ni ebule mihe krɔŋkrɔŋ lɛ,+ ni ewo migbɛ́i krɔŋkrɔŋ lɛ he muji.
4 Kɛ́ nakai mɔ lɛ kɛ eshwiei lɛ eko hã Molek, ni shikpɔŋ lɛ nɔ bii lɛ je gbɛ amɛku amɛhiɛ amɛfɔ̃ enifeemɔ lɛ nɔ, ni amɛgbeee lɛ lɛ,+
5 no lɛ, bɔ fɛɛ bɔ ni fee lɛ, mi diɛŋtsɛ majie mihiɛ maka nakai mɔ lɛ kɛ eweku lɛ.+ Mafo nakai mɔ lɛ mashɛ mafɔ̃* kɛje emaŋbii lɛ ateŋ, lɛ kɛ mɛi fɛɛ ni fata ehe ni amɛkɛ Molek bɔ ajwamaŋ lɛ.
6 “‘Mɔ* ni yaa mumɔi atsɛlɔi+ kɛ klamɔfoi aŋɔɔ,+ ni ekɛ nakai feemɔ tsɔɔ akɛ eje misɛɛ* lɛ, bɔ fɛɛ bɔ ni fee lɛ, matsɔ mihiɛ mawo nakai mɔ* lɛ, ni mafo lɛ mashɛ mafɔ̃* kɛje emaŋbii lɛ ateŋ.+
7 “‘Nyɛtsua nyɛhe ni nyɛfea krɔŋkrɔŋ,+ ejaakɛ miji Yehowa, nyɛ-Nyɔŋmɔ lɛ.
8 Ni nyɛyea mimlai lɛ anɔ daa.+ Miji Yehowa, mɔ ni feɔ nyɛ krɔŋkrɔŋ lɛ.+
9 “‘Kɛ́ mɔ ko lomɔ* epapa loo emami lɛ, bɔ fɛɛ bɔ ni fee lɛ, agbe lɛ.+ Akɛni elomɔ epapa loo emami hewɔ lɛ, lɛ diɛŋtsɛ elá abua eyiteŋ.
10 “‘Agbɛnɛ, kɛ́ nuu ko kɛ nuu kroko ŋa fite gbãla* lɛ: Mɔ ni kɛ enaanyo nuu ŋa lɛ fite gbãla lɛ, bɔ fɛɛ bɔ ni fee lɛ, agbe lɛ, agbe nuu gbalafitelɔ lɛ kɛ yoo gbalafitelɔ lɛ fɛɛ.+
11 Nuu ni kɛ epapa ŋa wɔɔ lɛ, eshwie epapa hiɛ shi.*+ Bɔ fɛɛ bɔ ni fee lɛ, agbe amɛyi enyɔ lɛ fɛɛ. Amɛ diɛŋtsɛ amɛlá abua amɛyiteŋ.
12 Kɛ́ nuu ko kɛ ebinuu ŋa wɔ lɛ, bɔ fɛɛ bɔ ni fee lɛ, agbe amɛyi enyɔ lɛ fɛɛ. Nɔ ni amɛfee lɛ teɔ shi woɔ adebɔɔ gbɛjianɔtoo. Amɛ diɛŋtsɛ amɛlá abua amɛyiteŋ.+
13 “‘Kɛ́ nuu ko kɛ nuu kroko wɔ tamɔ bɔ ni akɛ yoo wɔɔ lɛ, amɛyi enyɔ lɛ fɛɛ amɛfee nihiinii.+ Bɔ fɛɛ bɔ ni fee lɛ, agbe amɛ. Amɛ diɛŋtsɛ amɛlá abua amɛyiteŋ.
14 “‘Kɛ́ nuu ko ŋɔ yoo ko kɛ ebiyoo fɛɛ lɛ, eji yakayaka nifeemɔ.*+ Ashã nuu lɛ kɛ amɛ fɛɛ yɛ la mli,+ koni akakã he afee yakayaka nii yɛ nyɛteŋ.
15 “‘Kɛ́ nuu ko kɛ kooloo ko ná bɔlɛ lɛ, bɔ fɛɛ bɔ ni fee lɛ, agbe lɛ, ni kooloo lɛ hu, nyɛgbea lɛ.+
16 Kɛ́ yoo ko bɛŋkɛ kooloo ko koni ekɛ kooloo lɛ aná bɔlɛ lɛ,+ agbe yoo lɛ kɛ kooloo lɛ fɛɛ. Bɔ fɛɛ bɔ ni fee lɛ, agbe amɛ. Amɛ diɛŋtsɛ amɛlá abua amɛyiteŋ.
17 “‘Kɛ́ nuu ko kɛ enyɛmi yoo, ni ji epapa biyoo loo emami biyoo ná bɔlɛ, ni nuu lɛ na yoo lɛ yayaiaŋ ni yoo lɛ hu na nuu lɛ yayaiaŋ lɛ, eji hiɛshishwiemɔ. + Afolɔ amɛ ashɛrɛ ashwie* yɛ amɛmaŋbii lɛ ahiɛ. Eshwie enyɛmi yoo lɛ hiɛ shi.* Ehe sɔ̃ lɛ akã nuu lɛ nɔ.
18 “‘Kɛ́ nuu ko kɛ yoo ko ní miifee yei anii ná bɔlɛ lɛ, nuu lɛ kɛ yoo lɛ fɛɛ ebuuu yoo lɛ lá lɛ.*+ Afolɔ amɛyi enyɔ lɛ fɛɛ ashɛrɛ ashwie* kɛje amɛmaŋbii lɛ ateŋ.
19 “‘Okɛ omami nyɛmi yoo loo opapa nyɛmi yoo akaná bɔlɛ, ejaakɛ kɛ́ ofee nakai lɛ, ooshwie owekunyo kpaakpa hiɛ shi.+ Ehe sɔ̃ lɛ akã amɛnɔ.
20 Nuu ni kɛ etsɛkwɛ̃ ŋa wɔɔ lɛ, eshwie etsɛkwɛ̃ lɛ hiɛ shi.*+ Esha ni amɛfee lɛ he sɔ̃ lɛ akã amɛnɔ. Amɛbaagboi, amɛfɔŋ bii.
21 Kɛ́ nuu ko ŋɔ enyɛmi nuu ŋa lɛ, eji nyaŋemɔ nii.+ Eshwie enyɛmi nuu lɛ hiɛ shi.* Amɛfɔŋ bii.
22 “‘Nyɛyea mimlai lɛ fɛɛ kɛ miyiŋkpɛi*+ lɛ fɛɛ anɔ daa,+ koni shikpɔŋ ni mikɛ nyɛ yaa nɔ koni nyɛyahi nɔ lɛ akashwe nyɛ eshwie.+
23 Nyɛkanyiɛa yɛ maji ni mishwieɔ yɛ nyɛhiɛ lɛ amlai lɛ anaa;+ ejaakɛ amɛfee nibii nɛɛ fɛɛ, ni minyaŋeɔ amɛ.+
24 No hewɔ ni mikɛɛ nyɛ akɛ: “Nyɛbaaŋɔ amɛshikpɔŋ lɛ, ni mikɛbaahã nyɛ akɛ nyɛnɔ, shikpɔŋ ni mliki kɛ wo hoɔ yɛ nɔ lɛ.+ Miji Yehowa, nyɛ-Nyɔŋmɔ lɛ, mɔ ni jie nyɛ yɛ maji krokomɛi lɛ ateŋ eto afã lɛ.”+
25 Nyɛhãa anaa srɔto ni yɔɔ kooloo ni he tse kɛ nɔ ni he tseee teŋ, kɛ loofɔlɔ ni he tseee kɛ nɔ ni he tse teŋ;+ nyɛkahãa kooloo ko loo loofɔlɔ ko loo nɔ fɛɛ nɔ ni wamɔɔ yɛ shikpɔŋ lɛ nɔ ni mijie mito afã mihã nyɛ akɛ ehe tseee lɛ ateŋ eko hã nyɛtsɔmɔ mɛi* ni anyaŋeɔ.+
26 Nyɛfea krɔŋkrɔŋ nyɛhãa mi, ejaakɛ mi Yehowa lɛ, miyɛ krɔŋkrɔŋ,+ ni miijie nyɛ yɛ maji krokomɛi lɛ ateŋ miito afã koni nyɛtsɔ minɔ.+
27 “‘Nuu fɛɛ nuu loo yoo fɛɛ yoo ni feɔ ehe mumɔi atsɛlɔ loo klamɔfonyo* lɛ, bɔ fɛɛ bɔ ni fee lɛ, agbe lɛ.+ Maŋbii lɛ atswia lɛ tɛi ni egbo. Mɔ lɛ diɛŋtsɛ lá abua eyiteŋ.’”
Shishigbɛ Niŋmaa
^ Loo “magbe lɛ.”
^ Loo “Magbe nakai mɔ lɛ.”
^ Loo “Susuma.”
^ Loo “koni ekɛ amɛ ayabɔ ajwamaŋ.”
^ Loo “susuma.”
^ Loo “magbe lɛ.”
^ Loo “Kɛ́ mɔ ko tsɛ efɔŋ ehã.”
^ Kɛ́ mɔ ko ni ebote gbalashihilɛ mli yabɔ ajwamaŋ lɛ, no ji gbalafitemɔ.
^ Hebri sht. ŋm., “ejie epapa yayaiaŋ kpo.”
^ Loo “eji hiɛgbejianii; eji ajwamaŋianii.”
^ Loo “Agbe amɛ.”
^ Hebri sht. ŋm., “Ejie enyɛmi yoo lɛ yayaiaŋ kpo.”
^ Loo “nuu lɛ kɛ yoo lɛ fɛɛ ejie lá ni hoɔ yoo lɛ kpo.”
^ Loo “Agbe amɛyi enyɔ lɛ fɛɛ.”
^ Hebri sht. ŋm., “ejie etsɛkwɛ̃ lɛ yayaiaŋ kpo.”
^ Hebri sht. ŋm., “Ejie enyɛmi nuu lɛ yayaiaŋ kpo.”
^ Loo “mikojomɔi.”
^ Loo “susumai.”
^ Loo “mɔ ni yɔɔ mumɔ ni akɛtsɔɔ nɔ ni baaba wɔsɛɛ.”
