Kojolɔi 12:1-15
12 Kɛkɛ ni abua Efraim hii lɛ anaa kɛkpe, ni amɛfoŋ kɛtee Zafon* ni amɛyakɛɛ Yefta akɛ: “Be ni ofoŋ kɛtee koni okɛ Amonbii lɛ ayawu lɛ, mɛni hewɔ otsɛɛɛ wɔ ni wɔkɛ bo aya lɛ?+ Wɔbaashã oshĩa lɛ wɔshwie onɔ.”
2 Shi Yefta kɛɛ amɛ akɛ: “Mikɛ mimaŋbii lɛ, wɔ kɛ Amonbii lɛ bé waa. Mitsɛ nyɛ, shi nyɛbahereee mi kɛjeee amɛdɛŋ.
3 Be ni mina akɛ nyɛbahereŋ mi lɛ, mikpɛ miyiŋ akɛ mikɛ miwala baawo oshãra mli* koni maya ni mikɛ Amonbii lɛ ayawu,+ ni Yehowa kɛ amɛ wo midɛŋ. No hewɔ lɛ, mɛni hewɔ nyɛba ŋmɛnɛ koni nyɛkɛ mi abawu lɛ?”
4 Kɛkɛ ni Yefta bua Gilead+ hii lɛ fɛɛ anaa, ni amɛkɛ Efraim yawu; Gilead hii lɛ ye Efraimbii ni kɛɔ akɛ: “Nyɛ Gileadbii ni yɔɔ Efraim kɛ Manase lɛ, ani jeee Efraim kobɔfoi ji nyɛ” lɛ, anɔ kunim.
5 Gileadbii lɛ tsɔ Efraimbii lɛ ahiɛ ni amɛyaŋɔ hei ni afoɔ Yordan lɛ yɛ lɛ;+ ni kɛ́ Efraim hii lɛ miitao amɛjo foi lɛ, amɛkɛɔ akɛ, “Hã mafo kɛya”; kɛkɛ lɛ Gilead hii lɛ ebi amɛteŋ mɔ fɛɛ mɔ akɛ, “Efraimnyo ji bo?” Kɛ́ mɔ lɛ kɛɛ “Dabi!” lɛ,
6 amɛkɛɔ mɔ lɛ akɛ, “Ofainɛ, kɛɛmɔ Shibolet.” Shi akɛni mɔ lɛ nyɛɛɛ etsɛ gbɛ́i nɛɛ jogbaŋŋ hewɔ lɛ, ekɛɔ moŋ akɛ, “Sibolet.” Kɛkɛ lɛ amɛmɔ lɛ amɛgbe lɛ yɛ he ni afoɔ Yordan lɛ yɛ lɛ. No hewɔ lɛ, amɛgbe Efraimbii 42,000 yɛ nakai beiaŋ.
7 Yefta kojo Israel afii ekpaa, ni Yefta, Gileadnyo lɛ gbo ni afu lɛ yɛ emaŋ lɛ mli yɛ Gilead.
8 Esɛɛ lɛ, Ibzan, ni jɛ Betlehem lɛ kojo Israel.+
9 Eyɛ bihii 30 kɛ biyei 30. Ekɛ ebiyei lɛ hã hii ni jɛɛɛ eweku lɛ mli lɛ gbãla, ni eyaŋɔ yei 30 kɛjɛ wekui krokomɛi amli ebahã ebihii lɛ gbãla. Ekojo Israel afii kpawo.
10 Ni Ibzan gbo ni afu lɛ yɛ Betlehem.
11 Esɛɛ lɛ, Elon, Zebulonnyo lɛ kojo Israel; ekojo Israel afii nyɔŋma.
12 Ni Elon, Zebulonnyo lɛ gbo, ni afu lɛ yɛ Ayalon yɛ Zebulon shikpɔŋ lɛ nɔ.
13 Esɛɛ lɛ, Abdon, ni ji Hilel, Piratonnyo lɛ binuu lɛ kojo Israel.
14 Eyɛ bihii 40 kɛ nabii hii 30 ni taraa tejii 70 nɔ. Ekojo Israel afii kpaanyɔ.
15 Ni Abdon, ni ji Hilel, Piratonnyo lɛ binuu lɛ gbo, ni afu lɛ yɛ Piraton yɛ Efraim shikpɔŋ lɛ nɔ yɛ Amalekbii+ lɛ agɔŋ lɛ nɔ.
Shishigbɛ Niŋmaa
^ Shishitsɔɔmɔi komɛi kɛɔ akɛ, “amɛfoŋ kɛtee kooyigbɛ.”
^ Loo “mikɛ misusuma baawo midɛŋ.”
