Abɛi 3:1-35
3 Mibi,* ohiɛ akakpa nɔ ni mitsɔɔ bo* lɛ nɔ,Ni okɛ otsui fɛɛ aye mikitãi lɛ anɔ,
2 Ejaakɛ amɛbaahã oná gbii piiKɛ wala afii, kɛ toiŋjɔlɛ.+
3 Kaahã suɔmɔ ni tsakeee kɛ anɔkwayeli* miishi bo.+
Okɛ amɛ afi okuɛ;Ŋmaa amɛ yɛ otsui tao lɛ nɔ;+
4 Kɛ́ ofee nakai lɛ, obaaná hiɛnyam kɛ sɛɛyoomɔ babaooYɛ Nyɔŋmɔ kɛ gbɔmɛi ahiɛ.+
5 Okɛ ohiɛ afɔ̃ Yehowa nɔ+ kɛ otsui fɛɛ,Ni okɛ ohe akafɔ̃* bo diɛŋtsɛ oniiashishinumɔ nɔ.+
6 Jwɛŋmɔ ehe yɛ ogbɛi fɛɛ amli,+Ni ebaahã ogbɛi aja.+
7 Okɛ ohe akafɔ̃ bo diɛŋtsɛ onilee nɔ.*+
She Yehowa gbeyei ni otsi ohe kɛje efɔŋ he.
8 No baatsa bo*Ni ebaahã owuiaŋ ajɔ bo.
9 Okɛ onibii ni jara wa lɛ awo Yehowa hiɛ nyam,+Onibaa nii lɛ* fɛɛ amli klɛŋklɛŋ yibii lɛ;* +
10 Kɛ́ ofee nakai lɛ, onitoohei lɛ baayimɔ obɔbɔ,+Ni obui ni aŋaa wain yɛ mli lɛ baayimɔ kɛteke nɔ kɛ wain hee.
11 Mibi,* kaakpoo Yehowa tsɔsemɔ lɛ,+Ni be fɛɛ be ni ebaajaje bo lɛ, kaanyaŋe,+
12 Ejaakɛ mɛi ni Yehowa sumɔɔ lɛ, amɛ ejajeɔ,+Tamɔ bɔ ni tsɛ jajeɔ ebi* ni eyɔɔ ehe miishɛɛ lɛ.+
13 Gbɔmɔ ni hiɛ kã shi+ lɛ yɛ miishɛɛNi gbɔmɔ ni kɔɔ sane sɛɛ hu nakai nɔŋŋ;
14 Ejaakɛ kɛ́ oná no lɛ, ehi fe nɔ ni obaaná jwiɛtɛi,Ni kɛ́ oná no akɛ osɛɛnamɔ lɛ, ehi fe nɔ ni obaaná shika tsuru.+
15 Ejara wa fe ojarawatɛi;*Onyɛŋ okɛ nɔ ko nɔ ko ni otaoɔ lɛ ato he.
16 Walasɛɛtsɛlɛ yɛ eninejurɔ;Ninámɔ kɛ anunyam yɛ ebɛku.
17 Egbɛi lɛ anɔ yɛ miishɛɛ,Ni toiŋjɔlɛ yɛ egbɛi lɛ fɛɛ anɔ.+
18 Eji wala tso kɛhã mɛi ni mɔɔ mli lɛ,Ni mɛi ni hiɛɔ mli kpɛŋŋ lɛ, abaabu amɛ akɛ amɛyɛ miishɛɛ.+
19 Hiɛshikamɔ Yehowa kɛfee shikpɔŋ lɛ.+
Sanesɛɛkɔmɔ ekɛto ŋwɛi ema shi shiŋŋ.+
20 Enilee ekɛhã nui babaoo lɛ tueNi no ekɛhã bɔ́ nyɔ kɛjɛ atatui lɛ amli.+
21 Mibi,* kaahã ohiɛ miije amɛnɔ.*
Hã ohiɛ akã shi ni ojwɛŋ jogbaŋŋ be fɛɛ be;*
22 Amɛbaahã bo* walaNi amɛbaawula okuɛ;
23 Ni no baahã onyiɛ ogbɛ nɔ ni oshãra ko ninaaa bo,Ni onane tɛŋ.*+
24 Kɛ́ okã shi lɛ, osheŋ nɔ ko gbeyei;+Obaakã shi, ni owɔ baaŋɔɔ.+
25 Osheŋ sane fɔŋ ni baa trukaa lɛ gbeyei+Ni osheŋ ahum ni baaba mɛi fɔji anɔ lɛ gbeyei.+
26 Ejaakɛ Yehowa baatsɔ mɔ ni okɛ ohiɛ fɔ̃ɔ enɔ;+Ehãŋ tsɔne adu onane.+
27 Mɛi ni ekpakpafeemɔ he miihia amɛ lɛ, kaaku ohiɛ oshwie amɛnɔ+Kɛ́ eyɛ ohewalɛ* mli akɛ oooye obua amɛ.+
28 Kaakɛɛ onyɛmi gbɔmɔ akɛ, “Yaa ni oba sɛɛ mli! Mikɛbaahã bo wɔ́,”
Kɛ́ obaanyɛ okɛhã lɛ bianɛ.
29 Kaato onyɛmi gbɔmɔ he ŋaa fɔŋ+Be ni ele akɛ eyɛ shweshweeshwe yɛ omasɛi.
30 Okɛ mɔ ko akabé kɛkɛ,+Kɛ́ efeko bo efɔŋ ko.+
31 Ohiɛ akakɔ̃ yiwalɔ nɔ+Ni kaakɔ egbɛi lɛ eko eko,
32 Ejaakɛ Yehowa miihi mɔ ni lakaa mɛi,+Shi mɔ ni ja lɛ, lɛ ekɛbɔɔ naanyo.+
33 Yehowa loomɔ kã mɔ fɔŋ shĩa nɔ,+Shi ejɔɔmɔ yɛ jalɔ shihilɛhe nɔ.+
34 Ejaakɛ eyeɔ hefɛoyelɔi ahe fɛo,+Shi edroɔ mɛi ni he jɔ.*+
35 Hiɛshikalɔi baaná anunyam,Shi buului woɔ hiɛgbele hiɛ nyam.+
Shishigbɛ Niŋmaa
^ Hebri sht. ŋm., “Mibinuu.”
^ Loo “ohiɛ akakpa mimla.”
^ Loo “anɔkwale.”
^ Hebri sht. ŋm., “akakpasa.”
^ Hebri sht. ŋm., “Kaabu ohe hiɛshikalɔ yɛ bo diɛŋtsɛ ohiŋmɛiiaŋ.”
^ Hebri sht. ŋm., “olaŋmɔ.”
^ Loo “amli nɔ ni hi fe fɛɛ lɛ.”
^ Loo “Nii ni onáa lɛ.”
^ Hebri sht. ŋm., “Mibinuu.”
^ Hebri sht. ŋm., “ebinuu.”
^ Loo “koral pii.” Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “Mibinuu.”
^ Ekã shi faŋŋ akɛ, aawie Nyɔŋmɔ sui ni atsĩ tã yɛ kukuji ni tsɔ hiɛ lɛ amli lɛ ahe.
^ Loo “Okɛ hiɛshikamɔ kɛ sanenɔjwɛŋmɔ ato jogbaŋŋ.”
^ Loo “osusuma.”
^ Loo “okɛ onane shiŋ nɔ ko.”
^ Loo “Kɛ́ eyɛ odɛŋ hewalɛ.”
^ Loo “heshibalɔi.”
