Kojolɔi 2:1-23
2 Ni Yehowa bɔfo+ lɛ kwɔ kɛjɛ Gilgal+ kɛtee Bokim ni ekɛɛ: “Miwó nyɛ kɛjɛ Ejipt ni mikɛ nyɛ tee shikpɔŋ ni mikã nyɛtsɛmɛi+ lɛ kitã yɛ he lɛ nɔ. Agbɛnɛ hu, mikɛɛ akɛ, ‘Mikuŋ mikpaŋmɔ ni mikɛ nyɛ ekpaŋ lɛ mli kɔkɔɔkɔ.+
2 Ni yɛ nyɛgbɛfaŋ lɛ, esaaa akɛ nyɛkɛ mɛi ni yɔɔ shikpɔŋ nɛɛ+ nɔ lɛ kpaŋɔ kpaŋmɔ ko, ni esa akɛ nyɛkumɔ amɛfɔleshaa latɛi lɛ nyɛshwie shi.’+ Shi nyɛbooo migbee toi.+ Mɛni hewɔ nyɛfee nakai?
3 Enɛ hewɔ ni mi hu mikɛɛ, ‘Mishwieŋ amɛ yɛ nyɛhiɛ,+ ni amɛbaatsɔ tsɔne amɛhã nyɛ,+ ni amɛnyɔŋmɔi lɛ baatsɔ nyɛ akpa’ lɛ.”+
4 Be ni Yehowa bɔfo lɛ wie wiemɔi nɛɛ etsɔɔ Israelbii lɛ fɛɛ lɛ, mɛi lɛ wo yara ni amɛbɔi yaafo.
5 No hewɔ lɛ, amɛwo jɛmɛ gbɛ́i akɛ Bokim,* ni amɛshã afɔle amɛhã Yehowa yɛ jɛmɛ.
6 Be ni Yoshua wo mɛi lɛ gbɛ lɛ, Israelbii lɛ ateŋ mɔ fɛɛ mɔ tee egboshinii lɛ mli koni eyaŋɔ shikpɔŋ lɛ.+
7 Mɛi lɛ tee nɔ amɛsɔmɔ Yehowa yɛ Yoshua wala beiaŋ fɛɛ kɛ onukpai ni hi shi yɛ Yoshua gbele sɛɛ ni na nitsumɔi wuji ni Yehowa tsu ehã Israel lɛ hu awala beiaŋ fɛɛ.+
8 Ni Yoshua, Yehowa tsulɔ lɛ, ni ji Nun bi lɛ gbo be ni eye afii 110.+
9 No hewɔ lɛ, amɛfu lɛ yɛ shikpɔŋ ni ji egboshinii lɛ nɔ, yɛ Timnat-heres,+ yɛ Efraim gɔji lɛ anɔ yɛ Gaash Gɔŋ lɛ kooyigbɛ.+
10 Ni nakai yinɔbii lɛ fɛɛ gboi,* ni yinɔ kroko ba ni leee Yehowa kɛ nitsumɔi ni etsu ehã Israel lɛ.
11 No hewɔ lɛ, Israelbii lɛ fee efɔŋ yɛ Yehowa hiɛ, ni amɛyasɔmɔ* Baal srɔtoi lɛ.+
12 Enɛ hã amɛje Yehowa, amɛtsɛmɛi lɛ a-Nyɔŋmɔ ni jie amɛ kɛje Ejipt shikpɔŋ lɛ nɔ lɛ sɛɛ.+ Ni amɛyanyiɛ nyɔŋmɔi krokomɛi, mɛi ni ebɔle amɛ kɛkpe lɛ anyɔŋmɔi lɛ asɛɛ,+ ni amɛkoto amɛ ni amɛtɔ̃ Yehowa nɔ.+
13 Amɛje Yehowa sɛɛ ni amɛyasɔmɔ Baal kɛ Ashtoret amagai lɛ.+
14 Enɛ hewɔ lɛ, Yehowa mli wo la ewo Israelbii lɛ, ni ehã mɛi baye amɛnɔ kunim ni amɛloo amɛnibii.+ Ehɔ̃ɔ amɛ ewo amɛhenyɛlɔi ni ebɔle amɛ lɛ adɛŋ,+ ni amɛnyɛɛɛ amɛdamɔ amɛhenyɛlɔi lɛ ahiɛ dɔŋŋ.+
15 Nɔ fɛɛ nɔ ni amɛbaafee lɛ,* Yehowa nine tsii yɛ amɛnɔ, ni amɛyeee omanye*+ tamɔ bɔ ni Yehowa ewie lɛ pɛpɛɛpɛ kɛ bɔ ni Yehowa ekã kitã lɛ pɛpɛɛpɛ,+ ni amɛhao waa.+
16 No hewɔ lɛ, Yehowa hãa amɛ kojolɔi ni hereɔ amɛ kɛjeɔ mɛi ni baloɔ amɛnibii lɛ adɛŋ.+
17 Shi amɛbooo kojolɔi lɛ po toi, shi moŋ, amɛyajá nyɔŋmɔi krokomɛi* ni amɛkoto amɛ. Amɛtsi amɛhe oya kɛje gbɛ ni amɛtsɛmɛi lɛ ni bo Yehowa kitãi lɛ toi lɛ nyiɛ nɔ lɛ nɔ.+ Amɛfeee tamɔ bɔ ni amɛtsɛmɛi lɛ fee lɛ.
18 Be fɛɛ be ni Yehowa baahã amɛ kojolɔi lɛ,+ Yehowa yeɔ ebuaa kojolɔ lɛ* ni ehereɔ amɛ kɛjeɔ amɛhenyɛlɔi lɛ adɛŋ gbii abɔ fɛɛ ni kojolɔ lɛ yɔɔ lɛ; ejaakɛ ŋtsɔi ni amɛdɔmɔɔ yɛ mɛi ni waa amɛ yi+ lɛ kɛ mɛi ni feɔ amɛ niseniianii lɛ ahewɔ lɛ hãa Yehowa musuŋ tsɔɔ lɛ+ yɛ amɛhewɔ.*
19 Shi kɛ́ kojolɔ lɛ gbo lɛ, amɛfiteɔ fe amɛtsɛmɛi lɛ ejaakɛ amɛkuɔ amɛsɛɛ amɛyanyiɛɔ nyɔŋmɔi krokomɛi asɛɛ, ni amɛsɔmɔɔ amɛ ni amɛkotoɔ amɛ.+ Amɛkpaaa amɛnifeemɔi lɛ kɛ nibii ni amɛfeɔ kɛtseɔ Nyɔŋmɔ hiɛ atua lɛ feemɔ.
20 Naagbee lɛ, Yehowa mli wo la ewo Israelbii lɛ,+ ni ekɛɛ akɛ: “Akɛni jeŋmaŋ nɛɛ eku mikpaŋmɔ+ ni mikɛ amɛtsɛmɛi lɛ kpaŋ lɛ mli, ni amɛbooo migbee toi+ hewɔ lɛ,
21 mi hu mishwieŋ jeŋmaji ni Yoshua shi yɛ esɛɛ be ni egbo lɛ ekome po yɛ amɛhiɛ.+
22 Koni mikɛka Israel makwɛ akɛ amɛbaanyiɛ Yehowa gbɛ lɛ nɔ+ ni amɛbo lɛ toi tamɔ bɔ ni amɛtsɛmɛi lɛ fee lɛ lo.”
23 No hewɔ lɛ, Yehowa hã jeŋmaji nɛɛ hi shi. Eshwieee amɛ oya, ni eŋɔɔɔ amɛ ewooo Yoshua dɛŋ hu.
Shishigbɛ Niŋmaa
^ Eshishi ji, “Yaafolɔi.”
^ Hebri sht. ŋm., “Abua nakai yinɔbii lɛ fɛɛ anaa afata amɛtsɛmɛi lɛ ahe.” Eji lalawiemɔ ni akɛtsuɔ nii kɛhãa gbele.
^ Loo “amɛyajá.”
^ Hebri sht. ŋm., “He fɛɛ he ni amɛbaaya lɛ.”
^ Loo “ni ekɛ hiɛkpatamɔ baa amɛnɔ.”
^ Loo “amɛkɛ nyɔŋmɔi krokomɛi yabɔ ajwamaŋ.”
^ Loo “hãa Yehowa shwaa ehe.”
^ Hebri sht. ŋm., “Yehowa fataa kojolɔ lɛ he.”
