Kojolɔi 21:1-25
-
Abaa Benyamin weku lɛ yi (1-25)
21 No mli lɛ, Israel hii lɛ ekã kitã yɛ Mizpa+ akɛ: “Wɔteŋ mɔ ko mɔ ko kɛ ebiyoo hãŋ nuu ko ni jɛ Benyamin akɛ eŋa.”+
2 No hewɔ lɛ, Israelbii lɛ ba Betel+ ni amɛbatara anɔkwa Nyɔŋmɔ lɛ hiɛ yɛ jɛmɛ kɛyashi gbɛkɛ, ni amɛwó amɛgbei anɔ ni amɛfó waa.
3 Ni amɛkɛɛ akɛ: “Ao, Yehowa, Israel Nyɔŋmɔ, mɛni hewɔ nɔ ko tamɔ nɛkɛ eba Israel nɔ? Mɛni hewɔ esa akɛ weku kome alaaje yɛ Israel ŋmɛnɛ?”
4 Ni enɔ jetsɛremɔ lɛ, Israelbii lɛ te shi leebi maŋkpa ni amɛma afɔleshaa latɛ yɛ jɛmɛ koni amɛshã shãa afɔlei kɛ naanyobɔɔ afɔlei.+
5 Kɛkɛ ni Israelbii lɛ kɛɛ akɛ: “Yɛ Israel wekui lɛ fɛɛ amli lɛ, namɔ ekwɔɔɔ kɛbaaa ni ebadamɔ Yehowa hiɛ?” Ejaakɛ amɛkã kitã akɛ, mɔ fɛɛ mɔ ni ekwɔɔɔ kɛbaaa Yehowa hiɛ yɛ Mizpa lɛ, gbe aaagbe lɛ.
6 No hewɔ lɛ, Israelbii lɛ werɛ ho amɛhe yɛ nɔ ni eba amɛnyɛmi* Benyamin nɔ lɛ hewɔ. Amɛkɛɛ akɛ: “Ŋmɛnɛ lɛ, afo weku kome kɛje Israel he ashɛ afɔ̃.
7 Akɛni wɔkã Yehowa kitã+ akɛ wɔkɛ wɔbiyei hãŋ amɛ akɛ amɛŋamɛi hewɔ lɛ, mɛni esa akɛ wɔfee koni wɔná ŋamɛi wɔhã mɛi ni eshwɛ lɛ?”+
8 Amɛbi akɛ: “Israel wekui lɛ ateŋ namɔ ekwɔɔɔ kɛbaaa Yehowa hiɛ yɛ Mizpa?”+ Ni ana akɛ mɔ ko mɔ ko jɛɛɛ Yabesh-gilead ebafataaa asafo lɛ he yɛ nsara lɛ mli.
9 Be ni akane mɛi lɛ, amɛna akɛ mɛi ni jɛ Yabesh-gilead lɛ ateŋ mɔ ko mɔ ko bɛ jɛmɛ.
10 No hewɔ lɛ, Israel asafo lɛ tsu hii kãkãlɔi lɛ ateŋ mɛi 12,000 kɛtee jɛmɛ. Amɛfã amɛ akɛ: “Nyɛyaa ni nyɛkɛ klante ayagbea mɛi ni yɔɔ Yabesh-gilead lɛ, yei kɛ gbekɛbii fɛɛ.+
11 Nɔ ni esa akɛ nyɛfee nɛ: Nyɛkpãtãa hii lɛ fɛɛ ahiɛ, ni nyɛkpãtãa yoo fɛɛ yoo hu ni kɛ nuu ená bɔlɛ pɛŋ lɛ hiɛ.”
12 Amɛná yei 400, ni ji oblayei froi ni kɛ nuu náko bɔlɛ pɛŋ yɛ mɛi ni yɔɔ Yabesh-gilead lɛ ateŋ. No hewɔ lɛ, amɛkɛ amɛ ba nsara lɛ mli yɛ Shilo+ yɛ Kanaan shikpɔŋ lɛ nɔ.
13 Kɛkɛ ni Israel asafo lɛ fɛɛ tsu ni akɛ shɛɛ yahã Benyaminbii ni yɔɔ Rimon tɛsaa+ lɛ nɔ lɛ, ni amɛkɛ amɛ kpãtã.*
14 No hewɔ lɛ, Benyamin ku sɛɛ eba yɛ nakai beiaŋ. Amɛkɛ yei ni amɛbaa amɛyi yɛ Yabesh-gilead yei lɛ ateŋ lɛ hã amɛ,+ shi amɛyi fa fe yei lɛ.
15 Ni Israelbii lɛ werɛ ho amɛhe yɛ nɔ ni eba Benyamin nɔ lɛ hewɔ,+ ejaakɛ Yehowa kɛ mligbalamɔ eba Israel wekui lɛ ateŋ.
16 Israel asafo lɛ mli onukpai lɛ bi akɛ: “Akɛni akpãtã yei fɛɛ ni yɔɔ Benyamin lɛ ahiɛ lɛ hewɔ lɛ, mɛni esa akɛ wɔfee koni wɔná ŋamɛi wɔhã hii ni eshwɛ lɛ?”
17 Amɛhã hetoo akɛ: “Esa akɛ Benyaminbii ni eshwɛ lɛ aná gboshinii, bɔ ni afee ni weku ko akalaaje yɛ Israel.
18 Shi aŋmɛŋ wɔ gbɛ ni wɔkɛ wɔbiyei lɛ ahã amɛ akɛ ŋamɛi, ejaakɛ Israelbii lɛ ekã kitã akɛ: ‘Alomɔ mɔ fɛɛ mɔ ni kɛ yoo ko hãa Benyamin akɛ eŋa lɛ.’”+
19 Kɛkɛ ni amɛkɛɛ: “Naa! Daa afi lɛ, ayeɔ gbi jurɔ ahãa Yehowa yɛ Shilo,+ ni kã Betel kooyigbɛ, yɛ gbɛjegbɛ ni kwɔɔ kɛjɛɔ Betel kɛyaa Shekem lɛ bokãgbɛ, kɛ Lebona wuoyigbɛ lɛ.”
20 No hewɔ lɛ, amɛfã Benyamin hii lɛ akɛ: “Nyɛyaa ni nyɛyatea yɛ wain ŋmɔji lɛ amli.
21 Ni kɛ́ nyɛna akɛ Shilo oblayei* lɛ eje kpo kɛmiiba amɛbafata mɛi ni joɔ kɛbɔleɔ lɛ ahe lɛ, nyɛteŋ mɔ fɛɛ mɔ afãa kpo kɛjɛa wain ŋmɔji lɛ amli ni emɔ Shilo oblayei lɛ ateŋ mɔ ko akɛ eŋa, koni nyɛku nyɛsɛɛ kɛya Benyamin shikpɔŋ lɛ nɔ.
22 Ni kɛ́ amɛtsɛmɛi loo amɛnyɛmimɛi hii lɛ ba amɛbawie amɛshi wɔ lɛ, wɔbaakɛɛ amɛ akɛ, ‘Nyɛnaa wɔ mɔbɔ yɛ amɛhewɔ, ejaakɛ wɔnáaa ŋamɛi wɔhã amɛteŋ mɔ fɛɛ mɔ yɛ ta lɛ mli,+ ni agbɛnɛ hu akɛni jeee nyɛ diɛŋtsɛ nyɛjɛ nyɛsuɔmɔ mli nyɛhã amɛ ŋamɛi hewɔ lɛ, nyɛyeee fɔ.’”+
23 No hewɔ lɛ, Benyamin hii lɛ fee nakai pɛpɛɛpɛ, ni amɛteŋ mɔ fɛɛ mɔ yamɔ ŋa kɛjɛ yei ni joɔ lɛ ateŋ kɛtee. No sɛɛ lɛ, amɛku amɛsɛɛ kɛtee amɛshikpɔŋ lɛ nɔ* ni amɛyatswa amɛmaji lɛ ekoŋŋ+ ni amɛhi mli.
24 Ni Israelbii lɛ shi jɛmɛ amɛtee yɛ nakai beiaŋ, amɛteŋ mɔ fɛɛ mɔ tee eweku kɛ eshĩa mli, amɛshi jɛmɛ, ni amɛteŋ mɔ fɛɛ mɔ tee eshikpɔŋ nɔ.*
25 Nakai beiaŋ lɛ, abɛ maŋtsɛ ko yɛ Israel.+ Mɔ fɛɛ mɔ feɔ nɔ ni esusuɔ akɛ eja.*
Shishigbɛ Niŋmaa
^ Loo “amɛnyɛmi nuu.”
^ Hebri sht. ŋm., “ni amɛhã amɛ toiŋjɔlɛ.”
^ Hebri sht. ŋm., “biyei.”
^ Loo “amɛgboshinii lɛ mli.”
^ Loo “egboshinii lɛ mli.”
^ Loo “nɔ ni sa yɛ lɛ diɛŋtsɛ ehiɛ.”
