Bɔfoi Lɛ Anitsumɔi 4:1-37
4 Be ni mɛi enyɔ lɛ kɛ maŋbii lɛ wieɔ lɛ, osɔfoi lɛ, kɛ sɔlemɔ shĩa lɛ nɔkwɛlɔ lɛ, kɛ Sadukifoi+ lɛ ba amɛnɔ.
2 No mli lɛ, amɛmli efu ejaakɛ bɔfoi lɛ miitsɔɔ maŋbii lɛ nii ni amɛmiijaje amɛmiitsɔɔ yɛ faŋŋ akɛ atee Yesu shi kɛjɛ gbohii ateŋ.*+
3 No hewɔ lɛ, amɛmɔmɔ bɔfoi lɛ ni amɛyawo amɛ tsuŋ+ kɛyashi enɔ jetsɛremɔ, ejaakɛ no mli lɛ je ena momo.
4 Shi mɛi ni bo wiemɔ lɛ toi lɛ ateŋ mɛi babaoo he amɛye, ni hii lɛ ayibɔ bashɛ aaafee 5,000.+
5 Enɔ jetsɛremɔ lɛ, amɛnɔyelɔi lɛ, kɛ onukpai lɛ, kɛ woloŋmalɔi lɛ bua amɛhe naa yɛ Yerusalem,
6 ni Ana+ ni ji osɔfo hiɛnaanɔbii lɛ ateŋ mɔ kome lɛ, kɛ Kaiafa,+ kɛ Yohane, kɛ Aleksanda, kɛ mɛi fɛɛ ni ji osɔfo hiɛnaanɔbii lɛ ateŋ mɔ kome nɛɛ wekumɛi lɛ hu yɛ jɛmɛ.
7 Amɛkɛ Petro kɛ Yohane badamɔ amɛteŋ ni amɛbɔi amɛ bimɔ akɛ: “Mɛɛ hewalɛ naa aloo namɔ gbɛ́i mli nyɛfee enɛ yɛ?”
8 Kɛkɛ ni Petro ni mumɔ krɔŋkrɔŋ eyi lɛ obɔ+ lɛ kɛɛ amɛ akɛ:
“Maŋ lɛŋ nɔyelɔi kɛ onukpai,
9 kɛ́ ekpakpa ni wɔfee nuu obubuafo hewɔ ŋmɛnɛ gbi nɛɛ nyɛbibiɔ wɔ saji,+ ni nyɛmiisumɔ nyɛle mɔ ni hã nuu nɛɛ ná hewalɛ lɛ,
10 no lɛ, nyɛ fɛɛ kɛ Israelbii fɛɛ anáa alea akɛ, Yesu Kristo, Nazaretnyo+ ni nyɛgbe lɛ yɛ tso jaŋŋ nɔ,+ shi Nyɔŋmɔ tee lɛ shi kɛjɛ gbohii ateŋ lɛ gbɛ́i mli,+ ni kɛtsɔ enɔ hu ni nuu nɛɛ damɔ nyɛhiɛ yɛ biɛ ni ená hewalɛ nɛɛ.
11 Mɔ nɛ ji ‘tɛ ni nyɛ ni nyɛji tsumalɔi lɛ ebuuu lɛ hãaa nɔ ko, ni etsɔ koŋtɛ ni he hiaa fe fɛɛ* lɛ.’+
12 Agbɛnɛ hu, yiwalaheremɔ ko bɛ mɔ kroko mli, ejaakɛ gbɛ́i kroko bɛ+ ŋwɛi shishi ni akɛhã yɛ gbɔmɛi ateŋ ni esa akɛ atsɔ nɔ ahere wɔyiwala.”+
13 Agbɛnɛ, be ni amɛna bɔ ni Petro kɛ Yohane wieɔ kɛ ekãa, ni amɛyɔse hu akɛ amɛji mɛi ni leee woloŋ* kɛ mɛi foji kɛkɛ lɛ,+ amɛnaa kpɛ amɛhe. Ni amɛbɔi yɔsemɔ akɛ amɛkɛ Yesu hi shi.+
14 Be ni amɛhiɛ nuu ni atsa lɛ ni kɛ bɔfoi lɛ damɔ shi lɛ kwɛmɔ lɛ,+ amɛnáaa nɔ ko amɛwie kɛjie sane nɛɛ naa.+
15 No hewɔ lɛ, amɛfã amɛ akɛ amɛje Sanhedrin* asa lɛ nɔ kɛya agbó lɛ naa, ni amɛbɔi niiahesusumɔ yɛ amɛteŋ
16 amɛkɛɛ: “Mɛni wɔfee hii nɛɛ?+ Ejaakɛ atsɔ amɛnɔ afee okadi ko ni sa kadimɔ waa lɛɛlɛŋ, okadi ni Yerusalembii fɛɛ ena,+ ni wɔnyɛŋ wɔje he ŋwane.
17 No hewɔ lɛ, bɔ ni afee ni sane nɛɛ akagbɛ eshwã yɛ maŋbii lɛ ateŋ dɔŋŋ lɛ, nyɛhãa wɔwoa amɛhe gbeyei ni wɔkɛa amɛ akɛ amɛkawie yɛ gbɛ́i nɛɛ mli amɛtsɔɔ mɔ ko mɔ ko dɔŋŋ.”+
18 Kɛkɛ ni amɛtsɛ amɛ kɛba ni amɛfã amɛ akɛ amɛkawie nɔ ko nɔ ko dɔŋŋ, ni amɛkatsɔɔ nii hu yɛ Yesu gbɛ́i mli dɔŋŋ.
19 Shi Petro kɛ Yohane here nɔ amɛkɛɛ amɛ akɛ: “Kɛ́ eja yɛ Nyɔŋmɔ hiɛ akɛ abo nyɛ moŋ toi fe Nyɔŋmɔ lɛ, nyɛ diɛŋtsɛ nyɛkojoa.
20 Shi wɔ lɛ, wɔnyɛŋ wɔkpa nibii ni wɔna kɛ nibii ni wɔnu lɛ ahe wiemɔ.”+
21 No hewɔ lɛ, be ni amɛwo amɛhe gbeyei ekoŋŋ lɛ, amɛŋmɛɛ amɛhe, ejaakɛ amɛnáaa nɔ ko ni amɛbaadamɔ nɔ amɛgbala amɛtoi, ni amɛfeee nakai hu yɛ maŋbii lɛ ahewɔ,+ ejaakɛ amɛ fɛɛ amɛmiijie Nyɔŋmɔ yi yɛ nɔ ni eba lɛ hewɔ.
22 Ejaakɛ nuu ni atsa lɛ yɛ naakpɛɛ gbɛ nɔ nɛɛ eye fe afii 40.
23 Be ni aŋmɛɛ amɛhe lɛ, amɛtee kaselɔi krokomɛi lɛ aŋɔɔ ni amɛyabɔ amɛ nɔ ni osɔfoi hiɛnaanɔbii lɛ kɛ onukpai lɛ kɛɛ amɛ lɛ.
24 Be ni amɛnu enɛ lɛ, amɛkɛ jwɛŋmɔ kome hole amɛgbei anɔ amɛhã Nyɔŋmɔ ni amɛkɛɛ:
“Nuŋtsɔ Ofe, bo ji mɔ ni bɔ ŋwɛi kɛ shikpɔŋ kɛ ŋshɔ kɛ nibii fɛɛ ni yɔɔ amɛmli lɛ,+
25 ni bo ji mɔ ni otsɔ mumɔ krɔŋkrɔŋ nɔ owie yɛ wɔtsɛ David,+ otsulɔ lɛ, naa akɛ: ‘Mɛni hewɔ jeŋmaji lɛ feɔ hoo, ni majimaji lɛ jwɛŋɔ nɔ ko ni sɛɛnamɔ bɛ he nɔ lɛ?
26 Shikpɔŋ lɛ nɔ maŋtsɛmɛi lɛ ete shi edamɔ shi ni nɔyelɔi lɛ efee ekome amɛte shi amɛwo Yehowa* kɛ mɔ ni efɔ lɛ mu lɛ.’*+
27 Ejaakɛ yɛ anɔkwale mli lɛ, Herode kɛ Pontio Pilato+ kɛ jeŋmajiaŋbii lɛ kɛ Israelbii lɛ bua amɛhe naa yɛ maŋ nɛɛ mli amɛshi otsulɔ krɔŋkrɔŋ Yesu, mɔ ni ofɔ lɛ mu lɛ,+
28 kɛtsu nɔ ni onine kɛ oyiŋtoo lɛ ekpɛ mli eto akɛ ebaaba lɛ he nii.+
29 Ni agbɛnɛ, Yehowa,* kwɛmɔ wɔhe gbeyei ni amɛwoɔ lɛ, ni ohã onyɔji lɛ aya nɔ awie owiemɔ lɛ kɛ ekãa babaoo,
30 be mli ni okpãa onine mli ohãa atsaa mɛi, ni atsɔɔ otsulɔ krɔŋkrɔŋ Yesu gbɛ́i lɛ nɔ+ afeɔ okadii kɛ naakpɛɛ nii lɛ.”+
31 Be ni amɛsɔle kɛkpa fai kɛ hiɛdɔɔ* amɛgbe naa lɛ, he ni amɛbua amɛhe naa yɛ lɛ hoso, ni mumɔ krɔŋkrɔŋ lɛ yimɔ amɛ fɛɛ obɔbɔ+ ni amɛwie Nyɔŋmɔ wiemɔ lɛ kɛ ekãa.+
32 Agbɛnɛ hu, mɛi babaoo ni he amɛye lɛ fɛɛ ná tsui kome kɛ susuma* kome, ni amɛteŋ mɔ ko mɔ ko po tsɛɛɛ enibii ni eyɔɔ lɛ amli eko akɛ lɛ diɛŋtsɛ enɔ, shi moŋ amɛfee nibii ni amɛyɔɔ lɛ fɛɛ ekome.+
33 Ni bɔfoi lɛ kɛ hewalɛ kpele tee nɔ amɛye Nuŋtsɔ Yesu shitee lɛ he odase,+ ni dromɔ babaoo yɛ amɛ fɛɛ amɛnɔ.
34 Anɔkwa, mɔ ko mɔ ko bɛ amɛteŋ ni nɔ ko he hiaa lɛ,+ ejaakɛ mɛi fɛɛ ni yɔɔ shikpɔji loo shĩai lɛ hɔ̃ɔ, ni amɛkɛ shika ni amɛnáa lɛ baa,
35 ni amɛkɛbashwieɔ bɔfoi lɛ anaji anaa.+ Ni ajaraa ahãa mɔ fɛɛ mɔ, bɔ ni he hiaa lɛ lɛ.+
36 No mli lɛ, Yosef, mɔ ni bɔfoi lɛ tsɛɔ lɛ Barnaba+ (ni eshishi ji, “Miishɛjemɔ Bi”) lɛ, ni eji Levinyo, ni ejɛ Kipro lɛ
37 yɛ shikpɔŋ ko, ni ehɔ̃ɔ ni ekɛ shika lɛ ba ni ekɛbashwie bɔfoi lɛ anaji anaa.+
Shishigbɛ Niŋmaa
^ Loo “amɛmiijaje gbohiiashitee lɛ, titri lɛ, Yesu nɔ lɛ, amɛmiitsɔɔ yɛ faŋŋ.”
^ Greek sht. ŋm., “koŋ lɛ yitso.”
^ Loo “mɛi ni ekaseko nii,” ni tsɔɔ akɛ, atsɔseko amɛ yɛ rabifoi askul ko kwraa mli; etsɔɔɔ akɛ amɛleee nikanemɔ kɛ niŋmaa.
^ Sanhedrin lɛ ji Yudafoi asaneyelihe wulu lɛ.
^ Kwɛmɔ Saji Krokomɛi A5 lɛ.
^ Loo “e-Kristo lɛ.”
^ Kwɛmɔ Saji Krokomɛi A5 lɛ.
^ Loo “amɛsɔle waa.”
^ Kwɛmɔ Wiemɔi Titrii Amligbalamɔ lɛ.
