Bɔfoi Lɛ Anitsumɔi 17:1-34
17 Agbɛnɛ, amɛyatsɔ Amfipoli kɛ Apolonia, ni amɛba Tesalonika,+ he ni Yudafoi lɛ akpeehe ko yɔɔ lɛ.
2 No hewɔ lɛ, tamɔ bɔ ni Paulo fɔɔ feemɔ lɛ,+ etee amɛŋɔɔ yɛ kpeehe lɛ ni ejɛ ŋmalɛi lɛ amli ekɛ amɛ susu nii ahe Hejɔɔmɔ Gbii srɔtoi etɛ,+
3 ni etsɔɔ nibii amli, ni etsɛ ŋmalɛi ayisɛɛ kɛtsɔɔ hu akɛ ehe miihia ni Kristo lɛ ana nɔ+ ni ete shi kɛjɛ gbohii ateŋ,+ ni ekɛɛ akɛ: “Yesu nɛɛ ni mijajeɔ ehe sane mitsɔɔ nyɛ nɛɛ, lɛ ji Kristo lɛ.”
4 Enɛ hewɔ lɛ, amɛteŋ mɛi komɛi bahe Nuŋtsɔ lɛ nɔ amɛye ni amɛkɛ amɛhe kpɛtɛ Paulo kɛ Sila+ he, ni Greekbii Nyɔŋmɔ jálɔi lɛ ateŋ mɛi babaoo kɛ yei hiɛnaanɔbii saŋŋ hu fee nakai nɔŋŋ.
5 Shi Yudafoi lɛ ye awuŋa,+ ni amɛbua hii efɔŋfeelɔi komɛi ni foɔ shi kɛkɛ yɛ jara lɛ nɔ lɛ anaa ni amɛná mɛi babaoo, ni amɛtee amɛyawo maŋ lɛ mli hirihiri. Amɛyatutua Yason shĩa lɛ, no mli lɛ amɛmiitao amɛjie Paulo kɛ Sila kɛje kpo kɛbahã mɛi babaoo lɛ.
6 Be ni amɛnaaa amɛ lɛ, amɛkɛ Yason kɛ nyɛmimɛi lɛ ekomɛi tee maŋ nɔyelɔi lɛ ahiɛ, ni amɛbolɔ amɛkɛɛ: “Hii nɛɛ ni etsɔ shikpɔŋ lɛ hiɛ ebu shi* lɛ eba biɛ hu,+
7 ni Yason ehere amɛ ni efee amɛ gbɔ. Hii nɛɛ fɛɛ teɔ shi amɛwoɔ famɔi ni Kaisare kɛhã lɛ, ni amɛkɛɔ akɛ maŋtsɛ kroko ko yɛ, ni atsɛɔ lɛ Yesu.”+
8 Be ni mɛi ni bua shi lɛ kɛ maŋ nɔyelɔi lɛ nu nibii nɛɛ, amɛjijaa;
9 ni be ni amɛhe beili* bɔ ni sa yɛ Yason kɛ mɛi krokomɛi lɛ adɛŋ lɛ, amɛŋmɛɛ amɛhe.
10 Ni be ni shɛ nyɔɔŋ nɔŋŋ lɛ, nyɛmimɛi lɛ yajie Paulo kɛ Sila fɛɛ gbɛ kɛtee Beroia. Be ni amɛshɛ jɛmɛ lɛ, amɛtee Yudafoi lɛ akpeehe lɛ.
11 Yudafoi ni yɔɔ Beroia lɛ yɛ su kpakpa fe mɛi ni yɔɔ Tesalonika lɛ, ejaakɛ amɛjie amɛyitsoŋ fɛɛ amɛmɔ wiemɔ lɛ mli, ni daa gbi lɛ, amɛtaoɔ ŋmalɛi lɛ amli jogbaŋŋ amɛkwɛɔ akɛ nibii nɛɛ yɛ mli nakai lo.
12 No hewɔ lɛ, amɛteŋ mɛi babaoo bahe Nuŋtsɔ lɛ nɔ amɛye, ni Greek yei ni abuɔ amɛ lɛ ateŋ mɛi saŋŋ kɛ hii komɛi hu fee nakai nɔŋŋ.
13 Shi be ni Yudafoi ni yɔɔ Tesalonika lɛ ná amɛle akɛ Paulo miijaje Nyɔŋmɔ wiemɔ lɛ yɛ Beroia hu lɛ, amɛba jɛmɛ amɛbawo mɛi lɛ ayiŋ ni amɛhã amɛjijaa.+
14 Kɛkɛ ni amrɔ lɛ, nyɛmimɛi lɛ yajie Paulo gbɛ koni eya ŋshɔ lɛ naa,+ shi Sila kɛ Timoteo lɛ, amɛtee nɔ amɛhi jɛmɛ.
15 Shi mɛi ni yajie Paulo gbɛ lɛ kɛ lɛ yashɛ Atene tɔ̃ɔ, ni be ni Paulo kɛ gbɛtsɔɔmɔi hã amɛ akɛ Sila kɛ Timoteo+ aba eŋɔɔ oya lɛ, amɛshi amɛtee.
16 Agbɛnɛ, be ni Paulo mɛɔ amɛ yɛ Atene lɛ, emumɔ mli wo la yɛ emli be ni ena akɛ amagai eyi maŋ lɛ mli obɔ lɛ.
17 No hewɔ lɛ, ekɛ Yudafoi lɛ kɛ mɛi ni jáa Nyɔŋmɔ lɛ bɔi niiahesusumɔ yɛ kpeehe lɛ, ni daa gbi lɛ ekɛ mɛi ni enaa yɛ jara lɛ nɔ lɛ hu feɔ nakai.
18 Shi jeŋ nilelɔi* ni ji Epikuromɛi* kɛ Stoamɛi* lɛ ateŋ mɛi komɛi kɛ lɛ bɔi naataamɔ, ni amɛteŋ mɛi komɛi kɛɔ akɛ: “Mɛni po naagɔbigɔbitsɛ nɛɛ taoɔ ekɛɛ?” Mɛi krokomɛi kɛɔ akɛ: “Etamɔ nɔ ni ejajeɔ maŋsɛɛ nyɔŋmɔi ahe sane etsɔɔ.” Amɛwie nakai ejaakɛ eejaje Yesu he sane kpakpa lɛ, kɛ gbohiiashitee lɛ eetsɔɔ.+
19 No hewɔ lɛ, amɛkɛ lɛ tee Areopago lɛ, ni amɛkɛɛ: “Ani obaanyɛ ohã wɔle tsɔɔmɔ hee ni owieɔ he nɛɛ jogbaŋŋ?
20 Ejaakɛ oohã wɔtoii miinu nibii komɛi ni yɔɔ srɔto kwraa, ni wɔmiitao wɔle nɔ ni nibii nɛɛ tsɔɔ.”
21 Anɔkwa, Atenebii lɛ fɛɛ kɛ gbɔi ni yɔɔ jɛmɛ lɛ, kɛ́ amɛná be lɛ, nɔ ni eshwɛ amɛ pɛ ji amɛgba sane hee ko loo amɛbo sane hee ko toi.
22 Agbɛnɛ, Paulo yadamɔ Areopago+ lɛ teŋ ni ekɛɛ:
“Ataamɛi Atenebii, mina akɛ yɛ nibii fɛɛ amli lɛ nyɛsheɔ nyɔŋmɔi lɛ gbeyei waa* fe mɛi krokomɛi.+
23 Akɛ nɔkwɛmɔnɔ lɛ, be ni miiho ni miikwɛ nibii ni nyɛjáa lɛ, mina afɔleshaa latɛ ko po ni akpɛ́ yɛ nɔ akɛ ‘Nyɔŋmɔ Ni Wɔleee Lɛ Lɛ Nɔ Ni.’ No hewɔ lɛ, mɔ ni nyɛleee lɛ ni nyɛjáa lɛ lɛ, lɛ ehe sane mijajeɔ mitsɔɔ nyɛ nɛɛ.
24 Nyɔŋmɔ ni fee je lɛ kɛ nibii fɛɛ ni yɔɔ mli lɛ, akɛni lɛ ji ŋwɛi kɛ shikpɔŋ Nuŋtsɔ hewɔ lɛ,+ ehiii sɔlemɔ shĩai ni akɛ niji mamɔ amli;+
25 ni akɛ gbɔmɛi aniji sɔmɔɔɔ lɛ hu oookɛɛ nɔ ko he hiaa lɛ,+ ejaakɛ lɛ diɛŋtsɛ ehãa mɛi fɛɛ wala kɛ mumɔ+ kɛ nibii fɛɛ.
26 Ni gbɔmɔ kome+ mli ejɛ efee gbɔmɛi ajeŋmaji fɛɛ koni amɛhi shikpɔŋ muu lɛ fɛɛ nɔ,+ ni bei ni ato lɛ kɛ hei ni esa akɛ gbɔmɛi ahi lɛ, ekpɛ mli eto momo,+
27 koni amɛtao Nyɔŋmɔ sɛɛ gbɛ, ni amɛkɛ hiɛdɔɔ po afee nakai ni amɛna lɛ lɛɛlɛŋ,+ shi anɔkwa, ekɛ wɔteŋ mɔ fɛɛ mɔ teŋ jekɛɛɛ.
28 Ejaakɛ emli wɔyɔɔ wala ni wɔtsiɔ wɔhe ni wɔyɔɔ shihilɛ mli yɛ, tamɔ bɔ ni nyɛ diɛŋtsɛ nyɛteŋ mɛi ni ŋmaa lalawiemɔi lɛ ekomɛi po ekɛɛ lɛ akɛ, ‘Ebii* ji wɔ hu.’
29 “No hewɔ lɛ, akɛni wɔna akɛ Nyɔŋmɔ bii* ji wɔ hewɔ lɛ,+ esaaa akɛ wɔsusuɔ akɛ mɔ ni ji Nyɔŋmɔ lɛ tamɔ shika tsuru loo jwiɛtɛi loo tɛ, tamɔ nɔ ko ni gbɔmɛi kɛ amɛŋaa kɛ amɛjwɛŋmɔ fee.+
30 Anɔkwa, Nyɔŋmɔ ku ehiɛ efɔ̃ bei amli ni mɛi leee nɔ ko lɛ anɔ;+ shi amrɔ nɛɛ eekɛɛ gbɔmɛi ni yɔɔ he fɛɛ he lɛ akɛ amɛtsake amɛtsui.
31 Ejaakɛ eto gbi ko, ni ekpɛ eyiŋ akɛ nakai gbi lɛ nɔ lɛ, ebaatsɔ nuu ko ni ehala lɛ lɛ nɔ ekojo+ shikpɔŋ lɛ fɛɛ yɛ jalɛ naa, ni etee lɛ shi kɛjɛ gbohii ateŋ kɛma nɔ mi ehã gbɔmɛi fɛɛ.”+
32 Agbɛnɛ, be ni amɛnu gbohiiashitee lɛ he lɛ, amɛteŋ mɛi komɛi bɔi fɛoyeli,+ ni mɛi krokomɛi hu kɛɛ: “Wɔbaasaa wɔbo bo toi ekoŋŋ yɛ enɛ hewɔ.”
33 No hewɔ lɛ, Paulo shi amɛ,
34 shi hii komɛi kɛ amɛhe kpɛtɛ ehe ni amɛbahe Nuŋtsɔ lɛ nɔ amɛye. Amɛteŋ mɛi komɛi ji Dionisio, ni ji kojolɔ yɛ Areopago saneyelihe lɛ, kɛ yoo ko ni atsɛɔ lɛ Damari, kɛ mɛi krokomɛi ni fata amɛhe.
Shishigbɛ Niŋmaa
^ Loo “ehã basabasafeemɔ eba shikpɔŋ lɛ nɔ.”
^ Loo “sɛɛdaamɔnii.” Eji shika ni awoɔ loo nɔ ko ni akɛhãa koni akɛdamɔ mli ahã mɔ ko; awaba.
^ Greek sht. ŋm., “hiɛshikalɔi.”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Loo “nyɛsumɔɔ Nyɔŋmɔjamɔ waa.”
^ Loo “Eshwiei.”
^ Loo “shwiei.”
