Abɛi 1:1-33
1 David+ binuu Solomon,+ Israel maŋtsɛ lɛ,+ abɛi nɛ:
2 Abɛi nɛɛ hãa mɔ hiɛ kãa shi,+ ni etsɔseɔ mɔ;Ehãa anuɔ wiemɔi ni jwɛŋmɔ yɔɔ mli lɛ ashishi;
3 Etsɔseɔ+ mɔ koni eyoo nii asɛɛ,Ele nɔ ni ja,+ ekpɛ yiŋ jogbaŋŋ,*+ ni efee nɔ ni ja;
4 Ehãa mɔ ni jwɛŋmɔ esako lɛ hiɛ tɛ̃ɔ;+Ehãa oblanyo* leɔ nii, ni ejwɛŋɔ jogbaŋŋ.+
5 Hiɛshikalɔ boɔ toi, ni no hãa ekaseɔ nii kɛfataa enilee he;+Nuu ni nuɔ nii ashishi lɛ náa kudɔmɔ kpakpa*+
6 Koni enu abɛ kɛ wiemɔ ni shishinumɔ wa* shishi,Kɛ hiɛshikalɔi awiemɔi kɛ amɛjenui ashishi.+
7 Yehowa gbeyeishemɔ* ji nɔ klɛŋklɛŋ ni hãa mɔ náa nilee.*+
Kwashiai* pɛ gbeɔ hiɛshikamɔ kɛ tsɔsemɔ he guɔ.+
8 Mibi,* bo opapa tsɔsemɔ lɛ toi,+Ni kaaku ohiɛ ofɔ̃ omami gbɛtsɔɔmɔ* lɛ nɔ.+
9 Nomɛi baafee akekere fɛfɛo ni fi oyitso,+Kɛ jwine fɛfɛo yɛ okuɛ.+
10 Mibi,* kɛ́ eshafeelɔi miilaka bo lɛ, kaabo amɛ toi.+
11 Kɛ́ amɛkɛɛ bo akɛ: “Ba wɔtee.
Ba ni wɔyatee wɔhe koni wɔshwie lá shi.
Wɔbaatee wɔhe koni wɔye mɛi ni efeko nɔ ko lɛ awui.
12 Wɔbaami amɛ hiɛkãalɔi tamɔ Gbonyobu* miɔ mɛi lɛ,Wɔbaami amɛ emuu, tamɔ mɛi ni kpelekeɔ shi kɛyaa bu lɛ mli lɛ.
13 Wɔbaashɔ̃ amɛjwetrii ni jara wa lɛ fɛɛ;Wɔkɛ ta mli nii baawo wɔshĩai amli obɔbɔ.
14 Baafata wɔhe,Ni wɔ fɛɛ wɔbaaja nɔ ni wɔbaayaju lɛ pɛpɛɛpɛ.”*
15 Mibi,* kaanyiɛ amɛsɛɛ.
Kaanyiɛ* amɛgbɛ lɛ nɔ,+
16 Ejaakɛ amɛnaji joɔ foi kɛyaa efɔŋfeemɔ mli;Amɛhe feɔ oya kɛshwieɔ lá shi.+
17 Kɛ́ okɛ yaa miitsɔ loofɔlɔ tsɔne be ni eena lɛ, oduŋ lɛ kɔkɔɔkɔ.
18 No hewɔ ni mɛnɛɛmɛi teɔ amɛhe koni amɛshwie lá shi lɛ;No hewɔ ni amɛteɔ amɛhe koni amɛkpãtã mɛi awala* hiɛ lɛ.
19 Nɛkɛ ji bɔ ni mɛi ni taoɔ sɛɛnamɔ gbonyo lɛ feɔ amɛnii,*Ni no nɔŋŋ ji nɔ ni baaŋɔ mɛi ni náa lɛ awala* kɛya.+
20 Anɔkwa hiɛshikamɔ+ miibo waa yɛ gbɛjegbɛ lɛ nɔ.+
Eewó egbee nɔ yɛ henaabuamɔhei lɛ.*+
21 Eebo waa yɛ gbɛjegbɛi ni nɔ efee hoo lɛ akoji* lɛ anaa.
Eebo waa yɛ maŋ lɛ agbói lɛ anaa eekɛɛ:+
22 “Nyɛ mɛi ni nyɛjwɛŋmɔ esako, mɛɛ be nɔŋŋ nyɛaasumɔ buulufeemɔ kɛyashi?
Nyɛ hefɛoyelɔi, mɛɛ be nɔŋŋ nyɛaaná hefɛoyeli he miishɛɛ kɛyashi?
Ni nyɛ kwashiai, mɛɛ be nɔŋŋ nyɛaagbe nilee he guɔ kɛyashi?+
23 Kɛ́ mijaje nyɛ lɛ, nyɛkpɛlɛa.*+
Kɛkɛ lɛ, mahã nyɛ mihewalɛ* lɛ eko;Mahã nyɛle miwiemɔi lɛ.+
24 Ejaakɛ mibo mitsɛ nyɛ shii abɔ, shi nyɛfooo midaaŋ,Mikpã minine mli, shi mɔ ko mɔ ko efooo mli,+
25 Nyɛkuɔ nyɛhiɛ nyɛshwieɔ miŋaawoi lɛ fɛɛ anɔ,Ni kɛ́ mijaje nyɛ hu, nyɛkpɛlɛɛɛ,
26 No hewɔ lɛ, mi hu maŋmɔ nyɛ, kɛ́ sane fɔŋ banina nyɛ,Maye nyɛhe fɛo, kɛ́ nɔ ni nyɛsheɔ he gbeyei lɛ ba,+
27 Kɛ́ nɔ ni nyɛsheɔ he gbeyei lɛ ba tamɔ ahum,Ni sane fɔŋ banina nyɛ tamɔ kɔɔyɔɔ ni naa wa,Ni haomɔ kɛ naagba ba nyɛnɔ lɛ.
28 Amɛbaabo amɛtsɛ mi yɛ nakai beiaŋ, shi mihereŋ amɛ nɔ;Amɛbaatao mi kɛ hiɛdɔɔ, shi amɛnaŋ mi,+
29 Ejaakɛ amɛgbe nilee he guɔ,+Ni amɛsheee Yehowa gbeyei.*+
30 Amɛbooo ŋaa ni miwo amɛ lɛ eko eko toi;Amɛgbe jajemɔ ni mijaje amɛ lɛ fɛɛ he guɔ.
31 No hewɔ lɛ, amɛbaakpa nɔ ni amɛdu lɛ,*+Ni nɔ ni baajɛ amɛŋaatsɔi lɛ amli kɛba lɛ baaye amɛ awui.*
32 Ejaakɛ gbɛ fɔŋ ni mɛi ni jwɛŋmɔ esako lɛ ekɔ lɛ, no nɔŋŋ baagbe amɛ,Ni susumɔ ni kwashiai hiɛ akɛ amɛyɛ shweshweeshwe lɛ, no nɔŋŋ baakpãtã amɛhiɛ.
33 Shi mɔ ni boɔ mi toi lɛ baahi shi shweshweeshwe,+Ni esheŋ sane fɔŋ ko kwraa gbeyei.”+
Shishigbɛ Niŋmaa
^ Loo “eye jalɛ sane.”
^ Loo “oblayoo.”
^ Loo “ŋaawoo kpakpa.”
^ Loo “abɛbua; fɔŋwiemɔ.”
^ Yɛ Biblia lɛ mli lɛ, akɛ wiemɔ “kwashia” lɛ tsuɔ nii ahãa mɔ ko ni kuɔ ehiɛ eshwieɔ Nyɔŋmɔ taomɔ nii anɔ.
^ Hebri sht. ŋm., “Yehowa gbeyeishemɔ ji nilee shishijee.”
^ Loo “Bulɛ ni anáa ahãa Yehowa.”
^ Hebri sht. ŋm., “Mibinuu.”
^ Loo “mla.”
^ Hebri sht. ŋm., “Mibinuu.”
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Loo “Ni wɔbaabua nibii lɛ anaa wɔwo kotoku kome mli.”
^ Hebri sht. ŋm., “Mibinuu.”
^ Loo “Okɛ onane akama.”
^ Loo “asusuma.”
^ Loo “agbɛi yɔɔ.”
^ Loo “asusuma.”
^ Loo “yɛ maŋjaanɔ.”
^ Hebri sht. ŋm., “ayitsei.”
^ Loo “mimumɔ.”
^ Loo “Kɛ́ mijaje nyɛ lɛ, nyɛkua nyɛsɛɛ.”
^ Hebri sht. ŋm., “Amɛhalaaa Yehowa gbeyeishemɔ.”
^ Hebri sht. ŋm., “yibii ni amɛgbɛ lɛ ewo lɛ, amɛbaaye.”
^ Loo “Ni amɛyiŋtoi lɛ baahã amɛtɔrɔ fe nine.”
