Bɔfoi Lɛ Anitsumɔi 11:1-30
11 Agbɛnɛ, bɔfoi lɛ kɛ nyɛmimɛi ni yɔɔ Yudea lɛ nu akɛ jeŋmajiaŋbii lɛ hu emɔ Nyɔŋmɔ wiemɔ lɛ mli.
2 No hewɔ lɛ, be ni Petro kwɔ kɛba Yerusalem lɛ, mɛi ni fiɔ ketiafoo lɛ sɛɛ+ lɛ bɔi ehiɛ wiemɔ,*
3 ni amɛkɛɛ: “Otee hii ni afolɔko amɛ ketia lɛ ashĩa ni okɛ amɛ yaye nii.”
4 Kɛkɛ ni Petro gbála sane lɛ mli fitsofitso etsɔɔ amɛ ekɛɛ:
5 “No mli lɛ, miyɛ Yopa maŋ lɛ mli miisɔle, ni mina ninaa ko, mina akɛ nɔ ko miikpeleke shi tamɔ klala agbo ni ahiɛ ekoji ejwɛ lɛ mli aashiu kɛmiijɛ ŋwɛi kɛmiiba shi, ni eba miŋɔɔ tuuntu.+
6 Be ni mikwɛ mli jogbaŋŋ lɛ, mina shikpɔŋ nɔ kooloi ni hiɛ naji ejwɛjwɛɛjwɛ, kɛ ŋa mli kooloi, kɛ kooloi ni wamɔɔ, kɛ ŋwɛi loofɔji.
7 Minu gbee ko hu ni kɛɛ mi akɛ: ‘Petro, tee shi, gbee ni oye!’
8 Shi mikɛɛ: ‘Dabida, Nuŋtsɔ, ejaakɛ nɔ ko ni abule loo nɔ ko ni he tseee boteko midaaŋ pɛŋ.’
9 Gbee ni jɛ ŋwɛi lɛ wie nɔ ni ji shii enyɔ nɔ akɛ: ‘Kpa nibii ni Nyɔŋmɔ efee amɛ krɔŋkrɔŋ lɛ tsɛmɔ akɛ nibii ni abule.’
10 Gbee lɛ kɛ mi wie nɔ ni ji shii etɛ nɔ, ni agbala nɔ fɛɛ nɔ kɛtee ŋwɛi ekoŋŋ.
11 Ni amrɔ lɛ nɔŋŋ lɛ, hii etɛ ni atsu amɛ kɛjɛ Kaisarea kɛba miŋɔɔ badamɔ shĩa ni wɔyɔɔ mli lɛ agbó lɛ naa.+
12 Kɛkɛ ni mumɔ lɛ kɛɛ mi akɛ mikɛ amɛ aya, ni miyiŋ akafee mi kɔshikɔshi kwraa. Shi nyɛmimɛi hii ekpaa nɛɛ hu kɛ mi tee, ni wɔbote nuu lɛ shĩa lɛ mli.
13 “Egba wɔ bɔ ni ena ŋwɛibɔfo lɛ damɔ eshĩa lɛ ni eekɛɛ: ‘Tsu hii kɛya Yopa ni amɛyatsɛ Simon ni atsɛɔ lɛ Petro hu lɛ kɛba,+
14 ni ebaakɛɛ bo nibii ni baahã ahere bo kɛ oshĩabii lɛ fɛɛ yiwala.’
15 Shi be ni mibɔi wiemɔ lɛ, mumɔ krɔŋkrɔŋ lɛ ba amɛnɔ tamɔ bɔ ni eba wɔ hu wɔnɔ yɛ shishijee mli lɛ.+
16 Kɛkɛ ni mikai Nuŋtsɔ lɛ wiemɔ lɛ, bɔ ni efɔɔ kɛɛmɔ akɛ: ‘Yohane kɛ nu baptisi,+ shi nyɛ lɛ, akɛ mumɔ krɔŋkrɔŋ baabaptisi nyɛ’ lɛ.+
17 No hewɔ lɛ, kɛ́ Nyɔŋmɔ ehã amɛ nakai dromɔ nikeenii lɛ nɔŋŋ ni ekɛhã wɔ mɛi ni wɔheɔ Nuŋtsɔ Yesu Kristo nɔ wɔyeɔ lɛ hu lɛ, namɔ ji mi ni manyɛ Nyɔŋmɔ naa matsĩ?”*+
18 Be ni amɛnu nibii nɛɛ, amɛwieee amɛshiii lɛ dɔŋŋ,* ni amɛwo Nyɔŋmɔ hiɛ nyam amɛkɛɛ: “Belɛ, eyɛ faŋŋ akɛ, Nyɔŋmɔ ehã jeŋmajiaŋbii lɛ hu hegbɛ koni amɛtsake amɛtsui ni amɛná wala.”+
19 Agbɛnɛ, mɛi ni amanehulu ni te shi yɛ Stefano gbele lɛ sɛɛ lɛ hã amɛgbɛ amɛshwã+ lɛ tee aahu kɛyashɛ Foinike, kɛ Kipro, kɛ Antiokia tɔ̃ɔ, shi amɛjaje wiemɔ lɛ amɛtsɔɔ Yudafoi lɛ pɛ.+
20 Shi amɛteŋ hii komɛi ni jɛ Kipro kɛ Kirene lɛ ba Antiokia ni amɛbashiɛ amɛtsɔɔ mɛi ni wieɔ Greek lɛ, ni amɛjaje Nuŋtsɔ Yesu he sane kpakpa lɛ amɛtsɔɔ amɛ.
21 Agbɛnɛ hu, Yehowa* nine fata amɛhe, ni mɛi babaoo he amɛye ni amɛba Nuŋtsɔ lɛ ŋɔɔ.+
22 Amɛhe sane yashɛ asafo ni yɔɔ Yerusalem lɛ toiiaŋ, ni amɛtsu Barnaba+ kɛtee Antiokia tɔ̃ɔ.
23 Be ni eyashɛ jɛmɛ ni ena Nyɔŋmɔ dromɔ lɛ, emii shɛ ehe naakpa ni ebɔi amɛ fɛɛ hewalɛwoo akɛ amɛya nɔ amɛkɛ tsui ni fiɔ shi shiŋŋ ahi Nuŋtsɔ lɛ mli;+
24 ejaakɛ eji gbɔmɔ kpakpa ni eyi obɔ kɛ mumɔ krɔŋkrɔŋ kɛ hemɔkɛyeli. Ni akɛ mɛi pii fata Nuŋtsɔ lɛ he.+
25 No hewɔ lɛ, eyi mli etee Tarso ni eyatao Saul fitsofitso.+
26 Be ni ena lɛ lɛ, ekɛ lɛ ba Antiokia. No hewɔ lɛ, afi muu fɛɛ lɛ, amɛ kɛ asafo lɛ buaa amɛhe naa, ni amɛtsɔɔ mɛi pii nii, ni Antiokia klɛŋklɛŋ atsɛ kaselɔi lɛ akɛ Kristofoi yɛ, yɛ Nyɔŋmɔ gbɛtsɔɔmɔ naa.+
27 Nakai gbii lɛ amli lɛ, gbalɔi+ komɛi kpeleke shi kɛjɛ Yerusalem kɛba Antiokia.
28 Amɛteŋ mɔ kome ni atsɛɔ lɛ Agabo+ lɛ te shi ni egba yɛ mumɔ lɛ naa akɛ, hɔmɔ kpele ko miiba shikpɔŋ muu lɛ fɛɛ nɔ,+ ni eba mli nakai yɛ Klaudio beiaŋ.
29 No hewɔ lɛ, kaselɔi lɛ kpɛ mli akɛ amɛteŋ mɔ fɛɛ mɔ ahã bɔ ni ebaanyɛ+ koni akɛmaje nyɛmimɛi ni yɔɔ Yudea lɛ ni akɛyaye abua amɛ;*+
30 ni amɛfee nakai, ni amɛkɛmaje asafoŋ onukpai lɛ kɛtsɔ Barnaba kɛ Saul nine nɔ.+
Shishigbɛ Niŋmaa
^ Loo “kɛ lɛ bɔi naataamɔ.”
^ Loo “ni matsĩ Nyɔŋmɔ gbɛ?”
^ Greek sht. ŋm., “amɛfee diŋŋ.”
^ Kwɛmɔ Saji Krokomɛi A5 lɛ.
^ Loo “akɛ yelikɛbuamɔ nibii ni akɛmiisɔmɔ amɛ.”
